ເຂື່ອນໄຟຟ້ານ້ຳງື່ມ 1 ພ້ອມຮັບມືກັບປະລິມານນ້ຳໃນໜ້າເຂື່ອນທີ່ຈະເພີ່ມຂຶ້ນໃນລະດູຝົນປີນີ້

ເຂື່ອນໄຟຟ້ານ້ຳງື່ມ 1 ທີ່ຕັ້ງຢູ່ເມືອງ ແກ້ວອຸດົມ, ແຂວງວຽງຈັນ ພ້ອມແລ້ວທີ່ຈະຮັບມືກັບປະລິມານນ້ຳໃນໜ້າເຂື່ອນທີ່ອາດຈະເພີ່ມຂຶ້ນສູງ ຍ້ອນມີຝົນຕົກໜັກໃນໄລຍະລະດູຝົນປີນີ້. ໃນຂະນະດຽວກັນ ກໍ່ໄດ້ກະກຽມແຜນຊ່ວຍເຫລືອປະຊາຊົນທີ່ອາໃສຢູ່ເຂດລຸ່ມເຂື່ອນໃນກໍລະນີທີ່ຈຳເປັນຕ້ອງປ່ອຍນໍ້າອອກຈາກໜ້າເຂື່ອນເກີນປົກກະຕິ ຊຶ່ງອາດຈະເຮັດເກີດສະພາບນ້ຳຖ້ວມໄວ້ຢ່າງລະອຽດແລ້ວ.

 

ທ່ານ ດາວວຽງ ສຸນັນທະລາດ, ຮອງຜູ້ອໍານວຍການເຂື່ອນໄຟຟ້ານ້ຳງື່ມ 1 ໃຫ້ສໍາພາດວ່າ: ເຂື່ອນໄຟຟ້ານ້ຳງື່ມ 1 ໄດ້ວາງແຜນການບໍລິຫານຈັດການນໍ້າໄວ້ກ່ອນໜ້າລະດູຝົນປີນີ້ຈະມາເຖີງ ໂດຍເລີ່ມຈາກການບໍລິຫານນ້ຳໃນໜ້າເຂື່ອນໄວ້ໃນລະດັບຕ່ຳ ເພື່ອໃຫ້ມີຊ່ອງວ່າງຮອງຮັບປະລິມານນ້ຳຝົນທີ່ອາດຈະເພີ່ມຂຶ້ນເກີນກ່ວາປົກກະຕິ, ພ້ອມທັງໄດ້ຕິດຕໍ່ພົວພັນຮ່ວມມືກັບກົມອຸຕຸນິຍົມ ແລະ ອຸທົກກະສາດຂອງລາວ ແລະ ກົມອຸຕຸນິຍົມຂອງປະເທດເພື່ອນບ້ານ ເພື່ອຕິດຕາມເບິ່ງສະພາບອາກາດ ກໍ່ຄື ປະລິມານນ້ຳຝົນໃນຂອບເຂດເທີງອ່າງໂຕ່ງຂອງເຂື່ອນຢ່າງຕໍ່ເນື່ອງ.
ພ້ອມນີ້ ກໍ່ໄດ້ແຕ່ງຕັ້ງຄະນະຮັບຜິດຊອບລົງຕິດຕາມຢູ່ບັນດາບ້ານທີ່ຢູ່ລຸ່ມເຂື່ອນເພື່ອກວດກາເບິ່ງຈຸດວັດແທກນ້ຳ ແລະ ຈຸດທີ່ສູງເພື່ອເປັນບ່ອນຫລີກໄພໃຫ້ປະຊາຊົນໃນກໍລະນີຈໍາເປັນ ແລະ ການຕັ້ງຈຸດວັດແທກນ້ຳຢູ່ບ່ອນສໍາຄັນຕ່າງໆ.

 

ນອກຈາກນີ້, ຍັງໄດ້ຮ່ວມກັບບັນດາເຂື່ອນທີ່ຢູ່ເທິງເຂື່ອນໄຟຟ້ານ້ຳງື່ມ 1 ລວມເຖິງບັນດາອົງການປົກຄອງເມືອງ ແລະ ບ້ານທີ່ກ່ຽວຂ້ອງໃນເຂດລຸ່ມເຂື່ອນ ສ້າງທີມລະວັງໄພ ແລະ ກູ້ໄພຂຶ້ນຄືທຸກປີຜ່ານມາ, ເພື່ອກຽມຊ່ວຍເຫລືອປະຊາຊົນຢ່າງທັນການໃນເວລາຈໍຳເປັນ ໂດຍກະກຽມອຸປະກອນທີ່ຈໍາເປັນຕ່າງໆ ຢ່າງຄົບຊຸດ.

ທ່ານຮອງຜູ້ອໍານວຍການເຂື່ອນໄຟຟ້ານ້ຳງື່ມ 1 ໃຫ້ຮູ້ຕື່ມວ່າ: ຕາມການປະເມີນຂອງຜູ້ຊ່ຽວຊານທີ່ກ່ຽວຂ້ອງເຫັນວ່າເຂື່ອນໄຟຟ້ານ້ຳງື່ມ 1 ຈະມີອາຍຸການນໍາໃຊ້ໄດ້ປະມານ 100 ປີ ແຕ່ປັດຈຸບັນ ເຂື່ອນແຫ່ງນີ້ມີອາຍຸການ 50 ປີ ໂດຍໄດ້ຮັບການບົວລະບັດຮັກສາ ແລະ ຄຸ້ມຄອງນໍາໃຊ້ເປັນຢ່າງດີ; ປະຊາຊົນທຸກຄົນ ໂດຍສະເພາະຜູ້ທີ່ຢູ່ລຸ່ມເຂື່ອນຕາມລໍານໍ້າງື່ມ ຈົ່ງໝັ້ນໃຈໄດ້ວ່າລະດູຝົນປີນີ້ຈະບໍ່ມີເຫດການຫັກພັງຂອງເຂື່ອນໄຟຟ້ານ້ຳງື່ມ 1 ຄືດັ່ງຫາງສຽງຂອງສັງຄົມທີ່ໄດ້ວິຈານໄວ້ໃນໄລຍະຜ່ານມາ.


ພ້ອມນີ້ ທ່ານຍັງຢັ້ງຢືນຕື່ມວ່າ: ຄະນະບໍລິຫານເຂື່ອນໄຟຟ້ານໍ້າງື່ມ 1 ຈະເຮັດໜ້າທີ່ຂອງຕົນຢ່າງສຸດຄວາມສາມາດ ເພື່ອເຮັດໃຫ້ການບໍລິຫານຈັດການນໍ້າຢູ່ໜ້າເຂື່ອນໃນລະດູຝົນປີນີ້ໃຫ້ດີທີ່ສຸດ ເພື່ອຫລີກຫລ່ຽງບໍ່ໃຫ້ເກີດສະພາບນ້ຳຖ້ວມຢູ່ບັນດາບ້ານທີ່ຢູ່ລຸ່ມເຂື່ອນຄືດັ່ງທີ່ເຄີຍເກີດຂຶ້ນມາແລ້ວເມື່ອປີກາຍນີ້.

ຂ່າວ,​ພາບ: ບຸນຕຽງ​ ຈັນທະວົງ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *