ນ້ຳຖ້ວມເມືອງນານ ຫລວງພະບາງເສຍຫາຍຫຼາຍກວ່າ 11 ຕື້ກ່ວາກີບ

ໜັງສືພິມວຽງຈັນທາຍລາຍງານໃນວັນທີ 1 ສິງຫາ 2019 ໃຫ້ຮູ້ວ່າ: ຄະນະກຳມະການແກ້ໄຂໄພພິບັດເມືອງນານ ໄດ້ລົງເກັບກຳຂໍ້ມູນຈາກໄພນຳ້ຖ້ວມ ມີຫລາຍກວ່າ 11 ຕື້ກີບ. ຜົນເສຍທີ່ໜັກກວ່າໝູ່ແມ່ນກະສິກຳ, ໂຍທາ ແລະ ຮອງລົງມາແມ່ນ ຊົນລະປະທານ 5 ແຫ່ງມູນຄ່າ 9 ຕື້ກີບ ແລະ ຍັງມີເຮືອນເປ່ເພ, ເຄື່ອງໃຊ້ພາຍໃນເຮືອນ, ເຂົ້າ, ສັດລ້ຽງ, ເນື້ອທີ່ນາ ແລະ ພຶດ. ນອກຈາກນັ້ນ, ຍັງມີພື້ນຖານໂຄງລ່າງຕ່າງໆ ຄື ລະບົບນ້ຳປະປາ, ເສົາໄຟຟ້າ, ກົງເຕີໄຟຟ້າ, ທາງ ແລະ ຂົວຂ້າມນ້ຳ ເປັນຕົ້ນ.


ທ່ານ ແສງເພັດ ເພັດດວງຈັນ ຫົວໜ້າຫ້ອງການຖະແຫຼງຂ່າວ, ວັດທະນາທໍາ ແລະທ່ອງທຽ່ວ ເມືອງນານ ໄດ້ລາຍງານວ່າກຽ່ວກັບການຊ່ວຍເຫຼືອເບື້ອງຕົ້ນສຳລັບປະຊາຊົນທີ່ໄດ້ຮັບຜົນກະທົບ ແມ່ນມີພາກສ່ວນເມືອງ ແລະ ເອກກະຊົນຕ່າງໆໄດ້ໃຫ້ການຊ່ວຍເຫຼືອເບີື້ອງຕົ້ນແລ້ວ ໂດຍສະເພາະແມ່ນເຄື່ອງອຸບປະໂພກ ແລະ ບໍລິໂພກ ເຊັ່ນ: ເຂົ້າສານ, ໝີ່ສຳເລັດຮູບ, ນໍ້າ, ເຄື່ອງນຸ່ງຮົມ.


ທ່ານ ແສງເພັດ ໄດ້ແຈ້ງວ່າ ມື້ນີ້ ທ່ານເຈົ້າແຂວງ ແຂວງຫລວງພະບາງ ແລະ ຄະນະຈະໄດ້ລົງມາຕິດຕາມຜົນເສຍຫາຍ ແລະ ຈະມີການມອບເຄື່ອງຊ່ວຍເຫຼືອຈຳນວນໜຶ່ງໃຫ້ແຕ່ລະຄອບຄົວຜູ້ທີ່ໄດ້ຮັບຜົນກະທົບ. ແຕ່ກໍ່ຍັງບໍ່ພຽງພໍກັບຄວາມຕ້ອງການຊຶ່ງທາງຄະນະກຳມະການແກ້ໄຂໄພພິບັດເມືອງນານ ຍັງຕ້ອງການຈຳນວນຫຼາຍໂດຍສະເພາະເຂົ້າສານ, ນ້ຳດື່ມ, ເຄື່ອງຮັບໃຊ້ຄົວເຮືອນ, ເຄື່ອງນຸ່ງຮົມ, ເຄື່ອງບ່ອນນອນ, ອາຫານແຫ້ງຕ່າງໆ ແລະ ອື່ນໆ.
ຖ້າທ່ານໃດມີຈຸດປະສົງຢາກຊ່ວຍເຫຼືອວັດຖຸບັດໄຈດັ່ງກ່າວສາມາດມາມອບໃຫ້ໂດຍກົງໃຫ້ຄະນະກຳມະການແກ້ໄຂໄພພິບັດເມືອງນານ ເພື່ອຈະແຈກຢາຍໃຫ້ປະຊາຊົນຕໍ່ໄປ.


ຂ່າວ: ສົມພາວັນ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *