ນະຄອນຫຼວງຄາດວ່າ ປີ 2018-2020 ຈະມີນັກທ່ອງທ່ຽວ 2 ລ້ານຄົນຕໍ່ປີ

ການ​ເປັນ​ເຈົ້າພາບ​ທີ່​ດີ​ປີ​ທ່ອງທ່ຽວ​ລາວ 2018 ທີ່​ນະຄອນຫຼວງວຽງ​ຈັນ ຄາດ​ຄະເນ​ຜົນ​ໄດ້​ຮັບ​ໃນການ​ເປັນ​ເຈົ້າພາບ​ທີ່​ດີ ເພື່ອ​ເປັນການ​ກະຕຸກ​ຊຸກຍູ້ ແລະ ເພີ່ມ​ທະວີຄວາມ​ເປັນ​ເຈົ້າ​ການ ​ຍົກ​ສູງຄວາມ​ເປັນ​ແບບຢ່າງ​ໃນ​ນ້ຳໃຈຮັກ​ຊາດ ​ຮັກ​ບ້ານ​ເກີດ​ເມືອງ​ນອນ ຮັກ​ນະຄອນຫຼວງຂອງ​ປະຊາຊົນນະຄອນຫຼວງ​ວຽງ​ຈັນ ໃນ​ຄວາມເອກອ້າງ​ທະ​ນົງ​ໃຈ​ຕໍ່​ມູນເຊື້ອ​ພິລະ​ອາດ​ຫານ​ຂອງ​ບັນພະບຸລຸດລາວ ໃນ​ການ​ນຳພາ​ຕໍ່ສູ້​ປົກ​ປັກຮັກສາ​ຜືນ​ແຜ່ນດິນ​ລາວ ເຊື້ອຊາດ​ລາວ ໃນ​ໄລຍະ​ປະຫວັດສາດ​ອັນ​ຍາວ​ນານ ພູມໃຈ​ຕໍ່ຄວາມ​ສວນ​ສົດ​ງົດ​ງາມ​ຂອງ​ທຳມະ​ຊາດ​ຕໍ່​ຄວາມ​ອຸດົມ​ຮັ່ງມີ ແລະ ຄວາມ​ເປັນ​ເອກະລັກ​ທາງ​ດ້ານວັດທະນະທຳ ຮີດຄອງ​ປະເພນີ ຕະຫຼອດ​ຮອດ​ອຸປະ​ນິໄສ​ໃຈຄໍ​ທີ່ອ່ອນໂຍນ​ຍິ້ມແຍ້ມ​ແຈ່ມ​ໃສ​ຂອງຄົນ​ນະຄອນຫຼວງ​ວຽງ​ຈັນ.

ເຫັນ​ເຖິງ​ພາບ​ພົດ​ແຫ່ງ​ຄວາມ​ມີສະ​ເຖຍ​ລະ​ພາບ​ທາງ​ດ້ານ​ການເມືອງ ແລະ ຄວາມ​ເຂັ້ມແຂງ​ໃນການ​ພັດທະນາ​ເສດຖະກິດ-ສັງຄົມ ຄວາມ​ເປັນ​ເອກະລັກ​ທາງດ້ານ​ວັດທະນະທຳ​ຂອງ​ນະຄອນຫຼວງ​ວຽງ​ຈັນ ໂດຍ​ພາຍ​ໃຕ້​ການນຳພາ​ຂອງ​ພັກ ແລະ ລັດ​ຖະບານ ຄະນະ​ພັກ ແລະ ອົງການປົກຄອງ​ນະຄອນຫຼວງ ຈະ​ເປັນ​ທີ່ຮູ້ຈັກ​ຂອງ​ຊາວ​ຕ່າງປະເທດ​ຫຼາຍຂຶ້ນ ແລະ ມີ​ຄວາມ​ເຂົ້າໃຈ​ດີ​ຕໍ່​ປະເທດ​ລາວ​ຄົນ​ລາວ​ຫຼາຍ​ຂຶ້ນ ສ້າງສິ່ງ​ຈູງ​ໃຈໃນ​ດ້ານ​ການ​ຄ້າ ແລະ ການ​ລົງທຶນ​ຂອງ​ຕ່າງປະເທດ ​ເຂົ້າສູ່​ນະຄອນຫຼວງ​ນັບ​ມື້​ນັບ​ເພີ່ມ​ຂຶ້ນນັບ​ທັງ​ຍູ້​ແຮງ​ການ​ລົງທຶນ​ຂອງພາຍ​ໃນ​ປະເທດ​ໃຫ້​ເຂັ້ມແຂງ ການ​ເປັນ​ເຈົ້າພາບ​ທີ່​ດີ​ປີ​ທ່ອງທ່ຽວ​ລາວ ຈະ​ເຮັດ​ໃຫ້​ຜົນ​ຂອງການ​ສົ່ງເສີມ​ການທ່ອງທ່ຽວ ໄດ້​ປະກອບສ່ວນ​ຊຸກຍູ້​ສົ່ງເສີມ​ຂະບວນ​ການ​ຕ່າງໆ ເປັນຕົ້ນ ການອະນຸ​ຮັກ​ປົກ​ປັກ​ຮັກສາ​ຮີດຄອງປະເພນີ​ວັດທະນະທຳ​ຂອງ​ປະຊາຊົນ​ບັນດາເຜົ່າ ໃນ​ນະຄອນຫຼວງວຽງ​ຈັນ ການ​ອະນຸ​ຮັກ​ຮັກສາ​ປ່າໄມ້ ສັດປ່າ ແລະ ສິ່ງແວດລ້ອມທາງ​ທຳ​ມະ​ຊາດ ໃຫ້​ມີ​ຄວາມ​ອຸດົມ​ສົມບູນ ຊຸກຍູ້​ການ​ຜະລິດ​ດ້ານຕ່າງໆ​ຂອງ​ປະຊາຊົນ ເຊັ່ນ: ການຜະລິດ​ທາງ​ດ້ານ​ກະສິກຳ ຫັດຖະກຳ ເຄື່ອງໃຊ້​ສອຍ​ຕ່າງໆ​ອັນ​ຈະເປັນ​ການ​ຍົກ​ລະດັບ​ຊີວິດ​ການເປັນ​ຢູ່​ຂອງ​ປະຊາຊົນ​ໃຫ້​ດີ​ຂຶ້ນ ສ້າງ​ວຽກ​ເຮັດ​ງານ​ທຳ​ໃຫ້​ແກ່​ສັງຄົມ​ເພີ່ມ​ຂຶ້ນ ກະຈາຍ​ລາຍ​ໄດ້​ໄປ​ສູ່ທ້ອງຖິ່ນເຂດ​ຫ່າງ​ໄກ​ສອກຫຼີກ ​ທີ່ມີ​ການທ່ອງທ່ຽວ​ໄປ​ເຖິງ ​ເປັນ​ການກະຕຸກ​ຊຸກຍູ້​ເຮັດ​ໃຫ້ການ​ຮ່ວມ​ມືລະຫວ່າງລັດ ແລະ ພາກ​ທຸລະກິດ ໃນ​ຂະແໜງ​ການທ່ອງທ່ຽວກັບ​ຂະແໜງການ​ປິ່ນ​ອ້ອມ ໄດ້​ມີຄວາມ​ແໜ້ນ​ແຟ້ນ ແລະ ກົມກຽວ​ກັນ​ຫຼາຍ​ຂຶ້ນ ຄາດ​ຄະເນ​ນັກທ່ອງ​ທ່ຽວ ແລະ ລາຍ​ຮັບ​ຈາກນັກ​ທ່ອງ​ທ່ຽວ​ແຕ່​ປີ 2018-2020 ໃຫ້​ໄດ້ 2 ລ້ານ​ຄົນ​ຕໍ່​ປີ ແລະ ສາມາດ​ສ້າງ​ລາຍ​ຮັບ​ທົ່ວ​ສັງຄົມຈາກ​ການທ່ອງທ່ຽວ​ໃຫ້​ໄດ້ 190-200 ລ້ານ​ໂດ​ລາ​ສະຫະລັດ.

ຂໍ້​ມູນ​ຈາກ​ແຜນ​ວຽກ​ຈຸດ​ສຸມຂອງ​ນະຄອນຫຼວງ​ວຽງ​ຈັນ ​ໃນການ​ເປັນ​ເຈົ້າພາບ​ທີ່​ດີ ປີ​ທ່ອງທ່ຽວ​ລາວ 2018.

ທ່ຽວຊົມຖ້ຳຕິ່ງ

ຖ້ຳ​ຕິ່ງ ​ເປັນ​ປູ​ຊະ​ນິ​ຍະ​ສະ­ຖານ­ທີ່​ ສຳ­ຄັນ ອອກ​ແບບ​ໂດຍ​ທຳ​ມະ​ຊາດ ມີ​ຄວາມ​ກົມ­ກຽວ​ກັນ​ດີ ລະ­ຫວ່າງ​ທີ່​ຕັ້ງ​ພູມ​ສັນ­ຖານ​ທີວ​ທັດ​ທາງ​ທຳ​ມະ​ຊາດ ຄື​ຕັ້ງ​ຢູ່​ຍ່ານ​ທີ່​ນ້ຳ​ອູ​ມາ​ໄຫຼ​ປ່ອງ​ໃສ່​ນ້ຳ­ຂອງ ບ້ານ​ປາກ​ອູ ແລະ ມີ​ພູ​ນ້ອຍ​ໜ່ວຍ​ໜຶ່ງ​ຕັ້ງ​ຢູ່​ຟາກ​ແມ່­ນ້ຳ​ຂອງ ຊຶ່ງ​ທຳ​ມະ​ຊາດ​ເຈາະ​ຮູ​ໃຫ້​ເປັນ​ຖ້ຳ ສອງ​ຖ້ຳ ຄື​ຖ້ຳ​ລຸ່ມ ແລະ ຖ້ຳ​ເທິງ ຫ່າງ​ກັນ​ສູງ​ປະ­ມານ​ຮ້ອຍ​ກ່ວ​າ​ແມັດ ມີ​ຕົ້ນ­ໄມ້​ສີ­ຂຽວ​ປົກ​ຫຸ້ມ​ຕະ­ຫຼອດ​ປີ ໃນ​ນັ້ນ​ພົ້ນ​ເດັ່ນ​ກ່ອນ­ໝູ່​ແມ່ນ​ຕົ້ນ​ຈຳ­ປາ ເມື່ອ​ຕົກ​ຍາມ​ໜ້າ​ຮ້ອນ ໃບ​ຈະ​ມີ​ໜ້ອຍ ແລະ ດອກ​ຈະ​ບານ​ຂາວ​ສະ­ພັ້ງ ດັ່ງ​ຈະ​ແຂ່ງ­ຂັນ​ທ້າ​ສາຍ­ຕາ​ຂອງ​ນັກ​ທ່ອງ​ທ່ຽວ ເພື່ອ​ປະ­ກາດ​ສັກ​ສີ​ແຫ່ງ​ຄວາມ​ເປັນ​ພາກ­ສ່ວນ​ໜຶ່ງ ຂອງ​ນະ­ຄອນ​ເກົ່າ​ແກ່​ຫຼວງ​ພະ​ບາງ ປາກ​ຖ້ຳ​ຕິ່ງ ມີ​ຍອຍ​ຫີນ​ບັງ ປາກ​ຖ້ຳ​ບ່ອນ​ຕ່ຳ ບ່ອນ​ສູງ ເໝືອນ​ດັ່ງ​ນັກ​ສິ­ລະ​ປິນ ບັນ­ຈົງ​ສ້າງ​ໃຫ້​ມີ​ຄວາມ​ແປກ​ແຫວກ​ແນວ ໃຫ້​ແກ່​ສະ­ຖານ­ທີ່​ດັ່ງ­ກ່າວ.

ຖ້ຳ​ຕິ່ງ ຖ້າ​ຫຼຽວ​ຈາກ​ບ້ານ​ປາກ​ອູ ກໍ​ຈະ​ເຫັນ​ຕິ່ງ​ຫີນ​ຢ່ອນ​ຢູ່​ປາກ​ຖ້ຳ ແລະ ຮາວ​ຂັ້ນ­ໄດ​ສີ­ຂາວ ລຽນ​ລັ່ນ​ຂຶ້ນ​ໄປ​ຕາມ​ວ່າງ​ຫີນ​ໄປ​ຍັງ​ຖ້ຳ​ລຸ່ມ​ຖ້ຳ​ເທິງ ໂດຍ​ສາ­ມາດ​ແນມ​ເຫັນ​ໄກ​ຈາກ​ສີ­ຂາວ​ຂອງ​ຂັ້ນ­ໄດ​ນີ້ ຊຶ່ງ​ປັດ­ຈຸ­ບັນ ເພິ່ນ​ໄດ້​ສ້າງ​ຂັ້ນ­ໄດ​ອີກ​ເບື້ອງ​ໜຶ່ງ ເພື່ອ​ລັດ​ຂຶ້ນ​ຖ້ຳ​ເທິງ​ໂດຍ​ກົງ.

ຕາມ​ການ​ບອກ­ເລົ່າ​ຂອງ​ຊາວ­ບ້ານ​ອາ­ວຸ­ໂສ​ທ່ານ​ໜຶ່ງ​ໃຫ້​ຮູ້​ວ່າ: ຖ້ຳ​ຕິ່ງ ແຕ່​ກ່ອນ​ສາດ­ສະ­ໜາ​ພຸດ​ຈະ​ຖືກ​ເຜີຍ­ແຜ່​ມາ​ເຖິງ​ນັ້ນ ຊາວ­ບ້ານ​ແຖບ​ນັ້ນ​ນັບ­ຖື​ຜີ ແລະ ຖື​ເອົາ​ຖ້ຳ​ນັ້ນ ເຮັດ​ພິ­ທີ­ກຳ​ຕ່າງໆ ຂອງ​ການ​ເຊື່ອ​ຖື​ເວ­ລາ​ນັ້ນ ແຕ່​ເມື່ອ​ມີ​ການ​ນັບ­ຖື​ສາດ­ສະ­ໜາ​ພຸດ ຖ້ຳ​ກໍ​ປ່ຽນ­ແປງ​ມາ​ຮັບ​ໃຊ້​ການ​ເຮັດ​ພິ­ທີ­ກຳ​ທາງ​ພຸດ ແລະ ນຳ​ເອົາ​ພຸດ​ທະ​ຮູບ​ມາ​ປະ­ດິດ­ສະ­ຖານ​ໃນ​ຖ້ຳ ພະ​ພຸດ​ທະ​ຮູບ​ນຳ​ມາ​ປະ­ດິດ­ສະ­ຖານ​ຫຼາຍ​ທີ່​ສຸດ ໃນ​ສະ­ໄໝ​ພະ​ເຈົ້າ​ໄຊ​ເຊດ​ຖາ ໂດຍ​ສະ­ເພາະ​ກ່ອນ​ຈະ​ຍ້າຍ​ນະ­ຄອນ­ຫຼວງ​ໄປ​ຕັ້ງ​ຢູ່​ວຽງ​ຈັນ ເມື່ອ ຄ.ສ 1560 ຫຼັງ​ຈາກ​ນັ້ນ ກໍ​ແມ່ນ​ພະ​ອາ­ຈານ​ວັດ​ຕ່າງໆ ນຳ​ມາ​ປະ­ດິດ­ສະ­ຖານ ແລະ ການ​ນຳ​ມາ​ບວດ ແລະ ປະ­ດິດ­ສະ­ຖານ​ຂອງ​ອອກ​ຕົນ​ຍາດ​ໂຍມ​ໄວ້​ນະ​ທີ່​ນີ້ ດັ່ງ​ນັ້ງ ຖ້ຳ​ຕິ່ງ ຈຶ່ງ​ມີ​ພະ​ພຸດ​ທະ​ຮູບ​ນ້ອຍ​ໃຫຍ່​ປາງ​ຕ່າງໆ​ຫຼາຍ​ອົງ ທັງ​ໄດ້​ກາຍ­ເປັນ​ແຫຼ່ງ​ທ່ອງ​ທ່ຽວ​ສຳ­ຄັນ​ອີກ​ແຫ່ງ​ໜຶ່ງ ຂອງ​ແຂວງ​ຫຼວງ​ພະ​ບາງ ການ​ມາ​ທ່ຽວ​ຖ້ຳ​ຕິ່ງ ນອກ­ຈາກ​ຈະ​ເຫັນ​ທຳ​ມະ​ຊາດ ສວຍ​ງາມ ສາຍ​ນ້ຳ​ໃສ ປ່າ­ໄມ້​ຂຽວ ສາຍ­ພູ​ຍາວ ແລ້ວ ຍັງ​ເປັນ​ການ​ມາ​ທ່ຽວ ພ້ອມ​ກັບ​ການ​ເຮັດ­ບຸນ ເພື່ອ​ຄວາມ​ເປັນ​ສິ­ລິ​ມຸງ­ຄຸນ​ແກ່​ຊີ­ວິດ​ອີກ​ດ້ວຍ.

ມາ​ທ່ຽວ​ຖ້ຳ​ຕິ່ງ​ໃນ​ປັດ­ຈຸ­ບັນ ບໍ່​ເໝືອນ​ແຕ່​ກ່ອນ ຍ້ອນ​ວ່າ​ສາ­ມາດ​ມາ​ໄດ້​ທັງ​ທາງ­ນ້ຳ ແລະ ບາງ​ບົກ ທັງ​ບໍ່​ຕ້ອງ​ກັງ­ວົນ​ໃຈ​ວ່າ​ຈະ​ບໍ່​ມີ​ຮ້ານ​ອາ­ຫານ ດຽວ­ນີ້​ມີ​ທັງ​ຮ້ານ​ຕັ້ງ​ງອຍ​ຝັ່ງ ແລະ ຮ້ານ​ເຮືອນ​ແພ ພ້ອມ​ບໍ­ລິ­ການ​ແກ່​ແຂກ​ຄົນ​ຕາມ​ອັດ​ທະ​ຍາ​ໃສ ໂດຍ​ສະ­ເພາະ​ຈະ​ໄດ້​ຢູ່​ໃກ້ໆ​ກັບ​ທຳ​ມະ​ຊາດ ທີ່­ຢູ່​ທັງ​ສອງ​ແຫຼ່ງ​ນ້ຳ​ຢ່າງ​ມີ​ຄວາມ­ສຸກ.

ມະຫັດສະຈັນຖ້ຳກອງລໍ

ຖໍ້າກອງລໍ: ເປັນແຫຼ່ງທ່ອງທ່ຽວທາງທໍາມະຊາດ ທີ່ມີຊື່ສຽງລະດັບແນວໜ້າຂອງໂລກ ຍ້ອນວ່າເປັນຖໍ້າທີ່ມີສາຍນໍ້າຫີນບູນ ໄຫຼຜ່ານອຸໂມງຂອງພູຫີນບູນເຂົ້າໄປ ແລ້ວ ປ່ອງໃສ່ແມ່ນໍ້າຂອງ. ຖໍ້າກອງລໍຕັ້ງຢູ່ລະຫວ່າງບ້ານນາຕານ ແລະ ບ້ານກອງລໍ, ເມືອງຄູນຄຳ ເຊິ່ງຫ່າງຈາກເມືອງ 46 ກິໂລແມັດ. ​ບັນດານັກ ທ່ອງທ່ຽວ ສາມາດ ເດີນທາງຈາກ ເສັ້ນທາງເລກທີ 13 ເຂົ້າໄປຕາມ ເສັ້ນທາງເລກ 8 ອາດຈະຮອດບ້ານຄູນຄຳ ເຊິ່ງຫ່າງຈາກ ຖ້ຳກອງລໍ 40 ກິໂລແມັດ. ສຳລັບທາງເລືອກອື່ນ ທີ່ເໝາະສົມກັບຜູ້ ມັກການປະຈົນໄພ ແມ່ນ ຂີ່ເຮືອຈັກຫາງຍາວ ລ່ອງໄປຕາມ ສາຍນ້ຳຫີນບູນຈາກບ້ານນາ. ຈັ່ງໃດກໍ່ຕາມ, ບັນດານັກທ່ອງທ່ຽວສາມາດພັກ ແຮມຄືນນຳເຮືອນຊາວບ້ານ ບ້ານນາຫີນ, ບ້ານນາຕານ ແລະ ບ້ານກອງລໍ. ຖໍ້າກອງລໍ ມີຄວາມຍາວປະມານ 7.500 ແມັດ, ເຊິ່ງມີຄວາມກ້ວາງປະມານ 30 ແມັດ ແລະ ສູງນັບແຕ່ 20 ແມັດຫາ 100 ແມັດ. ຖໍ້າກອງລໍ ເປັນ ຖໍ້າທີ່ສວຍງາມ ແລະ ມີສະເໜ່ດຶງດູດທີ່ສຸດ ເພາະທາງໃນຖໍ້າ ມີແກ້ງ, ຫີນຍ້ອຍ, ຫາດຊາຍ ທີ່ສວຍງາມຈຳນວນ 20 ກວ່າຈຸດ ເພື່ອໃຫ້ນັກທ່ອງທ່ຽວໄດ້ຊົມ. ບັນດານັກທ່ອງທ່ຽວສາມາດຂີ່ເຮືອລອດຜ່ານເຂົ້າໄປໃນຖ້ຳ ໄດ້ຕະຫຼອດ.

ໃນລະດູແລ້ງ ເປັນໄລຍະ ເໝາະສົມທີ່ສຸດ ເພື່ອຊົມຮູບໂສມສີສັນຂອງຖ້ຳ ໂດຍການຂີ່ເຮືອເຂົ້າໄປພາຍໃນຖ້ຳ ແລ້ວກໍ່ສາມາດລົງຈາກເຮືອແວ່ທ່ຽວຊົມ ທິວທັດ ແລະ ຍ່າງເລາະຫຼິ້ນຕາມ ຫາດຊາຍຂາວ ດ້ວຍການສຳ ພັດກັບອາກາດທີ່ເຢັນ ສະບາຍ. ພາຍໃນຖ້ຳນັກທ່ອງທ່ຽວຈະມີຄວາມສຸກ ພາຍໃຕ້ບັນຍາກາດ “ພາຍໃຕ້ຄວາມ ສວຍງາມ”. ບົນເສັ້ນທາງພາຍໃນຖ້ຳມີຫີນ ຍ້ອຍ, ໂງ່ນຫີນ ແລະ ຫາດ ຊາຍຈຳນວນຫຼວງຫຼາຍອັນສວຍສົດງົດງາມເປັນທີ່ຈັບອົກຈັບໃຈທີ່ສຸດ. ຖໍ້າກອງລໍ-ນາຕານ ຖືກຄົ້ນພົບແຕ່ສະ​ຕະວັດທີ XVI, ໃນຊຸມປີ 1960 ເລີ່ມນຳໃຊ້ ເຮືອຫາງຍາວເປັນພາຫະນະເດີນທາງ ໄປ-ຜ່ານຖ້ຳແຫ່ງນີ້ ຂອງຄົນທ້ອງຖິ່ນ. ການສໍາຫຼວດຢ່າງຈິງຈັງ ເປັນຄັ້ງທໍາອິດ ເລີ່ມໃນເດືອນກຸມພາ 1995 ແລະ ພົບວ່ານັກທ່ອງທ່ຽວ ສາມາດ ຂີ່ເຮືອຈັກຫາງ ຍາວແລ່ນລອດເຂົ້າຖໍ້າ ແລະ ຜ່ານອອກອີກດ້ານອື່ນ ເຊິ່ງຫຼຸດຜ່ອນເວລາໃນການສັນຈອນຈາກ 2 ຊົ່ວໂມງມາເປັນປະມານ 1 ຊົ່ວໂມງ.  ​

ດ້ວຍເຫດນີ້, ອຸໂມງຂອງຖ້ຳນີ້ ຈຶ່ງເປັນເສັ້ນທາງການທ່ອງທ່ຽວທາງເຮືອ ໂດຍເກີດຂຶ້ນ ແລະ ຖືກນໍາໃຊ້ ທົ່ວໄປນັບແຕ່ວັນທີ 12 ມັງກອນ 2002 ເປັນຕົ້ນມາ. ປະຈຸບັນນີ້ອຸໂມງ ລອດ ຖ້ຳສາຍນີ້ ຈຶ່ງເປັນເສັ້ນທາງຄົມມະນະຄົມ ເຊື່ອມຕໍ່ລະຫວ່າງບ້ານກອງລໍ ຫາບ້ານນາຕານ. ຖໍ້າກອງລໍ ມີຄວາມໝາຍມາຈາກ “ກອງທັບລໍ” ບໍ່ແມ່ນ “ກອງຫຼໍ່” ຍ້ອນເຫດຜົນວ່າ ຄຳວ່າ “ກອງ” ມາຈາກ “ກອງທັບ” ສ່ວນ “ລໍ” ມາຈາກ “ລໍຖ້າ” ເມື່ອລວມເຂົ້າກັນຈຶ່ງເອີ້ນຖ້ຳກອງລໍ ຈົນເທົ່າທຸກວັນນີ້. ໃນຂະນະນັ້ນ, ອານາຈັກລາວລ້ານຊ້າງ ໄດ້ທຳການຕໍ່ສູ້ກັບກອງທັບສັກ ດີນາສະ ຫຍາມ ທີ່ເຂົ້າມາຮຸກຮານ ດ້ວຍເຫດນີ້ ມັນຈຶ່ງເປັນທີ່ມາຂອງຖ້ຳກອງລໍແຕ່ນັ້ນມາ ແລະ ມີຄວາມໝາຍເປັນ “ກອງທັບລໍຖ້າ” ນັ້ນເອງ.​​​​​

 

ແຂວງ ບໍລິຄຳໄຊ ຈັດພິທີເປີດປີທ່ອງທ່ຽວລາວ 2018 ໃນວັນທີ 28 ທັນວາ 2017

ແຂວງ ບໍລິຄຳໄຊ ຈັດພິທີເປີດປີທ່ອງທ່ຽວລາວ 2018 ໃນວັນທີ 28 ທັນວາ 2017 ພ້ອມກັບການເປີດງານບຸນນະມັດສະການພະທາດພະບາດໂພນສັນ ຢູ່ເມືອງ ທ່າພະບາດ ປະຈຳປີ 2017 ຊຶ່ງເປັນກິດຈະກຳຫລັກຂອງແຂວງໃນໂອກາດປີທ່ອງທ່ຽວລາວ 2018 ໂດຍການໃຫ້ກຽດເຂົ້າຮ່ວມຂອງ ທ່ານ ກອງແກ້ວ ໄຊສົງຄາມ, ເຈົ້າແຂວງຯ ບໍລິຄຳໄຊທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ.


ທ່ານ ເຄນ ລໍມະນີ, ຫົວໜ້າພະແນກ ຖະແຫລງຂ່າວ ວັດທະນະທຳ ແລະທ່ອງທ່ຽວແຂວງ ບໍລິຄຳໄຊ ທັງເປັນ ຄະນະຮັບຜິດຊອບຊີ້ນຳ ລະດັບແຂວງໃນການຈັດປີທ່ອງທ່ຽວລາວ 2018 ທີ່ແຂວງ ບໍລິຄຳໄຊ ກ່າວລາຍງານ ວ່າ: ການເປີດປີທ່ອງທ່ຽວລາວ 2018 ເປັນກິດຈະກຳສຳຄັນທີ່ສຸດ ເພາະເປັນການຊຸກຍູ້ການຈັດຕັ້ງປະຕິບັດແນວທາງນະໂຍບາຍ, ກົດໝາຍ ລະບຽບຫລັກການຄຸ້ມຄອງ, ການພັດທະນາ ແລະ ສົ່ງເສີມການທ່ອງ ທ່ຽວທຳມະຊາດ, ປະຫວັດສາດ ແລະ ວັດທະນະທຳ, ສຸມໃສ່ການພັດທະນາການທ່ອງທ່ຽວຢູ່ແຂວງ ບໍລິຄຳໄຊໃຫ້ມີຄວາມສາມາດຮອງຮັບນັກທ່ອງທ່ຽວໃນປັດຈຸບັນ ແລະ ອະນາຄົດ, ສ້າງຈິດສຳນຶກ ແລະ ຍົກສູງຄວາມຮູ້ຂອງສັງຄົມ ກໍຄື ຊາວແຂວງ ບໍລິຄຳໄຊກ່ຽວກັບບົດບາດ ແລະ ຄວາມສຳຄັນຂອງວຽກງານການທ່ອງທ່ຽວທີ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ, ທັງເປັນການສົ່ງເສີມທຸລະກິດຂະໜາດນ້ອຍ ແລະ ກາງ ແລະ ຂະແໜງການຕ່າງຯ ທີ່ກ່ຽວຂ້ອງໃຫ້ໄດ້ຮັບການພັດທະນາຂຶ້ນເລື້ອຍຯ.

ແຂວງ ບໍລິຄຳໄຊ ຖືເອົາການທ່ອງທ່ຽວເປັນບຸລິມະລິດໜຶ່ງເພື່ອຊຸກຍູ້ການພັດທະນາເສດຖະກິດ-ສັງຄົມ ກໍຄື ການສ້າງລາຍຮັບທົງກົງ ແລະ ທາງອ້ອມ ແລະ ສ້າງວຽກເຮັດງານທຳໃຫ້ປະຊາຊົນພາຍໃນແຂວງ ເຮັດໃຫ້ວຽກງານນີ້ໄດ້ຮັບການພັດທະນາຢ່າງຕໍ່ເນື່ອງ. ປີ 2012 ມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ອງທ່ຽວພາຍໃນແຂວງ ບໍລິຄຳໄຊ 135.735 ຄົນ, ສ້າງລາຍຮັບໄດ້ 4.132.050 ໂດລ່າສະຫະລັດ, ປີ 2015 ເພີ່ມຂຶ້ນເປັນ 279.605 ຄົນ, ສ້າງລາຍຮັບໄດ້ 8.388.150 ໂດລ່າສະຫະລັດ. ຄາດວ່າໃນປີ 2018 ຈະເພີ່ມຂຶ້ນເປັນ 300.000 ກ່ວາຄົນ ແລະ ຈະສ້າງລາຍຮັບໄດ້ 9 ລ້ານໂດລ່າສະຫະລັດ ແລະ ຈະເພີ່ມຂຶ້ນເປັນ 400.000 ກ່ວາຄົນໃນປີ 2020 ແລະ ຈະສ້າງລາຍຮັບໄດ້ 12.000.0000 ໂດລ່າສະຫະລັດ.

ການຈັດປີທ່ອງທ່ຽວລາວໃນຄັ້ງນີ້ແມ່ນເປັນຄັ້ງທີ 3 ທີ່ແຂວງ ບໍລິຄຳໄຊ ຈັດຂຶ້ນ ຫລັງຈາກເຄີຍຈັດຂຶ້ນມາແລ້ວ 2 ຄັ້ງໃນປີ 1999-2000 ແລະ ປີ 2011-2012.
ທ່ານ ກອງແກ້ວ ໄຊສົງຄາມ, ເຈົ້າແຂວງຯ ບໍລິຄຳໄຊ ໄດ້ໃຫ້ກຽດກ່າວເປີດປີທ່ອງທ່ຽວລາວ 2018 ທີ່ແຂວງ ບໍລິຄຳໄຊ ໃນຄັ້ງນີ້ ພ້ອມທັງເຊີນຊວນນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າໄປທ່ອງທ່ຽວເພື່ອສຳຜັດຄວາມສວຍງາມທາງທຳມະຊາດ ແລະ ວັດທະນະທຳທີ່ເປັນເອກະລັກ ແລະ ຮີດຄອງປະເພນີອັນດີງາມຂອງແຂວງ ບໍລິຄຳໄຊ ດ້ວຍຄວາມເບີກບານມ່ວນຊື່ນ ແລະ ມີຄວາມສຸກຕະ ຫລອດປີ 2018 ແລະ ຕະຫລອດໄປ.


ສຳລັບກິດຈະກຳທ່ອງທ່ຽວລາວ-ທ່ອງທ່ຽວແຂວງ ບໍລິຄຳໄຊ ປີ 2018 ມີ 20 ກ່ວາກິດຈະກຳ ເປັນຕົ້ນ: ກິດຈະກຳເປີດຫາດຊາຍຂາວ ພ້ອມທັງຊ່ວງເຮືອປິດນ່ານນ້ຳຢູ່ບ້ານໂດນ ເມືອງ ປາກຊັນ, ເປີດຟາມພູຕາເວັນຢູ່ເມືອງ ທ່າພະບາດ, ຈັດຄາລະວານລົດໃຫຍ່ໄປສູ່ດິນແດນປະຫວັດສາດບ້ານເກີດຂອງ ທ່ານ ສີສົມພອນ ລໍວັນໄຊ, ງານໝາກນັດຫວານເຂດບ້ານເລົ່າ-ວຽງຄຳ. ນອກຈາກນີ້ ຍັງມີກິດ ຈະກຳຕ່າງໆ ທີ່ຕິດພັນກັບງານວັດທະນະທຳ, ງານປະເພນີຂອງແຂວງບໍລິຄຳໄຊ ເປັນຕົ້ນ: ງານບຸນກິນຈຽງຂອງເຜົ່າມົ້ງ, ບຸນປີໃໝ່ຂອງເຜົ່າກຶມມຸ, ງານບຸນຊ່ວງເຮືອປະເພນີປະຈຳປີ ແລະ ອື່ນໆ.


ສຳລັບງານບຸນນະມັດສະການພະທາດພະບາດໂພນສັນ ເມືອງ ທ່າພະບາດ ປະຈຳປີ 2017 ຊຶ່ງເປັນກິດຈະກຳຫລັກຂອງແຂວງ ບໍລິຄຳໄຊ ໃນໂອກາດປີທ່ອງທ່ຽວລາວ 2018 ແມ່ນດຳເນີນແຕ່ວັນທີ 28 ທັນວັນ 2017 ຫາ ວັນທີ 1 ມັງກອນ 2018 ຈິ່ງສຳເລັດ ພາຍໃນງານມີຫຼາຍກິດຈະກຳປິ່ນອ້ອມ ເປັນຕົ້ນ: ງານຕະຫຼາດນັດ-ວາງສະແດງສິນຄ້າ ແລະ ຜະລິດຕະພັນການທ່ອງທຽ່ວ ໂດຍເນັ້ນໃສ່ສິນຄ້າໜຶ່ງເມືອງໜື່ງຜະລິດຕະພັນ ຫລື ສິນຄ້າ ODOP, ກາບໄຫ້ວຮອຍພະບາດ, ສະແດງສີລະປະວັນນະຄະດີ ແລະ ກິດຈະກຳອື່ນໆ ອີກ.

ໂດຍ: ມົດແດງນ້ອຍ

ແຂວງອຸດົມໄຊຖະແຫຼ່ງຂ່າວ ການຈັດກິດຈະກໍາສະເຫຼີມສະຫຼອງປີທ່ອງທ່ຽວລາວ 2018 ຂອງແຂວງ

ພິທີຖະແຫຼງຂ່າວຈັດງານສະເຫຼີມສະຫຼອງປີທ່ອງທ່ຽວລາວ 2018 ທີ່ແຂວງອຸດົມໄຊ ໄດ້ຈັດຂຶ້ນໃນຕອນບ່າຍຂອງວັນທີ 22 ທັນວາ 2017 ນີ້ ຢູ່ທີ່ຫ້ອງປະຊຸມ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ໂດຍມີ ທ່ານ ພອນສະຫວັນ ພັນທະວິຈິດ ຄະນະປະຈຳພັກແຂວງ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ບັນດາທ່ານການນໍາພັກ-ລັດ, ຫົວໜ້າພະແນກການ, ພະນັກງານສອງກອງບັນຊາການທະຫານ, ຕຳຫຼວດ,ລັດວິສາຫະກິດ, ຜູ້ປະກອບການທຸລະກິດບໍລິການດ້ານ ການທ່ອງທ່ຽວ,ສື່ມວນຊົນ ແລະ ພໍ່ແມ່ປະຊາຊົນພາຍໃນເທດສະບານແຂວງເຂົ້າຮ່ວມຢ່າງຫຼວງຫຼາຍ.


ໂອກາດດັ່ງກ່າວ ທ່ານ ສົມຈິດ ປັນຍາສັກ, ຮອງເຈົ້າແຂວງອຸດົມໄຊ ປະທານຄະນະຊິ້ນໍາໃນການຈັດງານສະເຫຼີມສະຫຼອງປີທ່ອງທ່ຽວລາວ 2018 ທີ່ອຸດົມໄຊໄດ້ໃຫ້ກຽດຖະແຫຼງຂ່າວການຈັດງານສະເຫຼີມສະຫລອງປີທ່ອງທ່ຽວລາວ 2018 ທີ່ແຂວງອຸດົມໄຊຢ່າງເປັນທາງການ ບາງຕອນທ່ານກ່າວວ່າ ຕາງໜ້າໃຫ້ອົງການປົກຄອງແຂວງ ແລະ ປະຊາຊົນບັນດາເຜົ່າທຸກທົ່ວໜ້າ ມີຄວາມຮູ້ສືກພາກພູມໃຈເປັນຢ່າງຍີ່ງ ແລະ ເປັນກຽດຢ່າງສູງ ແຂວງອຸດົມໄຊ ມີພູມລຳເນົາຕັ້ງຢູ່ຈຸດໃຈກາງບັນດາແຂວງ ພາກເໜືອຂອງ ສປປລາວ ຈະໄດ້ຈັດງານສະເຫຼີມສະຫຼອງປີທ່ອງທ່ຽວລາວ 2018 ພ້ອມກັບບັນດາແຂວງໃນຂອບເຂດທົ່ວປະເທດ, ຊື່ງເປັນເຫດການທີ່ມີຄວາມໝາຍຄວາມສຳຄັນເປັນຢ່າງຍິ່ງ, ພວກເຮົາມີຄວາມເອກອ້າງທະນົງໃຈ ທີ່ຈະໄດ້ໂຄສະນາເຜີຍແຜ່ ກ່ຽວກັບວັດທະນະທຳ, ຮິດຄອງປະເພນີອັນດີງາມ, ວິຖີການດຳລົງຊີວິດຂອງຊາວອຸດົມໄຊ ຜະລິດຕະພັນການທ່ອງທ່ຽວ ແລະ ສະຖານທີ່ແຫຼ່ງທ່ອງທ່ຽວອັນໂດດເດັ່ນຂອງແຂວງ ທາງດ້ານວັດທະນະທຳ, ທຳມະຊາດ ແລະ ປະຫວັດສາດ ເພື່ອສ້າງສິ່ງຈູງໃຈ ແລະ ດືງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດເຂົ້າມາທ່ອງທ່ຽວ ນັບມື້ນັບເພີ່ມຂືນ.
ແຂວງອຸດົມໄຊ ເປັນແຂວງທີ່ຕັ້ງຢູ່ໃນດິນແດນໃຈກາງພາກເໜືອຂອງລາວທີ່ອຸດົມສົມບູນໄປດ້ວຍພູຜ່າປ່າໄມ້ ແມ່ນ້ຳລຳເຊ, ມີວັດທະນະທຳຮີດຄອງປະເພນີອັນດີງາມທີ່ເປັນເອກະລັກ, ທົ່ວແຂວງມີເນື້ອທີ່ທັງໝົດ15,370 ກິໂລຕາແມັດ,ປະກອບດ້ວຍ 7 ເມືອງ, ມີພົນລະເມືອງທັງໝົດ 376,000 ຄົນ, ຍິງ 152,900 ຄົນ, ປະຊາຊົນສ່ວນໃຫຍ່ແມ່ນຖືອາຊີບທຳການຜະລິດກະສິກຳ, ປູກຝັງລ້ຽງສັດ ແລະ ບໍລິການ.


ໂດຍອີງໃສ່ທ່າແຮງ ແລະ ສະພາບຈຸດພິເສດອັນໂດດເດັ່ນຂອງແຂວງ ການນຳຈື່ງໄດ້ຖືເອົາ ການທ່ອງທ່ຽວເປັນບູລິມະສີດຂະແໜງການເສດຖະກິດໜຶ່ງ ທີ່ມີການຂະຫຍາຍຕົວຢ່າງວ່ອງໄວ ແລະ ກວ້າງຂວາງ ຢູ່ບັນດາປະເທດໃນໂລກ ເພື່ອຊຸກຍູ້ການພັດທະນາເສດຖະກິດ-ສັງຄົມ ສ້າງວຽກເຮັດງານທຳໃຫ້ປະຊາຊົນບັນດາເຜົ່າ ທີ່ມີລາຍໄດ້ ນຳເງິນຕາຕ່າງປະເທດ ເຂົ້າມາແຂວງ ເປັນຕົ້ນແມ່ນການຜະລິດກະສິກຳ, ຫັດຖະກຳໂດຍຖືເປັນການຜະລິດ ແລະ ສົ່ງອອກກັບທີ່ ແລະ ກະຈ່າຍໄປສູ່ຂົງເຂດ ຫ່າງໄກສອກຫຼີກ.
ພ້ອມດຽວກັນນັ້ນການນຳຂັ້ນແຂວງ ຍັງຖຶເອົາວຽກງານພັດທະນາ ແລະ ສົ່ງເສີມການທ່ອງທ່ຽວເປັນການຂະຫຍາຍຕົວ ແລະ ເປີດກ້ວາງການຮ່ວມມື ກັບພາຍນອກອີກດ້ວຍ ແລະໄດ້ກຳນົດທິດທາງໃນການປົກປັກຮັກສາ ການທ່ອງທ່ຽວທຳມະຊາດ, ປະຫວັດສາດ ແລະ ວັດທະນະທຳ, ດັ່ງໜຶ່ງຄຳຂັວນຂອງປີທ່ອງທ່ຽວລາວ 2018 ທີ່ວ່າ “ທ່ອງທ່ຽວ ເມືອງລາວ ຮຽນຮູ້ປະຫວັດສາດ, ຊົມຊຶ່ນທໍາມະຊາດ ແລະ ອະນຸລັກສົ່ງເສີມວັດທະນະທໍາ”.
ໃນຊຸມປີຜ່ານມາ ການທ່ອງທ່ຽວພາຍໃນແຂວງ ໄດ້ມີທ່ວງທ່າຂະຫຍາຍຕົວຢ່າງຕໍ່ເນື່ອງ ເຮັດໃຫ້ມີນັກທ່ອງທ່ຽວເຂົ້າມາທ່ອງທ່ຽວພາຍໃນແຂວງ ນັບມື້ນັບຫຼາຍຂື້ນ. ໃນປີ 2000 ມີນັກທ່ອງທ່ຽວເຂົ້າມາທີ່ເຂົ້າມທ່ຽວແຂວງອຸດົມໄຊ 34.254 ຄົນ,ມີລາຍຮັບ 775.230ໂດລາ ແລະ ຄາດຄະເນປີ 2018 ຈະມີນັກທ່ອງທ່ຽວເຖິງ250.000 ຄົນ, ຈະມີລາຍຮັບ 11.115.360 ໂດລາ. ສະເພາະປີທ່ອງທ່ຽວ 2018 ນີ້ພະຍາຍາມດຶງດູດນັກທ່ອງທ່ຽວເຂົ້າມາບໍ່ໃຫ້ລຸດ 3-4 ແສນຄົນ. ສ້າງລາຍຮັບເຂົ້າແຂວງປະມານ 15-20 ລ້ານໂດລາ. ແຂວງອຸດົມໄຊໄດ້ຈັດງານມະຫາກຳວັດທະນະທຳ 2009 ແລະ ງານມະຫາກຳກິລາແຫ່ງຊາດຄັ້ງທີ່ທີ່ XI ປີ 2014 ສອງຄັ້ງ ເພື່ອເປັນການສົ່ງເສີມໂຄສະນາ ແລະ ດຶງດູດນັກທ່ອງທ່ຽວເຂົ້າມາໃຫ້ຫຼາຍຂື້ນ ເພື່ອເຫັນໄດ້ທ່າແຮງ ແລະ ຄວາມເປັນໄປໄດ້ໃນການພັດທະນາທ່ອງທ່ຽວໃນອານາຄົດ ດັ່ງນັ້ນ ການນຳຂອງແຂວງ ຈື່ງອານຸມັດໃຫ້ຈັດປີທ່ອງທ່ຽວຂື້ນໃນປີ 2018.
ນອກຈາກນັ້ນ ສະເພາະບັນດາເມືອງ ຍັງໄດ້ສ້າງກິດຈະກຳຕ່າງໆເຊັ່ນ: ການທ່ອງທ່ຽວທາງດ້ານກະສິກຳ ແລະ ທຳມະຊາດ, ບຸນປະເພນີກິນຈຽງຂອງເຜົ່າມົ້ງ ແລະ ບຸນປະເພນີຂອງເຜົ່າກືມມຸ ເຕັດໜຶມ ເມືອງໄຊ, ບຸນປະເພນີຂອງເຜົ່າລື້ ບ້ານຍໍ້ ເມືອງແບງ, ບຸນອອກພັນສາຊ່ວງເຮືອ ເມືອງປາກແບງ ແລະ ເມືອງຮຸນ.
ການກະກຽມຈັດງານສະເຫຼີມສະຫຼອງປີທ່ອງທ່ຽວລາວ 2018 ນີ້ແຂວງອຸດົມໄຊ ຈະໄດ້ເອົາໃຈໃສ່ໃນການປັບປຸງ ແລະ ພັດທະນາວຽກງານການທ່ອງທ່ຽວ, ພັດທະນາຄຸນນະພາບຂອງການບໍລິການຕ່າງໆ, ຊຸກຍູ້ສົ່ງເສີມໃຫ້ບັນດາຫົວໜ່ວຍທຸລະກິດຈາກທັງພາກລັດ, ພາກເອກະຊົນ ແລະ ບັນດາອົງການຈັດຕັ້ງຕ່າງໆ ໄດ້ມີສ່ວນຮ່ວມເຂົ້າໃນການຜະລິດເຄື່ອງທີ່ລະນຶກ, ການໂຄສະນາຜ່ານສື່ຕ່າງໆ ທັງພາຍໃນ ແລະ ຕ່າງປະເທດ ໃຫ້ມີຄວາມພ້ອມ ເພື່ອຮອງຮັບ ແລະ ອຳນວຍຄວາມສະດວກໃຫ້ແກ່ນັກທ່ອງທ່ຽວ ທີ່ຈະເຂົ້າມາທ່ຽວ ໃນປີ 2018 ນີ້.

ຟັງການປະຄໍາຄິດຄໍາເຫັນ ແລະ ແລກປ່ຽນທັດສະນະບາງດ້ານກ່ຽວກິດຈະກໍາທ່ອງທ່ຽວທີ່ເມືອງວັງວຽງ ທີ່ມີແຕ່ການເກັບເງິນກະປິດກະປີ່ຈົນເຮັດໃຫ້ນັກທ່ອງທ່ຽວລໍາຄານ ແລະ ອາດສົ່ງຜົນກະທົບຕໍ່ພາບລວມຂອງນະໂຍບາຍສົ່ງເສີມການທ່ອງທ່ຽວ

ຟັງການປະຄໍາຄິດຄໍາເຫັນ ແລະ ແລກປ່ຽນທັດສະນະບາງດ້ານກ່ຽວກິດຈະກໍາທ່ອງທ່ຽວທີ່ເມືອງວັງວຽງ ທີ່ມີແຕ່ການເກັບເງິນກະປິດກະປີ່ຈົນເຮັດໃຫ້ນັກທ່ອງທ່ຽວລໍາຄານ ແລະ ອາດສົ່ງຜົນກະທົບຕໍ່ພາບລວມຂອງນະໂຍບາຍສົ່ງເສີມການທ່ອງທ່ຽວ

ຟັງການປະຄໍາຄິດຄໍາເຫັນ ແລະ ແລກປ່ຽນທັດສະນະບາງດ້ານກ່ຽວກິດຈະກໍາທ່ອງທ່ຽວທີ່ເມືອງວັງວຽງ ທີ່ມີແຕ່ການເກັບເງິນກະປິດກະປີ່ຈົນເຮັດໃຫ້ນັກທ່ອງທ່ຽວລໍາຄານ ແລະ ອາດສົ່ງຜົນກະທົບຕໍ່ພາບລວມຂອງນະໂຍບາຍສົ່ງເສີມການທ່ອງທ່ຽວ

Posted by ຄລິບດັງ ຂ່າວເດັ່ນ.com on Monday, December 25, 2017

ລ້ອງແຈ້ງ ແຂວງໄຊສົມບູນ ດິນແດນທີ່ເລີກລັບ ຊວນໃຫ້ໄປຄົ້ນຫາໃນຄວາມເປັນມາ ເພື່ອເປັນຂໍ້ມູນໃນການສົ່ງເສີມປີການທ່ຽວທ່ອງລາວ 2018 ນີ້

ເຂດພິເສດໄຊສົມບູນ ເຄີຍເປັນເຂດປົກຄອງພິເສດ ທີ່ຢູ່ພາຍໃຕ້ຄວາມຮັບຜິດຊອບຂອງກອງ ທັບປະຊາຊົນລາວ ໃນໄລຍະປີ 1975-2006 ເນື່ອງຈາກເປັນເຂດທີ່ມີບັນດາພີ່ນ້ອງເຜົ່າມົ້ງອາໄສຢູ່ ຢ່າງໜາແໜ້ນ ເຂດຫນຶ່ງໃນລາວ ໂດຍລັດຖະບານລາວໄດ້ປະກາດຍົກເລີກເຂດພິເສດໄຊສົມບູນດັ່ງກ່າວໃນປີ 2006 ແລ້ວກໍໄດ້ໂອນຍ້າຍເມືອງໄຊສົມບູນ ແລະເມືອງຮົ່ມ ໄປຢູ່ພາຍໃຕ້ ອໍານາດການປົກຄອງແຂວງວຽງຈັນ

ພິທີການປະກາດການສ້າງຕັ້ງແຂວງໄຊສົມບູນ ເປັນແຂວງທີ່ 17 ຂອງ ສປປ.ລາວ ໄດ້ມີຂຶ້ນຢ່າງເປັນທາງການໃນວັນທີ 31 ທັນວາ ປີ 2013 ທີ່ຜ່ານມາ ໂດຍມີທ່ານທອງສິງ ທໍາມະວົງ ນາຍົກລັດຖະມົນຕີ ພ້ອມດ້ວຍການນໍາພັກ-ລັດ ອໍານາດການປົກຄອງທ້ອງຖິ່ນ ພະນັກງານລັດຖະກອນ ແລະປະຊາຊົນລາວ ເຂົ້າຮ່ວມໃນພິທີດັ່ງກ່າວ.

ແຂວງໄຊສົມບູນ ເປັນແຂວງໜຶ່ງໃນ 18 ແຂວງຂອງ ສາທາລະນະລັດ ປະຊາທິປະໄຕ ປະຊາຊົນລາວ ຊຶ່ງມີທີ່ຕັ້ງຢູ່ໃນເຂດພາກກາງຂອງປະເທດ ຂອບເຂດຊາຍແດນ:

ແຂວງໄຊສົມບູນ ມີຂອບເຂດຊາຍແດນຕິດກັບບັນດາແຂວງອ້ອມຂ້າງໃກ້ຄຽງດັ່ງນີ້:

– ທິດເໜືອ ມີຊາຍແດນ ຕິດກັບ ເມືອງພູຄູນ ແຂວງຫຼວງພຣະບາງ, ເມືອງພູກູດ,ເມືອງຜາໄຊ ແລະ ເມືອງຄູນ ແຂວງຊຽງຂວາງ.
– ທິດໃຕ້ ມີຊາຍແດນ ຕິດກັບ ເມືອງທຸລະຄົມ ແຂວງວຽງຈັນ ແລະ ເມືອງທ່າພຣະບາດ ແຂວງບໍລິຄໍາໄຊ
– ທິດຕາເວັນຕົກ ມີຊາຍແດນ ຕິດກັບ ເມືອງກາສີ, ເມືອງວັງວຽງ, ແລະ ເມືອງແກ້ວອຸດົມ ແຂວງວຽງຈັນ
– ທິດຕາເວັນອອກ ມີຊາຍແດນ ຕິດກັບ ເມືອງໝອກໃໝ່ ແຂວງ ຊຽງຂວາງ ແລະ ເມືອງບໍລິຄັນ ແຂວງບໍລິຄໍາໄຊ

ແຂວງໄຊສົມບູນ ມີເນື້ອທີ່ໃນເຂດການປົກຄອງທັງໝົດ 8.500 ຕາລາງກິໂລແມັດ ໂດຍໄດ້ມີການຈັດສັນພື້ນທີ່ອອກເປັນ 8 ປະເພດ ດັ່ງນີ້: ດິນກະສິກຳ 138.340 ເຮັກຕາ ດິນປຸກສ້າງ 5. 371 ເຮັກຕາ ດິນອຸດສາຫະກຳ 17.631 ເຮັກຕາ ດິນປ່າໄມ້ 599.570 ເຮັກຕາ ດິນຄົມມະນາຄົມ 3. 375 ເຮັກຕາ ດິນວັດທະນະທຳ1.523 ເຮັກຕາ ດິນບໍລິເວນນ້ຳ 45.169 ເຮັກຕາ ດິນ ປກສ ແລະ ປກຊ 2.018 ເຮັກຕາ

ແຂວງໄຊສົມບູນພາຍຫຼັງໄດ້ຖືກຂະໜານນາມໃຫ້ເປັນແຂວງໜຶ່ງໃນ 18 ແຂວງຂອງສາທາລະນະລັດ ປະຊາທິປະໄຕ ປະຊາຊົນລາວ ຕາມມະຕິຕົກລົງຂອງສະພາແຫ່ງຊາດສະບັບເລກທີ 12/ສພຊ, ລົງວັນທີ 13 ທັນວາ 2013 ແລະ ໄດ້ປະກາດເປັນທາງການໃນວັນທີ 31 ທັນວາ 2013 ແລ້ວແຂວງໄຊສົມບູນກໍໄດ້ມີລະບົບການຈັດການປົກຄອງເປັນຂອງຕົນເອງຄືກັນກັບແຂວງໆອື່ນໆໃນ ສປປ ລາວ ທີ່ດໍາເນີນການປົກຄອງດ້ວຍ “ລະບອບປະຊາທິປະໄຕປະຊາຊົນ” ໂດຍມີທ່ານເຈົ້າແຂວງເປັນປະມຸກລັດຂອງແຂວງ ພາຍໃຕ້ການຊີ້ນຳຂອງຄະນະບໍລິຫານງານພັກແຂວງ.

ແຂວງໄຊສົມບູນ ປະກອບມີເຂດການປົກຄອງ 5 ເມືອງດ້ວຍກັນກໍຄື : ເມືອງຮົ່ມ ເມືອງທ່າໂທມ ເມືອງອະນຸວົງ ເມືອງລ້ອງຊານ ແລະ ເມືອງລ່ອງແຈ້ງ
ເຊຶ່ງໃນນີ້ກໍມີຢູ່ 3 ເມືອງ ທີ່ສ້າງຕັ້ງຂຶ້ນໃໝ່ ກໍຄື : ເມືອງລ້ອງຊານ ທີ່ແຍກອອກຈາກ ເມືອງຮົ່ມ ກັບ ເມືອງລ້ອງແຈ້ງ ແລະ ເມືອງອະນຸວົງ ທີ່ສ້າງຕັ້ງຂຶ້ນມາ ແທນ ເມືອງໄຊສົມບູນ ນັ້ນເອງ.

ຄັ້ງນີ້ຈະພາໄປເບິ່ງແຫລ່ງທ່ອງທ່ຽວທີ່ສຳຄັນ ໃນເຂດອ້ອມເມືອງລ້ອງຊານ ກັນກ່ອນ

1. ທິວທັດຕົວເມືອງລ້ອງຊານ

2. ສຳຜັດອາກາດເຢັນໃນການຄືນ ແມ່ນ 0 ອົງສາ ( ຕາເວັນຂຶ້ນແລ້ວ ແລ້ວຕອນ 07:00 ໂມງເຊົ້າ ອາກາດກໍ່ຍັງແທກໄດ້ ເຖິງ 2 ອົງສາ )

3.ຕະຫລາດໃຫມ່ ລ້ອງແຈ້ງ.

4. ວັດລ້ອງແຈ້ງ ສ້າງຂຶ້ນເມື່ອປີ 1963 ສຳເລັດແລ້ວ ເມື່ອປີ 1966 ໂດຍໄດ້ນາຍຊ່າງມາຈາກອຸດອນ ປະເທດໄທ ວັດແຫ່ງນີ້ເປັນວັດຮ້າງມາຫລາຍ 10 ປີ ຕົກມາຮອດກາງປີ 2016 ນີ້ ຈຶງມີພຣະພຶກຂຸສົງ ມາປະຈຳຢູ່ວັດແຫ່ງນີ້ ປະກອບມີ ພຣະ 3 ອົງ ແລະເນນ 3 ອົງ ວັດແຫ່ງນີ້ຍັງຂາດການອຸປະຖຳຄ້ຳຈຸນ ແລະຂາດການປະຕິສັງຂອນມາເປັນເວລາດົນນານ

5 ພູຜາໜໍ່ ເປັນຈຸດຊົມວິວທີ່ງົດງາມທີ່ສຸດຂອງເຂດເມືອງລ້ອງແຈ້ງກໍ່ວ່າໄດ້

6.ເຮືອນພັກຂອງນາຍພົນວາງເປົາ ສ້າງຂຶ້ນເມື່ອປີ 1962 ສຳເລັດເມືອປີ 1964 ເປັນອາຄານ 2 ຊັ້ນ ມູນຄ່າການກໍ່ສ້າງ 12 ລ້ານກີບ ມີ 15 ຫ້ອງ ປະຈຸບັນເຮືອນດັ່ງກ່າວທາງເມືອງ ໄດ້ໃຫ້ບໍລິສັດຂອງ ສສ ຫວຽດນາມເຊົ່າ.

7. ສະໜາມບິນເມືອງລ້ອງແຈ້ງ ສ້າງຂຶ້ນເມືອປີ 1962 ສຳເລັດ ປີ 1964 ໂດຍແມ່ນນາຍຊ່າງຈາກພິລິບປິນນຳພາການກໍ່ສ້າງ ມີຄວາມຍາວ 1,700 ແມັດ ກວ້າງ 30 ແມັດ ປູຢາງປູທາງ 7 ຊັ້ນ ຫນ້າ 40 ຊັງຕີແມັດ ມີລານຈອດຍົນ 4 ຈຸດ

8. ສາຍພູມອກ ຫ່າງຈາກເທດສະບານໄປທາງທິດເຫນືອ 7 ກິໂລແມັດ ພູດັ່ງກ່າວ ຈະມີນ້ຳຫມອກປົກຄອງຕະຫລອດ ອາກາດເທິງສັນພູແລະຈອມພູ ຈະຫນາວເຢັນຕະຫລອດປີ ພູຫນ່ວຍຫນຶ່ງຈະມີຊື່ສຽງ ຍ້ອນມີບົດເພງທີ່ກ່າວເຖິງ ນັ້ນກໍ່ຄື ໜາວຫມອກເມືອງເຫນືອ….

9.ເມືອງລ້ອງແຈ້ງ ຈະສູງກ່ວາອ່າງນ້ຳງື່ມ ປະມານ 1,000 ແມັດ ຈຶ້ງເຮັດໃຫ້ມີບັນຫາໃນເລືອງຂອງນ້ຳບໍລິໂພກ ທີ່ອາໄສແຕ່ນ້ຳບາດານ ແລະນ້ຳສ້າງເປັນຫລັກ

10. ເມືອງລ້ອງແຈ້ງ ຫ່າງຈາກເຂື່ອນນ້ຳງື່ມ 3 ປະມານ 10 ກວ່າກິໂລແມັດ ຖ້າເຂື່ອນແລ້ວ ຄົງຈະເປັນຈຸດດຶງດູດໃຫ້ຄົນມາທ່ຽວເຂື່ອນ ແລະເມືອງລ້ອງແຈ້ງໄດ້ອີກແມ່ແຮງຫນຶ່ງ

ນອກຈາກນັ້ນຍັງມີຮ່ອງຮອຍປະຫວັດສາດໃນການສູ້ຮົບອີກຫລາຍໆຈຸດ ເຊັ່ນ:ຖ້ຳຜາສິງ ຂຸມຄອງຕ່າງໆ … ນອກນັ້ນຍັງມີນ້ຳຕົກນ້ຳຊາວ

ໃຜຍັງບໍ່ເຄີຍໄປ ແລະເມື່ອໄດ້ໄປແລ້ວຄົງຈະຕິດໃຈແນ່ນອນ ແລະສາມາດຕິດຕໍ່ກັບໜ່ວຍງານການທ່ອງທ່ຽວຂອງເມືອງລ້ອງແຈ້ງໄດ້ ຄື :
ທ່ານ: ທ່ານທອງພັນ ສໍພາບມີໄຊ ຫົວຫນ້າຫ້ອງການ ຖະແຫລງຂ່າວວັດທະນະທຳເມືອງ
ທ່ານ : ອານຸສອນ ຈັນທະວິໄຊ ຫົວຫນ້າໜ່ວຍງານທ່ອງທ່ຽວ
ເບີຕິດຕໍ່ : 030-4988-252

ຂອບໃຈຮູບພາບ ແລະຂໍ້ມູນຈາກ: Houmphet Manisouk

ສະມາຄົມເຜົ່າມົ້ງເມືອງຫຼວງພະບາງຈັດງານບຸນກິນຈຽງ(ນໍ່ເປເຈົາ) ຢ່າງມ່ວນຊື່ນ

ໃນວັນທີ່ 20 ທັນວາ 2017 ຢູ່ທີ່ບ້ານພູຊ້າງຄໍາ ສະມາຄົມເຜົ່າມົ້ງເມືອງຫຼວງພະບາງ ແຂວງຫຼວງພະບາງໄດ້ຈັດງານສົ່ງທ້າຍປີເກົ່າຕ້ອນຮັບປີໃໝ່ ຫຼື ບຸນນໍ່ເປເຈົາ ຂອງເຜົ່າມົ້ງ ຂື້ນໂດຍການເຂົ້າຮ່ວມຂອງທ່ານ ຄໍາຂັນ ຈັນທະວີສຸກ ເລຂາພັກແຂວງ,ເຈົ້າແຂວງຫຼວງພະບາງ,ມີຮອງປະທານສູນກາງແນວາລາວສາງຊາດ,ກໍາມະການປະຈໍາພັກແຂວງ,ກໍາມະການພັກເມືອງ,ອາດິດການນຳແຂວງ,ເມືອງ ແລະ ພະນັກງານບຳນານ ພ້ອມດ້ວຍປະຊາຊົນຊາວເຜົ່າມົ້ງເຂົ້າຮ່ວມຢ່າງພ້ອມພຽງ.

ງານສົ່ງທ້າຍປີເກົ່າຕ້ອນຮັບປີໃໝ່ ແມ່ນບຸນປະຈຳປີຂອງເຜົ່າມົ້ງ,ເປັນສັນຍາລັກແຫ່ງຄວາມສາມັກຄີ,ຄວາມຜູກໝັ້ນໃນວົງສາຄະນາຍາດຂອງປະຊາຊົນເຜົ່າມົ້ງທີ່ຢູ່ຫ່າງໄກໄດ້ມາພົບປະສ້າງສັນ ແລະ ເພື່ອເຮັດພິທີກຳລະນຶກເຖິງບັນພະບູລຸດຂອງວົງສາຄະນະຍາດຕົນ ເຊິ່ງເຈົ້າກົກເຈົ້າເລົ່າ ໄດ້ນຳພາຊາວເຜົ່າມົ້ງຈັດງານບຸນນໍ່ເປເຈົາ ທີ່ຍິ່ງໃຫຍ່ຂື້ນມາແຕ່ດົນນານ ແລະ ມີຄວາມໝາຍຄວາມສຳຄັນທີ່ສ່ອງແສງເຖິງຮິດຄອງປະເພນີ,ວັດທະນະທຳອັນດີງາມຂອງຊົນເຜົ່າລາວ ໂດຍສະເພາະແມ່ນເຜົ່າມົ້ງ,ເຊິ່ງມີເອກະລັກສະເພາະຂອງເຜົ່າເຊັ່ນ: ການໂຍນໝາກຄອນ,ເປົ່າແຄນ,ການຂັບລຳ,ຍິງໜ້າເກັກ,ຕີໝາກຂ່າງ,ເປົ່າຂຸ່ຍ ແລະ ເປົ່າໃບໄມ້.


ການຈັດງານນີ້ແມ່ນເພື່ອສະຫຼຸບຜົນສຳເລັດການຈັດຕັ້ງປະຕິບັດວຽກງານຮອບດ້ານໃນໄລຍະ 1 ປີຜ່ານມາ ຂອງຊາວເຜົ່າມົ້ງພ້ອມທັງວາງທິດທາງແຜນການໃສ່ຊຸມປີຕໍ່ໄປ,ເພື່ອເປັນບ່ອນອິງໃຫ້ແກ່ແຜນພັດທະນາເສດຖະກິດ ແລະ ສັງຄົມຂອງຊາວເຜົ່າມົ້ງກໍ່ຄືຂອງເມືອງວາງອອກ ໃຫ້ມີການຂະຫຍາຍຕົວຢ່າງຕໍ່ເນື່ອງ ເຮັດໃຫ້ຊີວິດການເປັນຢູ່ຂອງປະຊາຊົນທຸກຊັ້ນຄົນ ມີວຽກເຮັດງານທຳ ອັນແນ່ນອນ,ສ້າງລາຍຮັບເຂົ້າສູ່ຄອບຄົວໃຫ້ນັບມື້ຫຼາຍຂື້ນເພື່ອຫຼຸດພົ້ນອອກຈາກຄອບຄົວທຸກຍາກກາຍເປັນຄອບຄົວຮັ່ງມີເທື່ອລະກ້າວ ແລະ ສ້າງຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນໃຫ້ໜັກແໜ້ນ,ພ້ອມກັນປົກປັກຮັກສາຮີດຄອງປະເພນີ ແລະ ວັດທະນະທຳ ອັນດີງາມຂອງຊາດໄວ້ໃຫ້ຍືນຍົງຄູ່ກັບເຜົ່າມົ້ງຕະຫຼອດໄປ,ທັງເປັນການສົ່ງເສີມການທ່ອງທ່ຽວ,ດຶງດູດເອົານັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມເມືອງຫຼວງພະບາງໃຫ້ນັບມື້ຫຼາຍຂື້ນ.

ໂດຍສະເພາະເຜົ່າມົ້ງທີ່ອາໄສຢູ່ຂອບເຂດເທດສະບານເມືອງແມ່ນໄດ້ປະກອບອາຊີບຕາມຄວາມເໝາະສົມ ເປັນຕົ້ນແມ່ນ ການບໍລິການຄ້າຂາຍ,ປູກຝັງ-ລ້ຽສັດ ແລະ ເຮັດຫັດຖະກຳຖັກແສ່ວ,ໂດຍອິງໃສ່ທ່າແຮງ ແລະ ຄວາມຕ້ອງການຂອງປະຊາຊົນ.


ໂອກາດນີ້ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ກໍ່ໄດ້ຂື້ນກ່າວອວຍພອນປີໃໝ່ໃຫ້ປະຊາຊົນ ໂດຍສະເພາະ ກໍ່ແມ່ນຊາວເຜົ່າມົ້ງເມືອງຫຼວງພະບາງ ເຊິ່ງມີບາງຕອນທ່ານກ່າວວ່າ: ໃນນາມຕາງໜ້າໃຫ້ຄະນະພັກ, ສະພາປະຊາຊົນ, ອົງການປົກຄອງແຂວງ ແລະ ສ່ວນຕົວຂໍອວຍພອນໄຊອັນປະເສີດໃຫ້ແກ່ພີ່ນ້ອງປະຊາຊົນເຜົ່າມົ້ງ ແລະ ບັນດາເຜົ່າທົ່ວແຂວງຫຼວງພະບາງຈົ່ງມີສຸຂະພາບແຂງແຮງ, ອາຍຸໝັ້ນຍືນຍາວ,

ເປັນຫຼັກແຫຼ່ງໃນການເຕົ້າໂຮມຄວາມສາມັກຄີປອງດອງປະຊາຊົນໃຫ້ເປັນປຶກແຜ່ນແໜ້ນໜາເພື່ອພ້ອມກັນປົກປັກຮັກສາ, ສ້າງສາພັດທະນາປະເທດຊາດ ແລະ ພັດທະນາແຂວງຫຼວງພະບາງໃຫ້ກ້າວຂື້ນຢ່າງບໍ່ຢຸດຢັ້ງ,ຂໍອວຍພອນໄຊໃຫ້ບຸນກິນຈຽງຂອງພີ່ນ້ອງເຜົ່າມົ້ງຈົ່ງເປັນບຸນແຫ່ງຄວາມເບີກບານມ່ວນຊື່ນ, ເປັນບຸນແຫ່ງຄວາມສຸກສົມຫວັງ, ຄວາມຄິດຮອດຄິດເຖິງ, ຄວາມເອົາໃຈໃສ່ຕໍ່ອານາຄົດ, ຄວາມວັດທະນາຖາວອນ, ຄວາມຮັກໄຄ່ໄມຕີຂອງປະຊາຊົນບັນດາເຜົ່າໃນທົ່ວແຂວງ, ເປັນບຸນປະເພນີແຫ່ງປີສ້າງທ່ວງທ່າ ແລະ ບາດກ້າວໃໝ່ເພື່ອຍົກລະດັບຊີວິດການເປັນຢູ່ຂອງຕົນເອງ, ຄອບຄົວໃຫ້ຫຼຸດພົ້ນອອກຈາກຄວາມທຸກຍາກກ້າວໄປເຖິງຄອບຄົວທີ່ຮັ່ງມີກາຍເປັນຕົວແບບທີ່ດີເດັ່ນຂອງບ້ານ, ເມືອງ, ຂອງແຂວງ ແລະ ພ້ອມກັນຈັດຕັ້ງປະຕິບັດແນວທາງນະໂຍບາຍຂອງພັກໃຫ້ປະກົດຜົນເປັນຈິງ, ຍົກສູງສະຕິຊາດ, ເຊີດຊູນໍ້າໃຈຮັກຊາດ, ຮັກລະບອບໃໝ່, ຮັກບ້ານເກີດເມືອງນອນ, ຮັກວັດທະນະທໍາພ້ອມກັນເຄົາລົບແລະປະຕິບັດລະບຽບກົດໝາຍຢ່າງເຂັ້ມງວດດັ່ງຄໍາສຸພາສຸດທີ່ວ່າ: ” ວັດທະນະທໍາບອກຊາດ ມາລະຍາດບອກຕະກຸນ ”.


ຂ່າວ: ເພັດສາຄອນ ສິມມະວົງ (ຂ່າວສານຫລວງພະບາງ)

ເຊີນຮ່ວມຮັບບຸນ ຮັບໂຊກ ຮັບໄຊ ຮັບບາລະມີ ໃນປີໃໝ່ນີ້ ໃນງານບຸນສູດສົມໂພດສູດມົນຂ້າມປີໃນວັນທີ31/12/2017 ທີ່ວັດໂນນຫີນແຮ່ (ວັດສີນໄຊຍາຣາມ) ເມືອງເຟືອງ ແຂວງວຽງຈັນ

ເຊີນຮ່ວມຮັບບຸນ ຮັບໂຊກ ຮັບໄຊ ຮັບບາລະມີ ໃນປີໃໝ່ນີ້ ໃນງານບຸນສູດສົມໂພດສູດມົນຂ້າມປີໃນວັນທີ31/12/2017 ທີ່ວັດໂນນຫີນແຮ່ (ວັດສີນໄຊຍາຣາມ) ເມືອງເຟືອງ ແຂວງວຽງຈັນ