ເຜີຍພາບບາງສ່ວນຂອງພຣະພຸດທະຮູບອົງຫຼວງ ປາງປະທານພອນ ມາຮອດວັດໄຫຫີນມີໄຊຍະຣາມແລ້ວ.

ອີງຕາມການລາຍງານຂອງ ຄູບາແສງທອງ ຈັນທະວາໂຣ ໃຫ້ຮູ້ວ່າ: ໃນມື້ນີ້ ວັນທີ 21 ກຸມພາ 2018 ບາງສ່ວນຂອງພຣະພຸດທະຮູບອົງຫຼວງປາງປະທານພອນ ໄດ້ມາຮອດວັດໄຫຫີນມີໄຊຍະຣາມ ເມືອງແປກ ແຂວງຊຽງຂວາງແລ້ວ ເຊິ່ງພະພຸດ ທະຮູບມີຄວາມສູງຈາກຖານປະມານ 23 ແມັດ (ຫາກລວມຖານທີ່ສູງ15 ແມັດ ຈະເຮັດໃຫ້ພະພຸດທະຮູບສູງເຖິງ38 ແມັດເລີຍ ເຊິ່ງນັບວ່າເປັນພະພຸດທະຮູບທີ່ສູງລະດັບຕົ້ນຂອງປະເທດເລີ່ມກໍວ່າໄດ້.

ວັດໄຫຫີນມີໄຊຍະຣາມ ມີ​ເນື້ອ​ທີ່ທັງໝົດປະມານ 18 ​ເຮັກຕາ ເປັນວັດທີ່ຕັ້ງຢູ່ຈອມພູໃກ້ກັບທົ່ງໄຫຫີນແຂວງຊຽງຂວາງ. ຖືວ່າເປັນອີກວັດໜຶ່ງທີ່ຊາວແຂວງຊຽງຂວາງປະກອບສ່ວນວັດຖຸ ແລະ ປັດໃຈ ເພື່ອສ້າງວັດດັ່ງກ່າວໃຫ້ກາຍເປັນສູນຮຽນຮູູ້ຂອງສາສະໜາຂອງບັນດາພະສົງ, ສຳມະນາພາຍໃນແຂວງ.

ທີ່ມາ: ຄູບາແສງທອງ ຈັນທະວາໂຣ (Sengthong Chanthavaro).

ເຊກອງ ເຊັນອະນຸມັດສ້າງເຂື່ອນ 3 ແຫ່ງຢູ່ເມືອງດາກຈຶງ

ຂປລ. ອົງການປົກຄອງແຂວງເຊກອງ ໄດ້ອະນຸຍາດໃຫ້ບໍລິສັດ ເອັມພີ (MP) ກໍ່ສ້າງຈໍາກັດຜູ້ດຽວ ເປັນຜູ້ສືບຕໍ່ພັດທະນາໂຄງການ ກໍ່ສ້າງເຂື່ອນໄຟຟ້ານໍ້າຕົກ ຂະໜາດນ້ອຍ 3 ແຫ່ງໃສ່ນ້ຳເຢີງ ຢູ່ເມືອງດາກຈຶງ. ໂດຍໄດ້ຈັດພິທີເຊັນສັນຍາ ອະນຸຍາດໂຄງການ ໃນວັນທີ 19 ກຸມພາ 2018 ລະຫວ່າງ ທ່ານ ທອງຄຳ ມະນີວົງຫົວໜ້າພະແນກແຜນການ ແລະ ການລົງທຶນ ແຂວງເຊກອງ ກັບທ່ານ ມະໂນທຳ ເພັດສີລິແສງອຳນວຍການບໍລິສັດ ເອັມພີກໍ່ສ້າງຈໍາກັດຜູ້ດຽວ ໂດຍມີທ່ານ ເຫລັກໄຫລສີວິໄລ ຮອງເຈົ້າແຂວງໆເຊກອງ, ມີທ່ານເຈົ້າເມືອງໆດາກຈຶງ, ພະແນກການ ທີ່ກ່ຽວຂ້ອງຂອງ ແຂວງ-ເມືອງ ແລະ ພະນັກງານວິຊາການ ເຂົ້າຮ່ວມ.
ທ່ານມະໂນທຳ ເພັດສີລິແສງ ໄດ້ໃຫ້ຮູ້ວ່າ: ໂຄງການດັ່ງກ່າວແມ່ນໄດ້ດຳເນີນການສຶກສາສຳຫລວດ ຄວາມເປັນໄປໄດ້ມາແຕ່ ເດືອນກໍລະກົດ ປີ 2014 ເຊິ່ງເຫັນວ່າມີຄວາມສາມາດ ເປັນໄປໄດ້ໃນການກໍ່ສ້າງ, ຈາກນັ້ນ ຈຶ່ງຂໍອະນຸຍາດສືບຕໍ່ ພັດທະນາເຂດດັ່ງກ່າວໂດຍໂຄງການກໍ່ສ້າງ ເຂື່ອນໄຟຟ້ານ້ຳຕົກ ຂະໜາດນ້ອຍນ້ຳເຢີງທັງ 3 ແຫ່ງ ແມ່ນມີກຳລັງຕິດຕັ້ງລວມ 33 ເມກາວັດ ແລະ ສາມາດຜະລິດ ກະແສໄຟຟ້າໄດ້ທັງໝົດ 136,39 ກິກກາວັດໂມງຕໍ່ປີ, ໃນນີ້ຫ້ວຍເຢີງ 3 ມີກຳລັງຕິດຕັ້ງ 9 ເມກາວັດ, ສາມາດຜະລິດກະແສໄຟຟ້າໄດ້ 34,7 ກິກກາວັດໂມງ ຕໍ່ປີ; ຫ້ວຍເຢີງ 5 ມີກຳລັງຕິດຕັ້ງ 10 ເມກາວັດ, ສາມາດຜະລິດກະແສໄຟຟ້າໄດ້ 36,19 ກິກກາວັດໂມງຕໍ່ປີແລະ ຫ້ວຍເຢີງ 7 ມີກຳລັງຕິດຕັ້ງ 14 ເມກາວັດ,ສາມາດຜະລິດກະແສໄຟຟ້າ ໄດ້ 63,5 ກິກກາວັດໂມງຕໍ່ປີ. ຄາດຈະໃຊ້ເວລາໃນການກໍ່ສ້າງ 3 ປີຈິ່ງສຳເລັດ.
ທ່ານອຳນວຍການບໍລິສັດ ຍັງໃຫ້ຮູ້ອີກວ່າ: ກະແສໄຟຟ້າທີ່ຜະລິດໄດ້ທັງໝົດແມ່ນຈະຂາຍໃຫ້ບໍລິສັດ ລັດວິສາຫະກິດໄຟຟ້າລາວເພື່ອຕອບສະໜອງກະແສໄຟຟ້າ ໃຫ້ປະຊາຊົນລາວ ບັນດາເຜົ່າໂດຍສະເພາະ ປະຊາຊົນແຂວງເຊກອງ ໄດ້ຮັບປະໂຫຍດໂດຍກົງຈາກໂຄງການ, ຖ້າຫາກໂຄງການດັ່ງກ່າວກໍ່ສ້າງ ສຳເລັດຕາມແຜນການ ຈະເປັນການປະກອບ ສ່ວນສຳຄັນ ເຂົ້າໃນການພັດທະນາ ເສດຖະກິດ-ສັງຄົມ ຂອງເມືອງດາກຈຶງ ກໍຄື ແຂວງເຊກອງໂດຍສະເພາະ ແມ່ນການສ້າງວຽກເຮັດງານທຳ ໃຫ້ປະຊາຊົນພາຍໃນທ້ອງຖິ່ນ.

ແຂວງໄຊຍະບູລີ ມອບຊ້າງ 11 ໂຕ ໃຫ້ສູນອະນຸລັກຊ້າງລາວ.

ພິທີມອບຮັບ ຊ້າງ ຈຳນວນ 11 ໂຕໃຫ້ແກ່ ບໍລິສັດທ່ອງທ່ຽວສູນອະນຸລັກຊ້າງລາວ ໄດ້ຈັດຂຶ້ນໃນຕອນເຊົ້າຂອງວັນທີ 19 ກຸມພາ 2018 ນີ້ຢູ່ທີ່ສູນອະນຸລັກຊ້າງອ່າງນ້ຳຕຽນແຂວງໄຊຍະບູລີ ໂດຍການເຂົ້າຮ່ວມຂອງທ່ານ ເພັງນິລັນ ຄຳພັນເພັງ ຮອງເຈົ້າໆແຂວງໄຊຍະບູລີ ມີຫົວໜ້າໜ້າ,ຮອງຫົວໜ້າພະແນກການ ແລະ ຫົວໜ້າສູນອານຸລັກຊ້າງເຂົ້າຮ່ວມ.

ຊ້າງຈຳນວນດັ່ງກ່າວນີ້ແມ່ນໄດ້ນຳເອົາມາຈາກເມືອງທົ່ງມີໄຊ ແຂວງໄຊຍະບູລີ ໂດຍມອບໃຫ້ສູນອະນຸລັກຊ້າງລາວເປັນຜູ້ດູແລເບິ່ງແຍງ ແລະ ຄຸ້ມຄອງປົກປັກຮັກສາໃນຕໍ່ໜ້າ. ທັງນີ້ ກໍ່ເພື່ອເປັນການອະນຸລັກຮັກສາຊ້າງລາວໃຫ້ຢູ່ຄູ່ກັບຄົນລາວຕະຫຼອດໄປ.

ຈາກນັ້ນໃນຕອນທ້າຍຂອງພິທີ ທ່ານ ຄຳຫຼ້າ ຜິວວັນນາ ຫົວໜ້າພະແນກກະສິກຳ ແລະ ປ່າໄມ້ແຂວງໄຊຍະບູລີ ແລະ ທ່ານ ເຊບັດສະຕຽນ ດຸຟີໂຢ ຫົວໜ້າສູນອານຸລັກຊ້າງລາວ ຍັງໄດ້ພ້ອມກັນຮ່ວມເຊັນບົດບັນທຶກມອບ-ຮັບຊ້າງ ຈຳນວນ 11 ໂຕໂດຍຊ່ອງ ແລະ ເປັນສັກຂີພິຍານຂອງທ່ານຮອງເຈົ້າໆແຂວງໄຊຍະບູລີພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ລັດຖະມົນຕີກະຊວງສຶກສາທິການ ແລະ ກິລາ ລົງຢ້ຽມາມ ແລະ ເຮັດວຽກຢູ່ເມືອງໄຊສະຖານ

ທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ໄດ້ລົງຢ້ຽມຢາມ ແລະ ເຮັດວຽກຢູ່ ເມືອງໄຊສະຖານ, ແຂວງໄຊຍະບູລີ ໃນເມື່ອວັນທີ 16 ກຸມພາ 2018 ທີ່ຜ່ານມາ ໂດຍໃຫ້ການຕ້ອນຮັບຈາກທ່ານ ກາບແກ້ວ ສີບຸນມາ ຫົວໜ້າພະແນກສຶກສາທິການ ແລະ ກິລາແຂວງໄຊຍະບູລີ, ຄະນະນຳຂອງເມືອງ, ພະນັກງານຄູອາຈານ ພາຍໃນເມືອງ.


ການລົງຢ້ຽມຢາມຄັ້ງນີ້ ທ່ານລັດຖະມົນຕີກະຊວງສຶກສາທິການ ແລະ ກິລາ ແມ່ນໄດ້ຮັບຟັງການສະຫຼຸບໂດຍຫຫຍໍ້ຈາກ ທ່ານ ຄຳຜຸຍ ອິນທະບັນດິດ ຮອງເລຂາພັກເມືອງ ຮອງເຈົ້າເມືອງໄຊສະຖານ ຜູ້ຊີ້ນຳຂົງເຂດວັດທະນາທຳ-ສັງຄົມ ຊື່ງທ່ານໄດ້ຍົກໃຫ້ເຫັນສະພາບລວມໂດຍຫຍໍ້ຂອງເມືອງໄຊສະຖານ ເມືອງໄຊສະຖານເປັນເຂດຢຸດທະສາດຂອງແຂວງໄຊຍະບູລີ, ເປັນເຂດຫ່າງໄກຊອກຫຼີກ, ທຸລະການດານ ແລະ ໄດ້ຮັບການສ້າງຕັ້ງຂື້ນໃນວັນທີ 2 ທັນວາ 2009 ຕັ້ງຢູ່ຫ່າງຈາກເທດສະບານແຂວງ ໄປທາງທິດຕາເວັນຕົກປະມານ 64 ກິໂລແມັດ, ປະກອບມີ 21 ບ້ານທຸກຍາກ, ມີຄອບຄົວທຸກຍາກ 1,702 ຄອບຄົວ, ກວມເອົາ 60,78 ເບີເຊັນ ຂອງຄອບຄົວທັງໝົດ,

ມີພົນລະເມືອງທັງໝົດ 15,200 ຄົນ, ຍິງ 7,800 ຄົນ ໃນນີ້ຊົນເຜົ່າໄປຣກວມເອົາ 96,21 ເບີເຊັນ, ມີປະຊາຊົນກືກໜັງສື 2,500 ກວ່າຄົນ, ອາຊີບຕົ້ນຕໍຂອງປະຊາຊົນແມ່ນປູກຝັງ, ລ້ຽງສັດ ຕໍ່ກັບວຽກງານການສຶກສາທົ່ວເມືອງ ມີໂຮງຮຽນລ້ຽງເດັກ 2 ແຫ່ງ, ມີນັກຮຽນ 44 ນ້ອງ, ຍິງ 24 ນ້ອງ, ໂຮງຮຽນອານຸບານ 21 ແຫ່ງ, ມີນັກຮຽນ 642 ນ້ອງ, ຍິງ 351 ນ້ອງ, ມີໂຮງຮຽນປະຖົມຖາວອນ 21 ແຫ່ງ, ມີໂຮງຮຽນມັດທະຍົມຕົ້້ນ 6 ແຫ່ງ ມີນັກຮຽນ ທົ່ວເມືອງມີພະນັກງານຂະແໜງການສຶກສາທັງໝົດ 310 ຄົນ, ຍິງ 163 ຄົນ ໃນນີ້ມີອາສາສະມັກ 117 ຄົນ, ຍິງ 65 ຄົນ, ມີຄູອານຸບານ 58 ຄົນ, ໃນນີ້ອາສາສະມັກ 28 ຄົນ, ຄູປະຖົມ 118 ຄົນ, ຍິງ 47 ຄົນ, ອາສາສະມັກ 445 ຄົນ, ຍິງ 20 ຄົນ, ມີຄູມັດທະຍົມຕົ້ນ 57 ຄົນ, ຍິງ 24 ຄົນ, ອາສາສະມັກ 10 ຄົນ, ຄູມັດທະຍົມປາຍ 44 ຄົນ, ຍິງ 21 ຄົນ, ອາສາສະມັກ 17 ຄົນ,, ຍິງ 5 ຄົນ ມາຮອດປະຈຸບັນອັດຕາເຂົ້າຮຽນຊັ້ນອານຸບານປະຕິບັດໄດ້ 81,9 ເບີເຊັນ, ຊັ້ນປະຖົມປະຕິບັດໄດ້ 97,8 ເບີເຊັນ, ຊັ້ນມັດທະຍົມຕົ້ນປະຕິບັດໄດ້ 54,3 ເບີເຊັນ ແລະ ຊັນມັດທະຍົມປາຍປະຕິບັດໄດ້ 20,4 ເບີເຊັນ

ພ້ອມດຽວກັນນີ້ທ່ານລັດຖະມົນຕີກະຊວງສຶກສາທິການ ແລະ ກິລາ ກໍ່ໄດ້ເໜັ້ນໜັກໃຫ້ພະນັກງານຄູອາຈານທຸກຄົນ ຈົ່ງພ້ອມກັນສືບຕໍ່ປະຕິບັດໜ້າທີວຽກງານວິຊາສະເພາະຂອງຕົນໃຫ້ນັບມື້ນັບສູງຂື້ນໄປເລື້ອຍໆ ມີຄວາມຕັດສິນໃຈສູງຕໍ່ກັບຄວາມຫຍຸ້ງຍາກທຸກປະການ ເພື່ອຮັບປະກັນໃຫ້ວຽກງານການສຶກສາຢູ່ເມືອງໄຊສະຖານໃຫ້ໄດ້ຮັບການພັດທະນາກ້າວໄປຢ່າງບໍ່ຢຸດຢັ້ງ ໂອກາດລົງຢ້ຽມຢາມຄັ້ງນີ້ທ່ານລັດທະມົນຕີກະຊວງສຶກສາທິການ ແລະ ກິລາ ຍັງໄດ້ນຳເອົາປື້ມອ່ານ ແລະ ອຸປະກອນກິລາຈຳນວນໜຶ່ງມອບໃຫ້ຫ້ອງການສຶກສາທິການ ແລະ ກິລາເມືອງຕື່ມອີກ.
ຂ່າວ: News Xayaboury

ປີ 2018-2019 ເມືອງຕະໂອ້ຍ ຈະຢຸດຕິການຖາງປ່າເຮັດໄຮ່ໃຫ້ໄດ້ 4 ບ້ານ

ທ່ານ ບຸນເຮືອງ ວຽງມະນີ ຮອງເຈົ້າເມືອງໆຕະໂອ້ຍ ແຂວງສາລະວັນ ຜູ້ຊີ້ນຳວຽກງານເສດກິດສັງຄົມໄດ້ລາຍງານຕໍ່ກອງປະຊຸມໃຫຍ່ຄົບຄະນະບໍລິຫານງານພັກເມືອງເຄິ່ງສະໃໝຄັ້ງທີ 11 ໃນວັນທີ 7 – 9 ກຸມພາ 2017 ຢູທີ່ຫ້ອງປະຊຸມສະໂມສອນຂອງເມືອງ ວ່າ: ເມືອງຕະໂອ້ຍແມ່ນເມືອງໜຶ່ງທີ່ເປັນເມືອງພູດອຍຕັ້ງຢູ່ທທາງທິດຕະເວັນອອກສ່ຽງເໜືອຫ່າງຈາກເທດສະບານແຂວງ 75 Km ປະກອບມີ 5 ກຸ່ມບ້ານ, ມີ 56 ບ້ານ, ມີພົນລະເມືອງທັງໝົດ 33,279 ຄົນ, ຍິງ 16,703 ຄົນ, ມີ 4,601 ຫຼັງຄາເຮືອນ, ມີ 6,032 ຄອບຄົວ, ມີບ້ານພົ້ນທຸກ 26 ບ້ານ, ມີ 2,764 ຄອບຄົວ, ແລະ ບ້ານທຸກຍາກ 30 ບ້ານ, ມີ 3,268 ຄອບຄົວ.

ເມືອງຕະໂອ້ຍປະກອບມີ 4 ເຜົ່າຄື: ເຜົ່າລາວລຸ່ມ, ເຜົ່າຕະໂອ້ຍ, ເຜົ່າກະຕາງ ແລະ ເຜົ່າປະໂກະ ມີເນື້ອທີທັງໝົດ 208,515 ເຮັກຕາ, ເນື້ອທີ່ພູດ້ອຍກວມ 80% ແລະທົ່ງພຽງ 20%, ມີເນື້ອທີ່ປູກເຂົ້າ 3,798 ເຮັກຕາ, ຜົນຜະລິດ ເທົ່າກັບ 20,850 ໂຕນ, ໃນນັ້ນນາປີມີເນື້ອທີ 1,089 ເຮັກຕາ, ຜົນຜະລິດ 6.905 ໂຕນ, ມີ 537 ຄອບຄົວ, ນາແຊງ 140 ເຮັກຕາ, ມີຊົນລະປະທານ 38 ແຫ່ງໃຊ້ໄດ້ 36 ແຫ່ງ, ຜົນຜະລິດ 4,625 ໂຕນ, ມີ 279 ຄອບຄົວ, ເນື້ອທີ່ໄຮ່ມີ 2,569 ເຮັກຕາ, ຜົນຜະລິດ 9,318 ໂຕນ, ມີ 5.216 ຄອບຄົວ, ຄອບຄົວທີ່ມີເຂົ້າກຸ່ມກິນໝົດປີ 1,758 ຄອບຄົວ, ທົ່ວເມືອງມີໄຟຟ້າຊົມໃຊ້ທັງໝົດ 27 ບ້ານເທົ່າກັບ 40% ຂອງຈຳນວນບ້ານ, ມີ 1.708 ຫຼັງຄາເຮືອນ, ເທົ່າກັບ 37,12%, ໃນນັ້ນໄຟຟ້ານອກລະບົບມີ 6 ບ້ານເທົ່າກັບ 224 ຫຼັງຄາເຮືອນ.

ທິດທາງຕໍ່ໜ້າປີ 2018-2019 ສູ້ຊົນຜະລິດເຂົ້າໃຫ້ໄດ້ 2,837 ເຮັກຕາ, ຜົນຜະລິດ 15,670 ໂຕນ, ໃນນັ້ນນາປີ 1,152 ເຮັກຕາ, ຜົນຜະລິດ 7,372 ໂຕນ, ນາແຊງ 1,360 ເຮັກຕາ, ຜົນຜະລິດໃຫ້ໄດ້ 7,944 ໂຕນ ແລະເຂົ້າໄຮ່ໃຫ້ຫຼຸດລົງຈາກ 2,569 ເຮັກຕາເຫຼືອພຽງງ 325 ເຮັກຕາ, ຜົນຜະລິດເທົ່າກັບ 354 ໂຕນ.

ປະກາດຢຸດຕິການຖາງປ່າເຮັດໄຮ່ໃຫ້ໄດ້ 4 ບ້ານຄື: ບ້ານປະຈູກະປາ, ປະດຸ, ຫ້ວຍງົວ ແລະ ບ້ານທົ່ງຊ້ອຍ, ສະເພາະ 2018 ໃຫ້ໄດ້ 2 ບ້ານຄື: ບ້ານປະຈູກະປາ ແລະ ຫ້ວຍງົວ, ພ້ອມທັງສ້າງຕັ້ງກຸ່ມການຜະລິດຈັກສານໃຫ້ໄດ້ 1 ກຸ່ມບ້ານຄື: ບ້ານໂບງນ້ຳ, ລືມລາງຄວາມທຸກຍາກໃຫ້ໄດ້ 8 ບ້ານ, 573 ຄອບຄົວ, ໃຫ້ພົ້ນທຸກ 303 ຄອບຄົວ; ສ້າງບ້ານພັດທະນາໃຫ້ໄດ້ 10 ບ້ານ ແລະ ສ້າງບ້ານໃຫຍ່ໃຫ້ກາຍເປັນຕົວເມືອງໃຫ້ໄດ້ 2 ບ້ານ, ຕິດຕັ້ງໄຟຟ້າເຂົ້າບ້ານໃຫ້ໄດ້ 95% ແລະເຂົ້າເຮືອນໃຫ້ໄດ້ 80% ຂອງແຜນ 5 ປີ, ສະເພາະປີ 2018 ເຂົ້າບ້ານໃຫ້ໄດ້ 70% ແລະ ເຂົ້າເຮືອນ 60% ຂອງແຜນ 5 ປີ, 2018-2019 ສຸ້ຊົນກໍ່ສ້າງທາງໃຫ້ໄດ້ 3 ເສັ້ນ, ມີຄວາມຍາວ 36 km ໃຫ້ສຳເລັດ, ພ້ອມທັງປະກາດ 2 ບ້ານເປັນບ້ານພັດທະນາຄື: ບ້ານໂບງນ້ຳ ແລະ ບ້ານປະຈຸດອນໃຫ້ສຳເລັດໃນປີ 2018.

ພາບ-ຂ່າວ ສິດຕາ ເພັດວົງສາ

ແຂວງບໍ່ແກ້ວ ແກ້ໄຂລົດນໍາເຂົ້າບໍ່ຖືກຕ້ອງໄດ້ 2 ພັນກວ່າຄັນ

ອີງຕາມການເປີດເຜີຍຂອງທ່ານ ສັນສຸສິນ ວົງສາທອນ ຮອງຫົວໜ້າກອງຄຸ້ມຄອງພາສີ I ແຂວງບໍ່ແກ້ວ-ແຂວງຫລວງນ້ຳທາ (ປະຈຳແຂວງບໍ່ແກ້ວ) ວ່າ: ໃນ 1 ປີຜ່ານມາ (ປີ 2017) ກອງກວດກາພາສີປະຈຳແຂວງບໍ່ແກ້ວ ກວດເຫັນການລະເມີດກົດໝາຍພາສີເກີດຂຶ້ນທັງໝົດ 2,157 ຄະດີ.


ໃນນັ້ນ ຄະດີຈັບກຸມ 143 ຄະດີ, ຄະດີແກ້ໄຂພາຫະນະບໍ່ຖືກຕ້ອງ 2,014 ຄະດີ ແລະ ຄ່າປັບໃໝ່ອື່ນໆ, ສາມາດຈັດເກັບລາຍຮັບເຂົ້າງົບປະມານແຫ່ງລັດໄດ້ທັງໝົດ 20.4 ຕື້ກວ່າກີບຖ້າທຽບໃສ່ແຜນການປີ (2.5 ຕື້ກີບ) ລື່ນແຜນການປີ 717.37%, ສົມທຽບໃສ່ໄລຍະດຽວກັນຂອງປີຜ່ານມາເທົ່າກັບ 714.54% ສາເຫດທີ່ພາໃຫ້ການຈັດເກັບລາຍຮັບຂອງກອງກວດກາພາສີ ປະຈຳແຂວງບໍ່ແກ້ວ ເກີນແຜນການປີຍ້ອນໄດ້ຮັບການແກ້ໄຂພະຫະນະລົດບໍ່ຖືກຕ້ອງຈຳນວນ 2,014 ຄະດີ ສາມາດເກັບເກັບລາຍຮັບໄດ້ທັງໝົດເກືອບ 16 ຕື້ກວ່າກີບ.


ທ່ານ ສັນສຸສິນ ວົງສາທອນ ຮອງຫົວໜ້າກອງຄຸ້ມຄອງພາສີ I ເນັ້ນຕື່ມອີກວ່າ: ສາເຫດທີ່ພາໃຫ້ກອງກວດກາສີພາສີ ປະຈຳແຂວງບໍ່ແກ້ວ ເກັບລາຍຮັບເກີນແຜນ ກໍ່ຍ້ອນໄດ້ຮັບການຊີ້ນຳ ແລະ ການຕິດຕາມຢ່າງໃກ້ຊິດຈາກກົມພາສີ, ມີການປະສານສົມທົບກັບບັນດາຂະແໜງການຕ່າງໆ, ເອົາໃຈໃສ່ສຶກສາອົບຮົມວຽກງານແນວຄິດການເມືອງເປັນບັນຫາສໍາຄັນ, ມີການກວດກາ, ມີການແບ່ງຄວາມຮັບຜິດຊອບໃນການເວນຍາມຕ້ານການເຄືອນໄຫວສະກັດກັ້ນຕາມຈຸດຕ່າງໆທີ່ີມີຄວາມສຽງໃນການລັກລອບສິນຄ້າ, ມີການແຕ່ງຕັ້ງໜ່ວຍສະເພາະກິດ ແລະ ບັນ ຫາອື່ນໆໄປພ້ອມກັນຈຶ່ງເຮັດໃຫ້ການຈັດເກັບລາຍຮັບບັນລຸຕາມແຜນການທີ່ວາງໄວ້ ແລະ ລື່ນຄາດໝາຍ.

ຂ່າວ: ກະຊວງການເງິນ

ບຸນເຕດ ຊົນເຜົ່າງວນເມືອງບົວລະພາ

ປະເທດເຮົາມີ 49 ຊົນເຜົ່າທີ່ມີຮີດຄອງປະເພນີທີ່ເປັນເອກະລັກຂອງຕົນ ຊົນເຜົ່າງວນເປັນຊົນເຜົ່າໜຶ່ງທີ່ນອນໃນ 6 ຊົນເຜົ່າຂອງເມືອງບົວລະພາ ແຂວງຄຳມ່ວນ ເຊິ່ງມີຕົ້ນກຳເນີດມາຈາກພາກກາງຂອງ ສສ ຫວຽດນາມ ເປັນຕົ້ນແມ່ນ ເຂດແຂວງກວາງບີ່ງ ແລະ ຢູ່ລຽບຕາມບັນດາເມືອງ ທີ່ຕິດກັບຊາຍແດນລາວ- ຫວຽດ ຄື ເມືອງມີງຮົວ, ເມືອງໂບແຕ໋ກ ແຂວງກວາງບີງ ສສ ຫວຽດນາມ ແລະ ໄດ້ຍົກຍ້າຍທີ່ຢູ່ອາໄສ ນັບຕັ້ງແຕ່ຕົ້ນສັດຕະວັດທີ 19 ໂດຍ ທ່ານ ດີງວັນມຽນ ເປັນຜູ້ນຳພາມາຢູ່ຫລາຍເຂດພາກກາງຂອງລາວ ເປັນຕົ້ນແມ່ນ ແຂວງຄຳມ່ວນ ແລະ ແຂວງສະຫວັນນະເຂດ ເຊິ່ງເມືອງບົວລະພາ ກໍ່ເປັນອີກເມືອງໜຶ່ງທີ່ມີຊົນ ເຜົ່າງວນ ອາໄສຢູ່ໃນຫລາຍໆບ້ານເປັນຕົ້ນແມ່ນບ້ານປາກພະນັງ, ບ້ານກວນຂະໂຍມ ແລະ ບ້ານອື່ນໆໃນທົ່ວເມືອງ.
ຊົນເຜົ່ານີ້ຈະມີການສະຫຼອງປີໃໝ່ບຸນເຕດຄ້າຍຄືກັນກັບຊາວຫວຽດນາມ ແລະ ກໍ່ເປັນຮີດຄອງປະເພນີອັນສຳຄັນຂອງຊົນເຜົ່າງວນ ເຊີ່ງຈະໄດ້ຈັດຂຶ້ນໃນມື້ຂຶ້ນ 1 ຄ່ຳ ເດືອນ 1 ຫວຽດ, ກົງກັບ ຂຶ້ນ 2 ຄ່ຳ ເດືອນ 4 ລາວ ພິທີດັ່ງກ່າວຈະໄດ້ມີການເຕົ້າໂຮມຍາດພີ່ນ້ອງ, ເພື່ອນມິດສະຫາຍທັງຢູ່ໃກ້ ແລະ ໄກ ມາພົບປະສ້າງສັນຮ່ວມກັນໄວ້ອາໄລເຖິງດວງວິນຍານຂອງເຈົ້າກົກ, ເຈົ້າເຫລົ່າ ຫລື ບັນພະບຸລຸດ ຂອງຊົນເຜົ່າ ຫລັງຈາກນັ້ນກໍ່ໄດ້ຮ່ວມກັນກີນ, ຮ່ວມກັນດື່ມຢ່າງມ່ວນຊື່ນ ພ້ອມທັງຖວາຍເຂົ້າປາ, ອາຫານ, ເຂົ້າຕົ້ມ,ເຂົ້າໝົມ ແລະ ໝາກໄມ້ ໃຫ້ປູ່ຍ່າຕາຍາຍ, ພໍ່ແມ່ ຜູ້ທີ່ໄດ້ລ່ວງລັບໄປນັ້ນ ພາຍໃນ 3 ວັນ.
ໃນບຸນເຕດໃຫຍ່ນີ້ ແມ່ນເລີ່ມແຕ່ ເວລາ 12 ໂມງກາງຄືນ ໃນມື້ອອກໃໝ່ 1 ຄ່ຳ ເດືອນ 4 ຈົນເຖິງ 07:00 ໂມງ ຕອນເຊົ້າ ໃນຕອນນີ້ຈື່ງຖືວ່າເປັນປີໃໝ່ ຈະບໍ່ໃຫ້ບຸກຄົນອື່ນເຂົ້າເຮືອນ ເວັ້ນເສຍແຕ່ເປັນຜູ້ທີ່ໄດ້ຮັບການເຊີນຈາກເຈົ້າຂອງເຮືອນເສຍກ່ອນ ແລະ ສ່ວນຫລາຍແມ່ນຜູ້ທີ່ເຖົ້າແກ່ມີບົດບາດ, ມີຖານະຮັ່ງມີມີອິດທີພົນໃນສັງຄົມ ຂຶ້ນຢ້ຽມເຮືອນເພື່ອອວຍພອນໃຫ້ຄູ່ຜົວ-ເມຍ ພ້ອມດ້ວຍຄອບຄົວຢູ່ດີມີແຮງມີໂຊກ, ມີໄຊຕະຫລອດໄປ. ມື້ໜ້າມີໂອກາດຢ່າພາດໄປສຶກສາວັດທະນະທຳຊົນເຜົ່າພື້ນເມືອງລາວ ເຊື່ອວ່າຍັງມີອີກຫຼາຍເຜົ່າທີ່ບໍ່ທັນໄດ້ຮັບການເປີດເຜີຍບ່ອນໃດມາກ່ອນ. ດີແທ້ປີນີ້ເວລາດີທີ່ສຸດເປັນປີທ່ອງທ່ຽວລາວຫຼາຍເຂດແຂວງຈະຈັດງານໃຫຍ່ພິເສດດຶງດູດເພື່ອຕ້ອງການໃຫ້ແຂກໄດ້ມາຢ້ຽມຢາມ.

ວຽງພູຄາທຳລາຍສວນຝິ່ນ 70 ກວ່າເຮັກຕາ

ເພື່ອປະຕິບັດຄຳສັ່ງຂອງທ່ານ ເຈົ້າແຂວງໆຫຼວງນໍ້າທາ ວ່າດ້ວຍການກວດກາ, ຄວບຄຸມ ແລະສະກັດກັ້ນການລັກລອບປູກຝີ່ນພາຍໃນແຂວງຫຼວງນໍ້າທາ, ທ່ານເຈົ້າເມືອງວຽງພູຄາ ແຂວງຫຼວງນ້ຳທາ ໄດ້ອອກຂໍ້ຕົກລົງສະບັບເລກທີ 40/ຈມ, ລົງວັນທີ 5 ກຸມພາ 2018 ວ່າດ້ວຍການແຕ່ງຕັ້ງພະນັກງານລົງກວດກາ ແລະ ທຳລາຍສວນຝີ່ນປີ 2018. ສະນັ້ນໃນລະຫວ່າງວັນທີ 6 – 9 ກຸມພາ 2018 ທາງກອງບັນຊາການ ປກສ ເມືອງວຽງພູຄາ ໄດ້ລົງສົມທົບກັບອົງການຈັດຕັ້ງທຸກພາກສ່ວນ, ອຳນາດການປົກຄອງຂອງບ້ານ ໄດ້ລົງຈັດຕັ້ງ ແລະ ທຳລາຍສ່ວນຝີ່ນທີ່ປະຊາຊົນລັກລອບປູກຢູ່ຂອບເຂດເມືອງວຽງພູຄາແຂວງຫຼວງນ້ຳທາ ຈຳນວນ 76, 65 ເຮັກຕາ.
ໂດຍການເຂົ້າຮ່ວມຂອງ ພັທ ແອ່ ພີມມະວົງ ຄະນະພັກ ຮອງກອງບັນຊາການ ປກສ ເມືອງວຽງພູຄາ, ພັທ ອາລຸນຍະເດດ ບົວສີສະຫວັດ ຫົວໜ້າພະແນກກວດກາ ແລະຄວບຄຸມຢາເສບຕິດ ປກສ ແຂວງ, ມີຄະນະກອງບັນຊາການທະຫານເມືອງ, ກອງພັນ 418 ພະແນກກະສິກຳ ແລະ ປ່າໄມ້ເມືອງ, ອຳນາດການປົກຄອງຂອງບ້ານ, ນາຍບ້ານ, ກອງຫຼອນບ້ານ, ພະນັກງານສອງກຳລັງ ປກຊ – ປກສ ພ້ອມດ້ວຍຊາວໜຸ່ມ 3 ບ້ານເຂົ້າຮ່ວມ ທຳລາຍສວນຝິ່ນຈຳນວນດັ່ງກ່າວ.


ສຳລັບການຈັດຕັ້ງລົງປະຕິບັດໜ້າທີທຳລາຍສ່ວນຝີ່ນຄັ້ງນີ້, ມີຢູ່ 3 ບ້ານ, ມີບ້ານ ຫ້ວຍຫົກ, ບ້ານ ນໍ້າຫວາງ ແລະ ບ້ານ ນໍ້າໂລະ , ຜ່ານການຈັດຕັ້ງປະຕິບັດໃນການທຳລາຍສ່ວນຝີ່ນທີ່ປະຊາຊົນລັກລອບປູກໃນຄັ້ງນີ້ສາມາດທຳລາຍສວນຝີ່ນ ເຂດບ້ານ ຫ້ວຍຫົກມີສວນຝີ່ນທີ່ປະຊາຊົນລັກລອບປູກຈຳນວນ 19 ຈຸດ ມີເນື້ອທີ່ 42 ເຮັກຕາ, ເປົ້າໝາຍລັກລອບປູກຝີ່ນຈຳນວນ 32 ຄອບຄົວ, ເຂດບ້ານ ນໍ້າຫວາງມີສວນຝີ່ນຈຳນວນ 5 ຈຸດ, ມີເນື້ອທີ 33,7 ເຮັກຕາ, ເປົ້າໝາຍລັກລອບປູກຈຳນວນ 42 ຄອບຄົວ, ເຂດບ້ານ ນໍ້າໂລະ ມີສວນຝີ່ນຈຳນວນ 6 ຈຸດ, ມີເນື້ອທີ່ 9.500 ຕາແມັດ ເປົ້າຫມາຍລັກລອບປູກຝີ່ນຈຳນວນ 8 ຄອບຄົວ.
ສວນຝີ່ນທີ່ໄດ້ທຳລາຍຖີ້ມທັງໝົດໃນຂອບເຂດເມືອງ ວຽງພູຄາ ໃນຄັ້ງນິ້ມີຈຳນວນ 30 ຈຸດ, ມີເນື້ອທີ່ 76,65 ເຮັກຕາ, ຕໍ່ກັບບັນຫາດັ່ງກ່າວ, ໄລຍະຜ່ານມາພັກ – ລັດຖະບານໄດ້ໃຫ້ຄວາມສຳຄັນ ແລະ ຍົກສູງຕໍ່ການລົບລ້າງການປູກຝີ່ນມາຕະຫຼອດຢູ່ບັັນດາຂອບເຂດໃນທົ່ວປະເທດ, ໂດຍໄດ້ສົ່ງເສີມປະຊາຊົນບັນດາເຜົ່າຫັນຈາກການປູກຝິ່ນມາທຳການຜະລິດປູກຝັງ ແລະ ລ້ຽງສັດ, ທີ່ສາມາດສ້າງລາຍຮັບໃຫ້ແກ່ຄອບ
ຄົວ,ຖືກຕ້ອງຕາມລະບຽບກົດໝາຍ ແລະ ເພື່ອພັດທະນາຊີວິດການເປັນຢູ່ໃຫ້ນັບມື້ດີຂື້ນເລື້ອຍໆ.

ຂ່າວ: ຫລວງນໍ້າທາ

 ທ່ານຮອງນາຍົກເນັ້ນ ໃຫ້ສາລະວັນ ເພີ່ມຄວາມເຂັ້ມງວດຖານລາຍຮັບ ແລະ ຄຸ້ມຄອງລາຍຈ່າຍ

ທ່ານ ອປ. ບຸນທອງ ຈິດມະນີ ຮອງນາຍົກລັດຖະມົນຕີ, ປະທານກວດກາສູນກາງພັກ, ປະທານອົງການລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງ ແຫ່ງ ສປປ ລາວ ພ້ອມດ້ວຍຄະນະລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງວາປີ ແຂວງສາລະວັນ ໂດຍໃຫ້ກຽດຕ້ອນຮັບຂອງ ທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ ພ້ອມດ້ວຍຄະນະນຳຂັ້ນແຂວງ ແລະ ຂັ້ນເມືອງ ເຂົ້າຮ່ວມຕ້ອນຮັບຢ່າງອົບອຸ່ນ ໂອກາດດັ່ງກ່າວທ່ານໄດ້ໂອ້ລົມເນັ້ນຫຼາຍບັນຫາຕໍ່ພະນັກງານການນໍາຂອງແຂວງ.


ໃນການໂອ້ລົມຕໍ່ພະນັກງານຢູ່ແຂວງສາລະວັນ ຄັ້ງນີ້ທ່ານໄດ້ກ່າວເນັ້ນການກວດກາຄືນຖານລາຍຮັບ ພ້ອມທັງຄຸ້ມຄອງລາຍຈ່າຍໃຫ້ຖືກຕ້ອງ, ເອົາໃຈໃສ່ໃນການລົງທຶນການປູກ, ການລ້ຽງ ໂດຍສະເພາະແມ່ນ 3 ເມືອງພູດອຍຂອງແຂວງ ເຊັ່ນ: ເມືອງຕະໂອ້ຍ, ສະໝ້ວຍ ແລະ ເມືອງຕຸ້ມລານ ໃຫ້ປະຊາຊົນມີລາຍຮັບເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ເອົາໃຈໃສ່ໃນການກໍ່ສ້າງພື້ນຖານໂຄງລ່າງໃຫ້ມີຄວາມສະດວກສະບາຍ, ເຮັດຢ່າງມີຈຸດສຸມ ແລະ ເປັນເຈົ້າການ, ມີຄວາມຮັບຜິດຊອບທາງດ້ານການເມືອງ; ວຽກງານປ້ອງກັນຊາດ – ປ້ອງກັນຄວາມສະຫງົບຕ້ອງໜັກແໜ້ນເຂັ້ມແຂງຕອບຕ້ານກັບກຸ່ມຄົນ ແລະ ບຸກຄົນບໍ່ດີທຸກຮູບແບບ, ສືບຕໍ່ຫັນລົງກໍ່ສ້າງຮາກຖານໃນແຕ່ລະຈຸດສຸມ, ສ້າງຍຸດທະສາດບ້ານສູ້ຮົບຕິດລ່ຽງ ແລະ ຍຸດທະສາດແນວຫຼັງ ເປັນຕົ້ນແມ່ນເຂດຊາຍແດນເພື່ອແກ້ໄຂບັນຫາຕ່າງໆ ພ້ອມທັງສ້າງ – ປັບປຸງອົງການຈັດຕັ້ງກຳລັງໃນແຕ່ລະຂັ້ນ ແລະ ສຶກສາອົບຮົມການເມືອງແນວຄິດ, ແບ່ງຂັ້ນຄຸ້ມຄອງໃຫ້ຖືກຕ້ອງ ແລະ ເອົາໃຈໃສ່ໃນການກວດກາຕ້ານການສໍ້ລາດບັງຫຼວງໃຫ້ໝົດໄປ.
ພິທີພົບປະໄດ້ຈັດຂຶ້ນໃນວັນທີ 13 ກຸມພາ 2018 ທີ່ສະໂມສອນຂອງແຂວງສາລະວັນ ພາຍໃຕ້ການເຂົ້າຮ່ວມຮັບຟັງຂອງ ທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ, ມີຄະນະປະຈຳພັກແຂວງ, ກຳມະການພັກແຂວງ, ເຈົ້າເມືອງໃນ 8 ຕົວເມືອງເຂົ້າຮ່ວມ.
ການລົງເຄື່ອນໄຫວຄັ້ງນີ້ທ່ານຍັງໄດ້ລົງຢ້ຽມຢາມຫຼາຍບ່ອນ ແລະ ໄດ້ມອບອຸປະກອນ ພ້ອມດ້ວຍເຄື່ອງຊ່ວຍເຫຼືອຈໍານວນໜຶ່ງ.
: © ShareKao

ແຂວງວຽງຈັນ ອະນຸຍາດໃຫ້ ບໍລິສັດອີຈິນວິສາວະກຳກໍ່ສ້າງລາວ ລົງທຶນ 200ລ້ານໂດລາເນລະມິດເດີ່ນບິນເກົ່າວັງວຽງໃຫ້ການເປັນແຫຼ່ງທ່ອງທ່ຽວ ຄາດພ້ອມລົງມືກໍ່ສ້າງໄວໆນີ້

ໃນວັນທີ13ກຸມພານີ້ທີ່ພະແນກແຜນການ-ການລົງທຶນແຂວງວຽງຈັນ ໄດ້ມີພິທີເຊັນສັນຍາເພື່ອພັດທະນາເດີ່ນບິນເກົ່າເມືອງວັງວຽງໃຫ້ກາຍເປັນແຫຼ່ງທ່ອງທ່ຽວໄດ້ມີຂຶ້ນລະຫວ່າງທ່ານຫຼິວຟຸກວາງປະທານບໍລິສັດອີຈິນວິສາວະກຳກໍ່ສ້າງລາວຈຳກັດໃນນາມຜູ້ລົງທຶນກັບທ່ານສຸກັນວິໄລຣັດຫົວໜ້າພະແນກແຜນການ-ການລົງທຶນແຂວງວຽງຈັນໂດຍຊ້ອງໜ້າທ່ານ ວິດົງ ໄຊຍະສອນເຈົ້າແຂວງໆວຽງຈັນ.

ທ່ານ ຫຼິວ ຟຸກວາງປະທານບໍລິສັດປະທານບໍລິລັດອີຈິນວິສາວະກຳກໍ່ສ້າງລາວຈຳກັດໃຫ້ສຳພາດຕໍ່ຜູ້ສື່ຂ່າວວ່າ:ຫຼັງຈາກການເຊັນສັນຍາຄັ້ງນີ້ແລ້ວຕົນເອງຈະໄດ້ວ່າຈ້າງບໍລິສັດທີ່ມີຄວາມສາມາດມາອອກແບບລາຍລະອຽດໃນບັນດາກິດຈະກຳຂອງໂຄງການຄື:ກໍ່ສ້າງໂຮງແຮມ5ດາວ,ໂຮງໝໍ,ໂຮງຮຽນທ່ອງທ່ຽວ,ຫໍສະແດງວັດທະນະທຳປະເພນີຊົນເຜົ່າລາວເພື່ອເກັບປີ້ນັກທ່ອງທ່ຽວເຂົ້າຊົມ.

ທ່ານກ່າວຕໍ່ອີກວ່າໂຄງການນີ້ຖືກຈັດຕັ້ງປະຕິບັດຢູ່ເດີ່ນບິນເກົ່າເມືອງວັງວຽງໃນເນື້ອທີ່16,24ເຮັກຕາໄລຍະການກໍ່ສ້າງ5ປີແລະໄລຍະສຳປະທານ50ປີມູນຄ່າການລົງທຶນທັງໝົດ200ລ້ານໂດລາ.

ທ່ານຫຼິວ ຟຸກວາງ ກ່າວຕື່ມ:ສາເຫດທີ່ຕົນເອງເຂົ້າມາລົງທຶນໃນໂຄງການນີ້ຍ້ອນເບິ່ງເຫັນທ່າແຮງຂອງດ້ານການທ່ອງທ່ຽວເຊິ່ງທ່ານເບິ່ງເຫັນວ່າປະເທດລາວມີທ່າແຮງເຊິ່ງເປັນປະເທດທີ່ເປັນຈຸດເຊື່ອມຈອດລະຫວ່າງຈີນແລະອາຊຽນເປັນປະເທດທີ່ນອນໃນໜຶ່ງແລວທາງໜຶ່ງເສັ້ນທາງຂອງຈີນແລະຢູ່ເມືອງວັງວຽງກໍ່ມີສະຖານນີລົດໄຟລາວ-ຈີນຕັ້ງຢູ່ເຊິ່ງຫາກທາງລົດໄຟລາວ-ຈີນສຳເລັດນັກທ່ອງທ່ຽວຊາວຈີນຈະເຂົ້າມາທ່ຽວຊົມເມືອງລາວເວົ້າສະເພາະກໍ່ຄືວັງວຽງຫຼາຍຂຶ້ນແລະສະຖານທີ່ແຫຼ່ງທ່ອງທ່ຽວທີ່ຕົນລົງມືພັດທະນານີ້ຈະເປັນບ່ອນດຶງດູດໃຫ້ນັກທ່ອງທ່ຽວເຂົ້າມາພັກເຊົາແລະເຮັດກິດຈະກຳຕ່າງໆຢູ່ເມືອງວັງວຽງຫຼາຍຂຶ້ນ.

ຂ່າວ: ແຂວງວຽງຈັນ