ປກສ ແຂວງບໍລິຄຳໄຊ ສຶກສາອົບຮົມຜູ້ຂາຍເລກເຖື່ອນ

ປັດຈຸບັນມີຄົນຈໍານວນໜຶ່ງຢູ່ຫຼາຍທ້ອງຖິ່ນພາກັນລັກລອບເຄື່ອນໄຫວຂາຍເລກໂດຍບໍ່ໄດ້ຮັບອະນຸຍາດ ຫຼື ເອີ້ນວ່າເລກເຖື່ອນ ເພື່ອໃຫ້ຄົນສ່ຽງໂຊກ ເຊິ່ງເປັນລັກສະນະການພະນັນອີກຮູບແບບໜຶ່ງ ເປັນຕົ້ນເລກລາວ, ຫວຽດ ແລະ ໄທ; ແຕ່ອໍານາດການຈັດຕັ້ງບ້ານໄດ້ເບິ່ງຂ້າມ ບໍ່ມີການແກ້ໄຂ ເຮັດໃຫ້ມີຫາງສຽງໄປໃນທາງທີ່ບໍ່ດີວ່າທາງອໍານາດການປົກຄອງບ້ານເມືອງ ບໍ່ ມີການກວດກາ ຄືປ່ອຍປະລະເລີຍແບບນີ້.

ຕໍ່ກັບບັນຫານີ້, ຕ້ອງຊົມເຊີຍແຂວງບໍລິຄໍາໄຊ ທີ່ເອົາໃຈໃສ່ແກ້ໄຂຢ່າງຈິງຈັງ. ຫຼ້າສຸດ, ໃນວັນທີ 8 ກໍລະກົດ 2019 ພະແນກຕໍາຫຼວດເສດຖະກິດ ປກສ ແຂວງບໍລິຄໍາໄຊ ພ້ອມດ້ວຍພາກສ່ວນກ່ຽວຂ້ອງໄດ້ສຶກສາອົບຮົມຜູ້ຂາຍ ຫວຍ-ເລກເຖື່ອນ ຈໍານວນ 7 ຄົນ ເພື່ອບໍ່ໃຫ້ກະທໍາຜິດອີກ.ພັທ ຄໍາເພັດ ອໍາພົງ ຮອງຫົວໜ້າພະແນກຕໍາຫຼວດປ້ອງກັນເສດຖະກິດ ຫ້ອງຕໍາຫຼວດ ປກສ ແຂວງບໍລິຄໍາໄຊ ໃຫ້ຮູ້ວ່າ:

ພາຍຫຼັງໄດ້ຮັບຄໍາສັ່ງຂອງທ່ານເຈົ້າແຂວງໆບໍລິຄໍາໄຊ ສະບັບເລກ ທີ 001/ຂບຊ, ວ່າດ້ວຍການສະກັດກັ້ນ ແລະ ປາບປາມຫວຍ-ເລກເຖື່ອນ ທາງເຈົ້າໜ້າທີ່ຕໍາຫຼວດເສດຖະກິດ ກໍໄດ້ສົມທົບກັບເຈົ້າໜ້າທີ່ສືບຂ່າວ ລົງກວດກາເປົ້າໝາຍຜູ້ຂາຍຫວຍ-ເລກ ເຖື່ອນຢູ່ພາຍໃນເທດສະບານແຂວງ ສາມາດຮູ້ໄດ້ຜູ້ທີ່ກະທໍາຜິດ ແລະ ໄດ້ຮຽກເຊີນພວກກ່ຽວ ມາສຶກສາອົບຮົມ ຈໍານວນ 7 ຄົນ ກ່ອນປັບໃໝຕາມກົດໝາຍ;

ເຊິ່ງການກະທໍາດັ່ງກ່າວແມ່ນ ຜິດຕໍ່ລະບຽບກົດໝາຍວ່າດ້ວຍການດໍາເນີນຄະດີອາຍາ ແລະ ກົດໝາຍອາຍາ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ຢູ່ໃນໝວດທີ 2 ການກະທໍາຜິດກ່ຽວກັບຄວາມປອດໄພ ແລະ ຄວາມເປັນລະບຽບຮຽບຮ້ອຍຂອງສັງຄົມ ໃນມາດຕາ 141 ການຫຼິ້ນ ການພະນັນທີ່ຕ້ອງຫ້າມໄດ້ລະບຸໄວ້ວ່າ: ບຸກຄົນໃດຫາກຫຼິ້ນການພະນັນທີ່ຕ້ອງຫ້າມຈະຖືກປັບໃໝແຕ່ 5.000.000 ກີບຫາ 10.000.000 ກີບ.

ບຸກຄົນໃດຫາກໄດ້ສົມຍອມໃຫ້ຫຼິ້ນການພະນັນທີ່ຕ້ອງຫ້າມຢູ່ໃນເຮືອນຂອງຕົນ ຫຼື ເປັນເຈົ້າມື ຫຼື ເປັນຜູ້ກະທໍາຜິດທີ່ບໍ່ເຂັດຫຼາບ ຈະຖືກລົງໂທດຕັດອິດສະຫຼະພາບແຕ່ສາມເດືອນ ຫາ ສອງປີ ຫຼື ດັດສ້າງໂດຍບໍ່ຕັດອິດສະຫຼະພາບ ແລະ ຈະຖືກປັບໃໝແຕ່ 5.000.000 ກີບ ຫາ 15.000.000 ກີບ.

ໂອກາດດັ່ງກ່າວ, ພັທ ຄໍາເພັດ ອໍາພົງ ຮຽກຮ້ອງໃຫ້ພວກກ່ຽວຈົ່ງຢຸດເຊົາ ເພື່ອບໍ່ໃຫ້ກະທໍາຜິດຊໍ້າຕື່ມອີກ ເພາະການກະທໍາດັ່ງກ່າວແມ່ນສ້າງເງື່ອນໄຂຫາຜົນປະໂຫຍດໃຫ້ຕົນເອງແບບບໍ່ຖືກ ຕ້ອງຕາມກົດໝາຍ ເຮັດໃຫ້ສັງຄົມບໍ່ມີຄວາມເປັນລະບຽບຮຽບຮ້ອຍ ແລະ ຮຽກຮ້ອງໃຫ້ພໍ່-ແມ່ປະຊາຊົນ ຈົ່ງພາກັນຊອກຢູ່ຫາກິນປະກອບອາຊີບທີ່ສຸດຈະລິດ ແລະ ຖືກຕ້ອງຕາມລະ ບຽບກົດໝາຍ.

ຂອບໃຈຂໍ້ມູນຈາກ: ຫນັງສືພິມຄວາມສະຫງົບ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *