ໄປຊ໊ອດປາ ແຕ່ຖືກໄຟຟ້າຊ໊ອດເສຍຊີວິດຄາທີ່

ບັນຫາການລັກລອບລ່າສັດນ້ຳ-ສັດປ່າ ແບບດັບສູນແມ່ນປະກົດການຫຍໍ້ທໍ້ໜື່ງ ທາງສັງຄົມ ໄລຍະຜ່ານມາ ພັກ ແລະ ລັດຖະບານແຫ່ງ ສປປລາວ ໄດ້ເອົາໃຈໃສ່ໃນການຕ້ານ ແລະສະກັດກັ້ນ ການລັກລອບລ່າສັດນ້ຳ, ສັດປ່າ ແບບ ສູນພັນ ແລະ ໂຄສະນາປຸກລະດົມ ໃຫ້ອານຸລັກ ສັດນ້ຳ, ສັດປ່າ ທີ່ໃກ້ຈະສູນພັນ. ແຕ່ຍັງມີກຸ່ມຄົນບໍ່ດີຈຳນວນໜື່ງ ໄດ້ຝາຝືນຕໍ່ລະບຽບກົດໝາຍໂດຍລັກລອບຫາປາໃນການນຳໃຊ້ໝໍ້ໄຟຟ້າຊ໊ອດ ແມ່ນເປັນການເຄື່ອນໄຫວທີ່ຜິດຕໍ່ລະບຽບກົດໝາຍ ເປັນການລ່າສັດແບບດັບສູນ.

ແຕ່ໂຊກບໍ່ເຂົ້າຂ້າງ ຈື່ງເກີດເຫດທີ່ບໍ່ຄາດຝັນ ຂື້ນທີບ້ານປາກນ້ຳຫຼ້າ ເມືອງຫຼວງນ້ຳທາ ແຂວງຫຼວງນ້ຳທາຕາມການໃຫ້ຂໍ້ມູນຂອງປະຊາຊົນບ້ານ ປາກນ້ຳຫຼ້າ ເມືອງຫຼວງນ້ຳທາ ແຂວງຫຼວງນ້ຳທາ ໃຫ້ຮູ້ວ່າ: ໃນເວລາ ປະມານ 12 ໂມງ 10 ນາທີ ຂອງວັນທີ 13 ກໍລະກົດ 2019 ມີເຫດການໄຟຟ້າຊ໊ອດເສຍຊີວິດ 01 ຄົນຢູ່ຫ້ວຍນ້ຳຫຼ້າ. ນາງ ຊົງ ອາຍຸ 26 ປີ ເມຍຂອງທ້າວ ຈົວ ຜູ້ເສຍຊີວິດ ໃຫ້ຮູ້ວ່າ: ກ່ອນເກີດເຫດໃນຕອນເຊົ້າຂອງວັນທີ 13 ກໍລະກົດ 2019 ຕົນເອງ ແລະທ້າວ ຈົວ (ຜູ້ເປັນຜົວ) ອາຍຸ 33 ປີ, ພ້ອມກັບລູກນ້ອຍ 2 ຄົນ. ໄດ້ໄປສ່ວນຢາງພະລາ ຢູ່ເຂດຫ້ວຍນ້ຳຫຼ້າ. ພໍມາຮອດເວລາ 12 ໂມງ ຜູ້ເປັນຜົວໄດ້ພາລູກນ້ອຍທັງສອງໄປຫາປາຢູ່ແຄມຫ້ວຍ ໂດຍການນຳເອົາໝໍ້ໄຟຟ້າໄປຊ໊ອດ ແຕ່ໄຟຟ້າໄດ້ຊ໊ອດໃສ່ຜູ້ກ່ຽວເສຍຊີວິດຄາທີ່.

ພາຍຫຼັງເກີດເຫດນາງ ຊົງ ຜູ່ເປັນເມຍ ກໍ່ໄດ້ໂທລະສັບໃຫ້ອ້າຍນ້ອງ ທະຫານແຂວງ ກອງຮ້ອຍ 26 ມາຊ່ວຍເອົາສົບຂອງທ້າວຈົວ ຜູ້ເປັນຜົວ ມາບ້ານ ເພື່ອຈັດພິທີສົ່ງສະການຕາມຮີດຄອງປະເພນີຕໍ່ເຫດການດັ່ງກ່າວຈື່ງຢາກຮຽກຮ້ອງ ເຖີງພະນັກງານ, ທະຫານ, ຕຳຫຼວດ ຕະຫຼອດຮອດ ພໍ່ແມ່ປະຊາຊົນ ຈົ່ງມີສະຕິໃນການນຳໃຊ້ເຄື່ອງໄຟຟ້າທຸກຊະນິດ. ການຫາປາໃນການນຳໃຊ້ໝໍ້ໄຟຟ້າຊ໊ອດ ແມ່ນເປັນການເຄື່ອນໄຫວທີ່ຜິດຕໍ່ລະບຽບກົດໝາຍ ເປັນການລ່າສັດແບບດັບສູນ. ສະນັ້ນ, ທຸກຄົນຈົ່ງເປັນເຈົ້າການໃນການປົກປັກຮັກສາສັດນ້ຳ, ສັດປ່າ ທີ່ຫ່ວງຫ້າມ ລວມທັງຊີວະນາໆ ພັນທາງທຳມະຊາດ ໃຫ້ຄູ່ກັບຄົນເຮົາຕະຫຼອດໄປຖ້າຫາກພົບເຫັນບຸກຄົນ ຫຼື ກຸ່ມຄົນໃດໜື່ງຝ່າຝືນ ຕ້ອງລາຍງານຕໍ່ເຈົ້າໜ້າທີ່ກ່ຽວຂ້ອງ ເພື່ອນຳຕົວມາດຳເນີນຄະດີຕາມລະບຽບກົດໝາຍ.
ຂ່າວ: ກອນຄຳ ແສນຫຼວງລາດ

 

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *