ທຸລະກິດຂົນສົ່ງພົບບັນຫາຍຸ້ງຍາກ ວອນໃຫ້ພາກລັດຊ່ວຍແກ້ໄຂ

ປັດຈຸບັນ ທຸລະ​ກິດ​ການ​ບໍ​ລິການ​ຂົນສົ່ງ ໄດ້​ພົບ​ບັນຫາ​ເຖິງ​ຂັ້ນວິ​ກິດ ມີ​ຫຼາຍ​ບໍລິສັດ​ທີ່​ດຳເນີນ​ທຸລະ​ກິດ​ດັ່ງກ່າວ ​ຕ້ອງ​ໄດ້​ຢຸດ​ກິດ​ຈະການຂາຍ​ຊັບ​ສິນ​ອອກ​ໄປ ແລະ ມີ​ບາງ​ບໍລິສັດ​ປະຄອງ​ຕົວ​ພໍ​ແຕ່​ຢູ່ໄດ້​ເທົ່າ​ນັ້ນ ເນື່ອງ​ຈາກ​ມີ​ລົດ​ຂົນສົ່ງ​ຂອງ​ຕ່າງປະເທດ ​ເຂົ້າ​ມາເຄື່ອນ​ໄຫວ​ຢູ່​ປະເທດ​ເຮົາ​ນັບ​ມື້​ນັບຫຼາຍ​ຂຶ້ນ.

ທ່ານ ຄຳ​ເວີນ ສຸ​ລັດ​ທະ ເຈົ້າຂອງ​ທຸລະ​ກິດ​ຄຳ​ເວີນ​ຂົນສົ່ງ ແລະ ກົນ​ຈັກ​ໃຫ້​ເຊົ່າ ໄດ້​ກ່າວ ວ່າ: ດຳເນີນ​ທຸລະ​ກິດ​ບໍລິການຂົນສົ່ງ​ທາງບົກ​ມາ​ໄດ້ 40 ກວ່າ​ປີ ມີ​ສຳນັກງານ​ຕັ້ງ​ຢູ່​ບ້ານ​ທ່າ​ສະຫວ່າງ (ທ່າ​ງ່ອນ) ເມືອງ​ໄຊ​ທານີ ນະຄອນຫຼວງ​ວຽງ​ຈັນ ເບື້ອງ​ຕົ້ນ ມີ​ລົດ​ອີ​ຊູ​ຊຸ 6 ລໍ້​ພຽງ​ແຕ່ 3 ຄັນ ແລະ ມີ​ພະນັກງານ 2-3 ຄົນ​ເທົ່ານັ້ນ ພາຍຫຼັງ​ຮຽນ​ຈົບ​ປີ 1998 ໄດ້ໄປ​ເຮັດ​ວຽກ​ກັບ​ບໍລິສັດ​ເອກະ​ຊົນ ເມື່ອ​ມີ​ປະສົບ​ການ​ຈຶ່ງ​ໄດ້​ມາ​ສືບທອດ​ຜູ້​ເປັນ​ພໍ່​ດຳເນີນ​ທຸລະ​ກິດ​ຈົນມາ​ເຖິງ​ປັດຈຸບັນ ສ່ວນ​ທຸລະ​ກິດແມ່ນ​ບໍລິການ​ຂົນສົ່ງ​ປະເພດ​ລົດ ທີ່​ເຄື່ອນ​ຍ້າຍ​ໄປ​ຈຸດ​ຕ່າງໆ​ທັງພາຍ​ໃນ ແລະ ຕ່າງປະເທດ ນອກນີ້ ຍັງ​ເຮັດ​ທຸລະ​ກິດ​ຮັບ​ເໝົາ​ກໍ່ສ້າງ​ທາງ​ຂະໜາດ​ນ້ອຍ​ ແຕ່​ເຮັດໄປ​ໄລຍະ​ໜຶ່ງ​ທຸລະ​ກິດ​ກໍ່ສ້າງ​ໄດ້ຢຸດ​ເຊົາ​ຍ້ອນ​ມີ​ຄູ່​ແຂ່ງ​ຫຼາຍ​ຂຶ້ນ ຖືວ່າ​ຍັງ​ແຕ່​ທຸລະ​ກິດ​ຂົນສົ່ງ ໃນ​ປີ 2008-2012 ທຸລະ​ກິດ​ແມ່ນ​ໄປໄດ້​ດີ ມີ​ລົດ​ບໍລິການ​ຂົນສົ່ງ 50 ກວ່າ​ຄັນ ແລະ ມີ​ພະນັກງານ 37 ຄົນ ແຕ່​ປັດຈຸບັນ ລົດ​ຍັງ​ເຫຼືອ​ແຕ່ 32 ຄັນ ໃນ​ນັ້ນ ຈະ​ມີ​ລົດ​ຍົກເຄື່ອງ ລົດ​ບັນທຸກ ລົດ​ລາກ ແລະ ຮ່າງ​ເທນ​ເດີ ການ​ດຳເນີນ​ທຸລະກິດ ມາ​ຮອດ​ປີ 2012 ເລີ່ມ​ມີ​ບັນຫາ ຍ້ອນ​ວ່າ​ປະເທດ​ອ້ອມ​ຂ້າງ​ບໍ່ໃຫ້​ທຸລະ​ກິດ​ຄົນ​ລາວ​ໄປ​ເຄື່ອນໄຫວ​ຢູ່​ປະເທດ​ເຂົາ ໂດຍ​ອ້າງ​ເຫດຜົນ​ວ່າ ລົດ​ບໍລິການ​ຂົນສົ່ງ​ຢູ່​ລາວ ບໍ່​ໄດ້​ມາດຕະຖານ​ຄື​ກັບ​ຢູ່​ປະເທດເຂົາ ​ທັງໆ​ທີ່​ປະເທດ​ເຮົາ​ບໍ່​ສາມາດ​ຜະລິດ​ລົດ​ເອງ​ໄດ້​ ມີ​ແຕ່​ນຳ​ເຂົ້າຈາກ​ຕ່າງປະເທດ ຖື​ວ່າ​ມາ​ເຖິງ​ເວລາ​ນີ້ ປະເທດ​ອ້ອມ​ຂ້າງ​ໄດ້​ກີດ​ກັ້ນທຸລະ​ກິດ​ຂອງ​ປະເທດ​ເຮົາ ພ້ອມດຽວ​ກັນ​ນີ້ ປະເທດ​ເຮົາ​ຜັດ​ໃຫ້​ທຸລະ​ກິດ​ຂົນສົ່ງ​ປະເທດ​ອ້ອມ​ຂ້າງ ເຂົ້າ​ມາ​ເຄື່ອນ​ໄຫວ​ໃນ​ການ​ຂົນສົ່ງສິນຄ້າ​ເຂົ້າ​ມາ ແລະ ເຂົາເຈົ້າ​ສາມາດ​ຂົນສົ່ງ​ໄປ​ໄດ້​ທຸກ​ຈຸດ ບໍ່​ວ່າ​ຢູ່ນະຄອນຫຼວງ​ວຽງ​ຈັນ ກໍ່​ຄືຕ່າງແຂວງ ແລະ ໄປ​ຮອດ​ຈຸດໝາຍປາຍທາງ​ຂອງ​ສິນຄ້າ ເປັນຕົ້ນ ການ​ຂົນສົ່ງ​ສິນຄ້າ​ໂຄງການ​ກໍ່ສ້າງ​ເຂື່ອນ ແລະ ໂຄງການ​ຂຸດຄົ້ນ​ບໍ່​ແຮ່ ໂດຍ​ບໍ່​ມີ​ການ​ຄ່ຽນ​ຖ່າຍສິນຄ້າ​ຢູ່​ດ່ານ ດັ່ງນັ້ນ ນັບ​ແຕ່​ປີ 2012 ເປັນຕົ້ນ​ມາ ຮອດ​ປັດຈຸບັນ ທຸລະ​ກິດ​ຂົນສົ່ງ​ໄດ້​ກ້າວ​ເຂົ້າ​ສູ່​ຂັ້ນວິ​ກິດ ​ມີ​ຫຼາຍ​ຫົວໜ່ວຍ​ທຸລະ​ກິດ​ທີ່ດຳເນີນ​ທຸລະ​ກິດ​ບໍລິການ​ຂົນສົ່ງ ຕ້ອງ​ໄດ້​ຢຸດ​ກິດຈະການ ແລະ ຂາຍ​ຊັບ​ສິນ​ອອກ​ໄປ​ໃຫ້​ຍັງ​ເຫຼືອໜ້ອຍ​ລົງ ​ຍ້ອນ​ວ່າການ​ບໍລິການຂົນສົ່ງ​ສິນຄ້າ​ນັບ​ມື້​ມີ​ໜ້ອຍ ຖ້າຮັກສາ​ລົດ​ໄວ້​ຈະ​ເຮັດ​ໃຫ້​ມີ​ລາຍຈ່າຍ​ຫຼາຍ​ຂຶ້ນ ຄືສະເລ່ຍ​ລົດ​ຄັນໜຶ່ງ​ເຖິງ​ວ່າ​ຈະ​ແລ່ນ ຫຼື ບໍ່​ແລ່ນ ຕ້ອງ​ມີ​ລາຍ​ຈ່າຍ​ເກືອບ 5 ລ້ານກີບ​ຕໍ່​ເດືອນ ເປັນຕົ້ນ ຈ່າຍ​ພາສີອາກອນ ຄ່າ​ແຮງ​ງານ​ກຳ​ມະກອນ ແລະ ອື່ນໆ ເພື່ອ​ບໍ່​ໃຫ້​ກິດຈະ​ການ​ຢຸດ ​ຕ້ອງ​ໄດ້​ຂາຍ​ຊັບ​ສິນອອກ​ໄປ ​ປະຄອງ​ທຸລະ​ກິດ​ໃຫ້​ໄປລອດ.

ຈາກ​ເລື່ອງ​ທີ່​ກ່າວ​ມາ​ຂ້າງເທິງ​ນັ້ນ​ ຮຽກຮ້ອງ​ມາ​ຍັງ​ພາກ​ລັດ ໂດຍ​ສະເພາະພາກສ່ວນ​ກ່ຽວຂ້ອງ​ກະຊວງ​ໂຍທາ​ທິ​ການ ແລະ ຂົນສົ່ງ ​ຢາກ​ໃຫ້​ມາ​ມີ​ສ່ວນ​ຮ່ວມໃນ​ການ​ເບິ່ງແຍງ​ທຸລະ​ກິດ​ຂົນສົ່ງ​ພາຍ​ໃນ​ເຮົາ ແລະ ໃຫ້​ບຸລິ​ມະສິດ​ຄົນ​ລາວ​ກ່ອນ ​ໃນ​ການ​ຂົນສົ່ງສິນຄ້າ​ຮັບ​ໃຊ້​ໂຄງການ​ໃຫຍ່ ເປັນຕົ້ນ ໂຄງການ​ກໍ່ສ້າງ​ທາງລົດໄຟ ລາວ-ຈີນ ຖ້າ​ຄົນ​ລາວເຮັດ​ບໍ່​ໄດ້ ​ຈຶ່ງ​ໃຫ້​ຕ່າງປະເທດ ນອກ​ນີ້ ກໍ່​ຢາກ​ໃຫ້​ພາກ​ລັດ​ເກັບພາສີ​ອາກອນ ແລະ ຄ່າ​ບໍລິການອື່ນໆ ​ນຳ​ລົດ​ຂົນສົ່ງ​ຕ່າງປະເທດທີ່​ມາ​ເຄື່ອນ​ໄຫວ​ຢູ່​ປະເທດ​ລາວ ສິ່ງ​ສຳຄັນ​ໜຶ່ງ​ອີກ​ຢາກ​ໃຫ້​ມີການ​ຄ່ຽນ​ຖ່າຍ​ສິນຄ້າ​ຢູ່​ດ່ານ ເພື່ອ​ໃຫ້​ທຸລະ​ກິດ​ຂົນສົ່ງພາຍ​ໃນ​ໄດ້​ມີ​ວຽກ​ເຮັດ ແລະ ມີລາຍ​ຮັບ​ຈາກ​ການ​ບໍລິການ​ຂົນສົ່ງ​ສິນຄ້າ​ຈາກ​ຈຸດ​ຄ່ຽນ​ຖ່າຍ ​ໄປຍັງ​ປາຍທາງ​ຂອງ​ສິນຄ້າ​ຢູ່​ພາຍໃນ​ປະ​​ເທດ ແລະ ອີກ​ສຳຄັນ ປັດຈຸບັນ ​ສປປ ລາວ ໄດ້​ມີ​ມາດຕະການ​ແນວໃດ​ຮັບຮອງ​ການເປີດ​ກວ້າງ​ທຸລະ​ກິດ ຫຼື ການ​ຂົນສົ່ງ​ທາງບົກ ​ເພື່ອ​ບໍ່​ໃຫ້​ປະເທດພວກ​ເຮົາ​ເສຍປຽບ ຄວນ​ໄດ້​ກວດຄືນ​ໃຫ້​ເໝາະ​ສົມ.

ບັນຫາ ບໍລິສັດ ລາວອິນໂດໄຊນາກຣຸບ ກຳລັງຈະກ້າວເຂົ້າສູ່ຂະບວນການຍຸດຕິທຳ

ບໍລິສັດລາວອິນໂດໄຊນາກຣຸບ ງຽບຫາຍໄປດົນ 3 ປີແລ້ວຄ່ອຍໄດ້ຮັບຂ່າວໃໝ່ການແກ້ໄຂຄະດີຍັງບໍ່ຄືບໜ້າ, ລັດຖະບານຍອມຮັບເປັນຄະດີໃຫຍ່ ແລະຊັບຊ້ອນຕ້ອງສັງລວມຂໍ້ມູນຫຼັກຖານພ້ອມກ່ອນສົ່ງເຂົ້າຂະບວນຍຸຕິທຳ.

ລາວອິນໂດໄຊນາກຣຸບ ຖືເປັນບໍລິສັດທີ່ມີເປົ້າໝາຍຊ່ວຍແກ້ໄຂຄວາມທຸກຍາກຂອງປະຊາຊົນໂດຍການເຮັດສັນຍາກັບຊາວສວນໃຫ້ປູກມັນຕົ້ນມາປ້ອນໂຮງງານຜະລິດແປ້ງ ເພື່ອສົ່ງອອກ ຊຶ່ງເວົ້າໄດ້ວ່າເປັນບໍລິສັດທີ່ເປີດໂຕມາໄດ້ສຽງຕອບຮັບດີພໍສົມຄວນຈາກສັງຄົມ ລວມທັງຕະຫຼາດຮັບຊື້ ແຕ່ຜ່ານການດຳເນີນທຸລະກິດຜະລິດແປ້ງມັນຕົ້ນມາໄລຍະໜຶ່ງບໍລິສັດດັ່ງກ່າວຂາດສະພາບຄ່ອງທາງດ້ານການເງິນມີໜີ້ສິນຫຼວງຫຼາຍທັງນຳທະນາຄານ, ບໍລິສັດແລະປະຊາຊົນ ຈິ່ງຈຳເປັນຢຸດຕິກິດຈະການໄປຢ່າງໜ້າເສຍດາຍ.

ຕາມການເປີດເຜີຍຂອງ ທ່ານນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ ໃນຕົ້ນອາທິດນີ້ໃຫ້ຮູ້ວ່າ: ບໍລິສັດລາວອິນໂດໄຊນາກຣຸບແມ່ນມີໜີ້ສິນລວມທັງຕົ້ນທຶນ ແລະດອກເບ້ຍຄ້າງຊຳລະກັບທະນາຄານ, ບໍລິສັດ ແລະປະຊາຊົນຈຳນວນ 320,97 ຕື້ກີບ, 25,42 ລ້ານບາດ ແລະ 31,80 ລ້ານໂດລາ ໃນນີ້ເປັນໜີ້ທະນາຄານ 265,79 ຕື້ກີບ.

ໃນເດືອນ 7/2014 ລັດຖະບານໄດ້ແຕ່ງຕັ້ງຄະນະກວດກາ ແລະແກ້ໄຂບັນຫາຂອງບໍລິສັດດັ່ງກ່າວ ໂດຍມອບໃຫ້ ທະນາຄານແຫ່ງ ສປປ ລາວເປັນຫົວໜ້າຄະນະ. ຜ່ານການກວດກາບໍລິສັດແມ່ນໄດ້ຮັບຮູ້ບັນຫາຂອງຕົນ ແລະພະຍາຍາມແກ້ໄຂ ແຕ່ບໍສມາດປະຕິບັດໄດ້ ຍ້ອນຕິດໜີ້ຫຼາຍພາກສ່ວນ ສະນັ້ນບໍລິສັດອິນໂດໄຊນາກຣຸບຈິ່ງຖືກຟ້ອງຕໍ່ສານ.

ຈົນເຖິງປະຈຸບັນການແກ້ໄຂບັນຫາຍັງບໍ່ມີຄວາມຄືບໜ້າ, ທ່ານຮອງຜູ້ວ່າການ ທຫລ ຍອມຮັບວ່ານີ້ເປັນຄະດີໃຫຍ່ ຕ້ອງການສັງລວມຂໍ້ມູນຫຼັກຖານຈາກບັນດາເຈົ້າໜີ້ຕື່ມອີກ ໂດຍ ທຫລ ຈະສືບຕໍ່ປະສານສົມທົບກັບສານ ແລະພາກສ່ວນກ່ຽວຂ້ອງ ເພື່ອໃຫ້ສາມາດນຳເອົາຄະດີຂອງບໍລິສັດລາວ ອິນໂດໄຊນາເຂົ້າສູ່ຂະບວນການຍຸຕິທຳຕັດສິນຄະດີ.

ເຫດການເຂື່ອນແຕກຮູ້ສາເຫດແລ້ວຍ້ອນຫຍັງ?

ທ່ານລັດຖະມົນຕີກະຊວງພະລັງງານ ແລະ ບໍ່ແຮ່ ຄໍາມະນີ ອິນທິລາດ ໃຫ້ຮູ້ວ່າ: ເຫດການເຂື່ອນໄຟຟ້າເຊຂະໝານ 3 ຢູ່ແຂວງອັດຕະປື ແລະ ເຂື່ອນໄຟຟ້ານໍ້າອ້າວຢູ່ແຂວງຊຽງຂວາງແຕກໃນຜ່ານມານັ້ນເປັນຍ້ອນຜູ້ພັດທະນາໂຄງການບໍ່ປະຕິບັດຕາມຂັ້ນຕອນມາດຕະຖານເຕັກນິກຂອງໄຟຟຟ້າລາວ.

ການເປີດເຜີຍດັ່ງກ່າວມີຂຶ້ນໃນລະຫວ່າງການຊີ້ແຈງຂໍ້ຊັກຖາມຂອງສະມາຊິກ ສະພາແຫ່ງຊາດກ່ຽວກັບການຄຸ້ມຄອງ, ກວດກາບັນດາໂຄງການກໍ່ສ້າງເຂື່ອນເພື່ອຮັບປະກັນບໍ່ໃຫ້ເຂື່ອນແຕກ, ໂດຍທ່ານກ່າວວ່າ: ເຂື່ອນເຊ​ຂະ​ໝານ 3 ​ເປັນ​ໂຄງການ​ພັດທະນາ​ໂດຍ​ຜູ້​ລົງທຶນ​ຈາກຫວຽດນາມ, ​ເຊິ່ງ​ການຈັດຕັ້ງປະຕິບັດ​ວຽກງານຕ່າງໆ​ແມ່ນ​ມີ​ຄວາມ​ຫຍຸ້ງຍາກ​ໃນ​ການ​ຄຸ້ມ​ຄອງ​, ຍ້ອນເຈົ້າຂອງໂຄງການບໍ່ໃຫ້​ຄວາມ​ຮ່ວມ​ມື​ໃນ​ການ​ລົງ​ຕິດຕາມ​ກວດກາ​ການ​ກໍ່ສ້າງ​ຕົວ​ຈິງ, ໂດຍອ້າງວ່າໄດ້​ມີ​ເຕັກ​ນິກມາດຕະຖານ​ຂອງ​ເພິ່ນ, ​ໃນ​ເບື້ອງ​ເຮົາ​ກໍ​ໄດ້​ມີ​ຊ່ຽວຊານ​ລົງ​ໄປ​ກວດກາ ​ແລະ ປະ​ເມີນ, ພ້ອມ​ທັງ​ໃຫ້​ຄຳ​ເຫັນ​ທາງ​ດ້ານ​

ເຕັກນິກ​ໃນ​ການ​ປະຕິບັດ​ຢ່າງ​ເປັນ​ລະບົບ​ແລ້ວ, ​ແຕ່​ກົງກັນຂ້າມຜູ້​ພັດທະນາ​ໂຄງການ​ບໍ່​ປະຕິບັດ​ຕາມ​ຂັ້ນຕອນ​ທາງ​ດ້ານ​ເຕັກນິກ​ດີ​ເທົ່າ​ທີ່​ຄວນ ແລະ ​ເມື່ອ​ເກີດ​ສະພາບ​ທໍ່​ສົ່ງ​ນ້ຳ​ແຮງ​ດັນ​ສູງ​ແຕກ ທາງ​ຜູ້​ພັດທະນາ​ຈຶ່ງ​ໄດ້​ເຂົ້າ​ໃຈ ​ແລະ ຍອມຮັບ​ການ​ນຳ​ໃຊ້​ວິສະວະກອນ​ຕ່າງປະ​ເທດ ​ເພື່ອ​ມາ​ສ້ອມ​ແປງ​ໂຄງການ. ​ປັດຈຸບັນ​ນີ້, ທັງ​ຝ່າຍ​ທັງຜູ້​ພັດທະນາ​ໂຄງການ ​ແລະ ​ກະຊວງ​ພະລັງງານ ​ແລະ ບໍ່​ແຮ່ ​ແມ່ນ​ໄດ້​ສືບ​ຕໍ່​ເຮັດ​ວຽກ​ນຳ​ກັນ​ຢ່າງ​ໃກ້ຊິດ ​ເພື່ອ​ເລັ່ງສ້ອມ​ແປງ​ໃຫ້​ໄດ້​ມາດຕະຖານ ແລະ ສາມາດ​ກັບ​ມາ​ດຳ​ເນີນ​ການ​ຜະລິດ​ໄຟຟ້າ​ໄດ້​ຢ່າງ​

ຮັບປະກັນ.ສຳລັບ​ເຂື່ອນໄຟຟ້າ​ນໍ້າອ້າວ, ​ແມ່ນ​ໄດ້​ຖືກ​ອະນຸມັດ​ໂດຍ​ອຳນາດ​ການ​ປົກຄອງແຂວງ​ຊຽງ​ຂວາງ​ກັບ​ຜູ້​ພັດທະນາ​ໂຄງການຄື​ບໍລິສັດ ບໍ່​ທອງ ອິນ​ເຕີ ກຣຸບ ໄດ້​ມີ​ຂໍ້​ຕົກລົງ​ອະນຸຍາດ​ໃຫ້​​ພັດທະນາ​ໂຄງການ​ເຂື່ອນ​ໄຟຟ້າ​ນໍ້າຕົກ​ຂະໜາດ​ນ້ອຍ ນ້ຳອ້າວ​ແຂວງ​ຊຽງ​ຂວາງສະບັບ​ເລກທີ 863/ພຜທ,ຊຂ, ລົງ​ວັນ​ທີ 20 ຕຸລາ 2015 ມີ​ອາຍຸ​ສັນຍາ​ພັດທະນາ​ໂຄງການ​ 70 ປີ, ມີ​ບົດ​ລາຍ​ງານ​ການ​ສຳ​ຫລວດ​ວິສະວະກຳ​ທໍລະນີວິທະຍາ​ສະບັບ​ເດືອນ​ກັນຍາ 2015 ບໍ່​ທັນ​ລະອຽດ, ບົດ​ວິພາກ​ເສດຖະກິດ-​ເຕັກນິກ ​ແລະ ​ແຜນ​ຜັງ​ການ​ອອກ​ແບບສະບັບ​ເດືອນ​ກັນຍາ 2015 ບໍ່​ທັນ​ລະອຽດ, ​ໃບຮັບ​ຮອງ​ບົດ​ວິພາກ​ເສດຖະກິດ-​ເຕັກນິກ​ຂັ້ນພື້ນຖານ​ຂອງ​ໂຄງການ​ເຂື່ອນ​ໄຟຟ້າ​ນ້ຳອ້າວ

ສະບັບ​ເລກທີ 465/ພບ.ຊຂ, ລົງ​ວັນ​ທີ 13/10/2015 (ບົດ​ວິພາກ​ເສດຖະກິດ-​ເຕັກນິກ​ຂັ້ນລະອຽດ​ຂອງ​ໂຄງການ​ບໍ່​ມີ), ​ມີ​ສັນຍາ​ຊື້-ຂາຍ​ໄຟຟ້າ​ນຳລັດ​ວິ​ສາ​ຫະກິດ​ໄຟຟ້າ​ລາວ​ໃນ​ວັນ​ທີ 1 ກໍລະກົດ 2016, ​ໂຄງການ​ເຂື່ອນ​ນ້ຳອ້າວ​ຈະ​​ເປີດ​ຂາຍ​ໄຟຟ້າ​ເປັນ​ທາງ​ການ​ໃນ​ເດືອນ​ມິຖຸນາ 2018 ແລະ ການກໍ່ສ້າງໄດ້ມີຄວາມຄືບໜ້າຫລາຍກວ່າ 80% ແລະ ຮອດ​ເວລາ 13:50 ​ໂມງຂອງ​ວັນ​ທີ 11 ກັນຍາ 2017 ການ​ທົດ​ສອບ​ຊັ້ນດິນ​ຖົມ​ແຕ່​ລະຊັ້ນບໍ່​ໄດ້​ຕາມ​ມາດຕະຖານ​ເຕັກນິກ ​ເຮັດ​ໃຫ້​ນໍ້າຊືມຜ່ານ​ໄດ້ ​ແລະ ​ແຕກ​ພັງໃນທີ່ສຸດ, ພາຍຫລັງເກີດເຫດຄະນະ​ສະ​ເພາະ​ກິດ​ຂອງ​ກະຊວງ​ພະລັງງານ ​ແລະ ບໍ່​ແຮ່ ສົມ​ທົບ​ກັບ​ແຂວງ​ຊຽງ​ຂວາງ, ​ໄຊ​ສົມບູນ ​ແລະ ຜູ້​ພັດທະນາ​ໂຄງການ​ສືບ​ຕໍ່​ຕິດຕາມ​ກວດກາ ​ແລະ ​ເກັບ​ກຳ​ຂໍ້​ມູນ​ຜົນ​ເສຍ​ຫາຍ​ຮ່ວມ​ກັນ ແລະ ສະຫລຸບ​ໄດ້​ວ່າຜູ້​ພັດທະນາ​ບໍ່​ປະຕິບັດ​ຕາມ​ຂັ້ນຕອນ​

ມາດຕະຖານ​ເຕັກນິກ​ຂອງ​ໄຟຟ້າ​ລາວວາງອອກ ແລະ ບົດຮຽນຈາກເຫດການນີ້, ລັດຖະບານ ກໍ​ຄື​ກະຊວງ​ພະລັງງານ ​ແລະ ບໍ່​ແຮ່ ​ໄດ້​ອອກ​ຄຳ​ສັ່ງ, ອອກ​ແຈ້ງ​ການ ​ແລະ ​ໄດ້​ສ້າງຕັ້ງຄະນະ​ກຳມະການ​ສະ​ເພາະ​ກິດ ​ເພື່ອ​ລົງ​ກວດກາ​ໂຄງການ​ດັ່ງກ່າວລວມທັງ​ບັນດາ​ໂຄງການ​ຂະໜາດ​ນ້ອຍ​ທີ່​ແຂວງ​ເປັນ​ຜູ້​ອະນຸມັດ​ໃນ​ທົ່ວ​ປະ​ເທດໃຫ້ຮອບຄອບຕື່ມອີກ.

ປັດຈຸບັນ ລາວເຮົາຍັງມີຄອບຄົວທຸກຍາກເກືອບ 70 ພັນຄອບຄົວ

ເນື່ອງ​ໃນ​ໂອກາດ​ວັນ​ສາກົນ ແລະ ສັບປະດາ​ແຫ່ງ​ຊາດ ເພື່ອລຶບລ້າງ​ຄວາມທຸກ​ຍາກ 17-24 ຕຸລາ​ນີ້ ໄດ້​ໝູນວຽນ​ມາ​ອີກ​ວາລະ​ໜຶ່ງ ຄະນະ​ໂຄສະນາ​ອົບຮົມສູນ​ກາງ​ພັກ ຮ່ວມ​ກັບ​ຫ້ອງ​ວ່າການ​ສູນ​ກາງ​ພັກ ແລະ ກະຊວງກະສິກຳ ແລະ ປ່າໄມ້ ຈັດ​ພິທີ​ປາຖະ​ກະຖາ​ລະນຶກ​ວັນ​ສາກົນ ແລະ ສັບປະດາ​ແຫ່ງ​ຊາດ ເພື່ອ​ລຶບລ້າງ​ຄວາມທຸກ​ຍາກ ຂຶ້ນ​ວັນ​ທີ 24 ຕຸລາ 2017 ຢູ່​ຫ້ອງ​ວ່າການສູນ​ກາງ​ພັກ ໃຫ້​ກຽດ​ປາຖະ​ກະຖາ​ໂດຍ​ທ່ານ ລຽນ ທິ​ແກ້ວ ລັດຖະ​ມົນຕີກະຊວງ​ກະສິກຳ ແລະ ປ່າໄມ້ ມີ​ຫົວໜ້າ ຮອງ​ຫົວໜ້າ ກົມ ຫ້ອງການ ພະນັກງານ ທະຫານ-ຕຳຫຼວດ ນັກ​ສຶກ​ສາ ພ້ອມດ້ວຍ​ພາກສ່ວນ​ທີ່​ກ່ຽວຂ້ອງ​ເຂົ້າຮ່ວມ.

ທ່ານ ລຽນ ທິ​ແກ້ວ ໄດ້​ເລົ່າຄືນ​ກ່ຽວ​ກັບ​ສະພາບ​ການ​ເຄື່ອນຍ້າຍ​ຂອງ​ສາກົນ ກໍ່​ຄືໃນ​ປັດ​ຈຸບັນ ໂດຍ​ອີງ​ຕາມ​ຕົວ​ເລກ​ຂອງສະຫະ​ປະຊາ​ຊາດ ໃນ​ປີ 2013 ທົ່ວ​ໂລກ​ມີ​ຄົນ​ເຄື່ອນ​ຍ້າຍ​ພາຍໃນ​ປະເທດ​ຂອງ​ຕົນ ປະມານ 763 ລ້ານ​ຄົນ ສູງ​ກວ່າ​ການຍ້າຍ​ຂ້າມ​ຊາຍ​ແດນ​ເຖິງ 3 ເທົ່າ ເຫດຜົນ​ທີ່​ເຮັດ​ໃຫ້​ມີ​ການ​ເຄື່ອນຍ້າຍອັນ​ທີ່​ພົ້ນ​ເດັ່ນ​ແມ່ນ ​ການເຄື່ອນ​ຍ້າຍ​ຕາມ​ລະດູ​ການ​ຜະລິດ ​ທີ່​ຕິດ​ພັນ​ກັບ​ການ​ເຮັດ​ກະ​ສິກຳ ຍ້າຍ​ຈາກ​ຊົນນະບົດ​ເຂົ້າ​ສູ່ຕົວ​ເມືອງ​ຕາມ​ການ​ດຶງ​ດູດ​ຂອງອຸດສາຫະກຳ ຍ້ອນ​ຄ່າ​ຄອງ​ຊີບສູງ ລວມ​ທັງ​ການ​ເຄື່ອນ​ຍ້າຍຍ້ອນ​ເສິກ​ສົງຄາມ ແລະ ຄວາມວຸ້ນວາຍ​ຂອງ​ແຕ່​ລະ​ປະເທດ.

ພ້ອມ​ນີ້ ທ່ານ​ຍັງ​ໄດ້​ເລົ່າຄືນບາງ​ເນື້ອ​ໃນ​ຕໍ່​ກັບ​ການ​ຈັດ​ສັນ​ພູມລຳ​ເນົາ ທັດສະນະ ທິດ​ທາງ​ລວມ ທັງ​ມາດ​ຕະການ ວິທີ​ການ​ປັບປຸງວຽກ​ງານ​ການ​ຈັດ​ສັນ​ພູມ​ລຳເນົາ​ຄົງ​ທີ່ ແລະ ສະພາບ​ຂອງການຈັດຕັ້ງ​ປະຕິບັດ​ວຽກ​ງານ ການ​ຈັດ​ສັນ​ພູມລຳເນົາ​ຄົງ​ທີ່​ໃນໄລຍະ​ຜ່ານ​ມາ ຜົນສຳເລັດ​ນັບຕັ້ງແຕ່​ກອງ​ປະຊຸມ​ໃຫຍ່ ​ຄັ້ງ​ທີ VII ຂອງ​ພັກ​ເປັນຕົ້ນ​ມາ ຢູ່​ໃນ ​ສປປ ລາວ ນຳ​ອີກ ມາ​ຮອດ​ປັດຈຸບັນ ລາວ​ເຮົາ​ສັງ​ລວມ​ຂໍ້​ມູນ​ທຸກ​ຍາກໃນ​ທົ່ວ​ປະເທດ 6 ເດືອນ​ຕົ້ນ​ປີ 2017 ມີ​ຕົວ​ເມືອງ​ທຸກ​ຍາກ 23 ເມືອງ ບ້ານ​ທຸກ​ຍາກ 1.653 ບ້ານ ແລະ ມີ​ຄອບຄົວ​ທຸກ​ຍາກ 69.000 ກວ່າ​ຄອບຄົວ.

ສສຊ ຖາມ! ຈະແກ້ໄຂໜີ້ສິນປະຊາຊົນທີ່ເກີດຂຶ້ນຢູ່ ພີເອສ ແນວໃດ?

ທ່ານ ນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ ຊີ້ແຈງວ່າ: ກໍລະນີຂອງບໍລິສັດ ພີເອັສສົ່ງເສີມກະສິກຳ ແລະ ອຸດສາຫະກຳ ຄົບວົງຈອນ ຂາເຂົ້າ-ຂາອອກ ຈຳກັດຜູ້ດຽວ ຖືກສ້າງຕັ້ງຂຶ້ນໃນເດືອນ 5/2012 ມີການເຄື່ອນໄຫວທຸລະກິດທາງດ້ານກະສິກຳ, ປ່າໄມ້, ອຸດສາຫະກຳປຸ່ງແຕ່ງ, ຂາຍຍົກ-ຂາຍຍ່ອຍ, ສ້ອມແປງລົດຍົນ ແລະ ລົດຈັກ, ໄດ້ມີການປຸກລະດົມໂຄສະນາຊວນເຊື່ອໃຫ້ມ່ວນຊົນເຂົ້າມາຮ່ວມລົງທຶນນຳບໍລິສັດ ການເຄື່ອນໄຫວທຸລະກິດແສລູກໂສ້ ທີ່ຂັດກັບໃບອະນຸຍາດດຳເນີນທຸລະກິດ. ນັບແຕ່ເດືອນ ພຶດສະພາ 2015 ຮອດເດືອນ ມິຖຸນາ 2017 ກະຊວງອຸດສາຫະກຳ ແລະ ການຄ້າ ໄດ້ອອກແຈ້ງການເຕືອນ 2 ຄັ້ງ ແລະ ປັບໃໝ 1 ຄັ້ງ, ທະນາຄານແຫ່ງ ສປປ ລາວ ໄດ້ອອກແຈ້ງການໃຫ້ບໍລິສັດສົ່ງເງິນຄືນ ໃຫ້ສະມາຊິກທັງໝົດ 3 ຄັ້ງ ເຊິ່ງບໍລັດສັດໄດ້ຮັບປາກ ແຕ່ບໍ່ໄດ້ປະຕິບັດ. ກົງກັນຂ້າມ ພັດໄດ້ມີການຫັນປ່ຽນຮູບການລະດົມທຶນມາເປັນຮູບແບບໃບສັງຊື້ສິນຄ້າ. ດ້ວຍເຫດນີ້ ສະມາຊິກຂອງບໍລິສັດ ຈຳນວນຫຼວງຫຼາຍໄດ້ອອກຮ້ອງຝ້ອງຮ້ອງທຸກຕໍ່ເຈົ້າໜ້າທີ່ຕ່ຳຫຼວດ ແລະ ໄດ້ແຮ່ກັນໄປເຕົ້າໂຮມຢູ່ຕໍ່ໜ້າບໍລິສັດ ໃນວັນທີ 11-12 ກັນຍາ 2017 ເພື່ອທວງຄຳໝັ້ນສັນຍາໃຫ້ສົ່ງເງິນຄືນ.

ເພື່ອແກ້ໄຂບັນຫາດັ່ງກ່າວລັດຖະບານໄດ້ແຕ່ງຕັ້ງຄະນະສະເພາະກິດ ອີງໃສ່ ຂໍ້ຕົກລົງເລກທີ 67/ນຍ ລົງວັນທີ 14 ກັນຍາ 2017. ຈາກນັ້ນຄະນະສະເພາະກິດ ໄດ້ປະຕິບັດໜ້າທີ່ຕາມການມອບໝາຍຄື: ເກັບກຳຂໍ້ມູນຫຼັກຖານ ແລະ ຄຳໃຫ້ການຂອງຜູ້ຖືກເສຍຫາຍທີ່ເຫັນວ່າບໍລິສັດໄດ້ໃຊ້ເລ່ຫຼ່ຽມຕົວະຍົວະຫຼອກລວງ; ກະຊວງປ້ອງກັນຄວາມສະງົບໄດ້ອອກແຈ້ງການເລກທີ 43/ຕຫຼ ລົງວັນທື 21 ກັນຍາ 2017 ໃຫ້ພໍ່ແມ່ປະຊາຊົນຜູ້ເສຍຫາຍໄປຢືນຄຳຮ້ອງຝ້ອງ ເຊິ່ງປັດຈຸບັນ ໄດ້ຮັບຄຳຮ້ອງຝ້ອງ ແລະ ເອົາຄຳໃຫ້ການໄດ້ຈຳນວນ 11,179 ຄົນ ມູນຄ່າເສຍຫາຍຈຳນວນ 364 ຕື້ກວ່າກີບ; ອະນຸກຳມະການ ໄດ້ລົງເຮັດວຽກຕົວຈິງ ເພື່ອເກັບກຳຂໍ້ມູນ ແລະ ກວດກາ ບັນດາຊັບສິນຂອງບໍລິສັດ ແລະ ບຸກຄົນທີ່ກ່ຽວຂ້ອງ, ຂໍ້ມູນການເຄື່ອນໄຫວທຸລະກິດ ແລະ ການເງິນ, ລະບົບໄອທີ, ເຄື່ອງຈັກ, ວັດຖຸອຸປະກອນເຄື່ອງໃຊ້ ແລະ ສັດລ້ຽງພາຍໃນໂຮງງານ, ເຮືອແພ ແລະ ສວນຜັກ ໂດຍມີການຈົດກາຍຂຶ້ນບັນຊີລະອຽດ ລວມທັງໃຫ້ຢຸດເຊົາການເຄື່ອນໄຫວກິດຈະການຂອງບໍລິສັດໃນໄລຍະດຳເນີນຄະດີອາຍາ.

ໃນການແກ້ໄຂບັນຫາຂອງບໍລິສັດພິເອັສ ຄະນະສະເພາະກິດທີ່ຖືກແຕ່ງຕັ້ງ ໄດ້ເອົາໃຈໃສ່ຢ່າງໃກ້ຊິດ, ດ້ວຍຄວາມຮັບຜິດຊອບສູງ, ເປັນຫ່ວງເປັນໄຍ, ຄຳໜຶງເຖິງຜົນປະໂຫຍດ ຂອງປະຊາຊົນ ແລະ ຈະດຳເນີນຕາມຂະບວນການຂອງກົດໝາຍຢ່າງເຂັ້ມງວດ, ພາວະວິໄສ, ມີຄວາມໂປ່ງໃສ ແລະ ຮັບປະກັນຄວາມຍຸຕິທຳທັງສອງຝ່າຍ, ແຕ່ບໍ່ໄດ້ໝາຍຄວາມວ່າຄະນະສະເພາະກິດຈະມາຮັບພາລະແທນບໍລິສັດ ເພື່ອໃຊ້ໜີ້ນັ້ນ. ກໍຂໍໃຫ້ພໍ່ແມ່ປະຊາຊົນ ແລະ ພາກສ່ວນທີ່ຖືກຜົນກະທົບຈາກການຮ່ວມລົງທຶນໄປນັ້ນ ມີຄວາມອຸ່ນອ່ຽງທຸນທ່ຽງ ເຊື່ອໝັ້ນຕໍ່ຄະນະສະເພາະກິດໃນການດຳເນີນການແກ້ໄຂ.
ຂ່າວ: ຫສພ ເສດຖະກິດ-ການຄ້າ