ມອບເງິນຊົດເຊີຍໃຫ້ປະຊາຊົນຜູ່ຖືກຜົນກະທົບຈາກໂຄງການກໍ່ສ້າງທາງເບຕົງຖະໜົນອະນຸວົງເທດສະບານແຂວງໄຊສົມບູນ.

ພິທີມອບ-ຮັບເງິນຄ່າຊົດເຊີຍໃຫ້ປະຊາຊົນຜູ່ທີ່ຖືກຜົນກະທົບຈາກໂຄງການກໍ່ສ້າງທາງເບຕົງ ຖະໜົນອະນຸວົງ ເທດສະບານ #ແຂວງໄຊສົມບູນ ໄດ້ຈັດຂື້ນໃນຕອນບ່າຍຂອງວັນທີ 10 ກໍລະກົດ 2019 ນີ້, ທີ່ຫ້ອງປະຊຸມ #ພະແນກໂຍທາທິການ ແລະ ຂົນສົ່ງ ແຂວງ. ໂດຍການເຂົ້າຮ່ວມເປັນປະທານພິທີມອບ ຂອງທ່ານ ຄຳພຸດ ແກ້ວວົງພອນ, ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງ, ມີບັນດາຄະນະກຳມະການສະເພາະກິດແກ້ໄຂຜົນກະທົບ ຂັ້ນແຂວງ ແລະ ເມືອງອະນຸວົງ, ມີນາຍບ້ານພູຫົວຊ້າງ ແລະ ບ້ານຜາສະຫງົບ ພ້ອມດ້ວຍປະຊາຊົນຜູ່ຖືກຜົນກະທົບ ເຂົ້າຮ່ວມ.


ໂອກາດນີ້ ທ່ານ ຄຳພຸດ ແກ້ວວົງພອນ ໄດ້ມີຄຳເຫັນໂອລົມຕໍ່ພິທີ ຊື່ງທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ບັນດາຄອບຄົວປະຊາຊົນ ທັງສອງບ້ານ ຄື: ບ້ານພູຫົວຊ້າງ ແລະ ບ້ານຜາສະຫງົບ ທີ່ຖືກຜົນກະທົບ ໄດ້ມີນ້ໍາໃຈເສຍສະຫລະຊັບສົມບັດສ່ວນຕົວຂອງຕົນ ເຂົ້າໃນການພັດທະນາປະເທດຊາດ ເວົ້າລວມ-ເວົ້າສະເພາະ ກໍຄືເມືອງອະນຸວົງ, ເທດສະບານ ແຂວງໄຊສົມບູນ ໃຫ້ໄດ້ຮັບການພັດທະນາຕາມແນວທາງນະໂຍບາຍຂອງພັກ-ລັດ ພ້ອມນີ້ ທ່ານຍັງໄດ້ຮຽກຮ້ອງໃຫ້ຄອບຄົວທີ່ຖືກຜົນກະທົບ ຈາກໂຄງການກໍ່ສ້າງທາງເບຕົງຖະໜົນອະນຸວົງ ເທດສະບານແຂວງ ຈົ່ງເຊື່ອໝັ້ນຕໍ່ການນຳພາຂອງພັກ-ລັດ ນຳເອົາເງີນຊົດເຊີຍ

ດັ່ງກ່າວນີ້ ໄປໝູນໃຊ້ພາຍໃນຄອບຄົວໃຫ້ເກີດປະໂຫຍດສູງ ຈາກນັ້ນ ໃນພິທີໄດ້ມອບເງີນຊົດເຊີຍ ໃຫ້ປະຊາຊົນທັງສອງບ້ານທີ່ຖືກຜົນກະທົບ ຈໍານວນ 10 ຄອບຄົວ ລວມເປັນເງີນທັງໝົດ 131.600.000 ກີບ (ໜື່ງຮ້ອຍ ສາມສິບເອັດລ້ານ ຫົກແສນ ກີບ ) ໂດຍການມອບ ຂອງທ່ານ ຄຳພຸດ ແກ້ວວົງພອນ, ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງ ແລະ ຮັບໂດຍ ບັນດາຄອບຄົວທີ່ຖືກຜົນກະທົບ ຈາກໂຄງການດັ່ງກ່າວ ຕາມລຳດັບ.

ພາບ-ຂ່າວ: souksan ounlithikoun

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *