ລັດຖະບານ ມອບ​​​ເຂົ້າ-ເຄື່ອງ​ຊ່ວຍ​ເຫລືອ​ຜູ້​ປະສົບ​ໄພພິບັດໃຫ້ 4 ແຂວງ​ພາກ​ເໜືອ

ໃນ​ ປີ 2019 ນີ້, ກະ​ຊວງ​ແຮງ​ງານ ​ແລະ ສະຫວັດດີ​ການ​ສັງ​ຄົມ ​ໄດ້​ຮັບ​ການ​ອະນຸມັດ​ຈາກ ລັດຖະບານ ​ແຫ່ງ ສປປ ລາວ ​ແລະ ລັດຖະບານ​ຍີ່ປຸ່ນ ​ໃນ​ການຈັດ​ຕັ້ງ​ປະຕິບັດ​ໂຄງການຄັງ​ແຮ​ເຂົ້າ​ຊ່ວຍ​ເຫລືອ​ຜູ້​ປະສົບ​ໄພພິບັດ ປີ 2018 ​ໃນ​ຂອບ​ເຂດ​ທົ່ວ​ປະ​ເທດ , ເປັນເຂົ້າສານໜຽວຈຳນວນ 1.676.000 ກິໂລ, ລວມມູນຄ່າເປັນເງິນ 13.492.386.600ກີບ.ພາຍ​ໃຕ້​ກອງ​ທຶນ​ເພື່ອ​ຮ່ວມ​ງານ KR1.


ສະ​ນັ້ນ, ​ໃນ​ໂອກາດທີ່ລົງ​ເຄື່ນ​ໄຫວ​ເຮັດວຽກ​ງານ​ແຮງ​ງານ ​ແລະ ສະຫວັດ​ດີ​ການ​ສັງຄົມ ຢູ່​ບັນດາ​ແຂວງ​ພາກ​ເໜືອ ​​ລະຫວ່າງວັນ​ທີ 11 -15 ກໍລະກົດ 2019 ນີ້ ທີ່​ພະແນກແຮງງານ ແລະ ສະຫວັດດີການແຂວງ​ຫລວງ​ນ້ຳທາ, ທ່ານ ຄຳ​ແພງ ​ໄຊ​ສົມ​ແພງ ລັດຖະມົນຕີ ກະ​ຊວງ​ແຮງ​ງານ ​ແລະ ສະຫວັດດີ​ການ​ສັງ​ຄົມ(ຮສສ ) ​ພ້ອມຄະນະ ໄດ້​ຕາງໜ້າ​ລັດຖະບານ ມອບ​ເຄື່ອງ​ຊ່ວຍ​ເຫລືອ​ໃຫ້​ແກ່​ປະຊາຊົນ​ຜູ້​ປະສົບ​ໄພພິບັດ ຢູ່​ ແຂວງ ຫລວງ​ນ້ຳ​ທາ, ແຂວງບໍ່​ແກ້ວ, ອຸດົມ​ໄຊ ​ແລະ ​ແຂວງ​ຫລວງ​ພະ​ບາງ ​ລວມມູນ​ຄ່າ 4 ຕື້ ກວ່າ​ກີບ, ​ເຊິ່ງຕາງໜ້າ​ຮັບ​ໂດຍ ທ່ານ​ເຈົ້າ​ແຂວງ ​ແລະ ຮອງ​ເຈົ້າ​ແຂວງ​ທັງ 4 ​ແຂວງ​ພ້ອມດວ້ຍຄະນະພະແນກ ຮສສ ແຂວງ ດັ່ງກ່າວ .

ເຄື່ອງ​ຊ່ວຍ​ເຫລືອ​ທີ່​ນຳ​ມາ​ມອບ​ໃນ​ຄັ້ງ​ນີ້ແມ່ນໄດ້ຮັບ​ເຂົ້າສານ​ໜຽວ ກອງ​ທຶນ​ເພື່ອ​ຮ່ວມ​ງານ KR1້ ປະ​ກອບ​ມີ: ​ແຂວງ​ຫລວງ​ນ້ຳທາ ໄດ້​ຮັບເຂົ້າສານ​ໜຽວ 76.824 ກິ​ໂລ ລວມມູນ​ຄ່າ 618 ລ້ານ​ ​, ​ແຂວງບໍ່​ແກ້ວ ໄດ້​ຮັບເຂົ້າສານ​ໜຽວ 60.000 ກວ່າ​ກິ​ໂລ ມູນ​ຄ່າ 489ລ້ານກີບ, ແຂວງ​ອຸດົມ​ໄຊ ​ ເຂ້າສານໜຽວ ຈໍານວນ 154.536 ກິ​ໂລ ມູນ​ຄ່າ 618 ລ້ານ​ກວ່າ​ກີບ, ແລະ ແຂວງ​ຫລວງ​ພະ​ບາງ ​ໄດ້​ຮັບ​ເຂົ້າສານ​ໜຽວ 112.356 ກິ​ໂລ ມູນ​ຄ່າ 900 ລ້ານ​ກວ່າ​ກີບ, ​ພ້ອມດ້ວຍເຄື່ອງນຸ່ງຫົມ ແລະ ເກີບ ຈາກ ສ. ເກົາຫລີ ຈຳນວນ 510 ແກັດ ລວມມູນຄ່າ ທັງໝົດ 764 ລ້ານກວ່າກີບນຳໄປມອບນຳອີກ.

(ຂ່າວ ຮສສ: ເພັດສະໄໝ )

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *