ຈັບຜູ້ຖືກຫາ 3 ຄົນຄາເຮືອນພັກ ພ້ອມຢາຢາບ້າ 80.000 ເມັດ

ໃນວັນທີ 4 ພຶດສະພາ ທີ່ຜ່ານມາ, ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຈຳປາສັກ ໄດ້ເຂົ້າຈັບກຸ່ມພວກຄ້າຂາຍຢາເສບຕິດ ຈໍານວນ 3 ຄົນ ຄື: ທ້າວ ສຸລິຍົງ ຫຼື ໂຢ້ງ ອາຍຸ 24 ປີ ບ້ານໂພນຄຳ ເມືອງສີໂຄດຕະບອງ, ນາງ ອະທິນາ ຫຼື ນີ້ມ ອາຍຸ 21 ປີ ບ້ານດົງປະລານ ເມືອງສີສັດຕະນາກ ນະຄອນຫຼວງວຽງຈັນ ແລະ ທ້າວ ນຸຍ ໄຊຍະພອນ ອາຍຸ 19 ປີ ບ້ານໂພນມ່ວງ ເມືອງແກ້ວອຸດົມ ແຂວງວຽງຈັນ ພ້ອມຂອງກາງຢາບ້າ ຈຳນວນ 80.000 ເມັດ ຢູ່ເຮືອນພັກແຫ່ງໜຶ່ງ ເຂດບ້ານຄັນແຍງ ເມືອງໂພນທອງ ແຂວງຈຳປາສັກ.

ໃນວັນທີ 4 ພຶດສະພາ 2019, ໄດ້ຮັບລາຍງານຈາກແຫຼ່ງຂ່າວວ່າ: ມີຄົນນັດຊື້-ຂາຍຢາບ້າຢູ່ເຮືອນພັກແຫ່ງໜຶ່ງເຂດບ້ານຄັນແຍງ ເມືອງໂພນທອງ. ຈາກນັ້ນ, ເຈົ້າໜ້າທີ່ ປກສ ແຂວງຈຶ່ງໄດ້ນໍາກໍາລັງຕໍາຫຼວດວິຊາສະ ເພາະສົມທົບກັບ ປກສ ເມືອງໂພນທອງ ຕິດຕາມກວດກາເປົ້າໝາຍດັ່ງກ່າວ; ຈົນຮອດ 13:00 ໂມງ ວັນດຽວກັນ ໄດ້ພົບເຫັນເປົ້າໝາຍ 3 ຄົນເຂົ້າໄປພັກຢູ່ໃນເຮືອນພັກຫຼັງດັ່ງກ່າວ ຈຶ່ງກະຈາຍກໍາລັງອ້ອມເຮືອນພັກເຂົ້າຈັບຕົວ ພ້ອມທັງກວດຄົ້ນ ພົບເຫັນຢາບ້າ 40 ມັດ ເທົ່າກັບ 80.000 ເມັດ.

ຢາບ້າຈຳນວນດັ່ງກ່າວເປັນຂອງພວກຕົນແທ້ ໂດຍໄດ້ຮ່ວມກັນເຄື່ອນໄຫວຄ້າຂາຍຢາເສບຕິດນຳກັນມາໄດ້ໄລຍະໜຶ່ງແລ້ວ, ເຊິ່ງມີຜູ້ຊາຍຄົນໜຶ່ງບໍ່ຮູ້ທີ່ຢູ່ເປັນຄົນເອົາມາສົ່ງໃຫ້ໃນແຕ່ລະຄັ້ງ.

ຮອດວັນ ທີ 4 ພຶດສະພາ 2019, ໄດ້ມີລູກຄ້າຂາປະຈໍາຕິດຕໍ່ມາວ່າຕ້ອງການຊື້ຢາບ້າຈໍານວນ 40 ມັດ. ດັ່ງນັ້ນ, ຈຶ່ງພາກັນເອົາຢາບ້າຈໍານວນທີ່ສັ່ງນັ້ນໄປສົ່ງໃຫ້ ໂດຍນັດກັນຢູ່ເຮືອນພັກແຫ່ງໜຶ່ງເຂດບ້ານຄັນແຍງ ເມືອງໂພນທອງ. ພໍໄປຮອດ, ກໍຖືກເຈົ້າໜ້າທີ່ເຂົ້າຈັບຕົວ ພ້ອມຂອງກາງຢາບ້າຈໍານວນດັ່ງກ່າວ.

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *