ມຊ ຈະຄັດເລືອກເອົານັກສຶກສາເຂົ້າຮຽນ ຈຳນວນ 60 ຄົນຕໍ່ສາຂາເທົ່າ​ນັ້ນ

ການ​ສອບ­ເສັງ​ເຂົ້າ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ມຊ) ສົກ­ຮຽນ 2019-2020 ມາ​ຮອດ​ປັດ­ຈຸ­ບັນ ຄະ­ນະ​ກຳ­ມະ­ການ​ໄດ້​ມີ​ຄວາມ​ກຽມ­ພ້ອມ​ທຸກ​ຢ່າງ ພ້ອມ​ທັງ​ຈະ​ສຸມ​ໃສ່​ການ​ສອບ­ເສັງ​ທີ່​ໂປ່ງ​ໃສ​ຄັດ​ເລືອກ​ເອົາ​ຄົນ​ທີ່​ມີ​ຄວາມ​ສາ­ມາດ ແລະ ຮຽນ​ເກ່ງ​ຢ່າງ​ແທ້​ຈິງ ໂດຍ​ຈະ​ຄັດ​ເລືອກ​ເອົາ​ສາ­ຂາ​ວິ­ຊາ​ຮຽນ​ລະ 60 ຄົນ​ເທົ່າ​ນັ້ນ ໃນ​ຈຳ­ນວນ 109 ສາ­ຂາ​ທົ່ວ ມຊ.

 

ທ່ານ ຄຳ​ຜົງ ນາມ​ມະ​ວົງ​ມີ​ໄຊ ຫົວ­ໜ້າ​ຫ້ອງ­ການ​ວິ­ຊາ​ການ ມຊ ໃຫ້​ສຳ­ພາດ​ໃນ​ທ້າຍ​ເດືອນ​ກໍ­ລະ­ກົດ 2019 ວ່າ: ມາ​ຮອດ​ປັດ­ຈຸ­ບັນ ການ​ກະ­ກຽມ​ຄວາມ​ພ້ອມ​ເພື່ອ​ກ້າວ​ສູ່​ການ​ສອບ­ເສັງ​ຄັດ​ເລືອກ​ເອົາ​ນັກ​ສຶກ​ສາ ສົກ­ຮຽນ 2019-2020 ໄດ້​ກະ­ກຽມ​ຄວາມ​ພ້ອມ 100% ແລ້ວ ໃນ​ນັ້ນ ປະ­ກອບ​ມີ​ດ້ານ​ບຸ​ຄະ­ລາ​ກອນ ເປັນ­ຕົ້ນ ແມ່ນ​ບັນ­ດາ​ຄະ­ນະ​ກຳ­ມະ­ການ​ຍາມ​ຫ້ອງ​ສອບ­ເສັງ ແລະ ບັນ­ດາ​ຄະ­ນະ­ບໍ­ດີ​ຂອງ​ແຕ່​ລະ​ຄະ­ນະ​ມາ​ປະ­ກອບ​ໃນ​ບັນ­ດາ​ອະ­ນຸ​ກຳ­ມະ­ການ​ຕ່າງໆ ກຽມ­ພ້ອມ​ບັນ­ດາ​ນິ­ຕິ​ກຳ​ຕ່າງໆ ໃນ​ການ​ສອບ­ເສັງ ເປັນ­ຕົ້ນ ລະ­ບຽບ​ການ​ສອບ­ເສັງ ການ­ຈັດ­ຕັ້ງ​ສອບ­ເສັງ ແລະ​ອື່ນໆ ແລະ ໄດ້​ກະ­ກຽມ​ສະ­ຖານ­ທີ່​ສອບ­ເສັງ​ຕ່າງໆ ໂດຍ​ມີ​ວິ­ທະ­ຍາ​ເຂດ​ດົງ​ໂດກ ມຊ ເປັນ​ສູນ​ສອບ­ເສັງ ແລະ ບັນ­ດາ​ຈຸດ​ສອບ­ເສັງ​ຕ່າງໆ​ເຊັ່ນ: ບັນ­ດາ​ຄະ­ນະ​ຕ່າງໆ​ທີ່­ຢູ່​ນອກ​ເຂດ​ດົງ​ໂດກ ແລະ ບັນ­ດາ​ໂຮງ­ຮຽນ​ມັດ­ທະ­ຍົມ​ສົມ­ບູນ​ຕ່າງໆ​ໃນ​ຂອບ​ເຂດ​ນະ­ຄອນ ຫຼວງ​ວຽງ​ຈັນ.

 

ໃນ​ປີ​ນີ້ ມຊ ໄດ້​ເປີດ​ລົງ­ທະ­ບຽນ​ເພື່ອ​ສອບ­ເສັງ​ມາ​ຕັ້ງ­ແຕ່​ວັນ​ທີ 1 ກໍ­ລະ­ກົດ ຫາ 30 ກໍ­ລະ­ກົດ 2019 ທີ່​ສະ­ໂມ­ສອນ​ໃຫຍ່ ມຊ ໂດຍ​ການ​ລົງ­ທະ­ບຽນ​ປະ­ກອບ​ມີ 3 ກຸ່ມ​ຄົນ ຄື: ນັກ​ສຶກ​ສາ​ຈົບ ມ7 ໃນ​ສົກ­ຮຽນ 2018-2019 ນັກ​ສຶກ​ສາ​ທີ່​ຈົບ ມ7 ສົກ­ຮຽນ 2017-2018 ກ່ອນ​ຫຼັງ ແລະ ກຸ່ມ​ພະ­ນັກ­ງານ​ລັດ­ຖະ­ກອນ​ທີ່​ເສັງ​ເຂົ້າ​ຮຽນ ມຊ ໃນ​ສາຍ​ຈິດ​ຕະ​ວິ ທະ​ຍາ ແລະ ບໍ­ລິ­ຫານ​ການ​ສຶກ​ສາ ທີ່​ຮັບ​ສະ­ເພາະ​ພະ­ນັກ­ງານ​ເທົ່າ​ນັ້ນ ສຳ­ລັບ​ການ​ກຳ­ນົດ​ການ​ສອບ­ເສັງ​ໃນ​ປີ​ນີ້ ນັກ­ຮຽນ​ຈະ​ສາ­ມາດ​ເລືອກ​ສາຍ​ຮຽນ​ໃນ​ກຸ່ມ​ດຽວ​ເທົ່າ​ນັ້ນ​ໃນ​ສາຍ​ສຳ­ຮອງ​ທັງ​ສອງ.

 

ມາ​ຮອດ​ປັດ­ຈຸ­ບັນ ມີ​ນັກ­ຮຽນ​ທີ່​ມາ​ລົງ­ທະ­ບຽນ​ສອບ­ເສັງ​ເຂົ້າ​ຮຽນ​ທີ່ ມຊ ມີ​ທັງ​ໝົດ 10 ພັນ​ກວ່າ​ຄົນ ໃນ​ນັ້ນ ກຸ່ມ​ສາ­ຂາ​ວິ­ຊາ​ທີ່​ມີ​ຄົນ​ລົງ­ທະ­ບຽນ​ຫຼາຍ​ກວ່າ​ໝູ່​ແມ່ນ​ກຸ່ມ B ເນື່ອງ​ຈາ​ກວ່າ​ເປັນ​ກຸ່ມ​ທີ່​ມີ​ສາ­ຂາ​ວິ­ຊາ​ຫຼາຍ​ກວ່າ 60 ສາ­ຂາ ສ່ວນ​ຄະ­ນະ​ທີ່​ມີ​ນັກ­ຮຽນ​ລົງ­ທະ­ບຽນ​ຫຼາຍ​ທີ່​ສຸດ ແມ່ນ​ຄະ­ນະ​ວິ­ສະ­ວະ­ກຳ​ສາດ ທີ່​ປະ­ກອບ​ມີ​ຫຼາຍ​ພາກ​ວິ­ຊາ ແລະ ພາກ​ວິ­ຊາ​ທີ່​ມີ​ຄົນ​ລົງ­ທະ­ບຽນ​ຫຼາຍ​ທີ່​ສຸດ​ແມ່ນ​ພາກ​ວິ­ຊາ​ພາ­ສາ​ຈີນ ໃນ​ຄະ­ນະ​ອັກ­ສອນ­ສາດ ການ​ສອບ­ເສັງ​ເຂົ້າ ມຊ ໃນ​ປີ​ນີ້ ທາງ ມຊ ຈະ​ຮັບ​ນັກ­ຮຽນ​ທີ່​ເຂົ້າ​ຮຽນ ທັງ​ໝົດ 8.100 ຄົນ ໃນ​ຈຳ­ນວນ 109 ສາ­ຂາ​ຮຽນ ແລະ ແຕ່​ສາ­ຂາ​ວິ­ຊາ​ຈະ​ສາ­ມາດ​ຮັບ​ໄດ້​ນັກ­ຮຽນ 60 ຄົນ.

 

ສຳ­ລັບ​ບົດ​ສອບ­ເສັງ​ຕ່າງໆ​ຂອງ​ແຕ່​ລະ​ກຸ່ມ ທາງ ມຊ ພ້ອມ​ດ້ວຍ​ຄະ­ນະ​ກຳ­ມະ­ການ​ທັງ­ຫຼາຍ ໄດ້​ມີ​ການ​ຄົ້ນ­ຄວ້າ​ວິ­ໄຈ​ຢ່າງ​ລະ­ອຽດ ເພື່ອ​ໃຫ້​ເໝາະ​ສົມ​ທີ່​ສຸດ​ສຳ­ລັບ​ແຕ່​ລະ​ກຸ່ມ ໂດຍ​ຄັດ​ເອົາ​ຫົວ​ບົດ​ສອບ­ເສັງ​ຕາມ​ຄວາມ​ຍາກ​ແຕ່​ລະ­ວິ​ຊາ ເຊັ່ນ: ໃນ​ຫົວ​ບົດ​ກຸ່ມ A ລວມ​ມີ​ວິ­ຊາ​ຟີ​ຊິກ​ສາດ 15 ຂໍ້ ເຄ​ມີ​ສາດ 15 ຂໍ້ ຊີ­ວະ​ສາດ 10 ຂໍ້ ແລະ​ອື່ນໆ ເຊິ່ງ​ຂໍ້​ສອບ​ທັງ​ໝົດ​ແມ່ນ​ນອນ​ໃນ​ບົດ­ຮຽນ​ທີ່​ຮຽນ​ຢູ່​ໃນ​ມັດ­ທະ­ຍົມ​ສຶກ​ສາ​ຕອນ​ປາຍ ໂດຍ ມ5-ມ6 ກວມ 35% ແລະ ມ7 ແມ່ນ 65%.

 

ສ່ວນ​ການ​ສອບ­ເສັງ​ແມ່ນ​ຈະ​ຈັດ​ຂຶ້ນ​ໃນ​ວັນ​ທີ 3 ສິງ­ຫາ 2019 ທີ່​ຈະ​ມາ​ເຖິງ​ນີ້ ຫຼັງ​ຈາກ​ເສັງ​ແລ້ວ 15 ວັນ ແມ່ນ​ຜົນ​ການ​ກວດ​ບົດ​ຕ້ອງ​ແລ້ວ​ໝົດ ແລະ ກຽມ​ນຳ​ສະ­ເໜີ​ຕໍ່​ກະ­ຊວງ​ສຶກ​ສາ​ທິ​ການ ແລະ ກີ­ລາ ແລະ ມຊ ເພື່ອ​ກຽມ​ແຈ້ງ​ປະ­ກາດ​ຜົນ​ສອບ­ເສັງ ພາຍ­ຫຼັງ​ປະ­ກາດ​ຜົນ​ແລ້ວ​ຈະ​ໃຊ້​ເວ­ລາ​ໃນ​ການ​ລົງ­ທະ­ບຽນ 15 ວັນ ຄາດ​ວ່າ­ການ​ເຂົ້າ​ຮຽນ ໃນ​ສົກ 2019-2020 ຈະ​ເລີ່ມ​ການ​ຮຽນ-ການ​ສອນ​ແຕ່​ວັນ​ທີ 1 ຕຸ­ລາ 2019 ນີ້.

ຂອບໃຈຂໍ້ມູນຈາກ: ໜັງສືພິມວຽງຈັນໃຫ່ມ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *