ເຈົ້າໜ້າທີ່ແຂວງບໍລິຄຳໄຊ ລົງກວດສິນຄ້າທີ່ຫ້າມນຳເຂົ້າປະເພດ: ຊີ້ນສ່ວນສັດ, ເຄື່ອງໃນສັດ, ຊີ້ນສ່ວນໄກ່ປອກ ແລະ ອາຫານທະເລຈຳນວນໜຶ່ງທີ່ໝົດອາຍຸການບໍລິໂພກ, ເຊື່ອມຄຸນ

ເພື່ອເປັນການສະກັດກັ້ນ,ປົກປ້ອງຜູ້ບໍລິໂພກ ແລະ ຕ້ານການເອົາລັດເອົາປຽບຂອງຜູ້ຊື້ ແລະ ຜູ້ຂາຍໃນໄລຍະປີໃໝ່ສາກົນ; ດັ່ງນັ້ນ ໃນລະຫວ່າງວັນທີ 18-23 ທັນວານີ້ ເຈົ້າໜ້າທີ່ກວດກາສິນຄ້າ, ພະແນກອຸດສາຫະກຳ ແລະ ການຄ້າແຂວງ, ເມືອງປາກຊັນ ໄດ້ລົງເຄື່ອນໄຫວກວດກາສິນຄ້າຢູ່ບັນດາຫ້າງຮ້ານຕ່າງໆໃນເທດສະບານເມືອງປາກຊັນ ແຂວງບໍລິຄຳໄຊ ເຊັ່ນ: ຢູ່ຕະຫຼາດປາກຊັນໃໝ່, ຕະຫຼາດປາກຊັນເກົ່າ ແລະບັນດາຫ້າງຮ້ານຂາຍເຄື່ອງຍ່ອຍທົ່ວໄປພາຍໃນຕົວເມືອງປາກຊັນ.


ຜ່ານການລົງເຄື່ອນໄຫວຂອງເຈົ້າໜ້າທີ່ສາມາດກວດພົບເຫັນສິນຄ້າຫ້າມນຳເຂົ້າປະເພດ: ຊີ້ນສ່ວນສັດ, ເຄື່ອງໃນສັດ, ຊີ້ນສ່ວນໄກ່ປອກ ແລະ ອາຫານທະເລຈຳນວນໜຶ່ງທີ່ໝົດອາຍຸການບໍລິໂພກ, ເຊື່ອມຄຸນ ແລະ ບໍ່ມີກາເຄື່ອງໝາຍ ອຢ. ນອກນີ້ຍັງສາມາດກວດກາພົບເຫັນສິນຄ້າປະເພດ: ນົມ, ເຂົ້າໜົມ, ໝີ່ສຳເລັດຮູບ ແລະ ເຄື່ອງອຸປະໂພກ-ບໍລິໂພກຈຳນວນໜຶ່ງ ທີ່ໝົດອາຍຸການນຳໃຊ້ທີ່ວາງຂາຍຢູ່ບັນດາຮ້ານຕ່າງໆໃນເທດສະບານເມືອງ.
ພ້ອມນີ້ຄະນະກວດກາສິນຄ້າຍັງໄດ້ກວດກາຊີງຊັງ, ລາຄາສິນຄ້າ ເພື່ອບໍ່ໃຫ້ແມ່ຄ້າຊາວຂາຍສວຍໂອກາດຂຶ້ນລາຄາ ໃນຊ່ວງປີໃໝ່ສາກົນ 2018 ນີ້.

ສຳລັບສິນຄ້າທີ່ໝົດອາຍຸການນຳໃຊ້ໃນການກວດພົບເຫັນຂອງເຈົ້າໜ້າທີ່ໃນຄັ້ງນີ້ແມ່ນໄດ້ຍຶດເອົາມາໄວ້ຢູ່ຫ້ອງການອຸດສາຫະກຳ ແລະການຄ້າເມືອງປາກຊັນ ເພື່ອເອົາໄປທຳລາຍຖິ້ມ,ສ່ວນແມ່ຄ້າຊາວຂາຍຜູ້ທີ່ກະທຳຜິດເຈົ້າໜ້າທີ່ໄດ້ກ່າວເຕືອນ, ສຶກສາອົບຮົມ,ເຮັດບົດບັນທຶກ ແລະ ໃຊ້ມາດຕະການປັບໃໝຕາມລະບຽບກົດໝາຍ.

ຂ່າວ: ເສດຖະກິດການຄ້າ

ປກສ ແຂວງຄໍາມ່ວນ ຢຶດຢາບ້າເກືອບ 31.000 ເມັດ

ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຄຳມ່ວນ ໄດ້ກັກຕົວທ້າວ ວັນພິລາ ອາຍຸ 28 ປີ ຢູ່ບ້ານຫາດຊຽງດີ ເມືອງໜອງບົກ ແຂວງຄຳມ່ວນ ໃນວັນທີ 16 ທັນວາ 2017 ໃນຂະນະທີ່ເອົາຢາບ້າໄປສົ່ງໃຫ້ຜູ້ສັ່ງຊື້ ຄື ໂຊເຟີຂັບລົດຫີນກາວ ຢູ່ຂອບເຂດໂຮງງານຊີມັງ ບ້ານນາຄຳ ເມືອງມະຫາໄຊ ແຂວງຄຳມ່ວນ ພ້ອມທັງຢຶດຢາບ້າ ຈຳນວນ 31.928 ເມັດ ໄປດໍາເນີນການສືບສວນ-ສອບສວນຂະຫຍາຍຜົນຫາຜູ້ຮ່ວມຂະບວນການນໍາກັນ.

ເຈົ້າໜ້າທີ່ຕໍາຫຼວດວິຊາສະເພາະ ປກສ ແຂວງຄຳມ່ວນ ໃຫ້ຮູ້ວ່າ: ພາຍຫຼັງໄດ້ສືບຮູ້ວ່າ ໃນວັນທີ 16 ທັນວາ 2017, ທ້າວ ວັນພິລາ ຈະລັກລອບເຄື່ອນໄຫວເອົາຢາບ້າຈໍານວນຫຼາຍໄປສົ່ງໃຫ້ຜູ້ສັ່ງຊື້ ຢູ່ເຂດໂຮງງານຊີມັງ ບ້ານນາຄຳ ເມືອງມະຫາໄຊ ແຂວງຄຳມ່ວນ; ດັ່ງນັ້ນ, ເຈົ້າໜ້າທີ່ວິຊາສະເພາະ ຈຶ່ງໄດ້ວາງແຜນການສະກັດກັ້ນ ແລະ ຕິດຕາມກວດກາເປົ້າໝາຍຢູ່ຈຸດດັ່ງກ່າວ. ມາຮອດເວລາ 11:00 ໂມງ ຂອງວັນດຽວກັນ ຈຶ່ງໄດ້ພົບເຫັນເປົ້າໝາຍກໍາລັງເອົາຢາບ້າຍື່ນໃຫ້ກັນ ຈຶ່ງເຂົ້າຈັບກຸມ ແຕ່ຈັບຕົວໄດ້ແຕ່ທ້າວ ວັນພິລາ ສ່ວນຜູ້ສັ່ງຊື້ເອົາຕົວລົບໜີໄປໄດ້.

ຜ່ານການສືບສວນ-ສອບສວນເບື້ອງຕົ້ນ, ທ້າວ ວັນພິລາ ຮັບສາລະພາບວ່າ: ຢາບ້າຈຳນວນດັ່ງກ່າວ ບໍ່ແມ່ນຂອງຜູ້ກ່ຽວ ພຽງແຕ່ຮັບຈ້າງໄປສົ່ງໃຫ້ນາຍໜ້າ ເພື່ອເອົາໄປສົ່ງໃຫ້ໂຊເຟີຂັບລົດຫີນກາວ ທີ່ອອກປະເທດເພື່ອນບ້ານ ໃນຂະນະທີ່ກໍາລັງສົ່ງໃຫ້ກັນ ມີເຈົ້າໜ້າທີ່ຕໍາຫຼວດເຂົ້າຈັບຕົວກ່ອນພ້ອມຂອງກາງຈໍານວນດັ່ງກ່າວ. ປະຈຸບັນ, ເຈົ້າໜ້າທີ່ກຳລັງດຳເນີນການສືບສວນ-ສອບສວນຂະຫຍາຍຜົນຫາຜູ້ຮ່ວມຂະບວນການກະທຳຜິດຄັ້ງນີ້ ມາດຳເນີນຄະດີຕາມກົດໝາຍ.

© LSecurityNews

ໄວລຸ້ນຄະນອງ ມາຖາມຊື້ໄກ່ ບໍ່ຂາຍໃຫ້ ໃຊ້ປືນຍິງຂູ່

ຄະດີໄວລຸ້ນປະມານ 3-4 ຄົນ ໄປຖາມຊື້ໄກ່ນໍາຜູ້ເຖົ້າຄົນໜຶ່ງ ເຝົ້າສວນຢູ່ເຂດຕາດມູນ ເມືອງສີໂຄດຕະບອງ ນະຄອນຫຼວງວຽງຈັນ ແຕ່ເຈົ້າຂອງໄກ່ປະຕິເສດບໍ່ຂາຍ ເຮັດໃຫ້ພວກກ່ຽວໃຈຮ້າຍ ຈົກເອົາປືນອອກມາຍິງນາບຂູ່ແລ້ວໜີໄປ ໃນເດືອນກໍລະກົດ 2017. ຈາກນັ້ນ, ເຈົ້າຂອງໄກ່ຈຶ່ງເຂົ້າແຈ້ງຄວາມຕໍ່ເຈົ້າໜ້າທີ່ຕໍາຫຼວດກອງຄະດີ ປກສ ເມືອງສີໂຄດຕະບອງ ເພື່ອຕິດຕາມໄປດໍາເນີນຄະດີຕາມກົດໝາຍ ເພື່ອບໍ່ໃຫ້ໄປກະທໍາກັບຄົນອື່ນອີກ.

ຜ່ານການຕິດຕາມຕົວຂອງເຈົ້າໜ້າທີ່ຕໍາຫຼວດ ກອງບັນຊາການ ປກສ ເມືອງສີໂຄດຕະບອງ ມາຮອດທ້າຍເດືອນສິງຫາ 2017 ຈຶ່ງສາມາດຈັບຕົວຜູ້ກໍ່ເຫດໄດ້ຊື່ທ້າວ ບຸນທະວີ ຫຼື ໂກ ອາຍຸ 25 ປີ ຢູ່ບ້ານຕາດທອງ ເມືອງສີໂຄດຕະບອງ ນະຄອນຫຼວງວຽງຈັນ ເຊິ່ງເປັນລູກຊາຍເຈົ້າຂອງສວນ ພ້ອມໝູ່ຊື່ທ້າວ ວິສະນຸ ຫຼື ມັດ ອາຍຸ 25 ປີ ຢູ່ບ້ານສີໄຄທົ່ງ ເມືອງສີໂຄດຕະບອງ ແລະ ທ້າວ ບຸນມີ ອາຍຸ 30 ປີ ພັກເຊົາຢູ່ບ້ານຕາດທອງ ເມືອງສີໂຄດຕະບອງ ພ້ອມອາວຸດປືນສັ້ນກັບລູກກະສຸນ 37 ລູກ ແລະ ປືນອາກາ 1 ກະບອກ ພ້ອມລູກກະສຸນ 4 ລູກ ໄປດໍາເນີນການສືບສວນ-ສອບສວນຫາທີ່ມາການຄອບຄອງປືນດັ່ງກ່າວ.

ມາຮອດວັນທີ 15 ທັນວາ 2017, ເຈົ້າໜ້າທີ່ຕໍາຫຼວດວິຊາສະເພາະ ປກສ ເມືອງສີໂຄດຕະບອງ ເປີດເຜີຍຜົນການສືບສວນ-ສອບສວນກ່ຽວກັບທີ່ມາຂອງວຸດປືນດັ່ງກ່າວວ່າ: ເບື້ອງຕົ້ນທ້າວ ບຸນທະວີ ກັບ ທ້າວ ວິສະນຸ ພ້ອມໝູ່ອີກຈຳນວນໜຶ່ງໄດ້ໄປຫຼິ້ນສວນຂອງທ້າວ ບຸນທະວີ ໂດຍມີຜູ້ເຖົ້ານອນເຝົ້າປະຈຳຢູ່ສວນ. ເມື່ອໄປຮອດສວນ ທ້າວ ບຸນທະວີ ໄດ້ຖາມຊື້ໄກ່ນໍາພໍ່ຕູ້ເຝົ້າສວນຄົນດັ່ງກ່າວເພື່ອມາຕົ້ມກິນ ແຕ່ພໍ່ຕູ້ໄດ້ຕອບປະຕິເສດວ່າບໍ່ຂາຍ. ຈາກນັ້ນ, ທ້າວ ບຸນທະວີ ໄດ້ເກີດຄວາມໂມໂຫ ໂດຍອ້າງວ່າເປັນສວນຂອງພໍ່ຜູ້ກ່ຽວເປັນຫຍັງຄືບໍ່ຂາຍໄກ່ໃຫ້. ຈາກນັ້ນ, ຈຶ່ງຈົກເອົາປືນສັ້ນອອກມາຂົ່ມຂູ່ ໃນຂະນະນັ້ນຜູ້ເຖົ້າໄດ້ເຂົ້າໄປພະຍາຍາມຍາດເອົາປືນສັ້ນ ແຕ່ທ້າວ ບຸນທະວີ ໄດ້ຍິງປືນຂຶ້ນຟ້າ 1 ນັດ ຜູ້ເຖົ້າແລ່ນໜີໄປ ແລະ ແຈ້ງຕໍ່ອຳນາດການປົກຄອງບ້ານ. ມາຮອດວັນທີ 15 ສິງຫາ 2017 ຈຶ່ງໄດ້ກັກຕົວ ທ້າວ ວິສະນຸ ແລະ ຕິດຕາມກັກຕົວທ້າວ ບຸນທະວີ ແລະ ທ້າວ ບຸນມີ ພ້ອມຂອງກາງອາວຸດເສິກ ປືນສັ້ນທີ່ໃຊ້ກໍ່ເຫດ ແລະ ປືນອາກາທ້າຍພັບພ້ອມລູກ 4 ລູກ.

ທ້າວ ບຸນທະວີ ໄດ້ສາລະພາບວ່າ: ປືນທີ່ກໍ່ເຫດໃນຄັ້ງນີ້ ແມ່ນໄດ້ຕິດຕໍ່ຊື້ທາງສື່ອອນລາຍ (Facebook) ໂດຍນັດຈຸດຊື້-ຂາຍຢູ່ຕາມສະຖານທີ່ບັນເທີງຕ່າງໆຜ່ານມາ ເຊິ່ງໄດ້ຊື້-ຂາຍມາແລ້ວ ຈຳນວນ 3 ຄັ້ງ ໃນລາຄາລະ 20.000-25.000 ບາດ ແລ້ວນຳໄປຂາຍຕໍ່ໃຫ້ກັບພັກພວກທີ່ຮ່ວມຄ້າຂາຍນຳກັນ ໃນລາຄາ 75.000 ບາດ, ເງິນທີ່ໄດ້ມາແຕ່ລະຄັ້ງແມ່ນເອົາໄປໃຊ້ຈ່າຍຫຼິ້ນກິນໝົດ.

ທ້າວ ວິສະນຸ ສາລະພາບຕໍ່ເຈົ້າໜ້າທີ່ວ່າ: ໄດ້ຮ່ວມເຄື່ອນໄຫວຊື້ປືນມາຂາຍນຳທ້າວ ບຸນທະວີ ແລະ ຊື້ປືນອາກາທ້າຍພັບ ພ້ອມທັງລູກປືນຈຳນວນໜຶ່ງນຳທ້າວ ພອນວິໄລ ໃນລາຄາ 3.800.000 ກີບ ແຕ່ປືນອາກາແມ່ນບໍ່ທັນໄດ້ຂາຍ ເຊິ່ງໃຫ້ທ້າວ ບຸນມີ ເກັບຮັກສາໄວ້ ເພາະວ່າທ້າວ ບຸນມີ ຈະຂັບລົດເດີນທາງໄກ, ມາວັນທີ 15 ສິງຫາ ຖືກເຈົ້າໜ້າທີ່ກັກຕົວ.

ສ່ວນທ້າວ ບຸນມີ ສາລະພາບວ່າ: ເຄີຍຖືກເຈົ້າໜ້າທີ່ກັກຕົວ ໃນປີ 2006 ທີ່ແຂວງອັດຕະປື ຂໍ້ຫາອາລະວາດ ສ້າງຄວາມບໍ່ສະຫງົບສຸກໃຫ້ສັງຄົມ ຖືກດຳເນີນຄະດີເປັນເວລາ 4 ເດືອນ, ພາຍຫຼັງພົ້ນໂທດອອກມາ ກໍໄດ້ກັບມາຂັບລົດຂົນສົ່ງສິນຄ້າໃຫ້ຮ້ານຂາຍເຄື່ອງຢູ່ເຂດເມືອງສີໂຄດຕະບອງ ຮອດປີ 2017 ຈຶ່ງໄດ້ຕິດຕໍ່ຊື້ປືນນຳທ້າວ ບຸນທະວີ ແລະ ທ້າວ ວິສຸນະ ຈຳນວນ 1 ກະບອກ ເປັນປືນສັ້ນ ສີດຳ ບໍ່ຮູ້ຊະນິດ, ນັບແຕ່ນັ້ນມາໄດ້ມີພົວພັນກັນສະໜິດແໜ້ນກວ່າເກົ່າ ໃນເວລານັດພົບກັນແມ່ນເລົ່າເລື່ອງປືນແຕ່ລະຊະນິດໃຫ້ກັນຟັງ ໃນເດືອນກໍລະກົດ 2017 ທ້າວ ວິສະນຸ ໄດ້ນຳເອົາປືນອາກາຊະນິດທ້າຍພັບ ພ້ອມກັບລູກຈຳນວນໜຶ່ງມາໃຫ້ຮັກສາໄວ້, ຈາກນັ້ນ ໄດ້ເອົາປືນດັ່ງກ່າວ ຕິດລົດບັນທຸກໄປແຂວງຈຳປາສັກ ແລະ ໄດ້ແວ່ຍິງຫຼິ້ນຕາມທາງທີ່ເປັນບ່ອນນອນຈຸດພັກລົດ, ພໍກັບຄືນຮອດນະຄອນຫຼວງວຽງຈັນ ວັນທີ 31 ສິງຫາ 2017 ຈຶ່ງຖືກເຈົ້າໜ້າທີ່ກັກຕົວພ້ອມກັບປືນອາກາ ແລະ ລູກປືນ 4 ລູກ ມາດຳເນີນຄະດີ.

ສ່ວນທ້າວ ພອນວິໄລ ແມ່ນໄດ້ຖືກເຈົ້າໜ້າທີ່ ປກສ ເມືອງໄຊທານີ ກັກຕົວພ້ອມຂອງກາງອາວຸດເສິກ ປືນສັ້ນ 3 ກະບອກ.

© LSecurityNews

ເຜີຍຄະດີຄາດຕະກໍາຜົວແຍກຊີ້ນສ່ວນ ຢູ່ບ້ານໂຄກສະອາດ

ເຈົ້າໜ້າທີ່ຕໍາຫຼວດສືບສວນ-ສອບສວນຄະດີອາຍາ ປກສ ເມືອງໄຊທານີ ນະຄອນຫຼວງວຽງຈັນ ໃຫ້ຄວາມກະຈ່າງ ແຈ້ງຄະດີຄາດຕະກໍາຜົວ ຊື່ທ້າວ ກາ ອາຍຸ 41 ປີ ຢູ່ຕູບນ້ອຍ ບ້ານໂຄກສະອາດ ເມືອງໄຊທານີ ນະຄອນຫຼວງວຽງຈັນ ໃນຕົ້ນເດືອນທັນວາ 2017 ແລ້ວຕັດແຍກຊິ້ນສ່ວນເຊັ່ນ: ຟັນຄໍ, ຟັນແຂນ, ຟັນຂາ ແລະ ອະໄວຍະວະເພດ ຍ້ອນຄວາມຫຶງຫວງ, ໃຈຮ້າຍແຮງສືບເນື່ອງມາຈາກທັງສອງຜິດຖຽງກັນເປັນປະຈໍາໃນໄລຍະຜ່ານມາ, ເຊິ່ງຜູ້ເສຍຊີວິດເປັນຜົວຜູ້ທີ 2 ທີ່ຜູ້ຄາດຕະກອນລາຍນີ້ກໍ່ເຫດລັກສະນະເກົ່າພາຍຫຼັງພົ້ນໂທດຈາກຄະດີຂ້າຜົວກ່ອນ.

ເຈົ້າໜ້າທີ່ຕໍາຫຼວດສືບສວນ-ສອບສວນຄະດີອາຍາ ປກສ ເມືອງໄຊທານີ ເປີດເຜີຍຕໍ່ນັກຂ່າວໜັງສືພິມຄວາມສະຫງົບ ໃນອາທິດຜ່ານມາວ່າ: ຄາດຕະກອນລາຍນີ້ ຊື່ນາງ ບົວສອນ ຫຼື ເກສອນ ຊື່ຫຼິ້ນ (ສອນ) ອາຍຸ 48 ປີ ຢູ່ບ້ານໂຄກສະອາດ ເມືອງໄຊທານີ ນະຄອນຫຼວງວຽງຈັນ ເຊິ່ງຜູ້ກ່ຽວບໍ່ໄດ້ເປັນບ້າ ແລະ ເສຍຈິດຕາມຂ່າວລືແຕ່ຢ່າງໃດ, ຜູ້ກ່ຽວມີສະຕິສົມບູນດີ, ການກະທໍາແມ່ນຄົບ 4 ອົງປະກອບຂອງການກະທໍາຜິດທາງອາຍາ. ພາຍຫຼັງຜູ້ກ່ຽວຄາດຕະກໍາຜົວແລ້ວແມ່ນໄດ້ດື່ມເຫຼົ້າຈົນມຶນເມົາເຮັດໃຫ້ຂາດສະຕິ.

ນາງ ບົວສອນ ຫຼື ເກສອນ ຊື່ຫຼິ້ນ ສອນ ສາລະພາບວ່າ: ໃນໄລຍະປີ 1990 ຜູ້ກ່ຽວໄດ້ສ້າງຄອບຄົວກັບທ້າວ ທິນ ສັນຊາດໄທ ໄດ້ມາຢູ່ນໍາກັນທີ່ບ້ານໂຄກສະອາດ ເມືອງໄຊທານີ ເຊິ່ງໄດ້ມີລູກຮ່ວມກັນ 3 ຄົນ, ຍິງ 1 ຄົນ ຜ່ານການໃຊ້ຊີວິດຢູ່ຮ່ວມກັນມາໄດ້ໄລຍະໜຶ່ງທັງສອງແມ່ນມີຄວາມບໍ່ເຂົ້າໃຈກັນ ໄດ້ມີການຜິດຖຽງກັນເລື້ອຍໆມາເຖິງຂັ້ນຢ່າຮ້າງກັນ. ສ່ວນທ້າວ ທິນ ແມ່ນໄດ້ກັບຄືນປະເທດໄທ. ຕໍ່ມາຮອດໄລຍະຕົ້ນປີ 2011, ຜູ້ກ່ຽວຈຶ່ງຮູ້ຈັກກັບທ້າວ ຜູ ຢູ່ບ້ານນາໂນ ເມືອງໄຊເສດຖາ ນະຄອນຫຼວງວຽງຈັນ ແລ້ວຕົກລົງປົງໃຈມັກຮັກຢູ່ກິນນໍາກັນແບບຜົວເມຍ ແຕ່ບໍ່ມີລູກນຳກັນ. ເຊິ່ງໃນໄລຍະທີ່ຢູ່ນໍາກັນມານັ້ນແມ່ນໄດ້ມີການຜິດຖຽງກັນມາຕະຫຼອດ ສາເຫດແມ່ນທ້າວ ຜູ ໄດ້ເສບຢາບ້າຈົນມຶນເມົາແລ້ວອາລະວາດຄອບຄົວ ໂດຍໄດ້ທຸບຕີມາຕະຫຼອດແຕ່ກໍຕ້ອງອົດທົນຢູ່ຮ່ວມກັນເລື້ອຍມາ.

ມາຮອດເວລາ 19 ໂມງ ວັນທີ 20 ພະຈິກ 2011 ຈຶ່ງໄດ້ມີການຜິດຖຽງກັນອີກ ສາເຫດແມ່ນຍ້ອນທ້າວ ຜູ ເມົາເຫຼົ້າ ແລະ ຢາບ້າ ໄດ້ມີປາກສຽງກັນຫຼາຍຢ່າງຈົນເຖິງຂັ້ນລົງມືທໍາຮ້າຍຮ່າງກາຍກັນ, ຫຼັງຈາກນັ້ນ ຜູ້ກ່ຽວໄດ້ຕໍ່ສູ້ຄືນ, ເຊິ່ງໄດ້ຈັບເອົາພ້າຂໍທີ່ວາງຢູ່ຂ້າງບ່ອນນອນແລ້ວຟັນຄໍທ້າວ ຜູ (ຜູ້ເປັນຜົວ) ແລ້ວຍາດພີ່ນ້ອງນໍາສົ່ງໂຮງໝໍແລ້ວເສຍຊີວິດເວລາຕໍ່ມາ. ຈາກນັ້ນ, ຜູ້ກ່ຽວຈຶ່ງໄດ້ເຂົ້າມາມອບໂຕຕໍ່ການຈັດຕັ້ງບ້ານໂຄກສະອາດ ແລ້ວການຈັດຕັ້ງບ້ານໄດ້ໃຫ້ ກອງຄະດີເມືອງໄຊທານີ ໂດຍຖືກສານອາຍາຂັ້ນຕົ້ນນະຄອນຫຼວງວຽງຈັນ ຕັດອິດສາລະພາບ 3 ປີ ກັບ 6 ເດືອນ ສະຖານທໍາຮ້າຍຮ່າງກາຍຜູ້ອື່ນຈົນເຖິງຂັ້ນເສຍຊີວິດ.

ພາຍຫຼັງພົ້ນໂທດອອກມາໃຊ້ຊີວິດຢູກັບຄອບຄົວ ມາຮອດເດືອນກໍລະກົດ 2015 ຈຶ່ງໄດ້ມັກຮັກຢູ່ກິນຮ່ວມກັນແບບຜົວເມຍກັບທ້າວ ກາ ( ຜູ້ເສຍຊີວິດ ) ບ້ານໂຄກສະອາດ ແບບຜົວເມຍ, ແຕ່ບໍ່ໄດ້ຈົດທະບຽນສົມລົດຢ່າງຖືກຕ້ອງຕາມກົດໝາຍ. ຈາກນັ້ນ, ພວກກ່ຽວຈຶ່ງພາກັນມາປຸກຕູບຢູ່ດິນສະຫງວນຂອງບ້ານໂຄກສະອາດ ເມືອງໄຊທານີ ແຕ່ກໍບໍ່ມີລູກ.

ໃນໄລຍະທີ່ໄດ້ຢູ່ນໍາກັນມານັ້ນ ພວກກ່ຽວແມ່ນໄດ້ດື່ມເຫຼົ້າເປັນອາຈິນ ແລະ ໄດ້ມີການຜິດຖຽງກັນເລື້ອຍມາ, ບາງຄັ້ງ ເຖິງຂັ້ນລົງມືຕີກັນແຕ່ກໍບໍ່ຮຸນແຮງ. ເຊິ່ງສາເຫດທີ່ຜິດກັນແຕ່ລະຄັ້ງຍ້ອນທ້າວ ກາ ເວົ້າປາຊົດໃສ່ວ່າ: ມີຜູ້ສາວ ແລ້ວຈະໄປຢູ່ນໍາກັນ, ຜູ້ກ່ຽວຈຶ່ງໄດ້ມີການຫຶງຫວງມີການລະແວງສົງໃສແລ້ວຈຶ່ງມີການຜິດຖຽງກັນມາຕະຫຼອດ.

ມື້ເກີດເຫດ ເວລາ 8 ໂມງ ຂອງວັນທີ 1 ທັນວາ 2017 ພວກກ່ຽວໄດ້ມີການຜິດຖຽງກັນອີກ, ພໍຮອດເວລາປະມານ 15-16 ໂມງຂອງວັນດຽວກັນ ຈຶ່ງມີການຜິດຖຽງກັນຊໍ້າແລ້ວຊໍ້າອີກຍ້ອນຄວາມຫຶງຫວງ ແລະ ບໍ່ເຂົ້າໃຈກັນ ຄັ້ງນີ້ໄດ້ລົງມືຕີກັນແຕ່ກໍບໍ່ເຖິງຂັ້ນຮ້າຍແຮງ. ພໍຮອດເວລາປະມານ 19 ໂມງ ຈຶ່ງໄດ້ມີການຜິດຖຽງກັນອີກ ແລ້ວໄດ້ກຸມຕີກັນຢູ່ຕູບນ້ອຍຄັ້ງນີ້ນາງເກສອນ ໄດ້ຈັບເອົາພ້າຂໍທີ່ວາງໄວ້ຢູ່ແຄມຕູບ ມາຟັນທີ່ຄໍຂອງຜູ້ເປັນຜົວ ຈໍານວນຫຼາຍບາດຈົນລົ້ມລົງເສຍຊີວິດຄາທີ່.

ຫຼັງຈາກທີ່ທ້າວ ກາ ເສຍຊີວິດແລ້ວ ຜູ້ກ່ຽວໄດ້ເອົາພ້າດວງດັ່ງກ່າວມາຟັນຄໍຈົນຂາດອອກຈາກກັນ, ເອົາພ້າຟັນຊໍ້າເຂົ້າທີ່ປາກ, ຟັນຂໍ້ແຂນທັງສອງເບື້ອງ, ແລ້ວໄດ້ເອົາພ້າຕັດເອັນຄະນ່ອງທັງສອງເບື້ອງ, ຟັນໂປ້ຕີນເບື້ອງຊ້າຍ ຈົນຂາດອອກຈາກກັນ ພ້ອມທັງຕັດອະໄວຍະວະເພດແລ້ວຟັນຊໍ້າຕາມຕົນຕົວ ແລະ ໃບໜ້າຫຼາຍບາດຈົນສົມກັບຄວາມຢາກຮ້າຍຈຶ່ງຢຸດເຊົາ.

ມື້ຕໍ່ມາເຊິ່ງເປັນວັນທີ 2 ທັນວາ 2017 ເວລາປະມານ 6 ໂມງເຊົ້າ ຈຶ່ງໄດ້ຍ່າງເຂົ້າໄປຮ້ານຂາຍເຄື່ອງເຂດເຮືອນໃກ້ຄຽງ ແລ້ວໄດ້ຊື້ເຫຼົ້າມາດື່ມຈຶ່ງໄດ້ເວົ້າສູ່ປະຊາຊົນເຂດເຮືອນໃກ້ຄຽງຟັງວ່າ: ໄດ້ເອົາພ້າຟັນຄໍທ້າວ ກາ ເສຍຊີວິດແລ້ວ ຈາກນັ້ນອໍານາດການຈັດຕັ້ງບ້ານ ຈຶ່ງໄດ້ກັກຕົວໄວ້ກ່ອນແຈ້ງໃຫ້ເຈົ້າໜ້າທີ່ ປກສ ເມືອງໄຊທານີ ຈັບຕົວໄປດໍາເນີນຄະດີຕາມລະບຽບກົດໝາຍອີກຄັ້ງ.

© LSecurityNews

ເຈົ້າຫນ້າທີ່ ຈັບກຸມໂຕຄົນຮ້າຍ ບຸກດຽວ ໃຊ້ມີດເຂົ້າປຸ້ນທະນາຄານ ການຄ້າຕ່າງປະເທດ ສາຂາ ເມືອງຄຳເກີດ ແຂວງບໍລິຄຳໄຊ

ເວລາ 9:30 ນາທີຂອງວັນທີ 19/12/2017 ມີໂຈນຖືມີດບຸກດຽວ ເຂົ້າທະນາຄານ ການຄ້າຕ່າງປະເທດ ສາຂາເມືອງຄຳເກີດ ແຂວງ ບໍລິຄໍາໄຊ ເພື່ອປຸ້ນເອົາເງິນ ແຕ່ໄປບໍ່ລອດ ຖືກເຈົ້າຫນ້າທີ່ຕໍາຫລວດຈັບຕົວໄວ້ໄດ້

ຢຶດຢາບ້າ ແລະ ຝິ່ນ ທີ່ລັກລອບຂົນສົ່ງທາງເຮືອ

ຜູ້ທີ່ລັກລອບຂົນສົ່ງຢາເສບຕິດ ພວກເຂົານໍາໃຊ້ທຸກວີທີທາງ ບໍ່ວ່າຈະເປັນທາງບົກ-ທາງນໍ້າ ເພື່ອຫຼົບຫຼີກການຕິດຕາມສະກັດກັນ ແລະ ປາບປາມ ຂອງເຈົ້າໜ້າທີ່ຕໍາຫຼວດ ກ່ອນໄປເຖິງຈຸດໝາຍ. ແນວໃດກໍ່ຕາມ, ຜູ້ທີ່ຫາກິນດ້ວຍຄວາມບໍ່ສຸດຈະລິດ, ສ່ວນຫຼາຍແມ່ນພົບຈຸດຈົບດ້ວຍການຖືກດໍາເນີນຄະດີຕາມກົດໝາຍ. ດັ່ງຄືທ້າວ ຕູລື ອາຍຸ 37 ປີ ປະຊາຊົນຢູ່ບ້ານຄົກແອກ ເມືອງຫົງສາ ແຂວງໄຊຍະບູລີ ສະແຫວງວ່າທໍາມາຫາກິນໄປໃນທີ່ຜິດກົດໝາຍ ໂດຍລັກລອບຊື້-ຂາຍຢາເສບຕິດທີ່ເກືອດຫ້າມ ແຕ່ຄັ້ງນີ້ໃຊ້ເຮືອເປັນພາຫະນະຂົນສົ່ງ ແຕ່ກໍ່ຖືກເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ເມືອງຫົງສາ ແຂວງໄຊຍະບູລີ ໄດ້ສະກັດຈັບຕົວໄດ້ພ້ອມຂອງກາງຢາບ້າເກືອບ 8.000 ເມັດ ແລະ ຢາຝິ່ນຈຳນວນ 545 ກຼາມ ໃນຂະນະທີ່ຂົນຢາເສບຕິດຈາກເຮືອຢູ່ທ່າເຮືອ ບ້ານຄົກແອກ.

ເຈົ້າໜ້າທີ່ຕໍາຫຼວດວິຊາສະເພາະ ກອງບັນຊາການ ປກສ ເມືອງຫົງສາ ເປີດເຜີຍວ່າ: ພາຍຫຼັງໄດ້ສືບຮູ້ວ່າ ທ້າວ ຕູລື ໄດ້ໄປຮັບເອົາຢາເສບຕິດຢູ່ຄິວລົດໂດຍສານຢູ່ແຂວງຫຼວງພະບາງ ໂດຍຜູ້ກ່ຽວໃຊ້ເຮືອໄວເປັນພາຫະນະຂີ່ລ່ອງຕາມລໍາແມ່ນໍ້າຂອງ ໄປຮັບເອົາຢາເສບຕິດໃນຄັ້ງນີ້. ຈາກນັ້ນ, ຈຶ່ງຈັດກໍາລັງລໍຖ້າສະກັດຈັບຢູ່ທ່າເຮືອບ້ານຄົກແອກ. ຮອດເວລາ 15 ໂມງ ຂອງໃນວັນທີ 29 ພະຈິກ 2017 ຈຶ່ງພົບເຫັນຜູ້ກ່ຽວຂີ່ເຮືອກໍາລັງທຽບທ່າຢູ່ທ່າເຮືອບ້ານຄົກແອກ ເມືອງຫົງສາ ຈຶ່ງເຂົ້າກວດຄົ້ນພົບຂອງກາງຢາບ້າ ແລະ ຢາຝິ່ນຈໍານວນດັ່ງກ່າວ.

ຜ່ານການສືບສວນ-ສອບສວນຂອງເຈົ້າໜ້າທີ່ ຜູ້ກ່ຽວໄດ້ຮັບສາລະພາບວ່າ: ໃນວັນທີ 24 ພະຈິກ 2017 ພ້ອມໝູ່ ຊື່ ທ້າວ ຈູທໍ ຄົນບ້ານດຽວກັນ ໄດ້ຕິດຕໍ່ສັ່ງຊື້ຢາບ້າ ຈໍານວນ 39 ຖົງ ແລະ ຢາຝິ່ນຈຳນວນ 549 ກຼາມ ນໍາຜູ້ຮ່ວມຂະບວນການນໍາກັນຢູ່ແຂວງອຸດົມໄຊ, ພາຍຫຼັງໄດ້ຕົກລົງກັນແລ້ວມາຮອດວັນທີ 28 ພະຈິກ 2017 ແມ່ນໃຫ້ຝາກນໍາລົດເມໂດຍສານໄປລົງຢູ່ຄິວລົດສາຍເໜືອ ເມືອງຫຼວງພະບາງ ແຂວງຫຼວງພະບາງ. ຈາກນັ້ນ, ທັງສອງຄົນກໍ່ໄດ້ພາກັນເດີນທາງອອກຈາກບ້ານຄົກແອກ ເມືອງຫົງສາ ແຂວງໄຊຍະບູລີ ໄປເມືອງຫຼວງພະບາງ ແຂວງຫຼວງພະບາງ, ໂດຍໄດ້ຈ້າງເຮືອໄວຂອງປະຊາຊົນບ້ານດຽວກັນ ໄປສົ່ງພໍເດີນທາງໄປຮອດພວກກ່ຽວໄດ້ໄປນອນພັກຢູ່ເຮືອນພັກແຫ່ງໜຶ່ງເພື່ອລໍຖ້າຮັບຢາບ້າ ແລະ ຢາຝິ່ນຈໍານວນດັ່ງກ່າວ, ຈົນຮອດຕໍ່ມາເວລາປະມານ 22 ໂມງວັນດຽວກັນ ຢາບ້າທີ່ສັ່ງຊື້ແມ່ນມາຮອດຄິວລົດສາຍເໜືອແຂວງຫຼວງພະບາງ ພວກກ່ຽວກໍໄດ້ໄປຮັບເອົາ ແລ້ວຝາກເງິນກັບຄືນໄປນຳລົດເມໂດຍສານ ໄປໃຫ້ເຈົ້າຂອງຢາເສບຕິດຢູ່ແຂວງອຸດົມໄຊ.

ພໍຮອດເວລາ 12 ໂມງ ຂອງວັນທີ 29 ພະຈິກ 2017 ທ້າວ ຕູລື, ທ້າວ ຈູທໍ ແລະ ເຈົ້າຂອງເຮືອ ໄດ້ພາກັນເອົາຢາເສບຕິດໄປໃສ່ເຮືອທີ່ຈອດລໍຖ້າຢູ່ແຄມນໍ້າຂອງ; ຈາກນັ້ນ, ແລ້ວພາກັນຂີ່ອອກຈາກເມືອງຫຼວງພະບາງ ກັບຄືນໄປບ້ານຄົກແອກ, ໃນລະຫວ່າງເດີນທາງກັບພວກກ່ຽວໄດ້ເອົາຢາບ້າອອກມາປັນກັນເສບຜູ້ລະ 2 ເມັດ, ພໍຮອດທ່າເຮືອບ້ານຄົກແອກ, ເວລາ 15 ໂມງຂອງວັນດຽວກັນ ທາງເຈົ້າໜ້າທີ່ ປກສ ເມືອງຫົງສາ ຈຶ່ງໄດ້ເຂົ້າກັກຕົວ ພ້ອມຂອງກາງປະເພດຢາບ້າ ຈຳນວນ 7.751 ເມັດ, ຝິ່ນຈຳນວນ 545 ກຼາມ ແລະ ໂທລະສັບ 1 ໜ່ວຍ ມາດຳເນີນຄະດີຕາມລະບຽບກົດໝາຍ. ສ່ວນທ້າວ ຈູ ທໍ ແລະ ເຈົ້າຂອງເຮືອແມ່ນໄດ້ເອົາຕົວລົບໜີ.

ປະຈຸບັນ, ເຈົ້າໜ້າທີ່ ປກສ ເມືອງຫົງສາ ໄດ້ສືບຕໍ່ສົມທົບກັບເຈົ້າໜ້າທີ່ພາກສ່ວນກ່ຽວຂ້ອງເລັ່ງຕິດຕາມຕົວພວກກ່ຽວ ເພື່ອມາດຳເນີນຄະດີຕາມກົດໝາຍຢ່າງເຂັ້ມງວດ.

© LSecurityNews

ຈັບໂຈນຂີ່ລົດໃຫຍ່ທີ່ມາຕັດສັນຍານລ໋ອກລົດແລ້ວລັກເຄື່ອງ ຕອນຜູ້ປົກຄອງມາສົ່ງລູກຢູ່ໂຮງຮຽນ

ໃນວັນທີ 19 ທັນວານີ້ ໂຮງຮຽນອອກສະກ້າແຈ້ງວ່າປະຈຸບັນເຈົ້າໜ້າທີ່ໄດ້ຈັບໂຈນທີ່ມາຕັດສັນຍານລ໋ອກລົດຂອງຜູ້ປົກຄອງທີ່ມາສົ່ງລູກຫຼານຢູ່ໂຮງຮຽນແລ້ວລັກຊັບສິນພາຍໃນລົດ.

ຂ່າວທີ່ເຄີຍໂພສແຈ້ງເຕືອນ:📢 ເຖິງຜູ້ປົກຄອງ ໂຮງຮຽນ ອ໋ອດສະກ້າ 1🗯
ທາງໂຮງຮຽນ ຂໍແຈ້ງ ມາຍັງທ່ານຜູ້ປົກຄອງ ໃຫ້ມີສະຕິລະວັງໂຕ ຂຶ້ນຕື່ມ ເວລາ ມາຮັບ-ສົ່ງ ລູກຫຼານຂອງທ່ານ. ເວລາລ໋ອກລົດແລ້ວ ໃຫ້ກວດເຊັກເບິ່ງຕື່ມວ່າລົດຖືກລ໋ອກແລ້ວແທ້ບໍ່.

ປລ: ໂຈນຂີ່ລົດໃຫຍ່ມາ ເຮັດຄືວ່າເປັນຜູ້ປົກຄອງມາຮັບລູກ

ດ້ວຍຄວາມຫ່ວງໃຫຍ່ ແລະ ຫວັງດີ
ໂຮງຮຽນ ອ໋ອດສະກ້າ

ທາງລົດໄຟລາວ-ຈີນເຂດຫລວງນ້ຳທາເຈາະສຳເລັດແລ້ວກວ່າ 24%

ການຂຸດເຈາະອຸໂມງທາງລົດໄຟລາວ-ຈີນໃນບໍລິເວນ ຜ່ານແຂວງຫລວງນ້ຳທາ, ມາຮອດປັດຈຸບັນເຈາະສຳເລັດ ແລ້ວ 2.685 ກວ່າແມັດເທົ່າ ກັບ 24,76% ຂອງໄລຍະ ອຸມົງຍາວທັງໝົດ 10.845 ແມັດ. ສະເພາະເຂດ ແລວທາງ ລົດໄຟທີ່ຜ່ານແຂວງນໍ້າທາມີ ໄລຍະຍາວ 16 ກວ່າກິໂລແມັດ, ປະກອບມີ 2 ສະຖານີຄືສະ ຖານີບໍ່ເຕ່ນເປັນສະຖານີນ້ອຍ ສໍາລັບກວດຄົນເຂົ້າ- ອອກ ເມືອງ ແລະ ສະຖານີນາເຕີຍ ເປັນສະຖານີໃຫຍ່ສໍາລັບຄ່ຽນຖ່າຍສິນຄ້າ.

ຫົວໜ້າພະແນກໂຍທາ ທິການ ແລະ ຂົນສົ່ງ ແຂວງ ຫລວງນໍ້າທາ ໃຫ້ຮູ້ວ່າ: ປັດຈຸ ບັນບັນດາບໍລິສັດຜູ້ຮັບເໝົາ ໄດ້ເລັ່ງໃສ່ການຂຸດເຈາະ ອຸມົງດັ່ງກ່າວຢູ່ 3 ແຫ່ງຄືອຸ ໂມງມິດຕະພາບລາວ-ຈີນມີ ຄວາມຍາວ 2.425 ແມັດ, ອຸ ໂມງບໍ່ເຕ່ນມີຄວາມຍາວ 6.461 ແມັດ ແລະ ອຸໂມງ ຕີນຕົກມີ ຄວາມຍາວ 1.173 ແມັດ. ຂະນະດຽວ ກັນກໍໄດ້ ກໍ່ສ້າງຮາກຖານຂົວໃຫຍ່ ຈຳນວນ 7 ແຫ່ງໃນບໍລິເວນ ແຂວງ ຫລວງນ້ຳທາ ໃຫ້ສຳ ເລັດຕາມຄາດໝາຍແຜນ ການວາງໄວ້.

ຂີ້ຝຸ່ນຈາກທາງດິນແດງ ກະທົບໜັກຕໍ່ຊີວິດການເປັນຢູ່

ຂີ້ຝຸ່ນຈາກທາງດິນແດງ ກະທົບໜັກຕໍ່ຊີວິດການເປັນຢູ່ ແລະ ສຸຂະພາບຂອງປະຊາຊົນທີ່ຢູ່ໃກ້
ຫຼາຍເສັ້ນທາງທີ່ສ້າງແລ້ວມີການເປ່ເພຍ້ອນຫຼາຍສາເຫດ ອັນເນື່ອງມາຈາກທາງບໍ່ໄດ້ມາດຕະຖານ, ເສັ້ນທາງມີການຊົມໃຊ້ຫຼາຍປີ ສົ່ງຜົນໃຫ້ເກີດການ-ໄປມາພົບຄວາມລຳບາກ. ຂະນະດຽວກັນ, ປະເພດລົດບັນທຸກ ຫຼື ລົດຂົນດິນ-ຊາຍ, ຂົ່ນເຄື່ອງກໍ່ສ້າງອື່ນໆກໍ່ມີສ່ວນເຮັດໃຫ້ທາງເປ່ເຟເປັນບວກ, ເປັນຂຸ່ມ, ເປັນຝຸ່ນ ແລະ ບາງເສັ້ນທາງສ້າງບໍ່ສຳເລັດຕາມຄາດ ເຊິ່ງກະທົບຕໍ່ຜູ້ຊົມໃຊ້ຕະຫຼອດຜູ້ອາໄສຢູ່ສອງຝາກທາງ.

ຈາກການສຳພາດປະຊາຊົນຖືອາຊີບເຮັດສີລົດ (ລົດໃຫຍ່-ລົດເກງ) ທີ່ເຂດບ້ານແກ້ງປາຢ້າງ ເມືອງ ຫາດຊາຍຟອງ, ນະຄອນຫຼວງວຽງຈັນ ທີ່ຕັ້ງຮ້ານແຄມທາງ (ເສັ້ນທາງສາມແຍກຈີ່ນາຍໂມ້-ສາມແຍກບ້ານທ່າແຂກ, ຊາຍຟອງໃຕ້) ໃຫ້ຮູ້ວ່າ: ນັບແຕ່ໄລຍະອອກພັນສາຈົນມາເຖິງດຽວນີ້ ກໍ່ຫວິດຝົນແລ້ວສົ່ງຜົນໃຫ້ທາງດິນແດງເກີດມີຂີ້ຝຸ່ນຫຼາຍ ບວກກັບລົດຂົນຫີນ-ຊາຍ ທີ່ທຽວທາງນີ້ກະ ທົບ ຕໍ່ຊີວິດການເປັນຢູ່ຂອງປະຊາຊົນທີ່ມີເຮືອນອາໄສຢູ່ໃກ້ທາງໃຫຍ່.
ປະຊາຊົນບ້ານໂພເງິນທ່ານໜຶ່ງ ທີ່ມີຮ້ານຂາຍເຂົ້າປຸ້ນແຄມທາງ ບອກວ່າ: ເຮົາຄອງຄອຍເສັ້ນທາງໃໝ່ຈະເຖິງບ້ານເຮົານີ້ມາແຕ່ຕົ້ນປີ ແລະ ມາທ້າຍປີ້ນີ້ຍັງບໍ່ທັງສ້າງມາຮອດ ຈຶ່ງຕ້ອງທົນສະພາບຂີ້ຕົມໃນລະດູຝົນ ແລະ ຂີ້ຝຸ່ນໃນລະດູແລ້ງມາຫຼາຍປີແລ້ວ. ສິ່ງດັ່ງກ່າວສ້າງຄວາມລຳບາກໃນເວລາຂາຍເຂົ້າປຸ້ນໃຫ້ກັບລູກຄ້າ ເພາະລະອອງຝຸ່ນຈາກທາງໃນເວລາລົດແລ່ນກາຍໄດ້ພັດເຂົ້າມາໃສ່ຮ້ານ ແລະ ໃສ່ຜູ້ລູກຄ້າທີ່ຮັບປະທານ ຈຶ່ງໄດ້ທຳຄວາມສະອາດຢູ່ທຸກເຊົ້າ-ແລງ

ເຈົ້າຂອງຮ້ານຂາຍເຄື່ອງແຫ້ງ ແລະ ຂາຍນ້ຳປັ່ນແຄມທາງເຂດບ້ານໜອງພະຍາ ເມືອງນາຊາຍທອງ ທ່ານໜຶ່ງກໍ່ໃຫ້ທັກສະນະຄືກັນວ່າ: ເສັ້ນທາງໃໝ່ຍັງບໍ່ທັນສຳເລັດນັບແຕ່ສີ່ແຍກບ້ານຕາມມີໄຊ ຫາສາມແຍກສີເກີດ ເກີດມີຂີ້ຝຸ່ນຫຼາຍເພາະລົດທຽວທາງຕະຫຼອດ ກະທົບຕໍ່ຮ້ານເຮົາທຸກໆມື ແລະ ບາງມື້ກໍ່ໄດ້ປິດ ເຮັດໃຫ້ການຂາຍເຄື່ອງບໍ່ຄ່ອຍມີລາຍໄດ້ສະໝ່ຳສະເໝີ ຍ້ອນຂີ້ຝຸ່ນພັດຜ່ານຕະຫຼອດເວລາ.

ປະຊາຊົນທຽວທາງດັ່ງກ່າວ ບອກກັບຜູ້ສື່ຂ່າວອີກວ່າ: ທາງດິນແດງນອກຈາກຈະກະທົບຕໍ່ຜູ້ສັນຈອນໄປມາແລ້ວຍັງກະທົບຕໍ່ເສດຖະກິດນຳອີກ ເຊິ່ງເຫັນໄດ້ຫຼາຍຮ້າງຮ້ານທີ່ເປີດມາແລ້ວຕ້ອງປິດເພາະເສັ້ນທາງມີການກໍ່ສ້າງ, ເສັ້ນທາງເປິເປື້ອຍ, ມີຝຸ່ນ ແລະ ຫຼາຍຮ້ານໄດ້ປິດກິດຈະການຊົ່ວຄາວລໍຖ້າເສັ້ນທາງສຳເລັດແລ້ວຈຶ່ງກັບມາເປີດ. ຄຽງຄູ່ກັນນັ້ນ, ທາງດິນແດງຍັງເຮັດໃຫ້ຂີ້ຝຸ່ນກະ ທົບຕໍ່ລະບົບຫາຍໃຈຂອງຜູ້ທຽວທາງ ໂດຍສະເພາະແມ່ນເດັກນ້ອຍ ເຖິງວ່າຈະມີຜ້າອັດປາກ ແລະ ໃສ່ໝວກກັນກະທົບກໍ່ຕາມ.