ຖໍ້າກອງລໍ

ເປັນແຫຼ່ງທ່ອງທ່ຽວທາງທໍາມະຊາດ ທີ່ມີຊື່ສຽງລະດັບແນວໜ້າຂອງໂລກ ຍ້ອນວ່າເປັນຖໍ້າທີ່ມີສາຍນໍ້າຫີນບູນ ໄຫຼຜ່ານອຸໂມງຂອງພູຫີນບູນເຂົ້າໄປ ແລ້ວ ປ່ອງໃສ່ແມ່ນໍ້າຂອງ. ຖໍ້າກອງລໍຕັ້ງຢູ່ລະຫວ່າງບ້ານນາຕານ ແລະ ບ້ານກອງລໍ, ເມືອງຄູນຄຳ ເຊິ່ງຫ່າງຈາກເມືອງ 46 ກິໂລແມັດ. ​

ບັນດານັກ ທ່ອງທ່ຽວ ສາມາດ ເດີນທາງຈາກ ເສັ້ນທາງເລກທີ 13 ເຂົ້າໄປຕາມ ເສັ້ນທາງເລກ 8 ອາດຈະຮອດບ້ານຄູນຄຳ ເຊິ່ງຫ່າງຈາກ ຖ້ຳກອງລໍ 40 ກິໂລແມັດ. ສຳລັບທາງເລືອກອື່ນ ທີ່ເໝາະສົມກັບຜູ້ ມັກການປະຈົນໄພ ແມ່ນ ຂີ່ເຮືອຈັກຫາງຍາວ ລ່ອງໄປຕາມ ສາຍນ້ຳຫີນບູນຈາກບ້ານນາ.

ຈັ່ງໃດກໍ່ຕາມ, ບັນດານັກທ່ອງທ່ຽວສາມາດພັກ ແຮມຄືນນຳເຮືອນຊາວບ້ານ ບ້ານນາຫີນ, ບ້ານນາຕານ ແລະ ບ້ານກອງລໍ. ຖໍ້າກອງລໍ ມີຄວາມຍາວປະມານ 7.500 ແມັດ, ເຊິ່ງມີຄວາມກ້ວາງປະມານ 30 ແມັດ ແລະ ສູງນັບແຕ່ 20 ແມັດຫາ 100 ແມັດ. ຖໍ້າກອງລໍ ເປັນ ຖໍ້າທີ່ສວຍງາມ ແລະ ມີສະເໜ່ດຶງດູດທີ່ສຸດ ເພາະທາງໃນຖໍ້າ ມີແກ້ງ, ຫີນຍ້ອຍ, ຫາດຊາຍ ທີ່ສວຍງາມຈຳນວນ 20 ກວ່າຈຸດ ເພື່ອໃຫ້ນັກທ່ອງທ່ຽວໄດ້ຊົມ. ບັນດານັກທ່ອງທ່ຽວສາມາດຂີ່ເຮືອລອດຜ່ານເຂົ້າໄປໃນຖ້ຳ ໄດ້ຕະຫຼອດ.

ໃນລະດູແລ້ງ ເປັນໄລຍະ ເໝາະສົມທີ່ສຸດ ເພື່ອຊົມຮູບໂສມສີສັນຂອງຖ້ຳ ໂດຍການຂີ່ເຮືອເຂົ້າໄປພາຍໃນຖ້ຳ ແລ້ວກໍ່ສາມາດລົງຈາກເຮືອແວ່ທ່ຽວຊົມ ທິວທັດ ແລະ ຍ່າງເລາະຫຼິ້ນຕາມ ຫາດຊາຍຂາວ ດ້ວຍການສຳ ພັດກັບອາກາດທີ່ເຢັນ ສະບາຍ. ພາຍໃນຖ້ຳນັກທ່ອງທ່ຽວຈະມີຄວາມສຸກ ພາຍໃຕ້ບັນຍາກາດ “ພາຍໃຕ້ຄວາມ ສວຍງາມ”. ບົນເສັ້ນທາງພາຍໃນຖ້ຳມີຫີນ ຍ້ອຍ, ໂງ່ນຫີນ ແລະ ຫາດ ຊາຍຈຳນວນຫຼວງຫຼາຍອັນສວຍສົດງົດງາມເປັນທີ່ຈັບອົກຈັບໃຈທີ່ສຸດ.

ຖໍ້າກອງລໍ-ນາຕານ ຖືກຄົ້ນພົບແຕ່ສະ​ຕະວັດທີ XVI, ໃນຊຸມປີ 1960 ເລີ່ມນຳໃຊ້ ເຮືອຫາງຍາວເປັນພາຫະນະເດີນທາງ ໄປ-ຜ່ານຖ້ຳແຫ່ງນີ້ ຂອງຄົນທ້ອງຖິ່ນ. ການສໍາຫຼວດຢ່າງຈິງຈັງ ເປັນຄັ້ງທໍາອິດ ເລີ່ມໃນເດືອນກຸມພາ 1995 ແລະ ພົບວ່ານັກທ່ອງທ່ຽວ ສາມາດ ຂີ່ເຮືອຈັກຫາງ ຍາວແລ່ນລອດເຂົ້າຖໍ້າ ແລະ ຜ່ານອອກອີກດ້ານອື່ນ ເຊິ່ງຫຼຸດຜ່ອນເວລາໃນການສັນຈອນຈາກ 2 ຊົ່ວໂມງມາເປັນປະມານ 1 ຊົ່ວໂມງ. ​

ດ້ວຍເຫດນີ້, ອຸໂມງຂອງຖ້ຳນີ້ ຈຶ່ງເປັນເສັ້ນທາງການທ່ອງທ່ຽວທາງເຮືອ ໂດຍເກີດຂຶ້ນ ແລະ ຖືກນໍາໃຊ້ ທົ່ວໄປນັບແຕ່ວັນທີ 12 ມັງກອນ 2002 ເປັນຕົ້ນມາ. ປະຈຸບັນນີ້ອຸໂມງ ລອດ ຖ້ຳສາຍນີ້ ຈຶ່ງເປັນເສັ້ນທາງຄົມມະນະຄົມ ເຊື່ອມຕໍ່ລະຫວ່າງບ້ານກອງລໍ ຫາບ້ານນາຕານ. ຖໍ້າກອງລໍ ມີຄວາມໝາຍມາຈາກ “ກອງທັບລໍ” ບໍ່ແມ່ນ “ກອງຫຼໍ່” ຍ້ອນເຫດຜົນວ່າ ຄຳວ່າ “ກອງ” ມາຈາກ “ກອງທັບ” ສ່ວນ “ລໍ” ມາຈາກ “ລໍຖ້າ” ເມື່ອລວມເຂົ້າກັນຈຶ່ງເອີ້ນຖ້ຳກອງລໍ ຈົນເທົ່າທຸກວັນນີ້. ໃນຂະນະນັ້ນ, ອານາຈັກລາວລ້ານຊ້າງ ໄດ້ທຳການຕໍ່ສູ້ກັບກອງທັບສັກ ດີນາສະ ຫຍາມ ທີ່ເຂົ້າມາຮຸກຮານ ດ້ວຍເຫດນີ້ ມັນຈຶ່ງເປັນທີ່ມາຂອງຖ້ຳກອງລໍແຕ່ນັ້ນມາ ແລະ ມີຄວາມໝາຍເປັນ “ກອງທັບລໍຖ້າ” ນັ້ນເອງ.​​​​​



ແຫລ່ງ: ອົງການພັດທະນາການທ່ອງທ່ຽວ

ບ້ານ ອາໂນ ເປັນບ້ານຊົນເຜົ່າອາຄາ ທີຕັ້ງຢູ່ຈອມພູສູງ

ບ້ານ ອາໂນ ເປັນບ້ານຊົນເຜົ່າອາຄາ ທີຕັ້ງຢູ່ຈອມພູສູງ

ຫ່າງຈາກເທດສະບານ ເມືອງຫຼາ ປະມານ 28 ກິໂລແມັດ ເສັ້ນທາງເຂົ້າຫາບ້ານ ອາໂນ ແມ່ນອອກຈາກຕົວເມືອງຫຼາປະມານ 2 ກິໂລແມັດ ທາງໄປ ແຂວງ ຜົ້ງສາລີ ຈະມີແຍກຂວາມື ຢູ່ບ້ານປາກກໍ ຈາກນັ້ນຂ້າມຂົ້ວນ້ຳພາກໄປ ແລ້ວລ້ຽວຊ້າຍ ອີກປະມານ 26 ກິໂລແມັດ ກໍ່ຈະຮອດບ້ານ.

ບ້ານອາໂນມີຕົ້ນກຳເນີດມາຈາກຈີນໃນເບື້ອງຕົ້ນໂດຍພາຍໃຕ້ການນຳພາຂອງພໍ່ເຖົ້າ ອາແປ້ວ ໃນປະມານປີ 1806 ໄດເຄື່ອນຍ້າຍຈາກປະເທດຈີນເຂົ້າໄປອາໄສຢູ່ພາກເໜື່ອຂອງປະເທດຫວຽດນາມເຊິ່ງໃນເມື່ອກ່ອນເອີ້ນວ່າ: ເມືອງແຖນ,ເມືອງລາ ຫຼືໃນປະຈຸບັນເອີ້ນວ່າ: ດຽນບຽນຟູ,ເຊີນລາ ແລະ ໄລເຈົາ ຂອງປະເທດ ສສ ຫວຽດນາມ ໃນໄລຍະຕໍ່ຍ້ອນທຳມະຊາດບໍ່ເອື້ອອຳນວຍຄວາມສະດວກມີຄວາມຫຍຸ້ງຍາກໃນການທຳມາຫາກີນ,ອີກຢ່າງໜຶ່ງຍ້ອນບໍ່ມີຄວາມສະດວກທາງດ້ານການເມືອງ ພາຍຫຼັງທີພໍ່ເຖົ້າອາແປ້ວ ເສຍຊີວິດ ພໍ່ເຖົ້າອາແຊ ເຊິ່ງ ເປັນລູກຂອງພໍ່ເຖົ້າອາແປ້ວ ໄດ້ນຳພາພໍ່ແມ່ປະຊາຊົນເຄື່ອນຍ້າຍມຸ້ງໜ້າເຂົ້າມາທາງປະເທດລາວໃນປີ 1831 ໂດຍຂ້າມນ້ຳອູເຂົ້າມາທາງເມືອງ ຂວາ ແຂວງ ຜົ້ງສາລີ ແລະ ມາຕັ້ງຖິ່ນຖານໃນເຂດຈອມວັນ ຢາງເຕີຍໃນປີ 1862 ແລະ ຄ່ອຍໆເຄື່ນຍ້າຍເຂົ້າມາໃນເຂດອາໂນພາຍຫຼັງພໍ່ເຖົ້າອາແຊໄດ້ເສຍຊີວິດໂດຍພາຍໃຕ້ການນຳພາຂອງພໍ່ເຖົ້າອາໂນຜູ້ເປັນລູກຊາຍຂອງພໍ່ເຖົ້າອາແຊເຊິ່ງໄດ້ຕັ້ງຖິ່ນຖານຢູ່ທີ່ບ້ານແສນຫຼວງປະຈຸບັນໃນປີ 1864, ມາເຖີງ ປີ 1882 ໄດ້ແຍກເປັນ 2 ບ້ານ ໂດຍພາຍໃຕ້ການນຳພາພໍ່ເຖົ້າອາໂນຈຶ່ງເອີ້ນວ່າ: ບ້ານອາໂນຈົນເທົ່າທຸກວັນນີ້ ໃນນີ້ຊົນເຜົ່າອາຄາບ້ານອາໂນ ຍັງມີວັດທະນະທຳ ແລະ ຮີດຄອງປະເພນີທີເປັນເອກະລັກສະເພາະຂອງເຜົ່າ ໄດ້ມີການສືບທອດກັນມາແຕ່ດົນນານເປັນຕົ້ນແມ່ນ ບຸນກີນຈຽງປີໃໝ່,ບຸນປະເພນີຂີ່ຊິງຊາ,ປະເພນີປະຕູໂຂງ ແລະ ຍັງມີສີລະປະວນັນະຄະດີການຂັບ,ການ ຮ້ອງຕ່າງໆ

ຂໍ້ມູນ: ຫ້ອງການທ່ອງທ່ຽວອຸດົມໄຊ

ທ່ຽວຊົມເຮືອນລາວ ໃນບຸນນະມັດສະການພະທາດຫລວງ

ທ່ຽວຊົມເຮືອນລາວ ໃນບຸນນະມັດສະການພະທາດຫລວງ

ບຸນນະມັດສະການພະທາດຫຼວງ ທີ່ນະຄອນຫຼວງວຽງຈັນ ປີນີ້ແມ່ນພິເສດຫລາຍ , ເພາະປີນີ້ເພິ່ນສ້າງເຮືອນລາວບູຮານແບບດັ້ງເດີມ,ລົດຖີບເກົ່າ ຫລືອຸປະກອນຕ່າງໆ ມາວາງສະແດງ ເພື່ອໃຫ້ຊາວລາວແລະຕ່າງປະເທດໄດ້ເຫັນເຖິງຮີດຄອງປະເພນີ, ວັດທະນະທຳລາວແບບດັ້ງເດີມໃນສະໄໝກ່ອນ. ຫາກໃຜທີ່ມາທ່ອງທ່ຽວບຸນນະມັດສະການພະທາດຫຼວງປີນີ້ ຢ່າລືມມາຊົມເນີ.

 

ພາບຈາກ: Alaotheworld.

ໃຜທີ່ໄປຫລິ້ນບຸນທາດຫລວງປີນີ້ ຢ່າລືມໄປແວ່ຊົມຫມູ່ບ້ານລາວເດີມໃນແບບຈຳລອງເດີ່ ງົດງາມອີຫຼີ ໃຜພາດແລ້ວຈະເສຍໃຈ…

Posted by Alaotheworld on Wednesday, October 25, 2017

ເຊີນທ່ຽວຊົມເຮືອນຊົງລາວ ໂດຍບໍ່ເສຍຄ່າບຸນນະມັດສະການພະທາດຫຼວງ

ຮືອນ​ບູຮານ​ຊົງ​ລາວ ​ເປັນ​ກິດຈະ​ກຳ​ໜຶ່ງ​ຂອງ​ງານ​ບຸນ​ນະ​ມັດສະການ​ພະ​ທາດຫຼວງ​ວຽງ​ຈັນ ເຊິ່ງ​ການ​ສ້າງ​ເຮືອນ​ບູຮານ​ປະຈຳປີ 2017 ແມ່ນ​ມີ​ຄວາມ​ໂດດ​ເດັ່ນທາງ​ດ້ານ​ລັກສະນະ​ຮູບຊົງ ແລະ ການ​ຕົບແຕ່ງ​ທີ່​ສ່ອງ​ແສງ​ໃຫ້​ເຫັນ​ປະເທດ​ລາວ​ ມີ​ບາດກ້າວ​ການ​ພັດທະ​ນາ​ດີ​ຂຶ້ນ ໄປ​ຄຽງ​ຄູ່​ກັບ​ການພັດທະນາ ແລະ ປົກ​ປັກ​ຮັກສາພະ​ທາດຫຼວງ​ວຽງ​ຈັນ ​ໃຫ້​ມີ​ຄວາມຍືນ​ຍົງ.

ທ່ານ​ນາງ ຈັນ​ນະພາ ວົງ​ສະໝໍ​ລະ​ພູມ ປະທານບໍລິສັດ ຊີ​ເອັນພີຂາ​ອອກ-ຂາ​ເຂົ້າ ສຳ​ຫຼວດ ແລະ ຂຸດ​ຄົ້ນ​ບໍ່​ແຮ່ ຈຳກັດ ໃຫ້​ສຳພາດ​ວ່າ: ໂດຍ​ໄດ້​ຮັບ​ການ​ມອບໝາຍ​ຈາກ​ພັກ-ລັດຖະບານ ກໍ່​ຄືອົງການ​ປົກຄອງນະຄອນຫຼວງວຽງ​ຈັນ ໃຫ້​ບໍລິສັດ​ຂ້າພະເຈົ້າຮັບຜິດຊອບ​ສ້າງ​ເຮືອນ​ຊົງ​ລາວ (ເຮືອນ​ບູຮານ) ໃນ​ງານ​ບຸນ​ນະມັດ​ສະການ​ພະ​ທາດຫຼວງ​ປະຈຳປີ 2017 ເພື່ອ​ກະກຽມ​ໃຫ້​ແກ່ການ​ຕ້ອນຮັບ​ເປີດ​ປີ​ທ່ອງ​ທ່ຽວລາວ 2018 ເຊິ່ງ​ບຸນ​ນະ​ມັດ​ສະການ​ພະ​ທາດຫຼວງ​ປີ 2016 ຜ່ານມາ ບໍລິສັດ​ໄດ້​ສ້າງ​ເຮືອນ​ບູຮານ ຈຳນວນ 2 ຫຼັງ ​ເຫັນ​ວ່າ​ໄດ້​ຮັບ​ການ​ຍ້ອງຍໍ​ຊົມເຊີຍ​ຈາກ​ມວນ​ຊົນ​ທີ່​ມາ​ທ່ຽວ​ຊົມ​ງານບຸນ​ເປັນ​ຈຳນວນ​ຫຼວງຫຼາຍ ສະນັ້ນ ປີ 2017 ບໍລິສັດ​ຈຶ່ງ​ໄດ້​ສືບຕໍ່ສ້າງ​ເຮືອນ​ບູຮານ​ເພີ່ມ​ຂຶ້ນ​ມີ​ຈຳນວນ​ທັງ​ໝົດ 8 ຫຼັງ ແອ້ມ ແລະ ປູ​ດ້ວຍ​ໄມ້ ມຸງ​ດ້ວຍ​ໄມ້​ສັບ ແລະ ດິນຂໍ​ທີ່​ມີ​ຮູບຊົງ​ລວດລາຍ​ແຕກຕ່າງ​ກັນ ພ້ອມ​ນັ້ນ ພາຍ​ໃນ​ເຮືອນຈະ​ມີ​ການ​ຕົບແຕ່ງ​ແບບ​ຊົງ​ລາວດັ່ງ​ເດີມ​ທີ່​ສວຍ​ງາມ ໂດຍ​ເລີ່ມ​ລົງມື​ກໍ່ສ້າງ​ມາ​ແຕ່​ເດືອນ​ພຶດສະພາ 2017 ເປັນຕົ້ນ​ມາ ໃຊ້​ງົບປະມານທັງ​ໝົດ 3,7 ຕື້​ກີບ ປັດຈຸບັນ ສຳເລັດ 90% ເພື່ອ​ອະນຸ​ຮັກ​ວັດ​ທະທຳ ແລະ ຮີດຄອງ​ປະເພນີ​ອັນ​ດັ່ງເດີມ​ຂອງ​ລາວ ແນໃສ່​ໂຄສະນາເຜີຍແຜ່​ວັດທະນະທຳ​ຂອງ​ລາວ ໃຫ້​ປະຊາຊົນ​ລາວ ລູກ​ຫຼານ​ທີ່ເກີດ​ຮຸ່ນ​ຫຼັງ ຕະຫຼອດ​ຮອດ​ແຂກທັງ​ພາຍ​ໃນ ແລະ ຕ່າງປະເທດ ໄດ້​ເຫັນ​ເຮືອນ​ຊົງ​ລາວ​ເດີມ ວິຖີການ​ດຳລົງ​ຊີວິດ ທີ່​ສ່ອງ​ແສງເຖິງ​ວັດທະນະທຳ ຮີດຄອງ​ອັນ​ດີງາມ​ຂອງ​ລາວ ນອກ​ນັ້ນ ພາຍ​ໃນຂອບ​ເຂດ​ບໍລິເວນ​ເຮືອນ​ບູຮານ ​ຍັງ​ມີ​ການສະແດງ​ສິລະ​ປະ​ວັດທະນະທຳ​ພື້ນເມືອງ ໝໍ​ລຳ ລະນາດ ການ​ຂັບ​ງື່ມ ອາຫານ​ພື້ນເມືອງລາວ ສວນ​ຈຳປາ ສວນ​ພຶກສາ ການ​ຕ່ຳຫູກ​ທໍ​ໄໝ ການ​ຕຳ​ເຂົ້າດ້ວຍ​ຄົກມອງ ແລະ ອື່ນໆ​ ໃຫ້​ນັກທ່ອງ​ທ່ຽວ​ທີ່​ມາ​ທ່ຽວ​ຊົມ​ບຸນ​ພະທາດຫຼວງ​ໄດ້​ທ່ຽວ​ຊົມ ແລະ ມີຄວາມ​ເບີກບານ​ມ່ວນຊື່ນ.

ສຳລັບ​ການ​ເຂົ້າ​ທ່ຽວ​ຊົມ​ບ້ານບູຮານ ​ບໍ່​ມີ​ການ​ເກັບ​ປີ້​ເສຍ​ຄ່າຜ່ານ​ປະຕູ​ແຕ່​ຢ່າງໃດ ແຕ່​ຈະ​ມີທີມ​ງານ​ຂາຍ​ນ້ຳ​ດື່ມ ແລະ ອາຫານ​ພື້ນເມືອງ​ລາວ ເພື່ອ​ນຳລາຍ​ຮັບ​ມາ​ຊຸກຍູ້​ທີມ​ງານ​ການສະແດງ​ສິລະ​ປະໃຫ້​ບໍລິການ ນັບ​ແຕ່​ວັນ​ທີ 27 ຕຸລາ​ນີ້​ເປັນຕົ້ນ​ໄປ ແລະ ພາຍຫຼັງທີ່​ສຳເລັດ​ບຸນ​ນະມັດສະການ​ພະທາດຫຼວງ​ແລ້ວ ​ເຮືອນ​ດັ່ງກ່າວ​ຍັງສືບຕໍ່​ໃຫ້​ບໍລິການ​ຕະຫຼອດ​ປີ​ທ່ອງທ່ຽວ​ລາວ 2018 ສະນັ້ນ ຂໍ​ເຊີນຊວນ​ມວນ​ຊົນ​ທີ່​ມາ​ທ່ຽວ​ຊົມ​ງານບຸນ​ນະມັດສະການ​ພະ​ທາດຫຼວງ ເຂົ້າ​ແວ່​ຢ້ຽມ​ຊົມ ແລະ ໃສ່​ຊຸດລາວ​ແບບ​ດັ່ງ​ເດີມ ເພື່ອ​ຖ່າຍຮູບເປັນ​ທີ່​ລະ​ລຶກ​ຕື່ມ​ອີກ. ຂ່າວ ໜສພ ວຽງຈັນໃຫ່ມ

ແຫລ່ງທ່ອງທ່ຽວ: ຕາດຕະແລ

ຕາດຕະແລ ຕັ້ງຢູ່ບ້ານຕະແລ, ຫ່າງຈາກເທດສະບານ ເມືອງຮຸນ ປະມານ 20 ກວ່າ ກິໂລແມັດ, ການເຂົ້າເຖິງເປັນ ເສັ້ນທາງດິນແດງ, ຈຸດເດັ່ນ ຂອງຕາດນີ້ ເປັນນ້ຳຕົກຕາດແຫ່ງໜຶ່ງ ທີ່ມີຄວາມສວຍສົດງົດງາມ ທາງທຳມະຊາດ ເຊິ່ງອ້ອມຮອບດ້ວຍ ປ່າດົງດິບ ແລະ ປ່າເຄິ່ງດົງດິບ ທີ່ມີຕົ້ນໄມ້ໃຫຍ່, ນ້ອຍທີ່ມີ ໃບດົກໜາຂຽວງາມ ແລະ ເຕັມໄປດ້ວຍ ນົກນາໆຊະນິດ, ນ້ຳຕົກຕາດແຫ່ງນີ້ ມີທັງໝົດ 7 ຕາດດ້ວຍກັນ, ມີທັງຕາດໃຫຍ່, ຕາດນ້ອຍຢັ່ງຢາຍ ໄປຕາມສາຍນ້ຳຕະ ແລະ ຍາວ ປະມານ 600 ກວ່າແມັດ

ນ້ຳຕົກຕາດຕະແລແຫ່ງນີ້ ມີຕຳນານເລົ່າຂານ ປາກຕໍ່ປາກສືບຕໍ່ກັນມາວ່າ: ແຕ່ປາງກ່ອນ ມີບ່າວເງືອກຜູ້ໜຶ່ງຊື່ວ່າ ທ້າວພັກໄດ້ລົງໄປຫຼິ້ນບຸນ ຢູ່ຫຼວງພະບາງ, ໄປເຫັນສາວເງືອກ ຜູ້ໜຶ່ງຊື່ວ່າ ນາງຄຳຜີວ ທີ່ອາໄສຢູ່ນ້ຳຄານ ທ້າວພັກເກີດມີ ຄວາມຮັກມັກກັບນາງຄຳຜີວ ແລະ ໄດ້ລັກເອົານາງຄຳຜີວມານຳ, ຕໍ່ຈາກນັ້ນມາ ມີບ່າວເງືອກຄົນໜຶ່ງ ທີ່ຢູ່ຫຼວງພະບາງ ທີ່ເຄີຍຮັກມັກກັບ ນາງຄຳຜິວ ມາກ່ອນໜ້ານີ້ ໄດ້ນຳມາເອົານາງຄຳຜິວຄືນ ແລະ ເກີດມີການຕໍ່ສູ້ກັນ, ສ່ວນທ້າວພັກ ກໍ່ໄດ້ສ້າງດ່ານຕ້ານ ກັນໄວ້ເປັນຈຸດໆ ຢູ່ທີ່ນ້ຳຕະແລ ແລະ ດ່ານ ດັ່ງກ່າວ ກໍ່ກາຍໄປຕາດຕະແລ ໃນປະຈຸບັນ.


ແຫລ່ງ: ອົງການພັດທະນາການທ່ອງທ່ຽວ

ແຫລ່ງທ່ອງທ່ຽວ: ຖໍ້າພະ ຫນອງປາຝາ


ຖໍ້າພະຕັ້ງຢູ່ເຂດບ້ານນາຊ້າງ ແຂວງຄໍາມ່ວນ ໄປຕາມເສັ້ນທາງເລກທີ12 ,ຫ່າງຈາກຕົວເມືອງທ່າແຂກປະມານ 14ກິໂລແມັດ ພາຍໃນຖໍ້າດັ່ງກ່າວມີພະພຸດຖະຮູບຈໍານວນຫຼວງຫລາຍເຖິງ229 ອົງ ເຊິ່ງລ້ວນແຕ່ມີອາຍຸເກົ່າແກ່ກວ່າ600ປີ, ຢູ່ດ້ານໃນຂອງຖໍ້າມີປາຝາທີ່ສວຍງາມ ຈື່ງໄດ້ຊື່ວ່າຖໍ້າຫນອງປາຝາ, ຖໍ້ານີ້ມີລັກສະນະເປັນຖໍ້າສອງຊັ້ງຢອງກັນຢູ່ຊັ້ນແມ່ນຖໍ້າແຫ້ງ, ມີພະພຸດທະຮູບຂະໜາດນ້ອຍ-ໃຫ່ຍເກົ່າແກ່ປະດິດສະຖານຢູ່ຕາມພັກຄ້າຍຄືຂັ້ນໄດແລະຖໍ້າດ້ານລຸ່ມແມ່ນມີນໍ້າໄຫລລອດອອກມາຈາກຫນອງປາຝາ, ທັງສອງມີຄວາມຍາວປະມານ200 ແມັດເຊິ່ງມີຄວາມງົດງາມຫລາຍ ເຕັມໄປດ້ວຍຫີນຍ້ອຍ ຫີນງອກ ຫລາກຫລາຍຂະຫນາດ ມີຮູບຮ່າງທີ່ແຕກຕ່າງກັນໄປ ຢັ່ງຢາຍໄປຕາມຖໍ້າ.

ຫໍໄຕປີດົກ

ທີ່ຕັ້ງ ແຫລ່ງທ່ອງທ່ຽວ: ບ້ານໜອງລໍາຈັນ, ໄລຍະຫ່າງຈາກຕົວເມືອງຈໍາພອນ ປະມານ 28 ກິໂລແມັດ, ການເຂົ້າເຖິງແຫລ່ງ: ສະດວກ, ປີຄົ້ນພົບ: ສັດຕະວັດທີ 17, ເປີດບໍລິການ: 2000.  ຫໍໄຕປີດົກສ້າງຂຶ້ນເມື່ອສັດຕະວັດທີ 17 ເປັນຕົ້ນມາ ຕໍ່ມາ ແມ່ນຍ່າທ່ານ ຫຼັກຄໍາພາ ເປັນຜູ້ນໍາພາສ້າງ ແລະ ປະຕິສັງຂອນຄືນໃໝ່ ໃນສັດຕະວັດທີ 19, ແຕ່ນັ້ນມາໄດ້ມີພໍ່ຂຽວ, ຍາທ່ານ ພູຈວງ, ຍາທ່ານ ພົມມາ ເປັນຜູ້ຮັກສາ ສືບຕໍ່ກັນມາຕາມລໍາດັບ ໃນປີ ຄສ 1990–2001, ໄດ້ມີໂຄງການຮັກສາ ໜັງສືຜຸກໃບລານ ໂດຍກະຊວງຖະແຫລງຂ່າວ ແລະ ວັດທະນະທໍາ ແລະ ໄດ້ຮັບທຶນໃນການຮັກສາ ແລະ ປົວແປງ ຈາກມູນນິທິໂຕໂຍຕ້າປະເທດຍີ່ປຸ່ນ, ລັດຖະບານສະຫະພັນເຢຍລະມັນ ຮ່ວມກັບ ພະແນກຖະແຫລງຂ່າວ ແລະ ວັດທະນະທໍາແຂວງ ແລະ ຫ້ອງການເມືອງຈໍາພອນ ໄດ້ລົງສໍາຫລວດ ພ້ອມຂຶ້ນບັນຊີຕົວຈິງ, ແຍກ ແລະ ຈັດລໍາດັບໄດ້ດັ່ງນີ້: ໜັງສືຜູກໃບລານທັງໜົດມີ 219 ເລື່ອງ, 326 ມັດ, 2,391 ຜູກ.

 

Photo by: phouxay THONKHAMMERNG

ເຮືອນເກົ່າວາງປາວ


ເຮືອນຫຼັງນີ້ຕັ້ງຢູ່ເຂດຄວບຄຸມຊົ່ວຄາວ ຂອງກຳລັງພິເສດວັງປາວ, ບ້ານລອ້ງແຈ້ງ ເມືອງລ້ອງແຈ້ງ ແຂວງໄຊສົມບູນ ປະກອບດ້ວຍ 21 ຫ້ອງ ໄດ້ຮັບການປຸກສ້າງໃນປີ ຄ.ສ 1966 ໂດຍນາຍພົນວັງປາວ ໃນປາງສົງຄາມ ເພື່ອເປັນເຮືອນພັກອາໄສ , ປັດຈຸບັນ ເຮືອນຫຼັງດັ່ງກ່າວນີ້ແມ່ນກາຍເປັນອະນຸສອນສະຖານທີ່ສໍາຄັນ ໃຫ້ແກ່ການສຶກສາອົບຮົມຄົນຮຸ່ນຫລັງ

ເຮືອນຫລັງນີ້ຈະໄດ້ຮັບການປັບປຸງບູລະນະໃຫ້ກາຍເປັນແຫລ່ງທ່ອງທ່ຽວຍຸດທະສາດທີ່ສຳຄັນທາງດ້ານປະຫວັດສາດຂອງແຂວງໄຊສົມບູນ ເມືອງລ້ອງແຈ້ງ.


ຂໍ້ມູນຈາກ: ປື້ມທ່ຽວທົ່ວລາວ

ຖໍ້ານໍ້າແອງຫລືຖໍ້າເກົາເລົາ


ຖໍ້ານໍ້າແອງຫລືຖໍ້າເກົາເລົາ ຕັ້ງຢູ່ເຂດບ້ານນໍ້າແອງ ເຊິ່ງຫ່າງຈາກເທດສະບານເມືອງວຽງພູຄາ ໄປປະມານ12ກິໂລແມັດ ສະຖານທີ່ນີ້ແມ່ນເປັນມໍລະດົກທາງທຳມະຊາດເຊິ່ງສອດແຊກຄຸນຄ່າທາງດ້ານວັດທະນະທຳທີ່ຂື້ນຊື່ຂອງແຂວງຫລວງນໍ້າທາ, ເຊິ່ງໄດ້ເກີດມາຫລາຍລ້ານປີແລ້ວ ຢູ່ໃນບໍລິເວນຖໍ້າດັ່ງກ່າວ ມີອຸໂມງຍາວ2ສາຍ ສາຍທີ່1 ເອີ້ນວ່າ ຖໍ້ານໍ້າລອດ ຫລືຖໍ້ານໍ້າແອງ ສ່ວນສາຍທີ່2ແມ່ນຖໍ້າເກົາເລົາຍາວຢຽດໄປຕາມສັນພູທີ່ມີປ່າໄມ້ດົກຫນາຂຽວງາມ ແລະອຸດົມສົມບູນໄປດ້ວຍຊີວະນາໆພັນ.

ທັງສອງຖໍ້ານີ້ເປັນຖໍ້າຫີນປູນທີ່ມີຄວາມເລິກເຂົ້າໄປໃນຫນ່ວຍພູ3ກິໂລແມັດກວ່າ, ຢູ່ດ້ານໃນຂອງຖໍ້າແມ່ນມີຫີນໂຟດຊິວ(Fossil) ທີ່ໄດ້ສ້າງສີລະປະແຫ່ງຄວາມງາມຕາມທຳມະຊາດ ຢູ່ຕາມຝາຜະຫນັງຖໍ້າ ປະກອບມີ ຫີນຍ້ອຍແລະນົມຜາຫີນ, ທີ່ມີລວດລາຍງາມສະດຸດຕາຫນ້າປະທັບໃຈຫລາຍທີ່ສຸດ.
ຫາກທ່ານໄດ້ໄປຫລວງນໍ້າທາແລ້ວຢ່າລືມໄປທ່ຽວຊົມຖໍ້າງາມໆນີ້ເດີ້ ເປີດໃຫ້ທ່ຽວຊົມເວລາ 8:30-16:00 ຖໍ້ານີ້ແມ່ນໄດ້ຮັບການຄຸ້ມຄອງໂດຍປະຊົນທ້ອງຖິ່ນ ເຊິ່ງເປັນຜູ້ບໍລິການແລະອໍານວຍຄວາມສະດວກໃຫ້ແກ່ນັກທ່ອງທ່ຽວຫາກທ່ານຢາກໄປທ່ຽວຊົມຕ້ອງມີປະຊາຊົນເປັນຜູ້ນໍາທາງເພື່ອຄວາມປອດໄພແລະສະດວກສະບາຍໃນການທ່ອງທ່ຽວ.

ທ່ຽວສາລະວັນ ພາກໃຕ້ຂອງລາວ

ແຂວງສາລະວັນແມ່ນແຂວງຫນື່ງທີ່ອຸດົມສົມບູນໄປດ້ວຍຊັບໃນດິນສິນໃນນໍ້າ, ແຂວງສາລະວັນປະກອບມີທັງຫມົດແປດເມືອງແລະມີປະຊາກອນ14ຊົນເຜົ່າອາໄສຢູ່, ແຂວງສາລະວັນມີຄວາມຫລາກຫລາຍທາງດ້ານຮີດຄອງປະເພນີ ເຊິ່ງສະແດງອອກຜ່ານການຮ້ອງລໍາທຳເພງ ເຊັ່ນ : ລໍາສາລະວັນ,ລໍາຄົງເຊໂດນ,ລໍາຕາລີມອນ ທີ່ມີຊື່ສຽງໂດ່ງດັງໄປທົ່ວປະເທດແລະຍັງມີລໍາອື່ນໆອີກ.

ນອກນັ້ນຍັງມີສະຖານທີ່ທ່ອງທ່ຽວອີກຫລາຍສະຖານທີ່ເຊັ່ນ: ນໍ້າຕົກຕາດເລາະ, ນໍ້າຕົກຕາດເທວະດາ, ນໍ້າຕົກຕາດສູງ, ນໍ້າຕົກຕາດໄມ້ເຮ້ຍ,ນໍ້າຕົກຕາດເສນ, ນໍ້າຕົກຕາດແກ້ງກຸ, ສີ່ພັນຂຸມບ້ານທ່າ, ຫັດຖະກຳຕໍ່າແພບ້ານຫ້ວຍຫູນແລະອີກຫລາຍສະຖານທີ່.ຫາກທ່ານໄປແຂວງສາລະວັນຢ່າລືມໄປທ່ຽວຊົມສະຖານທີ່ທ່ອງທ່ຽວບ້ານເພີ່ນເດີ້ພ້ອມຊິມອາຫານແຊບໆປີ້ງໄກ່ນາປົ່ງ.

ທີ່ມາ: ກິນທີ່ນີ້ ທ່ຽວທີ່ນີ້