ເຈົ້າໜ້າທີ່ກວດກາການຄ້າ ເອົາໃຈໃສ່ຕິດຕາມກວດກາສິນຄ້າໃນໄລຍະບຸນປີໃໝ່ຈີນ.

ໃນໄລຍະບຸນປີໃໝ່ຂອງຊາວຫວຽດນາມ ແລະ ຊາວຈີນ ເຈົ້າໜ້າທີ່ກວດກາການຄ້າ ແລະ ປົກປ້ອງຜູ້ຊົມໃຊ້ ກົມການຄ້າພາຍໃນໄດ້ສົມທົບກັບເຈົ້າໜ້າທີ່ກວດກາການຄ້າພະແນກອຸດສາຫະກຳ ແລະ ການຄ້ານະຄອນຫຼວງວຽງຈັນ, ສົມທົບກັບຫ້ອງການໆຄ້າເມືອງໄດ້ລົງຕິດຕາມ, ກວດກາສິນຄ້າໃນທ້ອງຕະຫຼາດ ໂດຍເນັ້ນໃສ່ກວດສິນຄ້າໝົດອາຍຸ, ສິນຄ້າເຊື່ອມຄຸນນະພາບ, ສິນຄ້າບໍ່ຕິດສະຫຼາກເປັນພາສາລາວ, ບໍ່ຕິດສະແຕມພາສີນໍາເຂົ້າ ແລະ ກວດສະພາບການຂຶ້ນລາຄາສິນຄ້າບາງປະເພດຕາມລໍາພັງໃຈ ແລະ ອື່ນໆ ໃນຂອບເຂດເທສະບານເມືອງ ແລະ ແຂວງຂອງຕົນ ເພື່ອຮັບປະກັນດ້ານລາຄາ, ຄວາມປອດໄພຂອງຜູ້ບໍລິ ໂພກ ແລະ ປົກປ້ອງສິດຜົນປະໂຫຍດຂອງຜູ້ຊົມໃຊ້ ລວມທັງຮັບປະກັນໃຫ້ຜູ້ປະກອບການດຳເນີນກິດຈະການໃຫ້ສອດຄ່ອງຖືກຕ້ອງຕາມກົດໝາຍ.

ໃນການຕິດຕາມກວດກາຄັ້ງນີ້ບໍ່ພຽງແຕ່ກວດໃນໄລຍະເທດສະການເທົ່ານັ້ນ ແຕ່ຍັງຈະຕ້ອງສືບຕໍ່ຕິດຕາມກວດກາວຽກງານດັ່ງກ່າວເປັນປົກະຕິ ເພື່ອເຮັດໃຫ້ຜູ້ບໍລິໂພກໃນຂອບເຂດທົ່ວປະເທດໄດ້ຮັບຄວາມເປັນທໍາ ແລະ ໃຫ້ສັງຄົມມີຄວາມສະຫງົບດ້ານການບໍລິໂພກ ແລະ ຊື້ – ຂາຍສິນຄ້າ.

ຢ່າງໃດກໍ່ຕາມ ຖ້າພໍ່ແມ່ປະຊາຊົນໃນສັງຄົມ ຫາກພົບກໍລະນີສິນຄ້າໝົດອາຍຸຖືກເອົາລັດເອົາປຽບໃນການຊື້ສິນຄ້າກໍ່ສາມາດໂທຫາສາຍດ່ວນປົກປ້ອງຜູ້ຊົມໃຊ້ໄດ້ ໂດຍບໍ່ເສຍຄ່າທີເບີ 1510.

ຂ່າວ: ເສດຖະກິດ ການຄ້າ

ຍຸບກວ່າ 1 ພັນຫົວໜ່ວຍ 300 ກວ່າໂຮງງານປຸງແຕ່ງໄມ້ໃນທົ່ວປະເທດໃນປີ 2017

ໃນໄລຍະຜ່ານມາ ລັດຖະບານໄດ້ເອົາໃຈໃສ່ຢ່າງຕໍ່ເນື່ອງໃນການສະກັດກັ້ນ ແລະສົ່ງອອກໄມ້ທ່ອນໄປຕ່າງ ປະເທດ ໂດຍໄດ້ອອກຄຳ ສັ່ງເລກທີ 15/ນຍ ເພື່ອໃຫ້ພາກສ່ວນກ່ຽວຂ້ອງ ຈັດຕັ້ງປະຕິບັດຢ່າງເຂັ້ມງວດຜ່ານ ການປະຕິບັດຄຳສັ່ງດັ່ງກ່າວ ຮອດປະ ຈຸບັນ ຂະແໜງອຸດສາຫະກຳ ແລະການ ຄ້າ ສາມາດດັດສົມ-ຍຸບເລີກ ໂຮງງານ ປຸງແຕ່ງໄມ້ໄປແລ້ວ 349 ໂຮງງານ ຈາກ 1,5 ພັນໂຮງງານ ແລະ ຍຸບເລີກທຸລະກິດປຸງແຕ່ງໄມ້ແບບຄອບຄົວໄດ້ ພັນກວ່າຫົວໜ່ວຍ.

ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ກ່າວໃນກອງປະຊຸມສະຫຼຸບ ວຽກງານອຸດສາ ຫະກຳ ແລະການຄ້າ ປະຈຳປີ 2017 ວ່າ: ໃນປີ 2017 ຜ່ານ ມາຍອດມູນຄ່າການຜະລິດອຸດສາຫະ ກຳປຸງແຕ່ງ ແລະຫັດຖະກຳທົ່ວປະເທດປະຕິບັດໄດ້ 8,94 ພັນຕື້ກີບ ອັດຕາຂະຫຍາຍຕົວສະເລ່ຍ 4,15% ແລະທຽບໃສ່ແຜນການປີແມ່ນປະຕິບັດໄດ້ຕາມແຜນທີ່ວາງໄວ້, ການຈໍລະຈອນສິນຄ້າພາຍໃນ (ການຄ້າຂາຍຍົກ-ຂາຍຍ່ອຍ ແລະບໍລິການ) ສາ ມາດບັນລຸໄດ້ 51,68 ພັນຕື້ກີບ

ເພີ່ມຂຶ້ນ 15,10%, ມູນຄ່າການນໍາເຂົ້າ ແລະສົ່ງອອກບັນລຸປະມານ 74,4 ພັນຕື້ ກີບ ຫຼືປະມານ 9,3 ຕື້ໂດລາເພີ່ມຂຶ້ນ 10,5% ເມື່ອທຽບໃສ່ໄລຍະດຽວກັນ ຂອງປີກ່ອນ ໃນນີ້ ການສົ່ງອອກບັນລຸ 4,8 ຕື້ໂດລາ ເພີ່ມຂຶ້ນ 13,4% ແລະການ ນຳເຂົ້າ 4,5 ຕື້ໂດລາ ເພີ່ມຂຶ້ນ 7,6% ທຽບໃສ່ປີກ່ອນ.ຄຽງຄູ່ກັນນີ້ ຍັງໄດ້ຜັກດັນໃຫ້ມີຕະ ຫຼາດມາດຕະຖານຫຼືຕະຫຼາດຕົວແບບ ຊຶ່ງໃນປະຈຸບັນ ກະຊວງໄດ້ອອກຢັ້ງຢືນ ເປັນຕະຫຼາດມາດຕະຖານຊຸດທໍາອິດໃຫ້ ຕະຫຼາດ 3 ແຫ່ງ: ຕະຫຼາດໂຊກທະວີ, ຕະຫຼາດສົ່ງເສີມກະສິກໍາເມືອງນາຊາຍ ທອງ ແລະຕະຫຼາດລາວ-ອົດຊີເມືອງສີ ໂຄດຕະບອງ, ນອກນີ້ ຍັງສືບຕໍ່ຈັດຕັ້ງ ປະຕິບັດຄໍາສັ່ງ ເລກທີ 15/ນຍ ຢ່າງ ເຂັ້ມງວດ ຊຶ່ງສາມາດດັດສົມ-ຍຸບເລີກ ໂຮງງານປຸງແຕ່ງໄມ້ໄປແລ້ວ 349 ໂຮງງານຈາກ 1.500 ກວ່າໂຮງງານ, ສຳລັບທຸລະກິດປຸງແຕ່ງໄມ້ຂະໜາດ ນ້ອຍແບບຄອບຄົວໄດ້ດັດສົມຍຸບເລີກ ໄປແລ້ວກວ່າ 1 ພັນຫົວໜ່ວຍ ຈາກ 1.178 ຫົວໜ່ວຍ.

ນອກນັ້ນ ໄດ້ຄົ້ນຄວ້າສ້າງ ແລະປັບ ປຸງກົດໝາຍ, ນິຕິກໍາ ແລະນະໂຍບາຍ ປະຈຸບັນ ມີນິຕິກໍາລວມທັງໝົດ 255 ສະບັບ ໃນນັ້ນ ເປັນກົດໝາຍ 7 ສະ ບັບ, ດຳລັດ 16 ສະບັບ, ຂໍ້ຕົກລົງ 74 ສະບັບ, ຄຳສັ່ງ 26 ສະບັບ, ຄຳແນະ ນຳ ແລະບົດແນະນຳ 30 ສະບັບ, ແຈ້ງ ການ 98 ສະບັບ, ລະບຽບ ແລະຂໍ້ກຳ ນົດ 8 ສະບັບ, ພ້ອມທັງໄດ້ສ້າງແຜນ ພັດທະນາວິສາຫະກິດຂະໜາດນ້ອຍ ແລະກາງ 2016-2020, ດໍາລັດວ່າ ດ້ວຍການຈັດແບ່ງຂະໜາດ SME ເພື່ອ ເປັນເຄື່ອງມືໃນການສົ່ງເສີມທຸລະກິດ ຂະໜາດນ້ອຍ ແລະກາງໃຫ້ມີຄວາມ ເຂັ້ມແຂງ.

ສຳລັບວຽກງານການເຊື່ອມໂຍງ ໄດ້ສືບຕໍ່ເຈລະຈາໃນກອບຂອງອົງ ການການຄ້າໂລກ ແລະການເຈລະຈາ ໃນຂອບສັນຍາຄູ່ຮ່ວມມືເສດຖະກິດ ຮອບດ້ານໃນລະດັບພາກພື້ນ (ອາຊຽນ ແລະ 6 ປະເທດຄູ່ເຈລະຈາຄື: ສປ ຈີນ, ຍີ່ປຸ່ນ, ສ.ເກົາຫຼີ, ອິນເດຍ, ອົດສະຕາລີ ແລະນິວຊີແລນ), ສ່ວນການພັດທະນາ ສິນຄ້າທ່າແຮງ ແລະສິນຄ້າໜຶ່ງເມືອງ ໜຶ່ງຜະລິດຕະພັນ “ODOP” ສາ ມາດ ພັດທະນາໄດ້ 24 ຫົວໜ່ວຍ ພ້ອມດຽວ ກັນນັ້ນ ລັດຖະບານໄດ້ຮັບຮອງແຜນ ພັດທະນາວິສາຫະກິດຂະໜາດນ້ອຍ ແລະກາງແຕ່ປີ 2016-2020, ສ່ວນ ການຄຸ້ມຄອງລາຄາສິນຄ້າແມ່ນໄດ້ປັບ ປຸງຂໍ້ກໍານົດວ່າດ້ວຍການເພີ່ມລາຍການ ສິນຄ້າຄວບ ຄຸມລາຄາ (ບັນຊີ ກ) ຈາກ 4 ປະເພດ ມາເປັນ 8 ປະເພດ ແລະໄດ້ ປະສານສົມທົບກັບອົງການຈັດຕັ້ງທີ່ກ່ຽວ ຂ້ອງຂອງທ້ອງຖິ່ນໃນຂອບເຂດທົ່ວປະ ເທດໃນການຄົ້ນຄວ້າ, ເກັບກໍາໂຄງປະ ກອບລາຄາໃນແຕ່ລະຂອດ, ກວດກາການ ເຄື່ອນໄຫວຂອງທຸລະກິດ ແລະຕິດຕາມ ການຊື້-ຂາຍຕ່າງໆເພື່ອຮັບປະກັນລາ ຄາສິນຄ້າໃຫ້ຢູ່ໃນລະດັບທີ່ສາມາດຄຸ້ມຄອງໄດ້.

ຂ່າວ: ເສດຖະກິດ-ສັງຄົມ

ການຈໍລະຈອນສິນຄ້າພາຍໃນປີ 2017 ມີມູນຄ່າສູງເຖິງ 51 ພັນຕື້ກີບ

ຜ່ານ​ການຈັດຕັ້ງ​ປະຕິບັດ​ຕົວເລກ​ຄາດໝາຍ​ສູ້​ຊົນ ປີ 2017 ຂອງ​ຂະແໜງ​ອຸດສາຫະກຳ ແລະ ການ​ຄ້າ​ຂອບ​ມີ 3 ວຽກ​ສຳຄັນ​ຄື: ດ້ານ​ອຸດສາຫະກຳ​ປຸງ​ແຕ່ງ ແລະ ຫັດຖະກຳ ສາມາດ​ປະຕິບັດ​ບັນລຸໄດ້ 8.942 ຕື້​ກີບ ທຽບໃສ່​ປີ 2016 ມີ​ພຽງ 8.585 ຕື້​ກີບ​ ອັດຕາ​ການ​ຂະຫຍາຍຕົວສະເລ່ຍ 4,15% ດ້ານ​ວຽກ​ງານ​ການ​ຄ້າພາຍ​ໃນ​ການ​ຈໍ​ລະ​ຈອນ​ສິນຄ້າພາຍ​ໃນ (ການ​ຂາຍຍົກ-ຂາຍຍ່ອຍ ແລະ ບໍລິການ) ບັນລຸ​ໄດ້ 51.687 ຕື້​ກີບ ປີ 2016 44.907 ຕື້​ກີບ ອັດຕາ​ການ​ຂະຫຍາຍຕົວ ສະເລ່ຍ 15,10% ແລະ ທຽບໃສ່ແຜນການ​ປີ​ແມ່ນ​ເພີ່ມ​ຂຶ້ນ 1% ແລະ ວຽກ​ງານ​ດ້ານ​ການ​ຄ້າຕ່າງປະເທດ​ມູນ​ຄ່າ​ການ​ນຳ​ເຂົ້າ ແລະ ສົ່ງ​ອອກ​ປີ 2017 ຄາດ​ວ່າຈະ​ບັນລຸ​ໄດ້ປະມານ 9.345 ລ້ານ​ໂດ​ລາ​ສະຫະລັດ ເພີ່ມ​ຂຶ້ນ 11% ເມື່ອ​ທຽບໃສ່​ປີ​ດຽວ​ກັນຂອງ​ປີຜ່ານມາ.

ກອງ​ປະຊຸມ​ປະຈຳ​ປີ 2017 ຂະແໜງ​ອຸດສາຫະກຳ ແລະ ການ​ຄ້າ (​ອຄ) ວັນ​ທີ 1-2 ກຸມພາ 2018 ຢູ່​ທີ່​ກະຊວງ​ອຸດ​ສາ​ຫະກຳ ແລະ ການ​ຄ້າ ໂດຍ​ການເປັນ​ປະທານຂອງ​ທ່ານ​ນາງ ເຂັມ​ມະນີ ພົນ​ເສນາ ລັດຖະມົນຕີກະຊວງ​ອຸດສາຫະກຳ ແລະ ການຄ້າ ມີ​ບັນດາ​ຮອງ​ລັດຖະມົນຕີຫົວໜ້າ​ກົມ​ຫ້ອງການ ແລະ ພະນັກງານ​ກ່ຽວຂ້ອງ​ຈາກ​ສູນກາງ-ທ້ອງຖິ່ນ​ເຂົ້າ​ຮ່ວມ.

ຕະຫຼອດ 2 ວັນ​ກອງ​ປະຊຸມ​ໄດ້ທົບ​ທວນຄືນ​ການຈັດຕັ້ງ​ປະຕິບັດແຜນ​ພັດທະນາ​ຂອງ​ຂະແໜງ ​ອຄ ປະຈຳ​ປີ 2017 ແລະ ແຜນການ​ປີ 2018 ໂດຍ​ປິ່ນ​ອ້ອມ 3 ແຜນ​ງານ​ຄື: ແຜນ​ງານ​ເຊື່ອມໂຍງ​ເສດຖະກິດ​ກັບ​ພາກ​ພື້ນ ແລະ ສາກົນ ແຜນ​ງານ​ການສ້າງ​ສະພາບ​ແວດ​ລ້ອມ​ທີ່​ເອື້ອອຳນວຍ​ແກ່​ການ​ສ້າງຕັ້ງ ແລະ ດຳເນີນ​ທຸລະ​ກິດ​ຕາມ​ພາລະ​ບົດບາດ​ຂອງ​ກະຊວງ ​ອຄ ແລະ ແຜນ​ງານ​ການ​ສ້າງ​ໃຫ້​ວິ​ສາ​ຫະກິດ​ພາຍ​ໃນ ໂດຍ​ສະເພາະແມ່ນວິ​ສາ​ຫະ​ກິດ​ຂະໜາດ​ນ້ອຍ-ກາງ ໃຫ້​ມີ​ຄວາມ​ເຂັ້ມແຂງ ແລະ ສາມາດ​ຮັບ​ມື​ກັບ​ການ​ແຂ່ງຂັນ​ພາຍໃນ-ພາກ​ພື້ນ​ຢ່າງ​ແຂງແຮງ ເຊິ່ງໃນ​ປີ 2017 ລາວ​ເຮົາ​ສາມາດ​ສົ່ງອອກ​ສິນຄ້າ ທັງ​ໝົດ​ມູນ​ຄ່າ 4.803 ລ້ານ​ໂດ​ລາ ເພີ່ມ​ຂຶ້ນ 13,4% ນຳ​ເຂົ້າ 4.542 ລ້ານໂດ​ລາ ເພີ່ມ​ຂຶ້ນ 7,6% ທຽບໃສ່ໄລຍະ​ດຽວ​ກັນ ໂດຍ​ເຮັດ​ໃຫ້ການສົ່ງ​ອອກ-ນຳ​ເຂົ້າທັງ​ໝົດ ​ໃນ​ປີ 2017 ເກີນ​ດູນ​ການ​ຄ້າ​ປະມານ 261 ລ້ານ​ໂດ​ລາ ສາເຫດ​ຈາກພັກ-ລັດຖະບານ ໄດ້​ມີ​ນະໂຍບາຍການ​ຮ່ວມ​ມື​ການ​ຄ້າ​ກັບ​ຕ່າງ​ປະເທດ​ຢ່າງ​ເປັນ​ລະບົບ ແລະ ເຂັ້ມແຂງ​ຍິ່ງ​ຂຶ້ນ​ກັບ​ບັນດາ​ປະເທດ​ທີ່ມີ​ຊາຍ​ແດນ​ຕິດ​ຈອດ ພ້ອມ​ນີ້ ກອງ​ປະຊຸມ​ຍັງ​ໄດ້​ປຶກສາ​ຫາລືກ່ຽວ​ກັບ​ການ​ປະຕິບັດ​ນະໂຍບາຍ-ນິຕິ​ກຳ​ຕ່າງໆ ທີ່​ກ່ຽວ​ພັນ​ກັບຂະແໜງ ​ອຄ ເພື່ອ​ເຮັດ​ໃຫ້ການປະຕິບັດ​ວຽກ​ງານ​ຕໍ່ໜ້າ​ປະສົບຜົນສຳເລັດ ແລະ ຕອບ​ສະໜອງໄດ້​ຄວາມ​ຮຽກຮ້ອງ​ຕ້ອງການ​ໄລຍະ​ໃໝ່​ຂອງ​ພັກ ແລະ ລັດ​ຖະບານ​ວາງ​ອອກ​ເປັນ​ກ້າວໆ. ຂ່າວ: ນສພ ວຽງຈັນໃຫ່ມ

ປີ 2018 ນີ້ນະຄອນຫລວງຈະສູ້ຊົນໃຫ້ເສດຖະກິດຂະຫຍາຍຕົວບໍ່ຫລຸດ 10,5%

ຫົວໜ້າພະແນກແຜນການ ແລະ ການລົງທຶນນະຄອນຫລວງວຽງຈັນ ໃຫ້ຮູ້ວ່າ: ປີໃໝ່ນີ້, ນະຄອນຫລວງຈະສູ້ຊົນເຮັດໃຫ້ລວມຍອດຜະລິດຕະພັນພາຍໃນ (GDP) ຂະຫຍາຍຕົວບໍ່ໃຫ້ຫລຸດ 10,5% ແລະ ສະເລ່ຍລາຍຮັບໃສ່ຫົວຄົນໃຫ້ໄດ້ປະມານ 5.490 ໂດລາສະຫະລັດຕໍ່ປີ. ໃນນັ້ນ, ຂົງເຂດກະສິກໍາໃຫ້ ເພີ່ມຂຶ້ນ 5,5% ກວມເອົາ 15%, ອຸດສະຫະກໍາເພີ່ມຂຶ້ນ 14% ກວມເອົາ 47% ແລະ ບໍລິການເພີ່ມຂຶ້ນ 10% ກວມເອົາ 38% ຂອງ GDP ແລະ ເພື່ອບັນລຸຄາດໝາຍດັ່ງກ່າວ, ຈະຕ້ອງໄດ້ລົງທຶນເຂົ້າໃນການພັດທະນາເສດຖະກິດ-ສັງຄົມທັງໝົດປະມານ 15.500 ຕື້ກີບ. ໃນນັ້ນການລົງທຶນໂດຍກົງຂອງພາກເອກະຊົນພາຍໃນ ແລະ ຕ່າງປະເທດມີປະມານ 11.200 ຕື້ກີບເທົ່າກັບ 72% ຂອງການລົງທຶນທັງໝົດ,

ໂດຍສະເພາະຈະສຸມໃສ່ສົ່ງເສີມການຜະລິດເປັນສີນຄ້າຂອງປະຊາຊົນໃຫ້ຫລາຍຂຶ້ນເພື່ອໃຫ້ພຽງພໍກັບຄວາມຕ້ອງການຂອງຕະຫລາດ, ໄປຄຽງຄູ່ກັບການຍູ້ແຮງການພັດທະນາວຽກງານທ່ອງທ່ຽວໃຫ້ແຂງແຮງ, ເອົາໃຈໃສ່ດຶງດູດນັກທຸລະກິດມາລົງທຶນ ແລະ ພັດທະນາການທ່ອງທ່ຽວໃຫ້ຫລາຍ ແລະ ດຶງດູດນັກທ່ອງທ່ຽວເຂົ້າມາທ່ຽວໃຫ້ໄດ້ຕາມເປົ້າໝາຍ, ສືບຕໍ່ຊຸກຍູ້ການຈັດຕັ້ງປະຕິບັດໂຄງການລົງທຶນຂະໜາດໃຫຍ່ ເປັນຕົ້ນ: ໂຄງການກໍ່ສ້າງທາງດ່ວນຄູ່ຂະໜານແຕ່ສູນການຄ້າລາວ-ໄອເຕັກ-ຫົວຂົວ-ໜອງໜ່ຽງ-ເຊື່ອມຕໍ່ເສັ້ນທາງເລກ 13 ໃຕ້-ສະຖານີລົດໄຟ ແລະ ບ້ານດົງໝາກຄາຍ, ໂຄງການກໍ່ສ້າງເສັ້ນທາງ ແລະ ຂົວຂ້າມນໍ້າງື່ມຈຸດບ້ານທ່າດອກຄໍາ-ບ້ານດວງບຸດດີເມືອງໄຊທານີ. ນອກນີ້ ກໍຈະເອົາໃຈໃສ່ຊຸກຍູ້ການລົງທຶນດ້ານອະສັງຫາລິມະຊັບຢູ່ບັນດາໂຄງການທີ່ໄດ້ຮັບອະນຸຍາດໃຫ້ເອກະຊົນສໍາປະທານແລ້ວ ເປັນຕົ້ນ: ໂຄງການເຂດເສດຖະກິດສະເພາະບຶງທາດຫລວງ, ເຂດພັດທະນາໜອງທາ, ເຂດເສດຖະກິດລອງແທັງ, ເຂດພັດທະນາກວມລວມໄຊເສດຖາ ແລະ ໂຄງການອື່ນໆໃຫ້ຫລາຍຂຶ້ນ.

ຮອງຫົວໜ້າກົມຄຸ້ມຄອງພັດທະນາທີ່ດິນກະຊວງກະສິກໍາ ແລະ ປ່າໄມ້ ຢ້ຽມຢາມການປູກຜັກຢູ່ບ້ານຫຼັກຂາວ

ໃນຕອນບ່າຍຂອງວັນທີ 26 ມັງກອນ 2018 ນີ້ ທ່ານ ປອ ນິວົງ ສີປະເສີດ ຮອງຫົວໜ້າກົມຄຸ້ມຄອງພັດທະນາທີ່ດິນ ກະຊວງກະສິກໍາ ແລະ ປ່າໄມ້ ພ້ອມພະແນກການອ້ອມຂ້າງແຂວງ,ເມືອງ ໄດ້ເຄື່ອນໄຫວຢ້ຽມຢາມຄອບຄົວຕົວແບບການປູກຜັກກະລໍ່າປີຂອງ ທ່ານ ຄໍາເສີຍ ຈໍາປາແກ້ວມະນີ ຢູ່ບ້ານ ຫຼັກຂາວ ເມືອງ ທ່າແຕງ ແຂວງ ເຊກອງ ການລົງຢ້ຽມຢາມຄັ້ງນີ້ ກໍ່ເພື່ອຕິດຕາມເບິ່ງການພັດທະນາພື້ນຖານການປູກຜັກຕ່າງໆພາຍໃນຄອບຄົວຕົວແບບດັ່ງກ່າວ.


ທ່ານ ຄໍາເສີຍ ຈໍາປາແກ້ວມະນີ ຄອບຄົວຕົວແບບການປູກຜັກກະລໍ່າປີບ້ານ ຫຼັກຂາວ ໄດ້ໃຫ້ຮູ້ວ່າ: ຕົນເອງໄດ້ລິເລີ່ມການປູກຜັກກະລໍ່າປີມາແຕ່ປີ 2000-2008 ປູກແບບປະຖົມປະຖານ ບວກກັບເຕັກນິກທີ່ຮຽນຮູ້ຈາກຂະແໜ່ງການທີ່ກ່ຽວຂ້ອງຂັ້ນເມືອງ,ຂັ້ນແຂວງ ເທົ່າທີ່ຕົນໄດ້ຮຽນຮູ້ມາ ແລະ ຄວາມມັກຮັກໃນອາຊີບການປູກຜັກຊະນິດຕ່າງໆ ໂດຍສະເພາະ ການປູກກະລໍ່າປີ,ການປູກຜັກກາດ ແລະ ອື່ນໆ,ເຊິ່ງເບື້ອງຕົ້ນມີດິນທໍາການຜະລິດບໍ່ເຖິງເຮັກຕາ ໄດ້ລົງທືນປະມານ 3-5 ລ້ານກີບ,ພາຍໃນຄອບຄົວມີແຮງງານສົມບູນ 2 ແຮງງານ ພາຍຫຼັງການເກັບກູ້ການຜະລິດສິນຄ້າຂອງຕົນເອງສາມາດຂາຍອອກສູ່ຕະຫຼາດພາຍໃນ,ສາມາດລ້ຽງຊີວິດຄອບຄົວໄດ້ພໍກຸ້ມຢູ່ກຸ້ມກິນ,ຈາກນັ້ນ ເມື່ອຮອດທ້າຍປີ 2008 ຈົນມາເຖິງປະຈຸບັນ ພາຍໃນຄອບຄົວໄດ້ປຶກສາຫາລືຊອກຫາທຸກວິທີເພື່ອຂະຫຍາຍເນື້ອທີ່ດິນທໍາການຜະລິດອອກຈາກເມືອກ່ອນບໍ່ທັນເຖິງເຮັກຕາ ມາເປັນ 2 ເຮັກຕາ,

ຊອກຮຽນຮູ້ບັນດາເຕັກນິກຕ່າງໆ ລວມໄປເຖິງວິທີການບົວລະບັດຮັກສາຈາກພາຍໃນເມືອງ-ແຂວງ ແລະ ແຂວງອ້ອມຂ້າງ ບວກກັບຄວາມມັກຮັກໃນອາຊີບນີ້ ເຊິ່ງປະຈຸບັນ ຄອບຄົວຂອງທ່ານ ຄໍາເສີຍ ຈໍາປາແກ້ວມະນີ ມີ 6 ຄົນ,ໃນນີ້ ມີແຮງງານສົມບູນ 2 ແຮງງານ,ແຮງງານສໍາຮອງ 2 ແຮງງານ ທີ່ເຮັດໜ້າທີ່ຊາວສວນປູກຜັກກະລໍ່າປີໄດ້ທັງໝົດ 150 ໂຕນ/ປີ,ສາມາດນໍາໄປຂາຍຢູ່ຕາມທ້ອງຕະຫຼາດທັງພາຍໃນ ແລະ ຕ່າງປະເທດ,ລາຍຮັບສະເລ່ຍທັງໝົດ 105 ລ້ານກີບ/ປີ,ສະເລ່ຍໃສ່ຫົວຄົນໜຶ່ງໄດ້ 17 ລ້ານ 5 ແສນກີບ ສາມາດລ້ຽງຄອບຄົວດີຂື້ນເທື່ອລະກ້າວ.


ຂະນະດຽວກັນນີ້ ທ່ານ ປອ ນິວົງ ສີປະເສີດ ຮອງຫົວໜ້າກົມຄຸ້ມຄອງພັດທະນາທີ່ດິນ ກະຊວງກະສິກໍາ ແລະ ປ່າໄມ້ ໄດ້ຮຽກຮ້ອງໃຫ້ຄອບຄົວຕົວແບບການປູກກະລໍ່າປີຂອງທ່ານ ຄໍາເສີຍ ຈໍາປາແກ້ວມະນີວ່າ: ໃນຕໍ່ໜ້ານີ້ ທາງກະຊວງກະສິກໍາ ແລະ ປ່າໄມ້ ແລະພາກສວ່ນທີ່ກ່ຽວຂ້ອງຂອງແຂວງ,ເມືອງ ໄດ້ມີວິທີການ,ມາດຕະການ,ເຕັກນິກວິຊາການ,ການບົວລະບັດຮັກສາ ລວມໄປເຖິງການຈັດການທີ່ດິນ,ປຶກສາຫາລືແກ້ໄຂບັນຫາການນໍາໃຊ້ຢາປາບສັດຕູພືດ,ຝຸ່ນເຄມີ ໃນການຜະລິດກະສິກໍາອິນຊີແບບຍືນຍົງ,ການວາງແຜນຈັດຕັ້ງປະຕິບັດຂອງໂຄງການສ້າງເຄືອຄ່າຍກະສິກໍາອິນຊີແບບຍືນຍົງຢູ່ພາຍໃນ 2 ແຂວງຄື: ແຂວງ ຈໍາປາສັກ ແລະ ແຂວງ ເຊກອງ,ເວົ້າສະເພາະ ຢູ່ເມືອງ ທ່າແຕງ ແມ່ນຈະຈັດຕັ້ງປະຕິບັດໂຄງການສ້າງເຄືອຄ່າຍກະສິກໍາອິນຊີແບບຍືນຍົງຢູ່ບ້ານຫຼັກຂາວໃຫ້ໄດ້ຮັບຜົນຕາມລະດັບຄາດໝາຍຂອງໂຄງການວາງອອກຢ່າງເຂັ້ມງວດເຊີ່ງທັງນີ້ເພື່ອເປັນການຮັບປະກັນຄວາມປອດໄພໃຫ້ແກ່ຜູ້ບໍລິໂພກຫຼາຍຂຶ້ນ.

ຂ່າວ: ພອນ ບຸນອຸທິດ 020 5632 8844.

ແຂວງເຊກອງສາມາດເກັບລາຍຮັບເຂົ້າງົບປະມານໄດ້ລື່ນແຜນ 39%

ກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2017 ແລະ ແຜນການທິດທາງປີ 2018ໄດ້ໄຂຂຶ້ນໃນຕອນບ່າຍວັນທີ 17 ມັງກອນ ນີ້ ຢູ່ທີ່ສະໂມສອນສະພາແຂວງ ໂດຍການເປັນປະທານຂອງທ່ານ ທອນສົມມັກ ຈັນທະສີດາ ຫົວໜ້າພະແນກການເງິນແຂວງເຊກອງ, ມີທ່ານຮອງເຈົ້າເມືອງ, ຜູ້ຊີ້ນຳວຽກງານເສດຖະກິດ ແລະ ຫົວໜ້າ ຫຼື ຮອງຫົວໜ້າຫ້ອງການການເງິນຈາກ 4 ເມືອງ, ພ້ອມດ້ວຍບັນດາພະແນກການ, ຂະແໜງການອ້ອມຂ້າງແຂວງ ເຂົ້າຮ່ວມ.

ທ່ານ ຄໍາຮູ້ ອ່ອນມະນີ ຮອງຫົວໜ້າພະແນກການເງິນແຂວງເຊກອງໄດ້ສະຫຼຸບລາຍງານ ການຈັດຕັ້ງປະຕິບັດວຽກງານລາຍຮັບ-ລາຍຈ່າຍງົບປະມານແຫ່ງລັດປະຈຳປີ 2017 ໃຫ້ຮູ້ວ່າ:

ໃນໄລຍະ 1 ປີ ຜ່ານມາໄດ້ສູ້ຊົນເກັບລາຍຮັບມອບເຂົ້າງົບປະມານ ໄດ້ທັງໝົດ 103.37 ຕື້ກີບ ທຽບໃສ່ແຜນການປີ ປະຕິບັດໄດ້ລື່ນແຜນ 39% ໃນນັ້ນປະກອບມີ: ລາຍຮັບພູດສູນກາງ 0,09 ຕື້ກີບ ທຽບໃສ່ແຜນປີ ລື່ນແຜນ 50 %, ລາຍຮັບພາຍໃນແຂວງ (ທ້ອງຖິ່ນ) 95.28 ຕື້ກີບ ທຽບໃສ່ແຜນການປີ ລື່ນແຜນ 38%, ຂັ້ນແຂວງປະຕິບັດໄດ້ລື່ນແຜນ, ຂັ້ນພະ ແນກລື່ນແຜນປີ 0.25 ຕື້ກີບ ແລະ ຂັ້ນເມືອງປະຕິບັດໄດ້ລື່ນແຜນ 1.29 ຕື້ກີບ, ສາມາດເບີກຈ່າຍເງິນເດືອນ-ເງິນນະໂຍ ບາຍຕ່າງໆໃນທົ່ວແຂວງໄດ້ສຳເລັດ 100% ເປັນປົກກະຕິດີ, ພ້ອມທັງໄດ້ກວດກາຕົວເລກຍອດເຫຼືອໃນບັນຊີຄັງເງິນສົດ ແລະ ເງິນຝາກທະນາຄານ ພາຍຫຼັງປິດສູນໂມງຍອດເຫຼືອງົບປະມານແມ່ນ 13.34 ຕື້ກີບ.

ທ່ານ ຮອງຫົວໜ້າພະແນກການເງິນ ແຂວງໃຫ້ຮູ້ຕື່ມວ່າ: ສຳລັບທິດທາງແຜນການງົບປະມານແຫ່ງລັດປີ 2018 ພວກເຮົາຕ້ອງໄດ້ສູ້ຊົນປະຕິບັດຄາດໝາຍໃນການຈັດເກັບລາຍຮັບໃຫ້ໄດ້ຢ່າງຄົບຖ້ວນຕາມທ່າແຮງທີ່ບົ່ມຊ້ອນ ເຊິ່ງໄດ້ວາງຄາດໝາຍສູ້ຊົນຊອກລາຍຮັບໃຫ້ໄດ້ທັງໝົດ ລວມທັງເງິນດຸ່ນດ່ຽງຈາກສູນກາງ 369.48 ຕື້ກີບ. ໃນນີ້, ມີລາຍຮັບພາຍໃນບວກລາຍຮັບວິຊາການໃຫ້ໄດ້ 84.34 ຕື້ກີບ ເພີ່ມຂຶ້ນ 5%, ລາຍຮັບຈາກສູນກາງດຸ່ນດ່ຽງ 290.06 ຕື້ກີບ ຫຼຸດລົງ 4%, ຍອດລາຍຈ່າຍງົບປະມານ 369.48 ຕື້ກີບ ທຽບໃສ່ແຜນດັດແກ້ຫຼຸດລົງ 8%.

ປີ 2017 ຜ່ານມາ ກວດພົບຜົນເສຍຫາຍຈາກສໍ້ລາດບັງຫລວງ 400 ກວ່າຕື້.

ກອງ​ປະຊຸມ​ວຽກ​ງານ​ກວດກາ​ທົ່ວ​ປະ​ເທດປະຈຳ​ປີ 2017 ​ໄດ້​ໄຂ​ຂຶ້ນ​ໃນ​ວັນ​ທີ 10-12 ມັງກອນຜ່ານມານີ້, ​ໂດຍ​ການ​ເປັນ​ປະທານ​ຂອງ​ທ່ານ ບຸນ​ທອງ ຈິດ​ມະນີ ຮອງ​ນາຍົກລັດຖະມົນຕີ, ປະທານ​ກວດກາ​ສູນ​ກາງ​ພັກ, ປະທານ​ອົງການ​ກວດກາ​ລັດຖະບານ, ຫົວໜ້າ​ອົງການ​ຕ້ານ​ການ​ສໍ້​ລາດ​ບັງ​ຫລວງ​ຂັ້ນສູນ​ກາງ, ໂດຍມີການເປີດເຜີຍວ່າ: ປີຜ່ານມາໄດ້​ດຳ​ເນີນການ​ຕິດຕາມ-ກວດກາ​ພຶດຕິ​ກຳ​ການ​ສໍ້ລາດ​ບັງ​ຫລວງ​ຂອງ​ພະນັກງານ-ລັດຖະກອນ​ຢູ່​ບັນດາ​ກະຊວງ-ອົງການ ​ແລະ ທ້ອງ​ຖິ່ນຕ່າງໆ, ຊຶ່ງສາມາດ​ດຳ​ເນີນ​ໄດ້ 80 ​ເລື່ອງ.

ໃນ​ນັ້ນ; ​ໄດ້​ສືບສວນ-ສອບ​ສວນ​ຄະດີ​​ສໍ້​ລາດ​ບັງ​ຫລວງ 3 ກໍລະນີທີ່​ກ່ຽວ​ຂ້ອງກັບການ​ຊຳລະ​ໜີ້​ສິນ​ຂອງ​ໂຄ​ງການ​ບໍ່​ມີ​ຕົວ​ຕົນ ​ແລະ ຈ່າຍ​ເງິນ​ເກີນ-ຊ້ຳຊ້ອນ​ຢູ່ 12 ​ແຂວງ, ນະຄອນ ຫຼວງ​ວຽງ​ຈັນ ແລະ 1 ກະຊວງ, ລວມມີມູນ​ຄ່າ​ເສຍ​ຫາຍເປັນເງິນ 404,33 ຕື້ກີບ, ​ໃນ​ນັ້ນ ສາມາດກູ້ຄືນມາ​ໄດ້ແລ້ວຫລາຍກວ່າ 317 ຕື້ກີບ.

ກອງປະຊຸມຄັ້ງນີ້ ຍັງໄດ້ພ້ອມກັນສະຫຼຸຸບຕີລາຄາ ແລະ ປະກອບຄຳເຫັນຕໍ່ການເຄື່ອນໄຫວປະຕິບັດວຽກງານ ຕິດຕາມ-ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງໃນໜຶ່ງປີຜ່ານມາ. ສຳລັບວຽກງານກວດກາໃນໜຶ່ງປີຜ່ານມາຄະນະພັກ, ອົງການປົກຄອງ ແລະ ຄະນະກວດກາແຕ່ລະຂັ້ນໄດ້ພ້ອມກັນຕັ້ງໜ້າບຸກບືນປະຕິບັດ ວຽກງານຕິດຕາມ-ກວດກາສະກັດກັ້ນ ແລະ ຕ້ານການສໍ້ລາດບັງຫຼວງ, ຄົ້ນຄວ້າແກ້ໄຂຄຳຮ້ອງ-ຄຳສະເໜີ ແລະ ປັບປຸງ ການຈັດຕັ້ງຢູ່ຂັ້ນຂອງຕົນມີຜົນສຳເລັດຫຼາຍດ້ານ.

ສຳລັບວຽກງານໃນຕໍ່ໜ້າ, ຈະຕ້ອງໄດ້ພ້ອມກັນຄົ້ນຄວ້າປະກອບຄວາມຄິດເຫັນໃຫ້ເລິກເຊິ່ງ, ເປັນເອກະພາບຕໍ່ທິດທາງ, ໜ້າທີ່ ແລະ ບັນດາວຽກທີ່ຈະຕ້ອງສຸມໃສ່ຈັດຕັ້ງປະຕິບັດໃນປີ 2018, ແນໃສ່ເຮັດໃຫ້ວຽກງານຕິດຕາມ-ກວດກາ ສະກັດກັ້ນ ແລະ ຕ້ານການສໍ້ລາດບັງຫຼວງທັງຢູ່ສູນກາງ ແລະ ທ້ອງຖິ່ນໄດ້ຮັບ ການຈັດຕັ້ງປະຕິບັດຢ່າງຕັ້ງ ໜ້າ ແລະ ມີການຫັນປ່ຽນດີຂຶ້ນກວ່າເກົ່າ,ປະກອບສ່ວນເຮັດໃຫ້ການຄຸ້ມຄອງລັດດ້ວຍກົດໝາຍມີຄວາມສັກສິດ, ການພັດທະນາເສດຖະກິດ-ສັງຄົມມີການຂະຫຍາຍຕົວ, ບັນລຸຕາມລະດັບຄາດໝາຍທີ່ວາງໄວ້, ການກໍ່ສ້າງພັກ, ພະນັກງານໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນຕາມທິດທີ່ມະຕິກອງປະຊຸມໃຫຍ່ ຄັ້ງທີ X ຂອງພັກໄດ້ກຳນົດໄວ້.

ໃນກອງປະຊຸມຄັ້ງນີ້ ທ່ານ ສີໃນ ມຽງລາວັນ ຮອງປະທານ ຄະນະກວດກາສູນກາງພັກ ຮອງປະທານອົງການກວດກາລັດຖະບານ ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ໄດ້ຂຶ້ນຜ່ານຮ່າງບົດສະຫຼຸຸບຕີລາຄາການເຄື່ອນໄຫວວຽກງານຕິດຕາມ-ກວດກາ ແລະ ສະກັດກັ້ນຕ້ານການສໍ້ລາດບັງຫຼວງໄລຍະ 1 ປີ ຜ່ານມາ 2017 ທິດທາງແຜນການວຽກງານກວດກາປີ 2018 ຕື່ມອີກ.

ທີ່ມາ: ນສພ ລາວພັດທະນາ

ເສດຖະກິດແຂວງຫົວພັນຂະຫຍາຍຕົວ 8,56%ສະເລ່ຍພົນລະ ເມືອງ ຜູ້ໜຶ່ງມີລາຍຮັບປະມານ 12 ລ້ານກວ່າກີບຕໍ່ປີ

ຜູ້ຮັບຜິດຊອບວຽກງານ ເສດຖະກິດແຂວງຫົວພັນລາຍ ງານໃນກອງປະຊຸມສະພາປະ ຊາຊົນແຂວງເມື່ອ ທ້າຍອາທິດ ຜ່ານມານີ້ວ່າ: ໃນປີ 2017 ເສດຖະກິດແຂວງຫົວພັນມີລະ ດັບການຂະຫຍາຍຕົວ 8,56% ຄືລວມຍອດຜະລິດຕະພັນ ພາຍ ໃນບັນລຸໄດ້ເກືອບ 4.000 ຕື້ກີບ, ໂດຍສະເລ່ຍພົນລະ ເມືອງ ຜູ້ໜຶ່ງມີລາຍຮັບປະມານ 12 ລ້ານກວ່າກີບຕໍ່ປີ. ທັງນີ້ ກໍ່ເນື່ອງຈາກແຂວງໄດ້ສຸມໃສ່ ຈັດຕັ້ງປະຕິບັດໂຄງການລົງ ທຶນຂອງລັດຈຳນວນ 235 ໂຄງການລວມມີມູນຄ່າຫລາຍ ກວ່າ 323 ຕື້ກີບ, ໃນນັ້ນທຶນ ພາຍໃນມີ 121 ຕື້ກວ່າກີບ ແລະ ການລົງທຶນຕ່າງປະເທດ ມີ 200 ກວ່າຕື້ກີບ, ພ້ອມນັ້ນ ຍັງມີການລົງທຶນ ຂອງພາກ ເອກະຊົນທັງພາຍໃນ ແລະ ຕ່າງປະເທດລວມມູນຄ່າ ຫລາຍກວ່າ 13 ລ້ານໂດລາ ສະຫະລັດ ແລະ ທຶນຊ່ວຍ ເຫລືອ (ODA) ມີ 39 ໂຄງ ການລວມມີມູນຄ່າ 226 ຕື້ກວ່າກີບ.

ໃນກອງປະຊຸມສະພາ ດັ່ງກ່າວຍັງໄດ້ຮັບຮອງເອົາ 5 ບັນຫາສຳຄັນທີ່ເປັນພື້ນ ຖານໃຫ້ແກ່ການຄຸ້ມຄອງ ບໍລິຫານ ແຂວງຂອງຕົນຄື: ວຽກງານປົກຄອງ, ວຽກ ງານກວດກາ, ວຽກງານໄອ ຍະການ ແລະ ສານປະຊາ ຊົນ ແລະ ພິເສດ ແມ່ນໄດ້ ຮັບຮອງເອົາຂໍ້ຕົກລົງ ຂອງ ທ່ານເຈົ້າແຂວງວ່າ ດ້ວຍ ກອງທຶນກິລາ-ກາຍະກຳຂັ້ນ ແຂວງອີກດ້ວຍ.

ຂ່າວ: ນສພ ລາວພັດທະນາ

ແຈ້ງການປັບຂຶ້ນລາຄາຂາຍຍ່ອຍນ້ຳມັນເຊື້ອໄຟໃຫ້ທົ່ວປະເທດ ເລີ່ມປະຕິບັດ 16 ມັງກອນ 2018

ກະຊວງອຸດສາຫະກຳ ແລະການຄ້າໄດ້ປະກາດປັບຂຶ້ນລາຄາຂາຍຍ່ອຍນ້ຳມັນເຊື້ອໄຟໃຫ້ທົ່ວປະເທດ

ຕາມແຈ້ງການຂອງກະຊວງອຸດສາຫະກຳ ແລະການຄ້າສະບັບເລກທີ 0048/ອຄ.ກຄພນ ລົງວັນທີ 15 ມັງກອນ 2018 ລາຄາໃໝ່ນີ້ແມ່ນຈະເລີ່ມມີຜົນສັກສິດແຕ່ເວລາ 6:00 ເຊົ້າຂອງມື້ອື່ນກໍ່ຄືວັນທ 16 ມັງກອນ 2018 ເປັນຕົ້ນໄປ.

ເຮັດສົ້ມຜັກຂາຍພາໃຫ້ຄອບຄົວມີລາຍຮັບດີຂຶ້ນ

ຄອບຄົວຂອງພໍ່ ບຸນເລີດ ຊິນນະລາດ ອາຍຸ 62 ປີ ແລະ ແມ່ ຈັນໂທ ຊິນນະລາດ ອາຍຸ 57 ປີ, ປະຊາຊົນບ້ານ ໂນນສະຫວ່າງ, ເມືອງປາກເຊ, ແຂວງຈໍາປາສັກ ພາຍຫຼັງຫັນມາຢຶດຖືອາຊີບເຮັດສົ້ມຜັກຂາຍ ພາໃຫ້ລາຍຮັບຂອງຄອບຄົວດີຂຶ້ນ ແລະ ພຽງພໍກັບການໃຊ້ຈ່າຍ.
ແມ່ ຈັນໂທ ຊິນນະລາດ ເວົ້າສູ່ຟັງວ່າ: ເມື່ອກ່ອນຄອບຄົວຂອງຕົນມີອາຊີບເປັນພະນັກງານທັງຜົວ ແລະ ເມຍ ຄື: ຜົວເປັນອາຈານສອນຢູ່ ມຕ.ໂພນໄຊ ໃນເມື່ອກ່ອນ ( ມສ. ໂພນໄຊ ໃນປັດຈຸບັນ ) ໄລຍະຕໍ່ມາຖືກແຕ່ງຕັ້ງໃຫ້ມາປະຈໍາການຢູ່ຫ້ອງການສຶກສາເມືອງປາກເຊ ຈົນຮອດອາຍຸການເຂົ້າພັກຜ່ອນຮັບບໍານານ ສ່ວນຕົນເອງແມ່ນເປັນທະຫານ ຊຶ່ງໜ້າທີ່ວິຊາສະເພາະແມ່ນຕັດຫຍິບເຄື່ອງນຸ່ງ ເຊິ່ງເຫັນວ່າໄລຍະນັ້ນສະພາບເສດຖະກິດຄອບຄົວມີລັກສະນະຂາດເຂີນ, ລາຍຮັບບໍ່ພຽງພໍກັບຄ່າໃຊ້ຈ່າຍໃນຄອບຄົວສະນັ້ນຕົນເອງຈິ່ງຕັດສິນໃຈລາອອກຈາກການເປັນພະນັກງານ ແລະ ຊອກຫາອາຊີບໃໝ່ດ້ວຍການເຮັດສົ້ມຜັກຂາຍ.
ການປະກອບອາຊີບເຮັດສົ້ມຜັກຂາຍ ເພື່ອສ້າງລາຍຮັບເພີ່ມໃຫ້ແກ່ຄອບຄົວແຕ່ປີ 1988 ເຊິ່ງໃນປີເລີ່ມຕົ້ນການລົງທຶນເຂົ້າໃນການຊື້ວັດຖຸດິບມາເຮັດສົ້ມຜັກພຽງແຕ່ 50 ພັນກີບຕໍ່ມື້ ແລະ ຜ່ານການເຮັດຕົວຈິງໃນໄລຍະຕົ້ນໆຂອງການດໍາເນີນກິດຈະການເຫັນວ່າມີຄວາມສະດວກໃນແຕ່ລະດ້ານ, ລູກຄ້າກໍ່ໃຫ້ການຕອບຮັບເປັນຢ່າງດີ ແລະ ປັດຈຸບັນເຫັນວ່າມີລູກຄ້າທົ່ວໄປ,

ລູກຄ້າຂາປະຈໍາ ກໍ່ຄືລູກຄ້າທີ່ມາຮັບຊື້ ແລ້ວນໍາໄປຂາຍຕໍ່ມີຈໍານວນເພີ່ມຂຶ້ນ ຈິ່ງມີການເພີ່ມປະລິມານການເຮັດສົ້ມຜັກຫຼາຍຂຶ້ນໃຫ້ພຽງພໍກັບຄວາມຕ້ອງການຂອງລູກຄ້າໃນແຕ່ລະວັນຄື: ສົ້ມຜັກຊູ ປະສົມກັບຜັກບົ່ວ ຫຼື ຜັກອີ່ຄູ້ 20 ກິໂລຕໍ່ມື້, ສົ້ມຜັກກາດ 15 ກິໂລຕໍ່ມື້, ສົ້ມຜັກສ້ຽນ 10 ກິໂລຕໍ່ມື້ ນອກຈາກນີ້ກໍ່ມີສົ້ມໝາກຖົ່ວງອກ ປະສົມກັບຜັກບົ່ວ, ຜັກກາດດອງເປັນຫົວ ຫຼື ເປັນຕົ້ນ ແລະ ສົ້ມຜັກກາດປະເພດຕັດຕ່ອນໃຫຍ່ ປະສົມກັບຫົວຜັກບົ່ວແດງ, ຫົວຜັກບົ່ວ, ຜັກອີ່ຄູ້. ສໍາລັບວັດຖຸດິບທີ່ນໍາມາເປັນສ່ວນປະກອບແມ່ນສາມາດຊອກຊື້ໄດ້ຕາມທ້ອງຕະຫຼາດເຊັ່ນ: ຜັກຊູ, ຜັກກາດຕີນໝີ (ຜັກກາດຂິວ), ຜັກສ້ຽນ, ຜັກບົ່ວ, ຜັກອີ່ຄູ້, ໝາກຖົ່ວງອກ, ແປ້ງນົວ, ເກືອ, ເຂົ້າໜຽວໜຶ້ງສຸກແລ້ວ, (ໜັງຂາງົວທີ່ຕົ້ມສຸກແລ້ວ ສໍາລັບໃສ່ສົ້ມຜັກຊູ), ແລະ ຕົ້ນທຶນທີ່ນໍາໃຊ້ເຂົ້າໃນການຈ່າຍຊື້ວັດຖຸດິບແມ່ນປະມານ 3 ແສນກີບຕໍ່ວັນ ເຊິ່ງຖ້າຂາຍໝົດຕາມຈໍານວນທີ່ເຮັດແມ່ນຈະມີກໍາໄລປະມານ 1 ແສນກີບໃນແຕ່ລະວັນ. ລາຄາຂາຍ: ຖົງ 3.000-5.000 ກີບ ແລະ ຂາຍເປັນໂລ ມີກິໂລລະ 25 ພັນກີບ, ກິໂລລະ 30 ພັນກີບຕາມລາຄາຂາຍສົ່ງ, ຂາຍຍ່ອຍ.
ສະເພາະວິທີເຮັດກໍ່ງ່າຍດາຍພຽງແຕ່ນໍາເອົາຜັກແຕ່ລະປະເພດມາຊອຍບາງໆແລ້ວແຊ່ນໍ້າເກືອປະໄວ້ 60-90 ນາທີ ເພື່ອໃຫ້ຜັກມີຄວາມສະອາດ, ຫຼັງຈາກນັ້ນເອົາຂຶ້ນມາຊາວ ຫຼື ຄົນໃຫ້ອ່ອນພໍປະມານ ແລ້ວນໍາມາລ້າງນໍ້າໃຫ້ສະອາດ ຈິ່ງນໍາມາຄົນໃສ່ເຂົ້າໜຽວທີ່ໜຶ້ງສຸກແລ້ວ, ຫຼັງຈາກນັ້ນປຸງແຕ່ງດ້ວຍເກືອ, ແປ້ງນົວພໍປະມານ ແລ້ວເອົາໃສ່ຖັງ ພ້ອມອັດຝາຖັງໃຫ້ແຈບດີ ປະໄວ້ໃນໄລຍະເວລາພໍສົມຄວນສົ້ມຜັກກໍ່ຈະ “ເປັນ” (ສົ້ມຜັກສາມາດກິນໄດ້). ພ້ອມນີ້ສິ່ງສໍາຄັນຂອງການເຮັດສົ້ມຜັກຂາຍນອກຈາກຈະເນັ້ນໜັກໃນຄວາມແຊບແລ້ວ ກໍ່ຍັງໄດ້ເອົາໃຈໃສ່ເລື່ອງຄວາມສະອາດອີກດ້ວຍ, ສະນັ້ນຈິ່ງສາມາດດຶງດູດລູກຄ້າພາຍໃນເມືອງປາກເຊ, ບັນດາເມືອງຕ່າງໆ, ແຂວງໃກ້ຄຽງ, ລູກຄ້າປະເທດໃກ້ຄຽງ (ໄທ) ກໍ່ໄດ້ມາແວ່ຊື້ຊ່ວຍເປັນປະຈໍາ.

ແມ່ ຈັນໂທ ຊິນນະລາດ ກ່າວໃນຕອນທ້າຍຕື່ມວ່າ: ໃນການເຮັດສົ້ມຜັກຂາຍມີແຮງງານທັງໝົດ 3 ຄົນ, ເປັນແຮງງານໃນຄອບຄົວ. ສໍາລັບສົມຜັກແຕ່ລະປະເພດ ເວລາລູກຄ້າເຮັດງານບຸນ, ງານດອງ ຫຼື ງານສັງສັນອື່ນໆ ຖ້າລູກຄ້າຕ້ອງການແມ່ນຍິນດີບໍລິການເຮັດໃຫ້ຕາມຈໍານວນລູກຄ້າຕ້ອງການ ດ້ວຍລາຄາເປັນກັນເອງ. ສະຖານທີ່ເຮັດສົ້ມຜັກ ແມ່ນຢູ່ກັບເຮືອນ, ບ້ານ ໂນນສະຫວ່າງ, ເມືອງປາກເຊ, ແຂວງຈໍາປາສັກ.
ພ້ອມນີ້ຫາກທ່ານສົນໃຈສັ່ງຊື້ ຫຼື ຕ້ອງການສອບຖາມເພີ່ມຕື່ມກ່ຽວກັບວິທີເຮັດສົ້ມຜັກ ສາມາດພົວພັນທາງໝາຍເລກໂທລະສັບ 020 9982 0214. ຜ່ານຈາກການເຮັດສົ້ມຜັກຂາຍເປັນສິນຄ້າ ໄດ້ເຮັດໃຫ້ຊີວິດການເປັນຢູ່ຂອງຄອບຄົວມີການພັດທະນາດີຂຶ້ນເລື້ອຍໆຄື: ປັດຈຸບັນມີເຮືອນຢູ່ຖາວອນ, ມີພາຫະນະຮັບໃຊ້ໃນເຮືອນຢ່າງສະດວກ, ມີທຶນຮອນສົ່ງລູກໆເຂົ້າຮຽນ ແລະ ປັດຈຸບັນລູກແຕ່ລະຄົນມີວຽກເຮັດງານທໍາທີ່ແນ່ນອນ.
*** ຂ່າວ-ພາບ: ຈັນທະວີສັກ ໜັງສືພິມຈໍາປາໃໝ່ ***