ຮອງ ລມຕ ກະຊວງ ປກສ ພົບປະຢ້ຽມຢາມ ພະນັກງານ-ນັກຮົບ ໂຮງໝໍປກສ ແຂວງຫຼວງນໍ້າທາ

ພົຕ ປອ ສົມຫວັງ ທຳມະສິດ ຮອງລັດຖະມົນຕີກະຊວງ ປກສ ໄດ້ເຄື່ອນໄຫວ ພົບປະຢ້ຽມຢາມ ພະນັກງານ-ນັກຮົບ ໂຮງໝໍກອງບັນຊາການ ປກສ ແຂວງຫຼວງນໍ້າທາ ໃນອາທິດທີ່ຜ່ານມາ, ຕ້ອນຮັບໂດຍ ພັຕ ສຸລິມ້າວ ພູມໄຄ ຄະນະອຳນວຍການໂຮງໝໍກອງບັນຊາການ ປກສ ແຂວງຫຼວງນໍ້າທາ ພ້ອມດ້ວຍຄະນະ ແລະ ພະນັກງານ-ນັກຮົບ ການລົງພົບປະຢ້ຽມຢາມຂອງຮອງລັດຖະມົນຕີຄັ້ງນີ້.


ພັຕ ສຸລິມ້າວ ພູມໄຄ ໄດ້ລາຍງານກ່ຽວກັບສະພາບທີ່ຕັ້ງ, ຈຸດພິເສດ ແລະ ການກໍ່ສ້າງໂຮງໝໍ ປກສ ແຂວງຫຼວງນ້ຳທາ ໃຊ້ງົບປະມານໃນການກໍ່ສ້າງ 7.633.546.000 ກີບ. ໃນນີ້, ໄດ້ຮັບການຊ່ວຍເຫຼືອຈາກແຂວງຟູເຖາະ ສສ ຫວຽດນາມ 3.074.000.000 ກີບ, ທຶນສົມທົບຈາກກະຊວງ 3.929.546.000 ກິບ, ໄດ້ເລີ່ມກໍ່ສ້າງໃນວັນ ທີ 7 ມີນາ 2013 ຫາ 20 ຕຸລາ 2015 ສຳເລັດ ແລະ ເປີດໃຊ້ບໍລິການ ໃນວັນທີ 30 ຕຸລາ 2015. ມີພະນັກງານ ປະຈຳລວມທັງໝົດ 42 ສະຫາຍ ຍິງ 21 ສະຫາຍ, ປະກອບມີ 9 ໜ່ວຍງານ, ໜ່ວຍງານບໍລິຫານການ ແພດ, ໜ່ວຍງານການຢາ, ໜ່ວຍງານວິເຄາະ-ເອໂກ-ລັງສີ, ໜ່ວຍງານກວດເຂດນອກ, ໜ່ວຍງານພາຍໃນ, ໜ່ວຍງານພາຍນອກ, ໜ່ວຍງານປະສູດ-ພະຍາດຍິງ, ໜ່ວຍງານສຸກເສີນ-ມໍລະສຸມ ແລະ ໜ່ວຍງານທັນຕະ ແພດ. ໃນ 1 ປີຜ່ານມາ, ມີຄົນເຈັບມາໃຊ້ບໍລິການທັງໝົດ 4.004 ຄົນ, ຄົນເຈັບທີ່ມາຮັບໃຊ້ບໍລິການສ່ວນຫຼາຍ ແມ່ນພໍ່-ແມ່ປະຊາຊົນກວມ 85%.


ໂອກາດດຽວກັນນັ້ນ, ພົຕ ສົມ ຫວັງ ທຳມະສິດ ກໍໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ທາງໂຮງ ໝໍຍາດມາໄດ້ໃນໄລຍະຜ່ານມາ. ພ້ອມທັງເນັ້ນໜັກໃຫ້ແຕ່ລະສະຫາຍສືບຕໍ່ເພີ່ມທະວີຄວາມສາມັກຄີພາຍໃນ ແລະ ພາຍນອກໃຫ້ເປັນປຶກແຜນ, ມີຄວາມເຂັ້ມແຂງຮອບດ້ານ, ຕ້ອງເອົາໃຈໃສ່ກໍ່ສ້າງ ແລະ ປັບປຸງພະນັກ
ງານ-ນັກຮົບໃນກໍາລັງປ້ອງກັນຄວາມສະຫງົບໃຫ້ມີແບບແຜນ, ມີຄວາມເປັນເອກະພາບ, ພ້ອມຍົກສູງລະດັບ
ຄວາມຮູ້ຄວາມສາມາດ ແລະ ປະສົບການໃຫ້ພະນັກງານ-ນັກຮົບພາຍໃນໂຮງໝໍ ປກສ ເປັນຕົ້ນແມ່ນຄວາມຮູ້, ຄວາມສາມາດທາງດ້ານວິທະຍາສາດ-ເຕັກໂນໂລຊີການແພດທີ່ທັນສະໄໝ.

ນອກນັ້ນ, ໃນເວລາດຽວກັນ ພົຕ ປອ ສົມຫວັງ ທຳມະສິດ ຍັງໄດ້ໄປພົບປະຢ້ຽມຢາມພະນັກງານ-ນັກຮົບ ຄ້າຍຄຸມຂັງ-ດັດສ້າງ ພ້ອມທັງໄດ້ຮັບຟັງການລາຍງານສະພາບໂດຍຫຍໍ້ຈາກສະຫາຍ ພັທ ຫຸ່ມພັນ ເຮື່ອງວົງສາ ຫົວ ໜ້າຄ້າຍຄຸມຂັງ-ດັດສ້າງ ແລະ ໄດ້ທ່ຽວຊົມເຂດຜະລິດ, ຫັດຖະກຳຈັກສານຂອງນັກໂທດຕື່ມອີກ.

ຂອບໃຈພາບ-ຂ່າວຈາກ: ໜັງສືພິມຄວາມສະຫງົບ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *