ສະມາຄົມຄອບຄົວການນໍາເມືອງແກ່ນທ້າວ ມອບເຄື່ອງຊ່ວຍເຫຼືອຄອບຄົວທີ່ຖືກເຄາະຮ້າຍຈາກໄຟໄໝ້ເຮືອນຢູ່ບ້ານນາບອນ

ໃນວັນທີ 8 ກໍລະກົດ ປີ 2019 ນີ້, ໄດ້ເກີດອັກຄີໄພ ໄຟໄໝ້ເຮືອນປະຊາຊົນຢູ່ບ້ານນາບອນ ເມືອງແກ່ນທ້າວ ແຂວງໄຊຍະບູລີ ຜ່ານການລົງກວດກາຕົວຈິງແລະເກັບກໍາຂໍ້ມູນຄວາມເສຍຫາຍຂອງຫ້ອງການແຮງງານ ແລະ ສະຫວັດດີການສັງຄົມເມືອງ ໃຫ້ຮູ້ວ່າ: ເຮືອນທີ່ຖືກໄຟໄໝ້ ແມ່ນເຮືອນຂອງທ້າວ ຈັນ ຈັນສິລິ ອາຍຸ 56 ປີ ປະຊາຊົນບ້ານນາບອນ ເມືອງແກ່ນທ້າວ ພາຍໃນຄອບຄົວມີຈໍານວນພົນ 3 ຄົນ, ຍິງ 2 ຄົນ.

ເຮືອນຫຼັງດັ່ງກ່າວເປັນເຮືອນສອງຊັ້ນ, ເຄິ່ງໄມ້ເຄິ່ງປູນ ລວມມູນຄ່າເສຍຫາຍທັງໝົດ 200 ລ້ານກີບ ຕາມການສັນນິຖານເບື້ອງຕົ້ນສາເຫດອາດຈະເກີດມາຈາກການແຕ່ງຢູ່ຄົວກິນ ແລ້ວລືມມອດໄຟ ຫຼື ມອດໄຟບໍ່ໝົດ. ເພື່ອເປັນການຊ່ວຍເຫຼືອບັນເທົາທຸກເບື້ອງຕົ້ນໃຫ້ແກ່ຄອບຄົວ ທີ່ໄດ້ຖືກເຄາະຮ້າຍດັ່ງກ່າວ.

ໃນຕອນແລງວັນທີ 9 ກໍລະກົດ 2019 ນີ້, ສະມາຄົມຄອບຄົວການນໍາເມືອງແກ່ນທ້າວ ນໍາໂດຍທ່ານ ນາງ ສົມໝາຍ ລັດສະໝີ ພັນລະຍາວ່າການເຈົ້າເມືອງແກ່ນທ້າວ ແລະ ຄະນະໄດ້ນໍາເອົາເຄື່ອງນອນ ແລະ ເຄື່ອງໃຊ້ພາຍໃນເຮືອນຈໍານວນໜຶ່ງ ໄປມອບໃຫ້ຄອບຄົວທ້າວ ຈັນ ຈັນສິລິ ລວມມູນທັງໝົດ 700.000 ກວ່າກີບ ແລະ ມອບເງິນສົດຊ່ວຍເຫຼືອ 500.000 ກີບ.


ຕໍ່ກັບເຫດການດັ່ງກ່າວ. ທາງອົງການປົກຄອງບ້ານ ແລະ ປະຊາຊົນພາຍໃນບ້ານນາບອນ ໄດ້ເຂົ້າຊ່ວຍເຫຼືອໃນການເກັບມ້ຽນສິ່ງເສດເຫຼືອ ແລະ ປຸກເຮືອນໃຫ້ຢູ່ຊົ່ວຄາວແລ້ວ.

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *