ສຳເລັດຊຸດເຝິກອົບຮົມການສອນພາສາອັງກິດໃຫ້ກັບຄູສອນຊັ້ນປ4ທົ່ວເມືອງໂພນທອງ.

ລະຫວ່າງວັນທີ24-27 ຕຸລາ 2017 ນີ້ຢູ່ທີ່ ຮ.ຮ ປະຖົມສຶກສາ ບ້ານກາງ ກຸ່ມໂພນທອງ ເມືອງໂພນທອງແຂວງຫຼວງພະບາງ ໄດ້ຈັດພິທີເຝີກອົບຮົມການສອນພາສາອັງກິດໃຫ້ກັບຄູສອນຊັ້ນ ປ 4 ທົ່ວເມືອງ,ໂດຍການເປັນປະທານ ທ່ານ ສົມແພດ ພົມມະຈັນ ຮອງຫົວໜ້າຫ້ອງການສຶກສາທິການແລະກິລາເມືອງ,ມີບັນດາຄູເຝິກຈໍານວນ 2 ທ່ານ ແລະ ສຳມະນາກອນ 39 ທ່ານ ຍິງ 7ທ່ານ ເຂົ້າຮ່ວມຢ່າງພ້ອມພຽງ.


ການເຝີກອົບຮົມການສອນພາສາອັງກິດຄັ້ງນີ້ ຄູເຝີກໄດ້ນຳເອົາເອກະສານປະກອບມີ
ເອກະສານຮຽນຮູ້ການອ່ານຕົວອັນສອນພາສາອັງກິດ26ຕົວ ແລະ ການອອກສຽງຂອງຕົວອັກສອນ
,ເອກະສານສຶກສາຮຽນຮູ້ຄຳສັບຕ່າງໆໃນປື້ມແບບຮຽນພາສາອັງກິດຊັ້ນປ4,ວິທີການແຕ່ງບົດສອນ ແລະການຂຶ້ນສອນສາທິດພ້ອມທັງແຈກຢາຍບົດສອນຕົວຢ່າງໃຫ້ແກ່ສຳມະນາກອນທຸກທ່ານໄດ້ສຶກສາໄດ້ມີການຈັດກິດຈະກຳແບ່ງກຸ່ມແຕ່ງບົດສອນ ພ້ອມທັງອະທິບາຍປະຕິບັດຂຶ້ນສອນສາທິດ,


ໃນຊຸດເຝີກອົບຮົມນັກສຳມະນາກອນກໍ່ໄດ້ຖອດຖອນບົດຮຽນໃນການສອນເຊິ່ງກັນແລະ ກັນ, ກ່ອນຈະເຝິກອົບຮົມຄູເຝີກໄດ້ມີການທົດສອບປະເມີນຄວາມຮູ້ພື້ນຖານຂອງສຳມະນາກອນກ່ຽວກັບພາສາອັງກິດເຫັນວ່າໄດ້ 78.43%, ຫລັງຈາກເຝິກສຳເລັດສາມາດຕີລາຄາປະເມີນໄດ້ 88.57%,ພິທີເຝິກອົບຮົມໃນຄັ້ງນີ້ໄດ້ຮັບທຶນຊ່ວຍເຫຼືອໃນມູນຄ່າ18.160.000ກີບເຊິ່ງເປັນງົບປະມານຂອງລັດຖະບານ100%ໂອກາດທ້າຍກໍ່ໄດ້ຈັດພິທີມອບໃບຢັ້ງຢືນໃຫ້ກັບນັກສຳມະນາກອນໄວ້ເປັນຫຼັກຖານໂດຍເປັນກຽດຂຶ້ນມອບຂອງ ທ່ານ ສົມແພດ ພົມມະຈັນ ແລະ ເປັນກຽດຂຶ້ນຮັບຂອງ ນັກສຳມະນາກອນ ທັງໝົດ 39 ທ່ານ .

ຂ່າວ: ທ້າວ ທະນູສິນ ອິດທິພົນ ນັກຂ່າວ ຈາກຫ້ອງການ ຖວທ ເມືອງໂພນທອງ ແຂວງຫຼວງພະບາງ.
ຖ່າຍພາບ: ທ່ານ ວິໄລທັດ ລໍວັນຄໍາ ພະນັກງານ ຫ້ອງການສຶກສາທິການແລະກິລາເມືອງ.

ເຕືອນໄພການສັນຈອນ ເສັ້ນທາງ ກາສີ-ເມືອງນ່ານ

ເຕືອນໄພການເດີນທາງ ເສັ້ນທາງກາສີ-ເມືອງນ່ານ ໂດຍສະເພາະແມ່ນຈຸດພູ 9 ຫລັກ ເພາະເສັ້ນທາງຈະມີຫມອກຫນາ ແລະມີຝົນຝອຍ ເປັນສາເຫດໃຫ້ທາງມື່ນຫລາຍ ລົດທີ່ບໍ່ມີໂຟວິນ ຄວນຫລີກເວັ້ນໄປໃຊ້ເສັ້ນທາງເກົ່າ

 

ທີ່ມາ: ບຸນແພງ ດາລາວັນ

ສໍາເລັດກອງປະຊຸມຄົບຄະນະບໍລິຫານງານພັກ ແຂວງ ໄຊຍະບູລີ ຄັ້ງທີ 8 ສະໄໝທີ 6

ກອງປະຊຸມຄົບຄະນະບໍລິຫານງານພັກ ແຂວງ ໄຊຍະບູລີ ຄັ້ງທີ 8 ສະໄໝທີ 6. ໄດ້ດໍາເນີນມາເປັນເວລາ 3 ວັນ ແລະ ໄດ້ສໍາເລັດລົງດ້ວຍໝາກຜົນອັນຈົບງາມໃນຕອນເຊົ້າ ຂອງວັນທີ 27 ຕຸລາ 2017 ນີ້. ຢູ່ທີ່ຫ້ອງປະຊຸມຫ້ອງວ່າການແຂວງໄຊຍະບູລີ, ໂດຍການເປັນປະທານຂອງ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ໄຊຍະບູລີ. ມີບັນດາສະຫາຍຮອງເລຂາພັກແຂວງ, ມີຄະນະປະຈຳພັກແຂວງ, ກຳມະການພັກແຂວງ, ເຈົ້າເມືອງ 11 ເມືອງ, ມີຫົວໜ້າພະແນກການອ້ອມຂ້າງແຂວງ ເຂົ້າຮ່ວມ 100 ກວ່າສະຫາຍ.


ຕະຫຼອດໄລຍະ 3 ວັນທີ່ດໍາເນີນກອງປະຊຸມ ຜູ້ເຂົ້າຮ່ວມແມ່ນໄດ້ພ້ອມກັນຄົ້ນຄົ້ວ, ປະກອບຄໍາຄິດ-ຄໍາເຫັນຢ່າງກົງໄປກົງມາ ແລະ ໄດ້ເປັນເອກະພາບຮັບຮອງເອົາບັນດາເນື້ອໃນທີ່ສໍາຄັນເຊັ່ນ: ບົດສະຫຼຸບສັງເກດຕີລາຄາການຈັດຕັ້ງປະຕິບັດກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 7 (ສະໄໝທີ VI) ແລະ ວຽກງານຈຸດສຸມຂອງຄະນະປະຈຳພັກແຂວງ ໃນ 3 ເດືອນຕໍ່ໜ້າປີ 2017, ລົງເລິກວຽກງານວຽກງານ ປກຊ -ປກສ ກ່ຽວກັບຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ການແກ້ໄຂປະກົດການຫຍໍ້ທໍ້ໃນສັງຄົມ, ສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ-ເງິນຕາ ໃນໄລຍະ 9 ເດືອນຜ່ານມາ, ທິດທາງແຜນການ 3 ເດືອນທ້າຍປີ 2017 ແລະ ແຜນຄາດຄະເນ ປີ 2018


ບົດສະຫຼຸບຕີລາຄາການຈັດຕັ້ງປະຕິບັດວຽກງານຈັດສັນທີ່ດິນ ແລະ ຄຸ້ມຄອງການນຳໃຊ້ທີ່ດິນ ຕິດພັນກັບການຄຸ້ມຄອງອ່າງໂຕ່ງ, ບົດສະຫຼຸບຕີລາຄາກ່ຽວກັບການຈັດສັນ ແລະ ຄຸ້ມຄອງການນຳໃຊ້ທີ່ດິນ 3 ປະເພດປ່າ ໃນນີ້ລົງເລີກການຄຸ້ມຄອງນໍາໃຊ້ທີ່ດິນປ່າຜະລິດທີ່ໄດ້ຮັບທຶນສະໜັບສະໜູນ ຈາກໂຄງການ ຄຸ້ຄອງປ່າໄມ້ແບບຍືນນານ ແລະ ການຈັດຕັ້ງປະຕິບັດຄໍາສັ່ງ ເລກທີ 15 /ນຍ ໃນໄລຍະຜ່ານມາ, ແຜນການທ່ອງທ່ຽວຂອງແຂວງປະຈຳປີ 2018 ແລະຍຸດທະສາດການທ່ອງທ່ຽວ ແຕ່ນີ້ຮອດປີ 2025, ປຶກສາຫາລືກະກຽມການກວດກາໜ່ວຍພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ ຕິດພັນກັບການດໍາເນີນກອງປະຊຸມໃຫຍ່ 3 ຂັ້ນ, ກອງປະຊຸມໄດ້ຮັບຮອງເອົາແຜນວຽກງານຈຸດສຸມໃນ 3 ເດືອນທ້າຍປີ 2017 ຂອງຄະນະບໍລິຫານງານພັກແຂວງ ຄັ້ງທີ 8 (ສະໄໝທີ VI), ເວົ້າລວມແລ້ວ ທົ່ວແຂວງຍັງສືບຕໍ່ຮັກສາໄດ້ສະຖຽນລະພາບດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ – ປອດໄພໂດຍພື້ນຖານ, ສະພາບຄວາມບໍ່ສະຫງົບ, ບັນຫາຊາຍແດນ ແລະ ບັນດາປະກົດການຫຍໍ້ທໍ້ໄດ້ຮັບການແກ້ໄຂຢ່າງທັນການ, ໂອກາດດັ່ງກ່າວ ສະຫາຍ ພົງສະຫວັນ ສິດທະວົງ ກຳມະການສູນກາງພັກ, ເລຂາພັກແຂວງ, ເຈົ້າແຂວງ ໄຊຍະບູລີ ຍັງໄດ້ຮຽກຮ້ອງໃຫ້ບັນດາຜູ້ເຂົ້າຮ່ວມກອງປະຊຸມຄັ້ງນີ້ຈົ່ງພ້ອມກັນນໍາເອົາເນື້ອໃນຈິດໃຈຂອງກອງປະຊຸມໄປເຜີຍແຜ່ ແລະ ຈັດຕັ້ງປະຕິບັດໃຫ້ເກີດດອກອອກຜົນ, ສຶບຕໍ່ເອົາໃຈໃສ່ສຶກສາອົບຮົມການເມືອງ – ແນວຄິດໃຫ້ສະມາຊິກພັກ, ພະນັກງານ, ທະຫານ, ຕຳ ຫຼວດ ແລະ ປະຊາຊົນບັນ ດາເຜົ່າໃຫ້ເລິກເຊີ່ງ ແລະ ຖືກເປົ້າໝາຍ, ເອົາໃຈໃສ່ປຸກລະດົມຂົນຂວາຍທົ່ວສັງຄົມປະກອບສ່ວນເຂົ້າໃນວຽກງານ ປກຊ – ປກສ ເຮັດໃຫ້ວຽກງານດັ່ງກ່າວກາຍເປັນຂອງທົ່ວປວງຊົນ

ພ້ອມກັນນັ້ນ, ກໍ່ຕ້ອງເພີ່ມທະວີຄວາມຮັບຜິດຊອບ ແລະ ເປັນເຈົ້າການໃນການຕ້ານ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ທີ່ເກີດຂຶ້ນໃນສັງຄົມເປັນຕົ້ນ: ບັນຫາຢາເສດຕິດ, ບັນຫາການຫຼິ້ນການພະນັນ, ການຫຼິ້ນກິນຟຸມເຟື້ອຍຂອງພະນັກງານ, ຊາວໜຸ່ມ, ໄວໜຸ່ມ ແລະ ບັນຫາອື່ນໆ, ສຸມໃສ່ຍູ້ແຮງເສດຖະກິດໃຫ້ມີການຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ, ເອົາໃຈໃສ່ອຳໂນຍຄວາມສະດວກ ແລະ ປັບປຸງຂອດບໍລິການ ເພື່ອສົ່ງເສີມ ແລະ ດຶງດູດການລົງທຶນຂອງຕ່າງປະເທດໃຫ້ເພີ່ມຂຶ້ນ, ເອົາໃຈໃສ່ຂຸດຄົ້ນແຫຼ່ງລາຍຮັບເຂົ້າງົບປະມານໃຫ້ບັນລຸຕາມແຜນການ, ຊຸກຍູ້ການການເກັບກູ້ຜົນຜະລິດລະດູປີ ຂອງປະຊາຊົນໃຫ້ທັນເວລາ ແລະ ບັນລຸຕາມແຜນການທີ່ວາງໄວ້.

ຂ່າວ: ແຂວງໄຊຍະບູລີ

ຄະນະກອງປະຕິບັດງານ 214 ປະຈຳກໍ່ສ້າງຮາກຖານກຸ່ມທອງສີລົງເຄືອນໄຫວເປີດກອງປະຊຸມເຜີຍແຜ່ເອກະສານຄໍາສັ່ງແນະນໍາເລກທີ03ຢູ່2ບ້ານກຸ່ມທອງສີເມືອງໂພນທອງ.

ວັນທີ 25-26 ເດືອນຕຸລາ ປີ 2017 ນີ້ຢູ່ທີໂຮງຮຽນປະຖົມສົມບູນບ້ານກິ່ວດອກແຄແລະບ້ານທອງສີຄະນະກອງປະຕິບັດງານ214ໄດ້ເປີດກອງປະຊຸມເຜີຍແຜາເອກະສານຄໍາສັ່ງແນະນໍາເລກທີ03 ,ໃຫ້ກຽດເຂົ້າຮ່ວມເປັນປະທານຂອງ ສະຫາຍ ພັຕ ສົມສະນິດ ປັນຍາສິດ ຫົວໜ້າກອງປະຕິງານ 214 ,ສະຫາຍ ຮອ ສິດທອງດີ ວອນສົມໄຈ ຮອງຫົວໜ້າກອງປະຕິບັດງານ214 ,ເລຂາພັກບ້ານທັງສອງບ້ານ ມີບັນດາຄະນະຮາກຖານກຸ່ມທອງສີ , ຄະນະກອງປະຕິບັດງານ 214 ,ຕະຫລອດຮອດພໍ່-ແມ່ປະຊາຊົນເຂົ້າຮ່ວມຢ່າງພ້ອມພຽງ.


ສະຫາຍ ຮຕ ໄຊພອນ ວິໄລຈັນ ກໍ່ໄດ້ຂື້ນຜ່ານບົດສະຫລຸບໂດຍຫຍໍ້ໃນການຈັດຕັ້ງປະຕິບັດແຕ່ລະໄລຍະໂດຍປະຕິບັດຕາມຄຳສັ່ງແນະນຳຂອງກົມການເມືອງສູນກາງພັກສະບັບທີ 03/ກມສພ ວ່າດ້ວຍການສ້າງບ້ານໃຫ້ເປັນຫົວໜ່ວຍພັດທະນາສ້າງບ້ານໃຫຍ່ໃຫ້ເປັນຕົວເມືອງນ້ອຍໃນຊົນນະບົດຂໍ້ຕົກລົງຂອງລັດຖະມົນຕີກະຊວງປອງກັນປະເທດສະບັບເລກທີ 768/ກປທ ວ່າດ້ວຍການສ້າງຕັ້ງກອງຮ້ອຍປະຕິບັດງານ 214ກໍ່ສ້າງຮາກຖານການເມືອງປະຈຳກຸ່ມທອງສີເມືອງໂພນທອງເຊິ່ງນຳເອົາມະຕິຕ່າງໆທີພັກ-ລັດມອບໝາຍລົງເຜີຍແຜ່ເຊືອມຊືມ ພ້ອມດ່ຽວກັນນັ້ນກໍ່ໄດ້ຮັບຟັງຂໍ້ກຳນົດ,ກົດລະບຽບໃນການຄຸ້ມຄອງທັງສອງບ້ານ


ເຊີ່ງເປັນບ້ານໜື່ງທີຕັ້ງຢູ່ເມືອງໂພນທອງໄປທາງທິດໃຕ້ຫາງຈາກເທດສະບ້ານເມືອງປະມານ 35 ກິໂລແມັດ ມີ ຄອບຄົວ189 ມີພົນລະເມືອງ 861ຄົນຍິງ 483 ຄົນປະຊາຊົນສ່ວນໃຫ່ຍແມ່ນຖືເອົາການປູກຝັງລ້ຽງ-ສັດເປັນທ່າແຮງທາງດ້ານເສດຖະກິດຂອງບ້ານ,ຄຽງຄູ່ກັນນັ້ນອຳນາດການປົກຄອງບ້ານແລະພໍ່-ແມ່ປະຊາຊົນຍັງໄດ້ຄົ້ນຄ້ວາປະກອບຄຳຄິດຄຳເຫັນຕໍ່ບົດສະຫລຸບເພືອເຮັດໃຫ້ບ້ານເປັນບ້ານແບບຢ່າງໃນການພັດທະນາ.


ໂອກາດທີມີຄວາມໝາຍຄວາມສຳຄັນ ສະຫາຍ ພັຕ ສົມສະນິດ ປັນຍາສິດ ກໍ່ໄດ້ມີຄໍາໂອລົມ ກ່ອນອືນສະຫາຍກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ອຳນາດການຈັດຕັ້ງປົກຄອງບ້ານຕະຫລອດຮອດພໍ່-ແມ່ປະຊາຊົນກຸ່ມທອງສີໃຫ້ມີຄວາມສາມັກຄີຮັກແພງຊ່ວຍເຫລືອເຊີ່ງກັນແລະກັນສ້າງໃຫ້ບ້ານຂອງຕົນກາຍເປັນບ້ານພົ້ນທຸກເທື່ອລະກ້າວ.

ຂ່າວ: ທ້າວທະນູສິນ ອິດທິພົນ ນັກຂ່າວ ຈາກຫ້ອງການ ຖວທ ເມືອງໂພນທອງ

ຜົນສຳເລັດລົງຕິດຕາມກວດກາ ໂຄງການກໍ່ສ້າງຕິດຕັ້ງຕາຂ່າຍໄຟຟ້າເຂົ້າຫາບ້ານຫ້ວຍແອນແລະບ້ານກິ່ວດອກແຄ ກຸ່ມທອງສີ ເມືອງໂພນທອງ ມູນຄ່າ 7,318,000,000ລ້ານກີບ.


ໃນຕອນເຊົ້າຂອງວັນທີ 27 ຕຸລາ 2017ນີ້ ,ທ່ານ ຫຸມພັນ ປໍເມກມະໂນລົມຮອງຫົວໜ້າພະແນກພະລັງງານແລະບໍ່ແຮ່ແຂວງຫຼວງພະບາງ,ທ່ານ ສົມມາລີ ຄໍາເກັ່ງ ເຈົ້າເມືອງ-ເມືອງໂພນທອງພ້ອມດ້ວຍຄະນະຂອງແຂວງແລະເມືອງພາກສ່ວນທີ່ກ່ຽວຂ້ອງສົມທົບກັບບໍລິສັດແວດປະເສີດຜູ້ຮັບເໝົາກໍ່ສ້າງແລະການຈັດຕັ້ງທັງສອງບ້ານໄດ້ລົງກວດກາການໂຄງການກໍ່ສ້າງຕິດຕັ້ງຕາຂ່າຍໄຟຟ້າເຂົ້າຫາບ້ານຫ້ວຍແອນແລະບ້ານກິ່ວດອກແຄກຸ່ມທອງສີເມືອງໂພນທອງແຂວງຫຼວງພະບາງສຳເລັດ100%.

ໂຄງການດັ່ງກ່າວໄດ້ເລີມລົງມືຕິດຕັ້ງໄຟຟ້າຂະໝາດ22kvແລະຂະໜາດ0,4kv ,ມາແຕ່ຕົ້ນປີ 2015-216ຄາດໝາຍສຳເລັດໃນປີ2017-2018 ໃນມູນຄ່າກໍ່ສ້າງ 7,318.000.000ລ້ານກີບ ໂດຍໄດ້ຮັບທຶນຊ່ວຍເຫຼືອຂອງລັດຖະບານລາວ 100%
ກໍ່ຍ້ອງຄວາມເອົາໃຈໃສ່ຂອງບໍລິສັດຜູ້ຮັບເໝົາລົງຕິດຕາມກວດກາຢ່າງໃກ້ຊິດຕົວຈິງ,ຈິ່ງເຮັດໃຫ້ໂຄງການດັ່ງກ່າວ ສຳເລັດກ່ອນຄາດໝາຍການກໍ່ສ້າງໂດຍປະຕິບັດຕາມຂັ້ນຕອນມາດຕະຖານເຕັກນິກຂອງໄຟຟ້າລາວຢ່າງເຂັມງວດ.ບ້ານຫ້ວຍແອນແລະບ້ານກິ່ວດອກແຄຂຶ້ນກັບກຸ່ມທອງສີ ຫ່າງຈາກເທດສະບານເມືອງໄປທາງທິດໃຕ້ ປະມານ 35 ກິໂລແມັດ,ທັງສອງບ້ານ ມີຄອບຄົວ 168 ຄອບຄົວ ພົນລະເມືອງ 849 ຄົນ ຍິງ 361ຄົນ.

ຂ່າວ: ທ້າວ ທະນູສິນ ອິດທິພົນ ນັກຂ່າວ ຈາກຫ້ອງການ ຖວທ ເມືອງໂພນທອງ ແຂວງຫຼວງພະບາງ

ກອງ​ປະຊຸມ​ອົງການ​ປົກຄອງ ນະຄອນຫຼວງ​ວຽງ​ຈັນ (ນວ) ຄັ້ງທີ 13 ຈັດ​ຂຶ້ນ​ວັນ​ທີ 26 ຕຸລາ 2017 ທີ່​ຫ້ອງ​ວ່າການ​ປົກຄອງ ນວ

ກອງ​ປະຊຸມ​ອົງການ​ປົກຄອງ ນະຄອນຫຼວງ​ວຽງ​ຈັນ (ນວ) ຄັ້ງທີ 13 ຈັດ​ຂຶ້ນ​ວັນ​ທີ 26 ຕຸລາ 2017 ທີ່​ຫ້ອງ​ວ່າການ​ປົກຄອງ ນວ ໂດຍ​ເປັນ​ປະທານ​ຂອງ​ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງນະຄອນຫຼວງ​ວຽງ​ຈັນ ມີ​ທ່ານຮອງ​ເຈົ້າ​ຄອງ ຫົວໜ້າ​ຫ້ອງ​ວ່າການ ຫົວໜ້າ​ພະ​ແນກ ຮອງ​ພະແນກ ເຈົ້າເມືອງ ຮອງ​ເຈົ້າເມືອງ ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

 

ກອງ​ປະຊຸມ​ໄດ້​ພິຈາລະນາ ການ​ສະເໜີ​ໃຫ້​ຊຳລະ​ໂຄງການ​ກໍ່ສ້າງ​ອາ​ນຸ​ສອນ​ສະຖານ​ທ່ານ ສີທອງ ວິລະ​ຊົນ ແຫ່ງ​ຊາດ ຢູ່​ບ້ານນາ​ຫອຍປັງ ເມືອງ​ສັງ​ທອງ ສະເໜີ​ໂດຍ​ທ່ານ​ຫົວໜ້າ​ພະ​ແນກແຜນການ ແລະ ການ​ລົງທຶນ ແລະ ບັນດາ​ພະແນກການ​ກ່ຽວຂ້ອງ ພ້ອມ​ທັງ​ໄດ້​ຮັບ​ຟັງ​ລາຍງານ​ຜົນ​ກອງ​ປະຊຸມ ​ສະຫຼຸບ​ຖອດຖອນ​ບົດຮຽນ​ການເຄື່ອນໄຫວ ວຽກ​ງານ​ຕິດຕາມ​ກວດກາ ແລະ ຊຸກຍູ້​ການຈັດຕັ້ງ​ປະຕິບັດ​ແຜນພັດທະນາ​ເສດຖະກິດ-ສັງຄົມແຫ່ງ​ລັດ 2017 ແລະ ທິດ​ທາງແຜນການ 2018 ສະເໜີ​ໂດຍ​ຫົວໜ້າ​ພະ​ແນກ​ແຜນການ ແລະ ການ​ລົງທຶນ ແລະ ຄະນະ​ກຳ​ມະການ​ເສດຖະກິດ ແຜນການ ແລະ ການ​ເງິນ ສະພາ​ປະຊາຊົນ ນວ ພິຈາລະນາ​ຮັບຮອງ​ເອົາ​ຜົນ​ສຳຫຼວດ ແລະ ອອກ​ແບບ​ການ​ກໍ່ສ້າງ​ປ່ອງ​ບໍລິການ​ເກັບ​ເງິນ​ຄ່າຜ່ານ​ທາງ​ຢູ່​ຖະໜົນ 450 ປີ ລວມທັງ​ພິຈາລະນາ​ການ​ສະເໜີ​ຂອງກອງ ຈ11 ເພື່ອ​ຂໍ​ການ​ທົດ​ແທນດິນ​ເຝີກ​ແອບ​ການ​ທະຫານ ຢູ່ບ້ານ​ຈຳປາ ເມືອງ​ສີ​ໂຄດ​ຕະບອງ ແລະ ບ້ານ​ປາກ​ແຮດ ເມືອງ​ນາຊາຍ​ທອງ ທີ່​ຖືກ​ໂຄງການ​ດາວທຽມ​ລາວ ແລະ ລາຍ​ງານ​ຜົນການ​ເຂົ້າ​ຮ່ວມ​ກອງ​ປະຊຸມ​ຄົບຄະນະ​ກຳມະການ​ສົ່ງເສີມ ແລະ ຄຸ້ມ​ຄອງ​ການ​ລົງທຶນ​ຂັ້ນ​ສູນ​ກາງ ແລະ ນວ ໃນ​ຄັ້ງ​ວັນ​ທີ 22 ກັນຍາ 2017.

 

ໂອກາດ​ນີ້ ທ່ານ​ເຈົ້າ​ຄອງ ນວ ໄດ້​ມີ​ຄຳ​ເຫັນ​ເຈາະ​ຈີ້ມ​ຫຼາຍ​ບັນຫາ ພ້ອມ​ທັງ​ເປີດ​ໂອກາດ​ໃຫ້​ບັນດາ​ຜູ້​ເຂົ້າ​ຮ່ວມ​ກອງ​ປະຊຸມ​ໄດ້​ປະກອບ​ຄຳ​ເຫັນ ນຳ​ສະເໜີ​ເຫດຜົນ ເງື່ອນໄຂ​ຂໍ້​ສະດວກ ຂໍ້​ຫຍຸ້ງຍາກ ແລະ ສິ່ງ​ທ້າ​ທາຍ ເພື່ອ​ເສີມ​ຂະຫຍາຍ​ຈຸດ​ດີ ແລະ ແກ້​ໄຂ​ຂໍ້ຄົງຄ້າງ​ໃນການຈັດຕັ້ງ​ປະຕິບັດ ​ວຽກ​ງານ​ຕົວຈິງ​ໃນ​ໄລຍະ​ຜ່ານ​ມາ.

ທີ່ມາ: ນສພ ວຽງຈັນໃຫ່ມ

ເມືອງໂຂງ ແຂວງຈໍາປາສັກ ແລະ ອົງການກອງທຶນອະນຸລັກທໍາມະຊາດໂລກ ປະຈໍາ ສປປ ລາວ (WWF-Laos) ຈັດພິທີ ປະກາດລະບຽບວັງສະຫງວນ, ຄະນະກໍາມະການ ແລະ ທີມງານລາດຕະເວນຂັ້ນບ້ານ.

ໃນວັນທີ 19 ຕຸລາ 2017 ທີ່ຜ່ານມາ ທີ່ບ້ານຈານ ເມືອງໂຂງ ແຂວງຈໍາປາສັກ ໄດ້ຈັດພິທີການປະກາດ
ການສ້າງຕັ້ງວັງສະຫງວນ ພ້ອມທັງຜ່ານລະບຽບການ, ການຈັດຕັ້ງຄະນະກໍາມະການ ແລະ ທີມງານລາດຕະເວນວັງສະຫງວນຂັ້ນບ້ານ ຂອງບ້ານຈານ ຕາມການຕົກລົງ ແລະ ເຫັນດີຈາກ ເຈົ້າເມືອງ ເມືອງໂຂງ.

ໃຫ້ກຽດເປັນປະທານເປີດພິທີໂດຍ ຮອງເຈົ້າເມືອງ ເມືອງໂຂງ ແລະ ຜູ້ເຂົ້າຮ່ວມມີຜູ້ຕາງໜ້າ ຈາກກົມລ້ຽງສັດ ແລະ ການປະມົງ, ພະແນກກະສິກຳ ແລະ ປ່າໄມ້, ທີມງານໂຄງການຄຸ້ມຄອງ ແລະ ຊົມໃຊ້ປາ ແລະ ສັດນໍ້າອື່ນໆ ແບບຍືນຍົງ ຢຸ່ເຂດສີພັນດອນ ໄລຍະສອງ ຂອງອົງການ WWF-Laos, ຫ້ອງການກ່ຽວຂ້ອງຂອງເມືອງ ແລະ ອໍານາດການປົກຄອງບ້ານ ພ້ອມດ້ວຍພໍ່ແມ່ປະຊາຊົນເຂົ້າຮ່ວມຫຼາຍກ່ວາ 100 ທ່ານ.

ຈຸດປະສົງຫຼັກຂອງການປະກາດການສ້າງຕັ້ງວັງສະຫງວນ ແລະ ລະບຽບວັງສະຫງວນ, ຄະນະກໍາມະການປະມົງ ແລະ ທີມງານລາດຕະເວນຂັ້ນບ້ານຄັ້ງນີ້ ກໍ່ແມ່ນເພື່ອໃຫ້ປະຊາຊົນທ້ອງຖິ່ນຮັບຮູ້ ກ່ຽວກັບ ເຂດແດນ, ຂໍ້ຫ້າມ ແລະ ອື່ນໆໃນກົດລະບຽບທີ່ຕິດພັຍນກັບກົດໝາຍວ່າດ້ວຍການປະມົງ ແລະ ໃນການປົກປັກຮັກສາຂອບ
ເຂດພື້ນທີ່ແຫລ່ງນໍ້າວັງສະຫງວນ ເພື່ອສ້າງເປັນບ່ອນອະນຸລັກ ແລະ ປົກປັກຮັກສາຊະນິດພັນປາ ແລະ ສັດນ້ຳອື່ນໆໃຫ້ມີຄວາມອຸດົມສົມບູນ ແລະ ມີຄວາມຢືນຍົງຕະຫຼອດໄປ. ເພື່ອສ້າງເປັນແຫ່ລງທີ່ຢູ່ອາໃສ, ພັກເຊົາ ຫລື ຫລີ້ຊ້ອນ, ເປັນແຫລ່ງວາງໄຂ່ ແລະ ແຜ່ພັນຂອງຊະນິດພັນປາ ແລະ ສັດນໍ້າອື່ນໆ.

ນອກນັ້ນ, ທາງໂຄງການໄດ້ມອບເຮືອພ້ອມຈັກຮອນດາ 6.5 ແຮງມ້າ 1 ເຄື່ອງ ແລະ ອຸປະກອນທີ່ຈຳເປັນໃຫ້ກັບບ້ານເພື່ອປະກອບສ່ວນໃນການກວດກາລາດຕະເວນໃນຂອບເຂດການຄຸ້ມຄອງແຫລ່ງນໍ້າ ຂອງບ້ານ ເນື່ອງໃນພິທີເປີດວັງສະຫງວນຄັ້ງນີ້ ຄິດເປັນມູນຄ່າຫຼາຍກ່ວາ 17,000,000 ລ້ານກີບ.

ຫຼັງຈາກເສັດສິ້ນພິທີ ບັນດາຜູ້ເຂົ້າຮ່ວມຍັງໄດ້ຮ່ວມກັນປ່ອຍປາຈໍານວນ 3,000 ໂຕ ລົງສູ່ແມ່ນໍ້າຂອງ ເຂດວັງສະຫງວນເວີນຫວ້າ ຂອງບ້ານ. ວັງເວີນຫວ້າຖືເປັນວັງອະນຸລັກທໍາອິດຂອງບ້ານຈານ ແລະ ມີເນື້ອທີ່ກວາມເອົາ 16.341 ເຮັກຕາ ແລະ ມີຄວາມເລິກສູງເຖິງ 70 ແມັດໃນບາງບ່ອນຂອງວັງ.

ໂຄງການຄຸ້ມຄອງ ແລະ ຊົມໃຊ້ປາ ແລະ ສັດນໍ້າອື່ນໆ ແບບຍືນຍົງ ຢຸ່ເຂດສີພັນດອນ ໄລຍະສອງ ຂອງອົງການ WWF-Laos ຍັງຈະສືບຕໍ່ສະໜັບສະໜູນ ແລະ ເຮັດວຽກຮ່ວມກັບເມືອງ ແລະ ພາກສ່ວນທີ່ກ່ຽວຂ້ອງຂັ້ນແຂວງ ແລະ ຂັ້ນສູນກາງໃນການຄັດເລືອກ ແລະ ສ້າງຕັ້ງວັງສະຫງວນ, ຄະນະກໍາມະການຄຸ້ມຄອງວັງສະຫງວນຂັ້ນບ້ານ, ສ້າງຄວາມເຂັ້ມແຂງດ້ານວິຊາການ ໂດຍສະໜັບສະໜູນວຽກງານການຝຶກອົບຮົມ, ວຽກງານລາດຕະເວນໜ້ານໍ້າ ຄຽງຄູ່ກັບການເຜີຍແພ່ ແລະ ການບັງຄັບໃຊ້ກົດໝາຍວ່າດ້ວຍການປະມົງ ແລະ ສະໜອງເຄື່ອງມືການລາດຕະເວນທີ່ຈໍາເປັນໃຫ້ກັບໝູ່ບ້ານເປົ້າໝາຍໃນໂຄງການ ພ້ອມທັງປະກອບສ່ວນໃນການປັບປຸງຊີວິດການເປັນຢູ່ສ້າງລາຍຮັບໃຫ້ແກ່ຊຸມຊົນໃນເຂດສີພັນດອນກໍ່ຄືໃນເຂດເມືອງໂຂງແລະ ເມືອງມຸນລະປະໂມກ ແຂວງຈໍາປາສັກ.

ທີ່ມາ: WWF-Laos

ເມືອງໂພນທອງສ້າງຂະບວນການອອກແຮງງານໄວ້ຂໍ່ານັບຕ້ອນຮັບວັນສຳຄັນຂອງຊາດ ແລະວັນຮ່ວມມືສາກົນ.

ຕອນເຊົ້າຂອງວັນທີ່ 27 ຕຸລາ ປີ 2017 ພະນັກງານ,ພໍ່ແມ່ປະຊາຊົນ,ນັກຮຽນ ມສ ໂພນທອງ ໄດ້ສ້າງຂະບວນການອອກແຮງງານອານາໄມ້ຖ່າງຫຍ້າທົ່ວເທດສະບານເມືອງໂພນທອງຢ່າງເປັນຂະບວນການຟົດຟືນ, ໂດຍພາຍໃຕ້ການຊີນໍາ-ນໍາພາ ຂອງຄະນະປະຈໍາພັກເມືອງໂພນທອງ.


ການສ້າງຂະບວນການອອກແຮງງານຄັ້ງນີ້ກໍ່ເພື່ອໄວ້ຂໍ່ານັບຕ້ອນຮັບວັນສໍາຄັນຂອງຊາດເວົ້້າລວມເວົ້າສະເພາະກໍ່ຄືວັນຮ່ວມມືສາກົນ,ກອງປະຊຸມ 3ຂັ້ນຂອງສະຫະພັນແມ່ຍິງ ເມືອງໂພນທອງ, ການຕ້ອນຮັບກອງປະຊຸມພົບປະພົວພັນຮ່ວມມືວຽກງານຊາຍແດນ ລະຫວ່າງເມືອງໂພນທອງ ກັບ ບັນດາເມືອງ 2 ເມືອງ 2ແຂວງ ຂອງ ສສ ຫວຽດນາມ, ທີ່ຈະໄຂ້ຂຶ້ນໃນມໍ່ໆນີ້

ຄະນະຊີນໍາ ໄດ້ຈັດແບ່ງແລະມອບໝາຍການສ້າງຂະບວນການ ເປັນຕົ້ນມອບໃຫ້ແຕ່ລະພາກສ່ວນຂະແໜງການສ້າງຂະບວນການແຕ່ລະຂອບເຂດຂອງແຕ່ລະພາກສ່ວນ ແລະ ມອບໃຫ້ສະຫະພັນກໍາມະບານ, ຊາວໝຸ່ມ,ສະຫະພັນແມ່ຍິງທົ່ວ ເມືອງສ້າງຂະບວນການອານາໄມ້ຂອບເຂດສວນອານຸສາວະລີ,ສະໂມສອນໃຫ່ຍ,ສວນທາລາລະນະ ແລະເຂດແດນບ້ານຕໍ່ບ້ານ,ນອກນັ້ນຍັງໄດ້ມອບໃຫ້ສະຫະ ພັນແມ່ຍິງແຕ່ລະໝ່ວຍສ້າງຂະບວນແອບຟ້ອນລໍາວົງລາວ ເພື່ອໃຫ້ມີຄວາມເປັນລາວ ສົ່ງເສີ່ມຮິດຄອງປະເພນີລາວມູນເຊື່ອອັນດີງາມເປັນຕົ້ນກໍ່ຄືຊາວເມືອງໂພນທອງ.


ຂ່າວ: ທ້າວ ທະນູສິນ ອິດທິພົນ ນັກຂ່າວ ຈາກຫ້ອງການ ຖວທ ເມືອງໂພນທອງ ແຂວງຫຼວງພະບາງ.

ປກສ ເມືອງ ທ່າແຕງ ສືບຕໍ່ເຜີຍແຜ່ເອກະສານຂື້ນທະບຽນ ແລະ ອອກບັດອະນຸຍາດຊົ່ວຄາວໃຫ້ຄົນຕ່າງປະເທດ

ວັນທີ 26 ຕຸລາ 2017 ຜ່ານມານີ້ ກອງບັນຊາການປ້ອງກັນຄວາມສະຫງົບເມືອງ ທ່າແຕງ ແຂວງເຊກອງ ໄດ້ຈັດກອງປະຊຸມສືບຕໍ່ເຜີ່ຍແຜ່ເອກະສານຂື້ນທະບຽນ ແລະ ອອກບັດອະນຸຍາດຊົ່ວຄາວ ໃຫ້ຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຢູ່ ສປປ ລາວ ຂຶ້ນຢູ່ທີ່ສະໂມສອນຂອງເມືອງ ທ່າແຕງ, ໂດຍເປັນປະທານຂອງ ທ່ານ ສົມເພັດ ເອິດລັດດາ ຄະນະປະຈໍາພັກເມືອງ ຮອງເຈົ້າເມືອງ ທ່າແຕງ, ໃຫ້ກຽດເຂົ້າຮ່ວມຂອງທ່ານ ພັອ ສົມໄຊ ພູລະຄໍາມະນີ ຄະນະປະຈໍາພັກແຂວງ ຫົວໜ້າກອງບັນຊາການປ້ອງກັນຄວາມສະຫງົບແຂວງ ເຊກອງ, ມີບັນດາຄະນະພັກ, ຄະນະບັນຊາການປ້ອງກັນຄວາມສະຫງົບຂັ້ນແຂວງ-ເມືອງ, ຫົວໜ້າ-ຮອງຫ້ອງການກ່ຽວຂ້ອງ, ຫົວໜ້າ-ຮອງເຂດບໍລິການປະຊາຊົນ, ຫົວໜ່ວຍທຸລະກິດ, ອົງການປົກຄອງບ້ານ ພ້ອມດ້ວຍພະນັກງານພາຍໃນກົມກອງເຂົ້າຮ່ວມ.


ໃນພິທີທ່ານ ພັອ ສົມໄຊ ພູລະຄໍາມະນີ ຄະນະປະຈຳພັກແຂວງ ຫົວໜ້າກອງບັນຊາການປ້ອງກັນຄວາມສະຫງົບແຂວງເຊກອງ ກ່າວວ່າ: ບັນດາຜູ້ເຂົ້າຮ່ວມກອງປະຊຸມຄັ້ງນີ້ ແຕ່ລະສະຫາຍຕ້ອງເຂົ້າໃຈ, ຮູ້ຈັກຈໍາແນກແຕ່ລະໜ້າວຽກ, ກໍາແໜ້ນ ແລະ ເຊື່ອມຊຶມເອກະສານຕາມແຈ້ງການສະບັບເລກທີ 2720/ຮສສ, ລົງວັນທີ 23 ສິງຫາ 2017 ວ່າດ້ວຍການສືບຕໍ່ຂຶ້ນທະບຽນ ແລະ ອອກບັດອະນຸຍາດຊົ່ວຄາວໃຫ້ຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຢູ່ ສປປ ລາວ, ແຈ້ງການແນະນໍາເລກທີ 23/ຈຂ, ຊກ,ລົງວັນທີ 5 ຕຸລາ2017, ແຈ້ງການສະບັບເລກທີ 755/ປກສ, ຂ,ລົງວັນທີ 29 ສິງຫາ 2017 ວ່າດ້ວຍການສືບຕໍ່ຂຶ້ນທະບຽນ ແລະ ອອກບັດອະນຸຍາດຊົ່ວຄາວໃຫ້ຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຢູ່ແຂວງ ເຊກອງຢ່າງເລິກເຊິ່ງ, ພາຍຫຼັງເຊື່ອມຊືມບັນດາເອກະສານຕ່າງໆແລ້ວ ຄະນະພັກ-ຄະນະບັນຊາການປ້ອງກັນຄວາມສະຫງົບເມືອງທ່າແຕງ ພ້ອມພາກສ່ວນກ່ຽວຂ້ອງທຸກສະຫາຍ ຕ້ອງເປັນເຈົ້າການ ແລະ ນໍາໄປຈັດຕັ້ງປະຕິບັດຢ່າງເຂັ້ມງວດ, ຊຸກຍູ້, ຕິດຕາມ, ກວດກາ, ເກັບກໍາຂໍ້ມູນ, ຄຸ້ມຄອງຄົນເຂົ້າ-ຄົນອອກ ທັງພາຍໃນ ແລະ ຕ່າງປະເທດເປັນປົກກະຕິຕໍ່ເນື່ອງ, ຖ້າພົບເຫັນວຽກງານໃດບໍ່ສອດຄ່ອງກັບລະບຽບກົດໝາຍວາງອອກແມ່ນຕ້ອງລາຍງານໃຫ້ຂັ້ນເທິງຮັບຮູ້ຢ່າງຈະແຈ້ງ. ທັງນີ້ ເພື່ອເຮັດໃຫ້ການຂຶ້ນທະບຽນ ແລະ ອອກບັດອະນຸຍາດຊົ່ວຄາວໃຫ້ຄົນຕ່າງປະເທດທີ່ເຄື່ອນໄຫວຢູ່ ສປປ ລາວ, ເວົ້າລວມ, ເວົ້າສະເພາະ ຢູ່ແຂວງ ເຊກອງ ໄດ້ກ້າວເຂົ້າສູ່ລະບຽບກົດໝາຍວາງອອກຢ່າງເຂັ້ມງວດ.


ໂອກາດດັ່ງກ່າວນີ້ທ່ານ ສົມເພັດ ເອິດລັດດາ ຄະນະປະຈໍາພັກເມືອງ ຮອງເຈົ້າເມືອງ ທ່າແຕງ ໄດ້ໃຫ້ກຽດໂອ້ລົມ ໂດຍໄດ້ເນັ້ນໃຫ້ຄະນະພັກ-ຄະນະບັນຊາການປ້ອງກັນຄວາມສະຫົງບ ເມືອງທ່າແຕງ ຕະຫຼອດຮອດພາກສ່ວນກ່ຽວຂ້ອງ ຈົ່ງພ້ອມກັນເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະໃຫ້ເຂັ້ມແຂງ ເພື່ອສະກັດກັ້ນຕ້ານກົນອຸບາຍຫັນປ່ຽນຂອງສັດຕູທີ່ເຂົ້າມາເຄື່ອນໄຫວກໍ່ຄວາມບໍ່ສະຫງົບໃນຂອບເຂດທົ່ວແຂວງ ເຊກອງ, ເວົ້າລວມ, ເວົ້າສະເພາະ ກໍຄືເມືອງທ່າແຕງ ເປັນຕົ້ນ ການເກັບກໍາຂໍ້ມູນຕ້ອງລະອຽດຊັດເຈນ, ຄົບຖ້ວນຕາມເງື່ອນໄຂ, ການຄຸ້ມຄອງຄົນອອກ-ຄົນເຂົ້າຢູ່ບັນດາແຕ່ລະບ້ານທົ່ວເມືອງ ທີ່ມາເຄື່ອນໄຫວເຮັດວຽກນໍາບໍລິສັດ, ຫ້າງຮ້ານຕ່າງໆ, ເວົ້າສະເພາະ ຄົນຕ່າງປະເທດຕ້ອງໄດ້ຂຶ້ນທະບຽນ, ອອກໃບອະນຸຍາດຊົ່ວຄາວໃຫ້ຖືກຕ້ອງຕາມລະບຽບກົດໝາຍຂອງ ສປປ ລາວວາງອອກ. ທັງນີ້ ເພື່ອເຮັດໃຫ້ຄົນຕ່າງປະເທດທີ່ມາລົງທຶນຢູ່ພາຍໃນເມືອງຂອງຕົນ ໄດ້ເຂົ້າສູ່ລະບຽບກົດໝາຍດີຂຶ້ນເທື່ອລະກ້າວ.

ຂ່າວ-ພາບ: ພອນ ບຸນອຸທິດ 020 5632 8844

ລາວ-ໄທ ຮ່ວມມືກັນສົ່ງເສີ່ມວຽກທ່ອງທ່ຽວ 5 ເມືອງ ເປັນຈຸດຍຸດທະສາດ

ວັນທີ 23 ຕຸລາ 2017 ຜ່ານມານີ້ ອໍານາດການປົກແຂວງບໍ່ແກ້ວຈັດກອງປະຊຸມປຶກສາຫາລື ແລະ ແລກປ່ຽນບົດຮຽນ ສົ່ງເສີ່ມແຫລ່ງທ່ອງທ່ຽວ ລະຫວ່າງ ລາວ – ໄທ ໂດຍຖືເອົາເມືອງ 5 ຊຽງ ເປັນເສັ້ນທາງ ແຜນພັດທະນາ ຍຸດທະສາດການທ່ອທ່ຽວຄື: ຊຽງທອງ ( ສປປ ລາວ ), ຊຽງຮຸ້ງ ( ສປປ ຈີນ ), ຊຽງຮາຍ, ຊຽງໃໝ່, ຊຽງຕຸງ ( ປະເທດໄທ ) ໂດຍ ທ່ານ ສຸກຂະ ຫລຽນທອງຄຳ ຫົວໜ້າ ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງບໍ່ແກ້ວ, ທ່ານ ໂພເພັດ ຮອງເຈົ້າເມືອງຫ້ວຍຊາຍ, ຕາງໜ້າຝ່າຍໄທໂດຍ ທ່ານ ດຣ ນາງ ປຣະກອບສິຣິ ພັກດີພິນິດ ຜູ້ຊ່ວຍສາສະດາຈານ ຫົວໜ້າໂຄງການຍ່ອຍ ພ້ອມດ້ວຍຄະນະ ແລະ ພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມດັ່ງກ່າວ ເພື່ອກຳນົດທິດທາງ ແລະ ຍຸດທະສາດການຮ່ວມມື ລະຫວ່າງ ພາກລັດ ແລະ ພາກເອກະຊົນ ໃນຂະແໜງການທ່ອງທ່ຽວ ລະຫວ່າງ ລາວ – ໄທ ໂດຍມີຈຸດປະສົງ ເພື່ອແລກ ປ່ຽນບົດຮຽນ ແລະ ປຶກສາຫາລື ທາງການທ່ອງທ່ຽວ ແລະ ທັງເປັນການຮ່ວມມື ຈຸດທ່ອງທ່ຽວຂ້າມແດນ, ການສົ່ງເສິ່ມວຽງານທ່ອງທ່ຽວ ແລະ ການເຊື່ອມໂຍງບັນດາແຂວງ ທີມີຊາຍແດນຕິດຈອນກັນ.

 


ທ່ານ ສຸກຂະ ຫລຽນທອງຄຳ ກ່າວວ່າ: ປັດຈຸບັນແຂວງບໍ່ແກ້ວ ມີແຫລ່ງທ່ອງທ່ຽວທີໄດ້ຮັບການພັດທະນາ 13 ແຫ່ງ ແລະ ຍັງບໍ່ໄດ້ຮັບການພັດທະນາ 83 ແຫ່ງ ແລະ ມີນັກທ່ອງທ່ຽວເຂົ້າມາທັງ 210.537 ຄົນ ທຽບໃສ່ປີຜ່ານມາ ແມ່ນເພິ່ມຂຶ້ນເກືອບ 3.000 ຄົນ ເທົ່າກັບ 1,44%. ສໍາລັບ 9 ເດືອນ ປີ 2017 ມີນັກທ່ອງທ່ຽວທັງໝົດ 150.537 ຄົນ ທຽບໃສ່ໄລຍະປີຜ່ານມາ ແມ່ນຫລຸດລົງ 6.834 ຄົນ ເທົ່າກັບ 4,35% ທຽບໃສ່ແຜນການປີແມ່ນຫລຸດລົງ 70,12% ສາເຫດຍ້ອນເສດຖະກິດຂອງໂລກມີການປ່ຽນແປງ, ນັກທ່ອງທ່ຽວມິີຫລາຍທາງເລືອກ ໃນການເດີນທາງເຂົ້າ – ອອກຫຼາຍ ເສັ້ນທາງ.

ຂ່າວ: ແຂວງບໍ່ແກ້ວ