ສປປ ລາວ ໄດ້​ເປັນ​ສະມາຊິກສະຖາບັນການເຕີບໂຕສີຂຽວໂລກ (GGGI) ແລ້ວ

ທ່ານຮອງ​ລັດຖະມົນຕີ​ກະຊວງ​ແຜນການ ​ແລະ ການ​ລົງທຶນ ກິ​ແກ້ວ ຈັນທະ​ບູລີ ​ໃຫ້​ຮູ້​ວ່າ: ສປປ ລາວ ພວກເຮົາ​ໄດ້​ຖືກ​ຮັບ​ເຂົ້າ​ເປັນ​ສະມາ​ຊິກ​ຂອງ​ສະ​ຖາ​ບັນ​ການ​ເຕີບ​ໂຕ​ສີຂຽວ​ໂລກ (GGGI) ​ເປັນ​ປະ​ເທດອັນດັບ​ທີ 28 ເພື່ອ​ເປັນ​ການສະໜັບສະໜູນບັນດາວຽກງານ ແລະ ນະໂຍບາຍຂອງ​ລັດຖະບານ.
ການເຕີບໂຕສີຂຽວຮັບປະກັນການພັດທະນາເສດຖະກິດໄປຄຽງຄູ່ກັບການປົກຮັກສາສິ່ງແວດລ້ອມ ແລະ ການມີສ່ວນຮ່ວມຂອງສັງຄົມ, ທັງ​ເປັນ​ການ​ຊຸກຍູ້​ໃຫ້​ບັນດາ​ປະ​ເທດ​ສະມາຊິກ​​ມີ​ສ່ວນ​ຮ່ວມ​​ປົກ​ປັກ​ຮັກສາ​ບໍ່​ໃຫ້​ເກີດສິ່ງ​​​ທີ່​ເປັນ​ຜົນ​ກະທົບ​ຕໍ່ການ​ປ່ຽນ​ແປງ​ຂອງ​ດິນ​​ຟ້າ​ອາກາດ.
ສໍາລັບ​ ສປປ ລາວ​ ​​​ໄດ້ເຮັດ​ວຽກ​ຮ່ວມ​ໃນຫລາຍຂະ​ແໜງ​ການ​ ເຊັ່ນ: ການທ່ອງທ່ຽວ​ປະສົມ​ປະສານ​ກັບ​ທໍາ​ມະ​ຊາດ, ການ​ກໍາຈັດ​ນໍ້າ​ເປື້ອນ, ຂີ້ເຫຍື້ອ​ຕ່າງໆ, ການ​ນໍາ​ໃຊ້​ພະລັງ​ງານ ​ແລະ ອື່ນໆ, ​ເຊິ່ງ​​ປັດຈຸບັນ​ໄດ້​​​​ທົດ​ລອງປະຕິບັດຢູ່ນະ​ຄອນ​ຫລວງວຽງ​ຈັນ ​ແລະ ແຂວງຈໍາປາ​ສັກ.
ສະຖາບັນ (GGGI) ແມ່ນອົງການຈັດຕັ້ງສາກົນ​ ເພື່ອສົ່ງເສີມການເຕີບໂຕຂອງສີຂຽວ ແລະ ຄວາມຍືນຍົງດ້ານສິ່ງແວດລ້ອມ​, ໃຫ້ການສະໜັບສະໜູນການຂະຫຍາຍຕົວຂອງເສດຖະກິດທີ່ມີສີຂຽວ, ເຊິ່ງລວມມີການຫລຸດຜ່ອນຄວາມທຸກຍາກ, ການສ້າງວຽກເຮັດງານທໍາ ​ແລະ ການປະກອບສ່ວນທາງດ້ານສັງຄົມ. GGGI ​ແມ່ນ​ເນັ້ນເຮັດວຽກໃນ 4 ຂົງເຂດບູລິມະສິດສໍາຄັນ​ໃນການຫັນປ່ຽນເສດຖະກິດໃນປະເທດ​ ເຊັ່ນ: ດ້ານພະລັງງານ, ນໍ້າ, ການນໍາໃຊ້ທີ່ດິນ ແລະ ເມືອງສີຂຽວ. ​ພ້ອມ​ດຽວ​ກັນ​ນັ້ນ, ​ກໍເຮັດວຽກຮ່ວມກັບບັນດາປະເທດພັດທະນາ ແລະ ປະເທດທີ່ພວມພັດທະນາ ເພື່ອອອກແບບ ແລະ ສະແດງໃຫ້ເຫັນເສັ້ນທາງໃໝ່ສໍາລັບການເຕີບໂຕທາງດ້ານເສດຖະກິດທີ່ມີຄວາມຍືນຍົງ.
ຂະນະ​ດຽວ​ກັນກໍ​ສະໜັບສະ​ໜູນປະ​ເທດ​ສະມາຊິກ, ໂດຍການສະໜອງຜະລິດຕະພັນ, ສະໜອງທຶນ ແລະ ການປະສານງານການເຕີບໂຕສີຂຽວ ເພື່ອສະໜັບສະໜູນການປະຕິບັດຕາມບູລິມະສິດການພັດທະນາ.
ຂໍ້ມູນຈາກ: © ShareKao

 ສາກົນຊີ້ອັດຕາການຕາຍຂອງເດັກເກີດໃໝ່ໃນລາວຍັງສູງ

ອົງການອຸຍນີເຊັບໄດ້ເປີດເຜີຍບົດລາຍງານໃໝ່ກ່ຽວກັບອັດຕາການຕາຍຂອງເດັກເກີດໃໝ່ວ່າ: ອັດຕາການຕາຍຂອງເດັກເກີດໃໝ່ໃນທົ່ວໂລກແມ່ນຢູ່ລະດັບເຕືອນໄພສູງ, ສ່ວນໃຫຍ່ແມ່ນຢູ່ປະເທດທຸກຍາກ. ​​ຂະນະ​ທີ່ ສປປ ລາວ ອັດຕາການຕາຍຂອງເດັກເກີດໃໝ່ແມ່ນສູງກວ່າອັດຕາສະເລ່ຍຄື: ມີເຖິງ 28,7 ຄົນໃນເດັກເກີດໃໝ່ 1.000 ຄົນ ແລະ ໃນ 10 ປີຜ່ານມາ, ສປປ ລາວ ໄດ້ປະສົບຜົນສຳເລັດໃນການຫລຸດຜ່ອນອັດຕາການຕາຍຂອງເດັກເກີດໃໝ່ກໍ​ຕາມ, ​ແຕ່ອັດຕາການຕາຍຂອງເດັກເກີດໃໝ່ໃນປັດຈຸບັນຍັງນອນຢູ່ໃນບັນດາປະເທດທີ່ມີອັດຕາການຕາຍສູງໃນຂົງເຂດອາຊີ ແລະ ປາຊີຟິກ.
ທ່ານນາງ ແຮນຣິແອັດຕາ ຟໍເອກ ອາທິບໍດີຜູ້ບໍລິຫານງານສູງສຸດຂອງອົງການຢູນີເຊັບ ກ່າວວ່າ: ເຖິງວ່າພວກເຮົາສາມາດຫລຸດຜ່ອນອັດຕາການຕາຍຂອງເດັກຕໍ່າກວ່າ 5 ປີລົງໄດ້ເຄິ່ງໜຶ່ງໃນທ້າຍໄຕມາດຂອງສັດຕະວັດຜ່ານມາ, ແຕ່ພວກເຮົາຍັງບໍ່ມີຜົນຄືບໜ້າໃນການຢຸດຕິການຕາຍຂອງເດັກທີ່ມີອາຍຸຕໍ່າກວ່າ 1 ເດືອນ, ຊຶ່ງສາເຫດສ່ວນໃຫຍ່ແມ່ນມາຈາກພະຍາດທີ່ສາມາດປ້ອງກັນໄດ້. ສຳລັບເດັກເກີດໃໝ່ໃນປະເທດຍີ່ປຸ່ນ, ໄອແລນ ແລະ ສິງກະໂປ ມີໂອກາດລອດຫລາຍກວ່າໝູ່, ຂະນະທີ່ເດັກເກີດໃໝ່ໃນປະເທດປາກິດສະຖານ, ສາທາລະນະລັດອາຟຣິກາກາງ ແລະ ປະເທດອັບການິສະຖານ ແມ່ນປະເຊີນກັບຊາຕາກໍາທີ່ໜ້າເປັນຫ່ວງທີ່ສຸດ.
ບົດລາຍງານໃຫ້ຮູ້ຕື່ມວ່າ: ໃນທົ່ວໂລກ, ປະເທດທີ່ມີລາຍຮັບຕໍ່າອັດຕາການຕາຍຂອງເດັກເກີດໃໝ່ສະເລ່ຍແມ່ນ 27 ຄົນໃນ 1.000 ຄົນ ແລະ ໃນປະເທດທີ່ມີລາຍຮັບສູງແມ່ນ 3 ໃນ 1.000 ຄົນ.
ຂໍ້ມູນຈາກ: © ShareKao

ຟ້າຝ່າງົວຕາຍ 27 ໂຕ ຢູ່ເມືອງແກ່ນທ້າວ

ວັນທີ 21 ກຸມພາ 2018 ເວລາປະມານ 17:00 ໂມງ ໄດ້ເກີດເຫດຟ້າຝ່າງົວຊາວບ້ານຕາຍ 27 ໂຕ ຢູ່ເມືອງແກ່ນທ້າວ ໄຊຍະບູລີ

Posted by ຄລິບເດັ່ນ ຂ່າວດັງ on Thursday, February 22, 2018

Posted by ຄລິບເດັ່ນ ຂ່າວດັງ on Wednesday, February 21, 2018

 ທາງງາມເຕັມໄປດ້ວຍຂີ້ດິນ ຍັງເປັນບັນຫາຊໍ້າເຮື້ອທີ່ທຸກພາກສ່ວນຄວນເປັນເຈົ້າການຮ່ວມກັນ

ນະຄອນຫຼວງວຽງຈັນ ມີລະບຽບກຳນົດໃນການນໍາໃຊ້ລົດບັນທຸກປະເພດຕ່າງໆ ເພື່ອແກ້ໄຂບັນຫາລົດແອອັດໃນຊົ່ວໂມງຮີບດ່ວນ, ການຕົກເຮ່ຍຈາກການຂົງສົ່ງ. ແຕ່ບັນຫາດັ່ງກ່າວກໍ່ຍັງມີການລະເມີດລະບຽບຈາກຜູ້ປະກອບການຈຶ່ງພາໃຫ້ເກີດມີຫຼາຍບັນຫາຕາມມາ ເປັນຕົ້ນແມ່ນຂີ້ຝຸ່ນ ແລະ ຄວາມເປິເປື້ອນຕາມເສັ້ນທາງ.
ບັນດາເສັ້ນທາງສາຍຫຼັກໃນນະຄອນຫຼວງວຽງຈັນ ທີ່ປູຢາງສຳເລັດ ແຕ່ປັດຈຸບັນໄດ້ມີຂີ້ດິນ, ດິນຊາຍເພີ່ມຂຶ້ນຢູ່ສອງຂອບທາງ ເຊິ່ງສາເຫດຫຼັກແມ່ນເກີດມາຈາກເສດດິນທີ່ຕົກຫຼົ່ນລົງຈາກລົດບັນທຸກແກ່ດິນ – ຫີນ – ຊາຍ.
ຈາກການລົງສຳຫຼວດເສັ້ນທາງ T4 ເລີ່ມແຕ່ໄຟແດງຫຼັກ 10 (ບ້ານສົມສະໜຸກ ເມືອງຫາດຊາຍຟອງ ) ໄປຫາ 4 ແຍກໄຟແດງທາດຫຼວງ ບ້ານທາດຫຼວງ ເມືອງໄຊເຊດຖາ ຈະເຫັນໄດ້ວ່າຕະຫຼອດທັງສອງຂອບທາງມີຂີ້ດິນຢູ່ເປັນໄລຍະ ໂດຍສະເພາະແມ່ນບ່ອນທີ່ມີການກໍ່ສ້າງ, ທາງເຂົ້າຮ່ອມ ( ທີ່ບໍ່ປູຢາງ ) ບ່ອນທີ່ບໍ່ມີເຮືອນປະຊາຊົນເນື່ອງຈາກຂີ້ດິນສະສົມຫຼາຍຂຶ້ນແຕ່ລະມື້ຈົນອະນາໄມບໍ່ໝົດ, ບາງຄັ້ງຂີ້ດິນຕາມຂອບແຄມທາງດັ່ງກ່າວອາດຈະກໍ່ໃຫ້ເກີດອຸບັດເຫດແກ່ຜູ້ສັນຈອນທຽວທາງໄດ້ ເນື່ອງຈາກເວລາລົດໃຫຍ່ແລ່ນຕາມແຄມທາງດ້ວຍຄວາມໄວແລ້ວ ມີລົດຈັກແລ່ນຕາມຫຼັງຈະເຮັດໃຫ້ເສດຂີ້ດິນຕາມຂອບແຄມທາງນັ້ນປິວໃສ່ຜູ້ຂັບຂີ່ລົດຈັກຢູ່ທາງຫຼັງ ອາດຈະເຮັດໃຫ້ໄດ້ຮັບບາດເຈັບຈາກເມັດດິນຟົ້ງໃສ່ ຫຼື ອາດເຮັດໃຫ້ລົດຈັກລົ້ມໄດ້ ຖ້າປະໄວ້ດົນເວລາຝົນຕົກນໍ້າຝົນເຊາະດິນລົງຄອງລະບາຍກໍ່ເຮັດໃຫ້ຕັນທາງນໍ້າໆບໍ່ໄຫຼ .
ທ່ານ ຖະໜອມ ທຳທອງ ເຈົ້າເມືອງໆໄຊເຊດຖາ ນະຄອນຫຼວງວຽງຈັນ ໃຫ້ທັດສະນະວ່າ: ບັນຫາຂີ້ດິນຕົກເຮ່ຍຕາມສອງຟາກຂ້າງຂອງເສັ້ນທາງ T4 ( ຖະໜົນກຳແພງເມືອງ ) ນັບມາຈາກ 3 ແຍກໜອງໄຮ – ໄອເຕັກ – ທາດຫຼວງ, ທາດຫຼວງເຂົ້າມາຫາວົງວຽນໜອງບອນ ຍັງປະກົດເຫັນປະຈຳ ສາເຫດຍ້ອນຄວາມບໍ່ເອົາໃຈໃສ່ຕໍ່ກົດລະບຽບຂອງຜູ້ຂັບຂີ່ ແລະ ບໍລິສັດທີ່ນຳໃຊ້ລົດບັນທຸກຕ່າງໆເພື່ອຜົນປະໂຫຍດສ່ວນຕົວ. ອີງຕາມກົດລະບຽບຂອງ ພະແນກໂຍທາທິການ ແລະ ຂົນສົ່ງ ( ຍທຂ ) ນະຄອນຫຼວງວຽງຈັນ ແມ່ນກຳນົດບໍ່ໃຫ້ປະເພດລົດ 6 ລໍ້ແກ່ດິນ, ລົດພວງ, ລົດແກ່ເຫຼັກ, ແກ່ຊີມັງ ເຂົ້າມາໃນຕົວເມືອງນັບແຕ່ເວລາ 7:00 – 18:00 ໂມງ ເພື່ອຫຼຸດຜ່ອນຄວາມແອອັດໃນຊົ່ວໂມງຮີບດ່ວນ ແລະ ຄວາມເປັນລະບຽບ.
ແຕ່ໄລຍະຜ່ານມາຍັງເຫັນວ່າຈຳນວນປະເພດລົດທີ່ ຍທຂ ນະຄອນຫຼວງວຽງຈັນ ແຈ້ງຫ້າມຍັງບໍ່ທັນສັັກສິດເພາະຍັງມີຈຳນວນລົດພວງ, ລົດແກ່ດິນ, ແກ່ເຫຼັກ ຂອງບາງບໍລິສັດຍັງບໍ່ປະຕິບັດຕາມ ເຊິ່ງເມືອງໄຊເຊດຖາ ກຳລັງລົງເກັບກຳຂໍ້ມູນຮ່ວມກັບ ຍທຂ ເມືອງ, ນະຄອນຫຼວງ, ຈະລາຈອນ ແລະ ພາກສ່ວນທີ່ກ່ຽວຂ້ອງເພື່ອຈັດຕັ້ງຄະນະກຳມະການຢ່າງຄັກແນ່. ປັດຈຸບັນ ຍທຂ ເມືອງກຳລັງລົງກວດ ກາ, ຕິດຕາມເກັບກຳຂໍ້ມູນຢູ່ 2 ເສັ້ນທາງຈາກທີ່ມີທັງໝົດ 5 ເສັ້ນທາງຫຼັກຂອງເມືອງໄຊເສດຖາເພື່ອຈົດກ່າຍຈຳນວນລົດທີ່ຍັງບໍ່ປະຕິບັດຕາມ, ຈອດແບບຊະຊາຍວ່າ: ລົດຈຳນວນດັ່ງກ່າວມາຈາກບໍລິສັດໃດ, ມາຈາກເມືອງໃດແລ້ວສົ່ງຂ່າວໃຫ້ເມືອງທີ່ບໍລິສັດຂຶ້ນກັບໄດ້ມີການແຈ້ງເຕືອນກ່ອນການປັບໃໝຕາມຄວາມເໝາະສົມ.
ທ່ານ ເຈົ້າເມືອງໄຊເສດຖາຍອມຮັບວ່າ: ຍັງແກ້ໄຂບັນຫາດິນຕົກເຮ່ຍຕາມທາງໂດຍສະເພາະແມ່ນເຂດບ້ານຫົວຂົວ, ວັງຊາຍ ແລະ ເຂດໃກ້ຄຽງເນື່ອງຈາກມີບໍ່ດິນຫຼາຍແຫ່ງເຊັ່ນ: ບ້ານຊຽງດາ, ຂຸມຫີນ ແລະ ນາຄວາຍ ເພື່ອນຳດິນທີ່ຂຸດຂຶ້ນມາໄປຖົມເຂດຫຼຸບ, ໂນນ ທີ່ກຳລັງມີການປຸກສ້າງຕາມສະຖານທີ່ຕ່າງໆຢູ່ 4 ເມືອງໃນຂອງນະຄອນຫຼວງ. ອີກປັດໄຈຫນຶ່ງເມືອງໄຊເສດຖາເອງກໍ່ເປັນເມືອງທີ່ກຳລັງມີການກໍ່ສ້າງເປັນຈຳນວນຫຼາຍ.
ແຕ່ ສຳລັບເສັ້ນທາງໃນຕົວເມືອງຈາກ 4 ແຍກທາດຫຼວງ-ໜອງບອນ ແລະ ເສັ້ນທາງອື່ນໆໃນເມືອງເຊື່ອມຕໍ່ຫາເມືອງຕ່າງໆແມ່ນເຮັດໄດ້ດີ ທ່ານເຈົ້າເມືອງໄຊເສດຖາ ກ່າວ.
ເຈົ້າໜ້າທີ່ຕຳຫຼວດຈະລາຈອນ ປະຈຳປ້ອມໜອງບອນ ໃຫ້ຄຳຄິດເຫັນວ່າ: ສາເຫດຫຼັກໆທີ່ຍັງມີຂີ້ດິນ, ຂີ້ຊາຍ ຢູ່ຕາມສອງຟາກຂອງເສັ້ນທາງບາງເສັ້ນໃນນະຄອນຫຼວງ ແມ່ນເກີດຈາກການທີ່ລົດບັນທຸກສິນຄ້າ, ລົດແກ່ດິນ, ແກ່ຊາຍ ທີ່ແລ່ນມາຈາກເຂດນອກເຂົ້າມາໃນຕົວເມືອງ ເຮັດໃຫ້ຂີ້ດິນທີ່ຕິດຕາມຕີນລົດຂຸລົງເທື່ອລະໜ້ອຍກາຍເປັນການສະສົມ ແລະ ສ້າງຄວາມເປິະເປື້ອນໃຫ້ກັບເສັ້ນທາງ ມີຄວາມສ່ຽງທີ່ຈະເຮັດໃຫ້ເກີດອຸບັດຕິເຫດ.
ຕໍ່ບັນຫາດັ່ງກ່າວ ທາງພະແນກ ຍທຂ ນະຄອນຫຼວງວຽງຈັນ, ກົມຕຳຫຼວດຈະລາຈອນ ກໍໄດ້ອອກມາດຕະການໃນການແກ້ໄຂບັນຫາດັ່ງກ່າວຢ່າງເຂັ້ມງວດ ເພື່ອເປັນການຫຼຸດຜ່ອນການສະສົມຂອງຂີ້ດິນແລະ ຊາຍຕາມສອງຟາກທາງ ຖ້າຫາກວ່າມີລົດບັນທຸກຫີນ-ຊາຍທີ່ມີຄວາມເປິະເປື້ອນ, ບໍ່ປົກຜ້າບັດແລ່ນເຂົ້າມາຕາມເສັ້ນທາງຕົວເມືອງ ກໍມີມາດຕະການວ່າຖ້າພົບເຫັນຄັ້ງທຳອິດແມ່ນຈະຕັກເຕືອນ, ຄັ້ງທີ 2 ກໍໄດ້ປະຕິບັດຕາມລະບຽບ, ຖ້າມີຄັ້ງທີ 3 ແມ່ນຈະໄດ້ກັກລົດຄັນດັ່ງກ່າວນັ້ນໄວ້ ເພື່ອປະຕິບັດຕາມລະບຽບຕໍ່ໄປ.
ທີມຂ່າວໄດ້ລົງສອບຖາມ ປະຊາຊົນ ຕາມສອງພາກທາງ ທີ່ຍືດ ອາຊີບຄ້າ-ຂາຍ ເວົ້າວ່າ: ໃນແຕ່ລະມື້ມີລົດບັນທຸກທີ່ແກ່ດິນ-ແກ່ຊາຍ ທ່ຽວໄປ-ມາ ຫຼາຍຮ້ອຍຄັນ. ນອກຈາກນັ້ນ, ກໍ່ຍັງເຫັນມີລົດແກ່ດິນທີ່ບໍ່ໃສ່ຜ້າປົກປິດກໍ່ມີໃຫ້ເຫັນເປັນໄລຍະໆ. ສະນັ້ນ, ການທີ່ຈະເຮັດອະນາໄມປັດກວາດຂີ້ດິນຕາມໜ້າເຮືອຮແຄມທາງຂອງຕົນທຸກໆວັນນັ້ນອາດເຮັດບໍ່ໄດ້ ເນື່ອງຈາກຢູ່ເຮືອນ ແລະ ຮ້ານຂອງຕົນກໍ່ອະນາໄມບໍ່ໄຫວແລ້ວ ຈາກຂີ້ດິນຝຸ່ນ.
ທັງນີ້, ໃນມະຕິຕົກລົງຂອງອົງການປົກຄອງນະຄອນຫຼວງວຽງຈັນ ກ່ຽວກັບແຜນວຽກ ແລະ ມາດຕະການຈັດຕັ້ງປະຕິບັດໂຄງການວຽງຈັນສະອາດໄລຍະສະເພາະໜ້າ ແລະ ຮອດປີ 2020 ໄດ້ກຳນົດມາດຕະການຮັບປະກັນພາຫະນະສະອາດຄື:
1) ສຶກສາອົບຮົມຜູ້ຂັບຂີ່ທີ່ລະເມີດລະບຽບການຂົນສົ່ງ ແລະ ສ້າງຄວາມເປື້ອນເປິະໃສ່ເສັ້ນທາງ.
2) ຫ້າມພາຫະນະຂົນສົ່ງລົດບັນທຸກໜັກ (ລົດ 10 ລໍ້, ລົດພວງ) ແລ່ນຜ່ານເສັ້ນທາງທີ່ຫ້າມແລ່ນທີ່ໄດ້ກຳນົດໄວ້ແລ້ວ.
3) ດຳເນີນການປັບໃໝຕໍ່ຜູ້ລະເມີດກົດລະບຽບໝາຍການຈາລະຈອນທາງບົກການຂົນສົ່ງທາງບົກ (ໃນດຳລັດ 188/ນຍ ລົງວັນທີ 3/7/2007, ມາດຕາ 27, 28 ແລະ ມາດຕາ 33).
4) ຄົ້ນຄວ້າສ້າງໃຫ້ມີລະບຽບການຄຸ້ມຄອງອູ່ສ້ອມລົດແປງລົດ, ການບໍລິການລ້າງອັດສີດ ແລະ ບ່ອນລ້າງຕີນລົດທີ່ຈະເຂົ້າສູ່ຕົວເມືອງ.
5) ສົ່ງເສີມໃຫ້ເອກະຊົນ ຜູ້ທີ່ມີເງື່ອນໄຂລົດທຶນກໍ່ສ້າງບ່ອນລ້າງຕີນລົດຕາມຈຸດເຂົ້າຕົວເມືອງທີ່ຍັງເປັນດິນແດງ ແຕ່ລະເສັ້ນທາງເຂົ້າຫາຕົວເມືອງ ແລະ
6) ຫຼຸດຜ່ອນການນຳເຂົ້າພາຫະນະມືສອງທຸກປະເພດ ແລະ ລົດເກົ່າທີ່ຂາດມາດຕະຖານເຕັກນິກ.
ຂໍ້ມູນຈາກ: © ShareKao

ຍີ່ປຸ່ນຊ່ວຍເຫຼືອເຄື່ອງນຸ່ງຫົ່ມຕ້ານໄພໜາວ ໃຫ້ແຂວງຊຽງຂວາງ

ແຂວງ ຊຽງຂວາງ ໄດ້ຮັບ ເຄື່ອງນຸ່ງຫົ່ມ ໂດຍການຊ່ວຍ ເຫຼືອຈາກບໍລິສັດ ກຸໂລ ກາວະ ຈຳກັດ (KUROKAWA LTD) ປະເທດຍີ່ປຸ່ນ ໜັກ 8 ໂຕນ ລວມມູນຄ່າເກືອບ 200 ລ້ານ ກີບ ໂດຍການປະສານງານ ຂອງບໍລິສັດພັດທະນາກະສິ ກຳ ລາວ-ຍີ່ປຸ່ນ ຈຳກັດ ແຂວງ ຊຽງຂວາງ. ພິທີມອບ-ຮັບ ໄດ້ຈັດຂຶ້ນ ໃນວັນທີ 16 ກຸມພາຜ່ານມາ ນີ້, ຢູ່ທີ່ຫ້ອງວ່າການປົກຄອງ ແຂວງຊຽງຂວາງ ຕາງໜ້າກ່າວ ມອບໂດຍທ່ານ ອີໂມຣິ ດາຍ ອີຈິ (IMORI DAIJI) ປະທານ ບໍລິສັດພັດທະນາກະສິກຳ ລາວ-ຍີ່ປຸ່ນ ຈຳກັດ ແຂວງຊຽງ ຂວາງ ແລະ ກ່າວຮັບໂດຍ ທ່ານ ບຸນຕົ້ນ ຈັນທະພອນ ຮັກ ສາການເຈົ້າແຂວງຊຽງຂວາງ. ໃນໂອກາດນີ້ ທ່ານໄດ້ ກ່າວສະແດງຄວາມຂອບໃຈຕໍ່ ລັດຖະບານຍີ່ປຸ່ນ ກໍຄືບໍລິສັດ ກຸໂລ ກາວະ ຈຳກັດ ແລະ ບໍລິສັດ ພັດທະນາກະສິກຳລາວ-ຍີ່ປຸ່ນ ຈຳກັດ ແຂວງຊຽງຂວາງ ທີ່ໄດ້ໃຫ້ການຊ່ວຍເຫຼືອ ແລະ ມາລົງທຶນຢູ່ແຂວງຊຽງຂວາງ ເຮັດໃຫ້ແຂວງຊຽງຂວາງມີບາດ ກ້າວອັນໃໝ່ ສຳລັບເຄື່ອງນຸ່ງ ຫົ່ມດັ່ງກ່າວນັ້ນແມ່ນຈະນຳໄປ ມອບໃຫ້ປະຊາຊົນຜູ້ທຸກຍາກ ທີ່ຢູ່ເຂດຫ່າງໄກຊອກຫຼີກໃນ ບັນດາເມືອງຕ່າງໆຂອງແຂວງ ເພື່ອບັນເທົາຄວາມໜາວຮັກ ສາສຸຂະພາບໃຫ້ແຂງແຮງ ເພື່ອ ພັດທະນາເສດຖະກິດຂອງ ຄອບຄົວໃຫ້ເຂັ້ມແຂງ. (ຂ່າວ: ບຸນມີ ແສງທຸມມີ)

ອັດຕະປື ສະຫຼຸຸບວຽກງານຈັດຕັ້ງທົ່ວແຂວງ

ກອງປະຊຸມສະຫຼຸຸບວຽກ ງານຈັດຕັ້ງ, ກໍ່ສ້າງພັກພະນັກ ງານ ແລະ ແຜນການຍົກສູງ ວຽກງານການຈັດຕັ້ງທົ່ວແຂວງ ອັດຕະປື ໄດ້ເປີດຂຶ້ນໃນວັນທີ 19 ກຸມພາຜ່ານມານີ້ ທີ່ຫໍປະ ຊຸມໃຫຍ່ຂອງແຂວງພາຍໃຕ້ ການເປັນປະທານຂອງທ່ານ ນາງ ມີນາພອນ ໄຊສົມພູ ຮອງ ເລຂາພັກແຂວງ ຫົວໜ້າຄະນະ ຈັດຕັ້ງແຂວງອັດຕະປື ໂດຍ ໃຫ້ກຽດເຂົ້າຮ່ວມຂອງ ທ່ານ ເລັດ ໄຊຍະພອນ ເລຂາ ພັກແຂວງ ເຈົ້າແຂວງອັດຕະປື, ມີຫົວໜ້າກົມຄຸ້ມຄອງພະນັກ ງານຄະນະຈັດຕັ້ງສູນກາງພັກ, ມີບັນດາຄະນະປະຈຳພັກ ແຂວງ, ກຳມະການພັກແຂວງ, ເຈົ້າເມືອງ ຫົວໜ້າພະແນກ ການອ້ອມຂ້າງແຂວງຕະຫຼອດ ບັນດາຜູ້ຮັບຜິດຊອບວຽກງານ ຈັດຕັ້ງໃນແຕ່ລະເມືອງເຂົ້າ ຮ່ວມ. ທ່ານ ບົວໄລ ກົມມະສິດ ຮອງຫົວໜ້າຄະນະຈັດຕັ້ງ ແຂວງອັດຕະປື ໄດ້ລາຍງານ ໃຫ້ຮູ້ວ່າ: ຕະຫຼອດໄລຍະຜ່ານ ມາ ຄະນະພັກທຸກຂັ້ນໄດ້ເພີ່ມ ທະວີການຊີ້ນຳ-ນຳພາ, ສຶກສາ ອົບຮົມປຸກລະດົມກຳລັງແຮງ ທຸກພາກສ່ວນເຂົ້າໃນການຈັດ ຕັ້ງປະຕິບັດພາລະກິດປ່ຽນ ແປງໃໝ່ຢ່າງຮອບດ້ານ ແລະ ມີຫຼັກການຂອງພັກເຮົາ, ຮັບ ປະກັນສະຖຽນລະພາບທາງ ດ້ານການເມືອງ, ສັງຄົມມີ ຄວາມສະຫງົບ, ເສດຖະກິດ ໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ, ລະບົບການເມືອງ ແລະ ການ ຈັດຕັ້ງແຕ່ລະຂັ້ນໄດ້ຮັບການ ປັບປຸງດີຂຶ້ນ ໂດຍສະເພາະ ວຽກງານກໍ່ສ້າງພັກວຽກງານ ພະນັກງານ. ປັດຈຸບັນ ທົ່ວແຂວງອັດ ຕະປື ມີການຈັດຕັ້ງຮາກຖານ ພັກ 501 ຮາກຖານ, ທຽບໃສ່ປີ 2016 ເພີ່ມຂຶ້ນ 25 ຮາກຖານ, ຄະນະພັກຮາກຖານມີ 56 ຮາກຖານ, ທຽບໃສ່ປີ 2016 ເພີ່ມຂຶ້ນ 3 ຮາກຖານ, ມີໜ່ວຍ ພັກທັງໝົດ 445 ໜ່ວຍພັກ, ທຽບໃສ່ປີຜ່ານມາເພີ່ມຂຶ້ນ 22 ໜ່ວຍ, ໜ່ວຍພັກແຂງຮູ້ນຳພາ ຮອບດ້ານມີ 176 ໜ່ວຍ, ກວມ ເອົາ 39,55% ຂອງໜ່ວຍພັກ ທັງໝົດ ແລະ ປັດຈຸບັນທົ່ວ ແຂວງມີສະມາຊິກພັກທັງ 8.875 ສະຫາຍ, ຍິງ 2.336 ສະຫາຍ, ທຽບໃສ່ປີ 2016 ເພີ່ມຂຶ້ນ 687 ສະຫາຍ, ສະມາ ຊິກພັກສຳຮອງ 980 ສະຫາຍ, ຍິງ 327 ສະຫາຍ, ສະມາຊິກ ພັກແຂງຮອບດ້ານ 1.077 ສະ ຫາຍ, ແຂງ 5.085 ສະຫາຍ, ກາງ 1.725 ສະຫາຍ, ບໍ່ໄດ້ ຈັດປະເພດ 780 ສະຫາຍ, ໃນ ປີ 2017 ທົ່ວອົງຄະນະພັກ ແຂວງອັດຕະປື ມີໜ່ວຍພັກ ເຂັ້ມແຂງ-ຮູ້ນຳພາຮອບດ້ານ ມີ 176 ໜ່ວຍ, ເທົ່າກັບ 39,55% ຂອງໜ່ວຍພັກທັງໝົດ ທຽບໃສ່ ປີ 2016 ເພີ່ມຂຶ້ນ 28 ໜ່ວຍ. ກອງປະຊຸມບັນດາຜູ້ເຂົ້າ ຮ່ວມຍັງໄດ້ພ້ອມກັນຄົ້ນຄວ້າ ປະກອບຄຳເຫັນເຂົ້າໃສ່ບົດ ສະຫຼຸຸບ ແລະ ທິດທາງແຜນ ການ ເພື່ອປັບປຸງວຽກງານຈັດ ຕັ້ງ, ກໍ່ສ້າງພັກ-ພະນັກງານ ໃນປີ 2018 ນີ້ ໃຫ້ມີຄວາມສອດ ຄ່ອງແທດເໝາະໃນການຈັດ ຕັ້ງປະຕິບັດໜ້າທີ່ວຽກງານຂອ ງ ແຕ່ລະພາກສ່ວນດ້ວຍຄວາມ ເປັນເອກະພາບ. (ຂ່າວ: ວັດທະນາ ຫຼວງອາໄພ)

ກວດລົດຈັກເປົ້າໝາຍ ພົບຢາບ້າ 300 ກວ່າເມັດ

ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຈຳປາສັກ ໄດ້ສະກັດກວດຄົ້ນລົດຈັກເປົ້າໝາຍຄ້າຂາຍຢາເສບຕິດ ຢູ່ຈຸດກວດກາຫຼັກ 3 ບ້ານສະໜາມໄຊ ເມືອງປາກເຊ ພົບຢາບ້າ 355 ເມັດ ໃນວັນທີ 26 ມັງກອນ 2018 ພ້ອມທັງກັກຕົວຜູ້ຖືກຫາໄດ້ 1 ຄົນ ໄປສອບສວນຂະຫຍາຍຜົນ.
ເຈົ້າໜ້າທີ່ ປກສ ແຂວງຈໍາປາສັກ ໄດ້ໃຫ້ຮູ້ວ່າ: ພາຍຫຼັງໄດ້ສືບຮູ້ວ່າຈະມີໄວລຸ້ນກໍາລັງນຳຢາບ້າ ໄປຂາຍໃຫ້ກັບພັກພວກຢູ່ເຂດບ້ານສະໜາມໄຊ ໂດຍນຳໃຊ້ພາຫະນະລົດຈັກ ຍີ່ຫໍ້ຮອນດ້າເວບ ສີແດງດຳ ປ້າຍທະບຽນ 4725 ຈຳປາສັກ. ຈາກນັ້ນ, ຈຶ່ງນໍາກໍາລັງໄປຕັ້ງດ່ານຢູ່ຈຸດກວດກາ ຫຼັກ 3 ບ້ານສະໜາມໄຊ ຮອດເວລາ 14:00 ໂມງ ຈຶ່ງພົບລົດຈັກເປົ້າໝາຍຂັບຂີ່ໄປ ພໍຮອດຈຸດກວດກາ ເຈົ້າໜ້າທີ່ຈຶ່ງກວດຄົ້ນລົດ ແລະ ຄົ້ນຕົວຜູ້ຂັບຂີ່. ຜ່ານການກວດຄົ້ນ ພົບຢາບ້າ 355 ເມັດ ຢູ່ຖົງໂສ້ງ ພ້ອມທັງກັກຕົວຜູ້ຖືກຫາຊື່ທ້າວ ນາຍ ອາຍຸ 18 ປີ ຢູ່ບ້ານທີ 1 ເມືອງບາຈຽງຈະເລີນສຸກ ແຂວງຈຳປາສັກ.
ທ້າວ ນາຍ ຮັບສາລະພາບວ່າ: ຢາບ້າຈຳນວນດັ່ງກ່າວແມ່ນຂອງຕົນແທ້ ເຊິ່ງໄດ້ຊື້ນໍາຜູ້ຮ່ວມຂະບວນການນໍາກັນຢູ່ເມືອງປາກເຊ ໃນວັນທີ 25 ມັງກອນ 2018 ຈຳນວນ 360 ເມັດ ໂດຍນັດຈຸດຊື້ຂາຍກັນຢູ່ຮ້ານກິນ-ດື່ມແຫ່ງໜຶ່ງໃນເມືອງປາກເຊ ແລ້ວນຳມາເສບເອງ 5 ເມັດ; ຮອດວັນທີ 26 ມັງກອນ 2018 ໄດ້ເອົາຢາບ້າຈຳນວນດັ່ງກ່າວໄປຂາຍໃຫ້ຜູ້ທີ່ສັງຊື້ຢູ່ບ້ານສະໜາມໄຊ ເມືອງປາກເຊ ພໍຂັບລົດໄປຮອດຈຸດກວດກາ ຫຼັກ 3 ຈຶ່ງຖືກເຈົ້າໜ້າທີ່ກັກຕົວພ້ອມຂອງກາງຢາບ້າ 355 ເມັດ, ໂທລະສັບ 2 ໜ່ວຍ ແລະ ລົດຈັກ 1 ຄັນ ໄປດຳເນີນຄະດີ.
ຂໍ້ມູນ: © LSecurityNews

 ກວດຢຶດນົກຫວງຫ້າມ ບໍ່ມີໜັງສືຢັ້ງຢືນທີ່ມາ 100 ກວ່າໂຕ

ກອງກວດກາປ່າໄມ້ ນະຄອນຫຼວງວຽງຈັນ ສົມທົບກັບພາກສ່ວນກ່ຽວຂ້ອງ ລົງກວດກາຮ້ານຂາຍສັດ ( ຮ້າຍຂາຍນົກ ) ຢູ່ຖະໜົນຄູວຽງ ເຂດບ້ານສີເມືອງ ເມືອງສີສັດຕະນາກ ຈໍານວນ 4 ຮ້ານ ພົບເຫັນສັດປ່າປະເພດນົກ ທີ່ຫວງຫ້າມ ຈໍານວນ 100 ກວ່າໂຕ ທີ່ວາງຂາຍຢູ່ໜ້າຮ້ານທີ່ບໍ່ມີເອກະສານຢັ້ງຢືນທີ່ມາຂອງສັດຈໍານວນດັ່ງກ່າວ ຈຶ່ງຢຶດໄວ້ເພື່ອດຳເນີນການສອບສວນ.
ທ່ານ ແສງອາລຸນ ສຸລິຍະວົງ ຫົວໜ້າກອງກວດກາປ່າໄມ້ ນະຄອນຫຼວງວຽງຈັນ ໃຫ້ຮູ້ວ່າ: ໃນວັນທີ 13 ກຸມພາ 2018, ເວລາປະມານ 14:00 ໂມງ ເຈົ້າໜ້າທີ່ກອງກວດກາປ່າໄມ້ ໄດ້ສົມທົບກັບເຈົ້າໜ້າທີ່ປ່າໄມ້ ນະຄອນຫຼວງວຽງຈັນ ລົງກວດກາຮ້ານຂາຍນົກຂອງ ນາງ ວິນະສາ ອາຍຸ 20 ປີ, ທ້າວ ແສງປະຊາ ອາຍຸ 38 ປີ, ນາງ ນິລັນ ອາຍຸ 28 ປີ ແລະ ນາງ ຂັນທະລີ ທັງໝົດຢູ່ບ້ານສີເມືອງ ເມືອງສີສັດຕະນາກ ນະຄອນຫຼວງວຽງຈັນ ພົບເຫັນສັດປ່າຄຸ້ມຄອງ ແລະ ຫວງຫ້າມປະເພດນົກ ເຊັ່ນ: ນົກຫາງຍາວ, ນົກອ້ຽງ, ນົກຫອນ, ນົກແກ້ວສົບແດງ, ອົກອ້ຽງປາກເຫຼືອງ, ນົກເຂົາ ແລະ ນົກຫອນຈຸກ ຈໍານວນ 117 ໂຕ, ຜ່ານການກວດກາ ພົບວ່າ ເຈົ້າຂອງຮ້ານບໍ່ມີເອກະສານຢັ້ງຢືນທີ່ມາ ຈຶ່ງຢຶດສັດຈໍານວນດັ່ງກ່າວ.
ພ້ອມທັງເຮັດບົດບັນທຶກກັບເຈົ້າຂອງຮ້ານກໍລະນີເຮັດຜິດຄັ້ງຕໍ່ໄປ ຈະຖືກດໍາເນີນຄະດີຕາມລະບຽບກົດໝາຍ. ມາໃນວັນທີ 14 ກຸມພາ 2018 ເຈົ້າໜ້າທີ່ກອງກວດກາປ່າໄມ້ ຈຶ່ງໄດ້ມອບສັດຈໍານວນທັງໝົດໃຫ້ສູນຊ່ວຍເຫຼືອສັດປ່າລາວ ( ສວນສັດບ້ານເກີນ ) ນໍາໄປບໍາບັດໃຫ້ແຂງແຮງ ເພື່ອປ່ອຍຄືນສູ່ທໍາມະຊາດ.


ທ່ານຫົວໜ້າກອງປ່າໄມ້ ໃຫ້ຮູ້ຕື່ມວ່າ: ການສະກັດກັ້ນ ແລະ ຕ້ານການຄ້າຂາຍສັດປ່າຢູ່ນະຄອນຫຼວງວຽງຈັນນີ້, ກອງກວດກາປ່າໄມ້ ສົມທົບກັບພາກສ່ວນທີ່ກ່ຽວຂ້ອງ ລົງກວດກາຢູ່ຕາມຕະຫຼາດ ແລະ ຈຸດທີ່ເປັນເປົ້າໝາຍອາທິດ ລະ 2 ຄັ້ງ ແລະ ລົງກວດຕາມພົນລະເມືອງດີທີ່ແຈ້ງມາ ສາມາດຢຶດສັດຫວງຫ້າມໄດ້ເປັນຈໍານວນຫຼວງຫຼາຍ ພ້ອມທັງສຶກສາອົບຮົມ ແລະ ດໍາເນີນຄະດີຕໍ່ຜູ້ລະເມີດ. ມາຮອດປັດຈຸບັນ ເຫັນວ່າການຄ້າຂາຍສັດປ່າຢູ່ນະຄອນຫຼວງວຽງຈັນ ຫຼຸດລົງ ພ້ອມນີ້ ຍັງຮຽກຮ້ອງມາຍັງຜູ້ທີ່ຄ້າຂາຍສັດປ່າໃຫ້ຢຸດເຊົາ, ຖ້າມີການຝ່າຝືນຈະຖືກດໍາເນີນຄະດີຢ່າງເຂັ້ມງວດໃນມາດຕາ 52, ວັກ 1,2 ແລະ 3 ຕາມກົດໝາຍ ວ່າດ້ວຍສັດນໍ້າ-ສັດປ່າ.
ຂໍ້ມູູນ: © LSecurityNews

ເຜີຍພາບບາງສ່ວນຂອງພຣະພຸດທະຮູບອົງຫຼວງ ປາງປະທານພອນ ມາຮອດວັດໄຫຫີນມີໄຊຍະຣາມແລ້ວ.

ອີງຕາມການລາຍງານຂອງ ຄູບາແສງທອງ ຈັນທະວາໂຣ ໃຫ້ຮູ້ວ່າ: ໃນມື້ນີ້ ວັນທີ 21 ກຸມພາ 2018 ບາງສ່ວນຂອງພຣະພຸດທະຮູບອົງຫຼວງປາງປະທານພອນ ໄດ້ມາຮອດວັດໄຫຫີນມີໄຊຍະຣາມ ເມືອງແປກ ແຂວງຊຽງຂວາງແລ້ວ ເຊິ່ງພະພຸດ ທະຮູບມີຄວາມສູງຈາກຖານປະມານ 23 ແມັດ (ຫາກລວມຖານທີ່ສູງ15 ແມັດ ຈະເຮັດໃຫ້ພະພຸດທະຮູບສູງເຖິງ38 ແມັດເລີຍ ເຊິ່ງນັບວ່າເປັນພະພຸດທະຮູບທີ່ສູງລະດັບຕົ້ນຂອງປະເທດເລີ່ມກໍວ່າໄດ້.

ວັດໄຫຫີນມີໄຊຍະຣາມ ມີ​ເນື້ອ​ທີ່ທັງໝົດປະມານ 18 ​ເຮັກຕາ ເປັນວັດທີ່ຕັ້ງຢູ່ຈອມພູໃກ້ກັບທົ່ງໄຫຫີນແຂວງຊຽງຂວາງ. ຖືວ່າເປັນອີກວັດໜຶ່ງທີ່ຊາວແຂວງຊຽງຂວາງປະກອບສ່ວນວັດຖຸ ແລະ ປັດໃຈ ເພື່ອສ້າງວັດດັ່ງກ່າວໃຫ້ກາຍເປັນສູນຮຽນຮູູ້ຂອງສາສະໜາຂອງບັນດາພະສົງ, ສຳມະນາພາຍໃນແຂວງ.

ທີ່ມາ: ຄູບາແສງທອງ ຈັນທະວາໂຣ (Sengthong Chanthavaro).

ເຊກອງ ເຊັນອະນຸມັດສ້າງເຂື່ອນ 3 ແຫ່ງຢູ່ເມືອງດາກຈຶງ

ຂປລ. ອົງການປົກຄອງແຂວງເຊກອງ ໄດ້ອະນຸຍາດໃຫ້ບໍລິສັດ ເອັມພີ (MP) ກໍ່ສ້າງຈໍາກັດຜູ້ດຽວ ເປັນຜູ້ສືບຕໍ່ພັດທະນາໂຄງການ ກໍ່ສ້າງເຂື່ອນໄຟຟ້ານໍ້າຕົກ ຂະໜາດນ້ອຍ 3 ແຫ່ງໃສ່ນ້ຳເຢີງ ຢູ່ເມືອງດາກຈຶງ. ໂດຍໄດ້ຈັດພິທີເຊັນສັນຍາ ອະນຸຍາດໂຄງການ ໃນວັນທີ 19 ກຸມພາ 2018 ລະຫວ່າງ ທ່ານ ທອງຄຳ ມະນີວົງຫົວໜ້າພະແນກແຜນການ ແລະ ການລົງທຶນ ແຂວງເຊກອງ ກັບທ່ານ ມະໂນທຳ ເພັດສີລິແສງອຳນວຍການບໍລິສັດ ເອັມພີກໍ່ສ້າງຈໍາກັດຜູ້ດຽວ ໂດຍມີທ່ານ ເຫລັກໄຫລສີວິໄລ ຮອງເຈົ້າແຂວງໆເຊກອງ, ມີທ່ານເຈົ້າເມືອງໆດາກຈຶງ, ພະແນກການ ທີ່ກ່ຽວຂ້ອງຂອງ ແຂວງ-ເມືອງ ແລະ ພະນັກງານວິຊາການ ເຂົ້າຮ່ວມ.
ທ່ານມະໂນທຳ ເພັດສີລິແສງ ໄດ້ໃຫ້ຮູ້ວ່າ: ໂຄງການດັ່ງກ່າວແມ່ນໄດ້ດຳເນີນການສຶກສາສຳຫລວດ ຄວາມເປັນໄປໄດ້ມາແຕ່ ເດືອນກໍລະກົດ ປີ 2014 ເຊິ່ງເຫັນວ່າມີຄວາມສາມາດ ເປັນໄປໄດ້ໃນການກໍ່ສ້າງ, ຈາກນັ້ນ ຈຶ່ງຂໍອະນຸຍາດສືບຕໍ່ ພັດທະນາເຂດດັ່ງກ່າວໂດຍໂຄງການກໍ່ສ້າງ ເຂື່ອນໄຟຟ້ານ້ຳຕົກ ຂະໜາດນ້ອຍນ້ຳເຢີງທັງ 3 ແຫ່ງ ແມ່ນມີກຳລັງຕິດຕັ້ງລວມ 33 ເມກາວັດ ແລະ ສາມາດຜະລິດ ກະແສໄຟຟ້າໄດ້ທັງໝົດ 136,39 ກິກກາວັດໂມງຕໍ່ປີ, ໃນນີ້ຫ້ວຍເຢີງ 3 ມີກຳລັງຕິດຕັ້ງ 9 ເມກາວັດ, ສາມາດຜະລິດກະແສໄຟຟ້າໄດ້ 34,7 ກິກກາວັດໂມງ ຕໍ່ປີ; ຫ້ວຍເຢີງ 5 ມີກຳລັງຕິດຕັ້ງ 10 ເມກາວັດ, ສາມາດຜະລິດກະແສໄຟຟ້າໄດ້ 36,19 ກິກກາວັດໂມງຕໍ່ປີແລະ ຫ້ວຍເຢີງ 7 ມີກຳລັງຕິດຕັ້ງ 14 ເມກາວັດ,ສາມາດຜະລິດກະແສໄຟຟ້າ ໄດ້ 63,5 ກິກກາວັດໂມງຕໍ່ປີ. ຄາດຈະໃຊ້ເວລາໃນການກໍ່ສ້າງ 3 ປີຈິ່ງສຳເລັດ.
ທ່ານອຳນວຍການບໍລິສັດ ຍັງໃຫ້ຮູ້ອີກວ່າ: ກະແສໄຟຟ້າທີ່ຜະລິດໄດ້ທັງໝົດແມ່ນຈະຂາຍໃຫ້ບໍລິສັດ ລັດວິສາຫະກິດໄຟຟ້າລາວເພື່ອຕອບສະໜອງກະແສໄຟຟ້າ ໃຫ້ປະຊາຊົນລາວ ບັນດາເຜົ່າໂດຍສະເພາະ ປະຊາຊົນແຂວງເຊກອງ ໄດ້ຮັບປະໂຫຍດໂດຍກົງຈາກໂຄງການ, ຖ້າຫາກໂຄງການດັ່ງກ່າວກໍ່ສ້າງ ສຳເລັດຕາມແຜນການ ຈະເປັນການປະກອບ ສ່ວນສຳຄັນ ເຂົ້າໃນການພັດທະນາ ເສດຖະກິດ-ສັງຄົມ ຂອງເມືອງດາກຈຶງ ກໍຄື ແຂວງເຊກອງໂດຍສະເພາະ ແມ່ນການສ້າງວຽກເຮັດງານທຳ ໃຫ້ປະຊາຊົນພາຍໃນທ້ອງຖິ່ນ.