ທ່ານ ຮອງນາຍົກລົງພື້ນທີ່ ຕິດຕາມການແກ້ໄຂຝູງບົ້ງຢູ່ໄຊຍະບູລີ

ໃນຕອນເຊົ້າວັນທີ 11 ກໍລະກົດ 2019 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວຢ້ຽມຢາມແຂວງໄຊຍະບູລີ, ມີ ທ່ານ ພົງສະຫວັນ ສິດທະວົງ ເຈົ້າແຂວງຯ ໄຊຍະບູລີ ພ້ອມດ້ວຍອໍານາດການປົກຄອງແຂວງ ແລະປະຊາຊົນແຂວງໄຊຍະ ບູລີໃຫ້ການຕ້ອນຮັບ.ທ່ານ ສອນໄຊ ສີພັນດອນ ພ້ອມດ້ວຍຄະນະລົງພື້ນທີ່ຄັ້ງນີ້ເປົ້າໝາຍຫຼັກແມ່ນເພື່ອລົງຕິດຕາມສະພາບການລະບາດຂອງບົ້ງຝູງສາລີຢູ່ທີ່ເມືອງປາກລາຍ ໂດອາດນີ້ທ່ານໄດ້ຮັບຟັງການລາຍງານຈາກວິຊາການພະແນກກະສິກໍາ ແລະ ປ່າໄມ້ແຂວງໃຫ້ຮູ້ວ່າ:

ໃນລະຫວ່າງວັນທີ 20 ພືດສະພາ 2019 ໄດ້ເກີດມີການລະບາດຂອງບົ້ງຝູງສາລີ ຢູ່ເມືອງປາກລາຍ, ແຂວງ ໄຊຍະບູລີ, ຊຶ່ງພົບການລະບາດເບື້ອງຕົ້ນ ຈຳນວນ 7 ບ້ານ, ມີເນື້ອທີ່ຖືກບົ້ງຝູງທຳລາຍຈຳນວນເກີອບ 3 ພັນເຮັກຕາ, ຈາກນັ້ນ, ມາຮອດວັນທີ 24 ມີຖຸນາ 2019 ບົ້ງດັ່ງກ່າວກໍ່ໄດ້ແຜ່ລາມອອກເປັນວົງກວ້າງ ໃນຂອບເຂດທົ່ວແຂວງ ມາຮອດວັນທີ 10 ກໍລະກົດ 2019 ມີເນື້ອທີ່ສາລີຖືກຜົນກະທົບຈາກບົ້ງຝູງທຳລາຍຈຳນວນ 15 ພັນກວ່າເຮັກຕາ ໃນຈໍານວນ 11 ເມືອງໃນທົ່ວແຂວງ, ມີເນື້ອທີ່ເສຍຫາຍສູງເກີອບ 7 ພັນເຮັກຕາ, ມີ 168 ບ້ານ, ມີ 7,058 ຄອບຄົວ ແລະ ມີບົ້ງຝູງທໍາລາຍເຂົ້າໄຮ່ ຂອງຊາວກະສິກອນເມືອງ ໄຊສະຖານ ຈໍານວນ 95.88 ເຮັກຕາ, ມີ 10 ບ້ານ, ມີ 241 ຄອບຄົວ.

ຊຶ່ງໄລຍະຜ່ານມາ ແຂວງໄດ້ສະໜອງງົບປະມານເພື່ອຈັດຊື້ຢາ emamectin benzoate ແລະ ກົມປູກຝັງໄດ້ສະໜອງຢາໃຫ້ ແລະ ອຸປະກອນຈຳນວນໜຶ່ງຄິດເປັນມູນຄ່າ 125 ລ້ານກີບ, ຢາດັ່ງກ່າວສາມາດນໍາໃຊ້ໄດ້ 2.400 ເຮັກຕາ, ເທົ່າກັບ 26% ຂອງເນື້ອທີ່ຜົນກະທົບ, ຊຶ່ງປະຈຸບັນໄດ້ໝູນງົບປະມານຈັດຊື້ຢາໃຫ້ຊາວກະສິກອນໄດ້ທັງໝົດ ຈຳນວນ 7 ຊຸດ, ໄດ້ຢາທັງໝົດ 7.200 ຊອງ, ຄິດເປັນມູນຄ່າ 252 ລ້ານກີບ.

ນອກຈາກນີ້ ຊາວກະສິກອນໄດ້ຈັດຊື້ຢາມານໍາໃຊ້ເອງຈຳນວນໜຶ່ງ ຕາມການແນະນຳຂອງພະນັກງານວິຊາການ, ຕໍ່ກັບການລະບາດຂອງບົ້ງຝູງສາລີນີ້, ຖ້າການປ້ອງກັນ ແລະ ກໍາຈັດ ບໍ່ທັນກັບສະພາບການອາດເຮັດໃຫ້ເນື້ອທີ່ໆປູກສາລີສຳເລັດໄປແລ້ວນັ້ນ ຖືກບົ້ງເຂົ້າທຳລາຍທັງໝົດ ແລະ ອາດຈະແຜ່ລາມລົງສູ່ເຂົ້ານາ ແລະ ເຂົ້າໄຮ່.

ໃນໄລຍະຜ່ານມາໄດ້ຈັດຝຶກຮົມ ກ່ຽວກັບວົງຈອນຊີວິດ, ການປ້ອງກັນ ແລະ ກຳຈັດ ໃຫ້ພະນັກງານຂັ້ນເມືອງ ສຳເລັດແລ້ວໃນຂອບເຂດ 11 ເມືອງ ແລະ ຝຶກອົບຮົມໃຫ້ຊາວກະສິກອນໄດ້ ຈຳນວນ 65 ບ້ານ, ມີຜູ້ເຂົ້າຮ່ວມ 5.511 ຄົນ, ຍິງ 2.476 ຄົນ, ປະຈຸບັນ ສືບຕໍ່ລົງແນະນໍາເຕັກນິກການປ້ອງກັນກໍາຈັດ, ຈັດຊື້ຢາປາບສັດຕູພືດແຈກຍາຍໃຫ້ບັນດາບ້ານ ແລະລົງນຳພາຊາວກະສິກອນປ້ອງກັນ ແລະ ກຳຈັດ.

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *