ຮືຮາ! ພົບຮູບປັ້ນເກົ່າແກ່ ແຕ່ສຸດທ້າຍເປັນພຽງຮູບປັ້ນຈຳລອງ

ຫລັງຈາກທີ່ສັງຄົມສື່ອອນລາຍຕ່າງໆສ້າງຄວາມສົນໃຈຢ່າງ ຮືຮາ ຕໍ່ກັບຮູບປັ້ນຫຸ່ນຄົນ ພາຍຫລັງທີ່ ທ່ານ ບຸນຈັນ ສິມມາລາ ຮອງນາຍບ້ານ ບ້ານໃຫຍ່ເຊກະໝານ ເມືອງ ສາມັກຄີໄຊ ແຂວງອັດຕະປື ໄດ້ພົບເຫັນຮູບປັ້ນຢູ່ກາງປ່າ ເຂດໜອງບົວ ໃນມື້ວັນທີ 9 ກໍລະກົດ 2019 ຜ່ານມາ ເຊິ່ງເປັນຮູບປັ້ນຫຸ່ນຄົນມີສະພາບເກົ່າແກ່ ແລະ ບາງສິ້ນສ່ວນຖືກຫັກພັງເລັກນ້ອຍນັ້ນ.


ໃນຄະນະດຽວກັນ ວິຊາການດ້ານວັດທະນະທຳ ພະແນກ ຖວທ ແຂວງ ອັດຕະປ ືສົມທົບກັບເຈົ້າໜ້າທີ່ກ່ຽວຂ້ອງໄດ້ໄປກວດສອບຢູ່ສະຖານທີ່ພົບເຫັນຕົວຈິງ ແລະ ພິສູດດ້ານວິຊາການ ພົບວ່າ: ຮູບປັ້ນນີ້ ເປັນຮູບປັ້ນຂອງຄົນທົ່ວໄປສ້າງຂຶ້ນ ໂດຍປັ້ນດ້ວຍປູນຊາຍອ່ອນ ເຊື່ອມກັບຫີນຊາຍອ່ອນ ເປັນຮູບປັ້ນມີຮູບຊົງນັກຊາວປະມົງຄົນໜຶ່ງໄລຍະຣາຊະວົງຈີນ ທີ່ສະແດງເຖິງວິຖີການຫາປາຂອງແຕ່ລະໄລຍະ, ຮູບປັ້ນນີ້ ເຂົາເຈົ້າຜະລິດຂຶ້ນໃໝ່ໆ ເພື່ອໃຊ້ປະດັບ ຕາມສະຖານທີ່ຮັບແຂກ ແລະ ສະຖານທີ່ພັກຫລິ້ນຜ່ອນຄາຍອື່ນໆຂອງຜູ້ມັກຮັກດ້ວຍການປະດັບແບບປະສົມປະສານເລົ່ານີ້ເປັນຕົ້ນ


ທ່ານ ທອງສະຫວັນ ມະໂນທຳ ຫົວໜ້າຂະແໜງວັດທະນະທໍາ ພະແນກ ຖວທ ທັງເປັນຜູ້ນຳພາຮ່ວມກັບເຈົ້າໜ້າທີ່ກ່ຽວຂ້ອງ ທີ່ລົງເກັບກຳຂໍ້ມູນຕົວຈິງຢູ່ພື້ນທີ່ປ່າແຫ່ງນັ້ນໃຫ້ຮູ້ວ່າ: ຮູບປັ້ນທີ່ພົບເຫັນນັ້ນ ສະຫລຸບວ່າ ບໍ່ແມ່ນຮູບປັ້ນວັດຖຸບູຮານເກົ່າແກ່ ແຕ່ເປັນພຽງຮູບປັ້ນຜະລິດຂຶ້ນເປັນສິ່ງປະດັບໂຊຕາມເຮືອນຊານບ້ານຊ່ອງ ຫລື ສະຖານທີ່ພັກຫລິ້ນຕ່າງໆເທົ່ານັ້ນ ເຊິ່ງແມ່ນຊາວຈີນເຂົານິຍົມໃຊ້ກັນຫລາຍ.

 

ທ່ານ ກ່າວຕື່ມວ່າ: ຮູບປັ້ນທີ່ພົບເຫັນນີ້ ແມ່ນຖືກມີຄົນເກັບໄປວາງໄວ້ຢູ່ພື້ນທີ່ປ່າຂອງບ້ານດັ່ງກ່າວ ເຊິ່ງແຂວງ ອັດຕະປື ກໍ່ຍັງບໍ່ທັນມີລັກສະນະທີ່ເປັນແບບນີ້ມາກ່ອນຈັກເທື່ອ ດັ່ງນັ້ນ ເພື່ອແກ້ໄຂ ແລະ ປ້ອງກັນບໍ່ໃຫ້ມີລັກສະນະເຊັ່ນນີ້ໃນຕໍ່ໜ້ານັ້ນ ຖ້າມີການພົບເຫັນວັດຖຸບູຮານ ຫລື ສິ່ງແປກເກົ່າແກ່ ໃຫ້ແຈ້ງອຳນາດປົກຄອງບ້ານ ຫລື ຫ້ອງການ ຖວທ ເມືອງ, ຖວທ ແຂວງ ແລະ ເຈົ້າໜ້າທີ່ກ່ຽວຂ້ອງໃຫ້ໄວ ເພື່ອຈະພິສູດຖານຂໍ້ມູນທີ່ມີຈິງນັ້ນໄປຕາມຂັ້ນຕອນໃຫ້ດີຂຶ້ນ ແລະ ຮັດກຸ່ມກວ່າເກົ່າ.


ໂດຍ: ມາລາທິບ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *