ແຟນສາວບອກເລີກ ແລະ ຕີໂຕອອກຫ່າງ ແຕ່ຝ່າຍຊາຍບໍ່ຍອມເຊົາ ຈຶ່ງເປັນເຫດໃຫ້ເອົາປືນຍິງແຟນສາວ ແລ້ວຍິງຕົວເອງຕາຍຕາມ

ໃນວັນທີ 29 ກໍລະກົດ 2019 ທີ່ຜ່ານມາຖືໄດ້ວ່າ ເປັນກະແສຂ່າວທີ່ມາແຮງ ໃນປັດຈຸບັນ ກ່ຽວກັບເຫດການ ຊາຍອາຍຸ 44 ປີ ໃຊ້ປືນ AK ຍິງແຟນ ເຊິ່ງເປັນສາວອາສາກູ້ໄພ ກ່ອນຍິງຕົວເອງຕາຍຕາມ ຢູ່ບ້ານ ຊຽງດາ ເມືອງ ໄຊເສດຖາ ນະຄອນຫຼວງວຽງຈັນ ແລະ ຫຼ້າສຸດ, ເຈົ້າໜ້າທີ່ ປກສ ເມືອງ ໄຊເສດຖາ ໄດ້ເປີດເຜີຍສາເຫດທີ່ຊັດເຈນຂອງເຫດຄາດຕະກໍາດັ່ງກ່າວວ່າ: ເລີ່ມຈາກແຟນສາວ ບອກເລີກ ແລະ ຕີໂຕອອກຫ່າງ, ແຕ່ຝ່າຍຊາຍບໍ່ຍອມເຊົາ ແລະ ຫ້າມບໍ່ໃຫ້ພົວພັນກັບ ຜູ້ຊາຍຄົນອື່ນ; ແຕ່ແຟນສາວ ບໍ່ເຮັດຕາມ ຈຶ່ງເຮັດໃຫ້ຝ່າຍຊາຍເກີດຄວາມໂມໂຫ ແລ້ວເອົາປືນ AK ນໍາໄປຍິງຢູ່ຫ້ອງນອນຂອງແຟນສາວ ກ່ອນຍິງຕົວເອງຕາຍຕາມ.

ເຈົ້າໜ້າທີ່ ພະແນກຕໍາຫຼວດ ປກສ ເມືອງ ໄຊເສດຖາ ແຈ້ງໃຫ້ຮູ້ວ່າ: ນາງ ສີລິວັນ ຫຼື ນໍ້າຝົນ ອາຍຸ 23 ປີ ອາຊີບນັກສືກສາ ສະຖາບັນຍຸຕິທຳ ແຫ່ງຊາດ ( ປີສຸດທ້າຍ ) ທີ່ອາໄສຢູ່ກັບແມ່ ຊື່ ນາງ ສີວັນ ອາຍຸ 52 ປີ ແລະ ເຮັດວຽກເປັນ ອາສາກູ້ໄພ ໄດ້ຮູ້ຈັກກັບ ທ້າວ ພອນໄຊ ຜູ້ກໍ່ເຫດ ເຊິ່ງເຮັດວຽກອາສາສະໝັກກູ້ໄພ ບ່ອນດຽວກັນ ອາໄສຢູ່ບ້ານໜອງບົວທອງເໜືອ, ເມືອງ ສີໂຄດຕະບອງ, ນະຄອນຫຼວງວຽງຈັນ. ຈາກການເກັບກໍາຂໍ້ມູນເບື້ອງຕົ້ນຂອງເຈົ້າໝ້າທີ່, ແມ່ຂອງ ນາງ ນໍ້າຝົນ ເລົ່າວ່າ: ໃນປີ 2017, ທ້າວ ພອນໄຊ ໄດ້ມາພົວພັນມັກຮັກແບບບ່າວສາວກັບລູກສາວຂອງຕົນເອງ ແລະ ໄປມາຫາສູ່ກັນຕະຫຼອດ, ໂດຍ ນາງ ນໍ້າຝົນ ບໍ່ຮູ້ວ່າ ທ້າວ ພອນໄຊ ມີເມຍແລ້ວ ແລະ ຍັງມີລູກ 1 ຄົນ, ອາຍຸ ປະມານ 11 ປີ, ໃນເດືອນ ມີຖຸນາ ຫາ ກໍລະກົດ 2019, ນາງ ນໍ້າຝົນ ຈຶ່ງຮູ້ວ່າ: ທ້າວ ພອນໄຊ ມີຄອບຄົວແລ້ວ, ຈາກນັ້ນ, ນາງ ນໍ້າຝົນ ຈຶ່ງເອົາຕົວອອກຫ່າງຈາກ ທ້າວ ພອນໄຊ ພ້ອມທັງບຼັອກເບີໂທລະສັບຂອງ ທ້າວ ພອນໄຊ ເພື່ອຕັດຂາດການຕິດຕໍ່; ທ້າວ ພອນໄຊ ບໍ່ຍອມເລີກລາ ຈາກການພົວພັບກັບ ນາງ ນໍ້າຝົນ ແລະ ຍັງໄດ້ທຽວມາຫາ ແຕ່ ນາງ ນໍ້າຝົນ ກໍບໍ່ສົນ. ເມື່ອເປັນແນວນັ້ນ, ທ້າວ ພອນໄຊ ກໍໄດ້ເອົາປືນສັ້ນ ແລະ ປືນຍາວ ມາຂົ່ມຂູ່ຂ້າ ນາງ ນໍ້າຝົນ ຫຼາຍຄັ້ງ, ພ້ອມທັງ ສັ່ງຫ້າມໄປພົວພັນກັບຄົນອື່ນ ຢ່າງເດັດຂາດ, ຖ້າພົບເຫັນ ຫຼື ຮູ້ວ່າ ນາງ ນໍ້າຝົນ ພົວພັນກັບ ຊາຍຄົນໃດ ແມ່ນຈະຍິງຖິ້ມທັນທີ.

ໃນມື້ເກີດເຫດ, ເວລາປະມານ 5:00 ໂມງ, ນາງ ນໍ້າຝົນ ໄດ້ພາຜູ້ເປັນແມ່ ໄປຕະຫຼາດຫົວຂົວ ແລະ ພາກັນກັບເຮືອນ ໃນເວລາ 6:40 ໂມງ, ພໍຮອດເຮືອນ, ນາງ ນໍ້າຝົນ ກໍໄດ້ຂຶ້ນຫ້ອງນອນ ຢູ່ຊັ້ນ 2 ສ່ວນຜູ້ເປັນແມ່ ໄດ້ໜຶ້ງເຂົ້າແຕ່ງກິນ ຢູ່ຊັ້ນລຸ່ມ, ບໍ່ພໍທໍ່ໃດນາທີ, ກໍເຫັນ ທ້າວ ພອນໄຊ ຂີ່ລົດເກັງ ຍີ້ຫໍ້ຟອດ ສີປອນທອງ ໝາຍເລກທະບຽນ ກຄ 8181 ກໍາແພງນະຄອນ ມາຈອດຢູ່ໜ້າເຮືອນ, ແລ້ວໄຂປະຕູລົງຈາກລົດ ພ້ອມທັງຈັບ ປືນ AK ຂຶ້ນໄປຫາຫ້ອງນອນລູກສາວ ຢູ່ຊັ້ນ 2 ຈາກນັ້ນ, ຜູ້ເປັນແມ່ ໄດ້ຍິນສຽງປືນດັງຂຶ້ນ 2 ນັດ, ຕົນຈຶ່ງແລ່ນໄປຫາຄົນທີ່ເຊົ່າຫ້ອງ ຢູ່ຊັ້ນລຸ່ມຂອງເຮືອນ ເພື່ອໃຫ້ໂທແຈ້ງ ອຳນາດການປົກຄອງບ້ານ ແລະ ເຈົ້າໜ້າທີ່ ມາຊ່ວຍເຫຼືອ ຕໍ່ກັບເຫດການດັ່ງກ່າວ, ເຈົ້າໜ້າທີ່ ປກສ ເມືອງ ໄຊເສດຖາ ຍັງຈະໄດ້ສົມທົບກັບ ປກສ ນະຄອນຫຼວງວຽງຈັນ ເພື່ອເຮັດໃຫ້ຈະແຈ້ງ ກ່ຽວກັບ ອາວຸດ ແລະ ບັນຫາຕ່າງໆ ທີ່ບໍ່ທັນລະອຽດ.

+ຂ່າວຈາກ: ນສພ ຄວາມສະຫງົບ.

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *