ຕັດສິນຈຳຄຸກ 3 ຈຳເລີຍຄະດີຢາບ້າ ຄົນລະ 5 ປີ ປັບໃໝຄົນລະ 10 ລ້ານ

ຄະນະສານອາຍາ ສານປະຊາຊົນຂັ້ນຕົ້ນ ແຂວງອຸດົມໄຊ ເປີດປະຊຸມສານໃນວັນທີ 5 ກໍລະກົດ 2019 ເພື່ອນຳເອົາສຳນວນຄະດີອາຍາທີ່ອົງການໄອຍະການປະຊາຊົນຖະແຫຼງ ສະບັບເລກທີ 80,81 ແລະ 89/ອຍກຂ.ອຊ ລົງວັນທີ 17 ມິຖຸນາ 2019, ໂດຍນຳຕົວຈຳເລີຍ 3 ຄົນ ຂຶ້ນມາພິຈາລະນາໃນສະຖານຄ້າຂາຍຢາເສບຕິດ ແລະ ມີຢາເສບຕິດໄວ້ຄອບຄອງປະເພດຢາບ້າ ຈຳຄຸກຜູ້ລະ 5 ປີ ປັບໃໝຜູ້ລະ 10.000.000 ກີບ.

ຈຳເລີຍທັງ 3 ຊື່ ທ້າວ ສຸວົງສັກ ຫຼື ແຫຼ້ (ຈຳເລີຍ 1) ອາຍຸ 38 ປີ ຢູ່ບ້ານປາກແບງ ເມືອງປາກແບງ ຖືກກັກຕົວດຳເນີນຄະດີ ໃນວັນທີ 17 ມັງກອນ 2019 ພ້ອມຂອງກາງຢາບ້າ 387 ເມັດ, ນໍ້າໜັກ 38,9 ກຼາມ; ທ້າວ ໄຊ ເນັງ ຫຼື ເນັງເລົາ (ຈຳເລີຍ 2) ອາຍຸ 58 ປີ ຢູ່ບ້ານຫຼັກ 32 ເມືອງໄຊ ຖືກກັກຕົວໃນວັນທີ 24 ທັນວາ 2018 ພ້ອມຂອງກາງຢາບ້າ ຈຳນວນ 35 ເມັດ ໜັກ 3,6 ກຼາມ; ທ້າວ ລີຮື (ຈຳເລີຍ 3) ອາຍຸ 27 ປີ ຢູ່ບ້ານຕົ້ງຕູ ເມືອງງາ ຖືກກັກຕົວໃນວັນທີ 7 ທັນວາ 2018 ຢາບ້າ 2 ຖົງ ມີ 295 ເມັດ ນໍ້າໜັກ 37 ກຼາມ ທັງ 3 ຈຳເລີຍຂຶ້ນກັບແຂວງອຸດົມໄຊ.


ພວກຈຳເລີຍທັງ 3 ສາລະພາບໃນຂັ້ນເຈົ້າໜ້າທີ່ ແລະ ຖືກອົງການໄອ ຍະການປະຊາຊົນນຳເອົາຄຳສາລະພາບດັ່ງກ່າວມາຖະແຫຼງໃນຫ້ອງປະຊຸມສານ ວ່າ: ຜ່ານການຄົ້ນຄວ້າ, ກວດກາບັນດາຂໍ້ມູນຫຼັກຖານ ແລະ ເອກະສານ ຕ່າງໆທີ່ມີຢູ່ໃນສໍານວນຄະດີຢ່າງລະອຽດຖີ່ຖ້ວນ, ຮອບດ້ານ, ພາວະວິໄສ ແລະ ໄຈ້ແຍກລະອຽດແລ້ວກ່ຽວກັບຄຳຖະແຫຼງຂອງພວກຈຳເລີຍນັ້ນເຫັນວ່າການກະທໍາຂອງພວກຈຳເລີຍໃນຄັ້ງນີ້ ໄດ້ກະທໍາຜິດຕາມຂໍ້ກ່າວຫາແທ້ ແລະ ພວກຈຳເລີຍກໍຮັບຮູ້ໄດ້ວ່າການຄ້າຂາຍ, ຈໍາໜ່າຍ ຫຼື ມີຢາເສບຕິດໄວ້ໃນຄອບຄອງ,

ນໍາເຂົ້າ-ສົ່ງອອກ, ຂົນສົ່ງ ຫຼື ນໍາຢາອີ, ຢາບ້າ, ຢາໄອສ໌ (ice) ຫຼື ວັດຖຸອອກລິດຕໍ່ຈິດປະສາດຜ່ານ ສປປ ລາວ ເປັນສິ່ງທີ່ຜິດຕໍ່ກົດໝາຍອາຍາ ແລະ ມີໂທດທາງອາຍາ, ແຕ່ພວກຈໍາເລີຍຍັງກະທໍາຜິດໂດຍເຈດຕະນາ ເພື່ອຫວັງຜົນປະໂຫຍດທີ່ບໍ່ຖືກຕ້ອງຕາມກົດໝາຍ ແລະ ເປັນການກະທໍາຜິດຕໍ່ກົດໝາຍອາຍາ ໃນໝວດທີ 7 ວ່າດ້ວຍການກະທໍາຜິດຕໍ່ເສດຖະກິດຂອງຊາດ.ເປັນການກະທໍາຜິດທາງອາຍາໃນຂໍ້ຫາຄ້າຂາຍຢາເສບຕິດ ແລະ ມີຢາເສບຕິດໄວ້ໃນຄອບຄອງທີ່ລະບຸໄວ້ວ່າ:

ບຸກຄົນຜູ້ໃດຫາກຜະລິດ, ຄ້າຂາຍ, ຈໍາໜ່າຍ ຫຼື ມີຢາເສບຕິດໄວ້ໃນຄອບຄອງ, ນໍາເຂົ້າ-ສົ່ງອອກ, ຂົນສົ່ງຢາບ້າ ຫຼື ວັດຖຸອອກລິດຕໍ່ຈິດປະສາດ ຜ່ານ ສປປ ລາວ ເປັນອາຈີນ ຫຼື ມີການຈັດຕັ້ງເປັນກຸ່ມ ຫຼື ມີຢາອີ, ຢາບ້າ, ຢາ ໄອສ໌ (Ice) ເກີນກວ່າ 100 ກຼາມ ຈະຖືກລົງໂທດຕັດອິດສະລະພາບແຕ່ 5-10 ປີ ແລະ ຈະຖືກປັບໃໝແຕ່ 10.000.000 – 50.000.000 ກີບ ແລະ ຈະຖືກຮິບຊັບຕາມທີ່ໄດ້ກໍານົດໄວ້ໃນມາດຕາ 34 ຂອງກົດໝາຍອາ ຍາ.

ສຳລັບພຶດຕິກຳຂອງພວກຈຳເລີຍ ແມ່ນໄປຊື້ຢາບ້ານຳພັກພວກ ແລະ ມາຈຳໜ່າຍຂາຍໃຫ້ກັບໄວລຸ້ນຢູ່ພາຍໃນບ້ານ ແລະ ບ້ານໃກຄຽງ ຄັ້ງລະ 2-5 ເມັດ ສ່ວນການຊື້-ຂາຍຢາບ້ານັ້ນແມ່ນໄດ້ເອົາຢາບ້າມາຂາຍກ່ອນ ຂາຍໝົດແລ້ວຈຶ່ງຈ່າຍເງິນຕາມຫຼັງ ແລະ ຮັບເອົາຢາບ້າຊຸດໃໝ່ມາຂາຍອີກ, ຜ່ານມາພວກຈຳເລີຍໄດ້ກະທຳແບບນີ້ມາແລ້ວຫຼາຍຄັ້ງບໍ່ສາມາດຈື່ໄດ້; ນອກນີ້,

ພວກຈຳເລີຍຍັງສາລະພາບວ່າ: ນອກຈາກຂາຍຢາບ້າແລ້ວຍັງໄດ້ເສບຢາບ້ານຳອີກ ໂດຍເສບຄັ້ງລະ 1-2 ເມັດ, ເງິນທີ່ໄດ້ຈາກການຂາຍຢາບ້າແມ່ນໄດ້ນຳໃຊ້ຈ່າຍສ່ວນຕົວ ແລະ ຄອບຄົວໝົດ.ນອກຈາກຄຳຕັດສິນຈຳຄຸກຜູ້ລະ 5 ປີ ປັບໃໝຜູ້ລະ 10.000.000 ກີບ ນັ້ນ, ຄະນະສານຍັງໄດ້ຮິບລົດຈັກຍີ່ຫໍ້ຮອນດ້າເວບ 100 ຂອງຈຳເລີຍ 1 ເຂົ້າເປັນຂອງລັດ ແລະ ຮິບຢາບ້າຈາກພວກຈຳເລີຍທັງໝົດໄປທຳລາຍຖິ້ມ ສ່ວນເປົ້າໝາຍທີ່ຖືກຊັດທອດນັ້ນ ປັດຈຸບັນເຈົ້າໜ້າທີ່ບໍ່ສາມາດນຳຕົວມາດຳເນີນຄະດີໄດ້ ເນື່ອງຈາກວ່າບໍ່ຮູ້ທີ່ຢູ່ອັນແນ່ນອນ.

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *