ໜ່ວຍພັກທີ່ຂຶ້ນກັບຄະນະພັກຮາກຖານກອງບັນຊາການ ປກສ ເມືອງຫົງສາ ຈັດພິທີເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ.

ໜ່ວຍພັກທີ່ຂຶ້ນກັບຄະນະພັກຮາກຖານກອງບັນຊາການ ປກສ ເມືອງຫົງສາ ຈັດພິທີເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ, ໃນຕອນບ່າຍຂອງວັນທີ 11 ມິຖຸນາ 2019 ນີ້, ຢູ່ທີ່ສະໂມສອນກອງບັນຊາການດັ່ງກ່າວ, ໂດຍການເປັນປະທານຂອງ ສະຫາຍ ພັທ ຄຳສິນ ຜິວວັນນາ ຄະນະປະຈຳພັກເມືອງ ເລຂາຄະນະພັກຮາກຖານ ຫົວໜ້າກອງບັນຊາການ ປກສ ເມືອງ, ມີຄະນະພັກຮາກຖານ, ເລຂາໜ່ວຍພັກ ພ້ອມດ້ວຍສະມາຊິກພັກເຂົ້າຮ່ວມ.


ໂດຍປະຕິບັດຕາມກົດລະບຽບຂອງພັກສະໄໝທີ X ແລະ ປະຕິບັດຕາມມະຕິຕົກລົງຂອງຄະນະປະຈຳພັກເມືອງຫົງສາ ສະບັບເລກທີ 138/ຄພມ.ຫສ, ລົງວັນທີ 5 ມິຖຸນາ 2019, ວ່າດ້ວຍການອານຸມັດເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ, ໜ່ວຍພັກທີ່ຂຶ້ນກັບຄະນະພັກຮາກຖານກອງບັນຊາການ ປກສ ເມືອງຫົງສາ ເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ ຄັ້ງນີ້ ມີຈຳນວນທັງໝົດ 6 ສະຫາຍ, ຍິງ 2 ສະຫາຍ, ປະກອບມີ ໜ່ວຍພັກພະແນກຕຳຫຼວດ 2 ສະຫາຍ,

ໜ່ວຍພັກພະແນກພະລາ-ກຸ່ມບ້ານ ຈຳນວນ 2 ສະຫາຍ, ຍິງ 1 ສະຫາຍ, ໜ່ວຍພັກພະແນກສັນຕິບານ ຈຳນວນ 1 ສະຫາຍ, ຍິງ 1 ສະຫາຍ ແລະ ໜ່ວຍພັກພະແນກຫ້ອງການ 1 ສະຫາຍ, ໃນໂອກາດນີ້ເລຂາໜ່ວຍພັກແຕ່ລະໜ່ວຍກໍ່ໄດ້ຂື້ນຢັ້ງຢືນຜົນງານ ແລະ ຈັບມືຮັບຮອງເອົາສະມາຊິກພັກສົມບູນໃໝ່ ໂດຍຜ່ານສະໄໝສຳຮອງ 12 ເດືອນ, ເຊິ່ງສະມາຊິກພັກສໍາຮອງແມ່ນໄດ້ຮັບການສຶກສາອົບຮົມການເມືອງແນວຄິດ, ການກໍ່ສ້າງ, ທົດສອບວຽກງານຕົວຈິງ ແລະ ມີຜົນງານໃນການເຄື່ອນໄຫວວຽກງານໃນໄລຍະຜ່ານມາ,

ໃນໂອກາດນີ້ ສະຫາຍ ຄຳສິນ ຜິວວັນນາ ຄະນະປະຈຳພັກເມືອງ ເລຂາຄະນະພັກຮາກຖານ ຫົວໜ້າກອງບັນຊາການ ປກສ ເມືອງ ກໍ່ໄດ້ໃຫ້ກຽດໂອ້ລົມໃຫ້ທິດຊີ້ນຳຕໍ່ກັບສະມາຊິກພັກສົມບູນໃໝ່ເຊິ່ງສະຫາຍໄດ້ເໜັ້ນໜັກໃຫ້ພ້ອມກັນສືບຕໍ່ຕັ້ງໜ້າເອົາໃຈໃສ່ປະຕິບັດກົດລະບຽບຂອງພັກວາງອອກໃຫ້ເຂັ້ມງວດ, ປະກອບສ່ວນໃນການກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ, ເປັນແບບເປັນຢ່າງໃນໝູ່ມະຫາຊົນ ແລະ ປະຕິບັດໜ້າທີ່ວຽກງານຕາມການມອບໝາຍໃຫ້ໄດ້ຮັບຜົນສຳເລັດເປັນຢ່າງດີ.


ຂ່າວ: ບຸນປອນ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *