ສຶກສາອົບຮົມຜູ້ເຜີຍແຜ່ຂ່າວບໍ່ມີມູນຄວາມຈິງໃນສື່ອອນລາຍ

ວັນທີ 16 ມິຖຸນາ 2019, ພັທ ວັນສຸກ ສຸລິຍະ ຫົວໜ້າຫ້ອງຕໍາຫຼວດ ປກສ ແຂວງຜົ້ງສາລີ ພ້ອມດ້ວຍຄະນະ ໄດ້ສຶກສາອົບຮົມ ນາງ ຈັນສະໄໝ ອາຍຸ 32 ປີ ຢູ່ບ້ານປາກທ້າງ ເມືອງສີໂຄດຕະບອງ ນະຄອນຫຼວງວຽງຈັນ ທີ່ໄດ້ໂພສ໌ຮູບພາບ-ວິດີໂອລົດບັນທຸກແກ່ໄມ້ຢູ່ບ້ານມາລີເທົ່າ ເມືອງຍອດອູ ແຂວງຜົ້ງສາລີ ລົງໃນສື່ສັງຄົມອອນ ລາຍໂດຍບໍ່ມີມູນຄວາມຈິງ.

ຜູ້ກ່ຽວໂພສ໌ຮູບພາບ-ວິດີໂອລົດບັນທຸກແກ່ໄມ້ໃນໄລຍະເດືອນເມສາ 2019 ໂດຍຂຽນວ່າ: ” ໃຜວ່າບໍ່ຕັດໄມ້ແລ້ວ, ຂ້າພະເຈົ້າເຫັນກັບຕາ ຄົນຈີນຂົນໄມ້ຢູ່ເມືອງຍອດອູ ອອກໄປຈີນ ທຸກມື້, ໄມ້ດິບໆໜ້າ 80-90 ຂຶ້ນໄປ ”. ຈາກຂໍ້ມູນດັ່ງກ່າວໄດ້ເຜີຍແຜ່ໄປກວ້າງຂວາງໃນສື່ອອນລາຍ ເຮັດໃຫ້ຜູ້ທີ່ອ່ານຂ່າວທາງອອນລາຍພົບເຫັນ ຈຶ່ງມີຄໍາເຫັນຕ່າງໆນາໆໄປໃນທາງທີ່ບໍ່ດີ.

ຕໍ່ກັບເຫດການດັ່ງກ່າວ, ຜ່ານການກວດກາຂໍ້ມູນຕົວຈິງຂອງເຈົ້າໜ້າທີ່ຕໍາຫຼວດ ປກສ ແຂວງ ຜົ້ງສາລີ ເຫັນວ່າລົດບັນທຸກແກ່ໄມ້ທີ່ ນາງ ຈັນສະໄໝ ໂພສ໌ຮູບພາບ-ວິດີໂອດັ່ງກ່າວບໍ່ແມ່ນຄວາມຈິງ; ເຊິ່ງໄມ້ດັ່ງກ່າວແມ່ນນໍາມາຈາກບ້ານມາລີເທົ່າ ລົງໄປບ້ານອູເໜືອ ເພື່ອເຂົ້າໂຮງງານປຸງແຕ່ງໄມ້ຕັ້ງຢູ່ເຂດນັ້ນ.

ດັ່ງນັ້ນ, ນາງ ຈັນສະໄໝ ໄດ້ອອກມາຂໍໂທດມາຍັງຜູ້ອ່ານຂ່າວ ຍ້ອນເຂົ້າໃຈຜິດເອງ ແລະ ຂໍອະໄພມາຍັງບັນດາທ່ານອົງການນໍາພັກ-ລັດຂັ້ນແຂວງ ກໍຄືພະນັກງານ, ທະຫານ, ຕໍາຫຼວດ, ປະ ຊາຊົນຊາວແຂວງຜົ້ງສາລີ ໂດຍສະເພາະແມ່ນພໍ່-ແມ່ປະຊາຊົນເມືອງຍອດອູ ແລະ ຜູ້ໃຊ້ເຟສບຸກທຸກທ່ານ ເຊິ່ງຮູບພາບ-ວິດີໂອໄມ້ທ່ອນທີ່ໄດ້ໂພສ໌ລົງໃນເຟສບຸກນັ້ນແມ່ນບໍ່ຖືກຕ້ອງ ແລະ ບໍ່ມີມູນຄວາມເປັນຈິງ,

ບໍ່ມີຈຸດປະສົງໃສ່ຮ້າຍປ້າຍສີການນໍາພັກ-ລັດ ຫຼື ບຸກຄົນແຕ່ຢ່າງໃດຍ້ອນຄວາມເຂົ້າໃຈຜິດ ແລະ ຄວາມຮູ້ເທົ່າບໍ່ເຖິງການຂອງຜູ້ກ່ຽວເອງ. ສະນັ້ນ; ເຈົ້າໜ້າທີ່ ປກສ ແຂວງຜົ້ງສາລີ ຈຶ່ງໄດ້ເຮັດບົດບັນທຶກສຶກສາອົບຮົມ-ກ່າວເຕືອນຜູ້ກ່ຽວ ແລະ ປັບໃໝຕາມລະບຽບກົດໝາຍຕື່ມອີກ.

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *