ອັດຕະປື ຈະຈັດການແຂ່ງຂັນກິລາກ໊ອບ ເພື່ອເປັນການປຸກລະດົມແຫຼ່ງທຶນເຂົ້າໄປຊ່ວຍໜູນໃນການຟື້ນຟູ ແລະ ການພັດທະນາຊີວິດການເປັນຢູ່ປະຊາຊົນຜູ້ປະສົບໄພຢູ່ທີ່ເມືອງ ສະໜາມໄຊ

ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງ ອັດຕະປື ປະທານສະມາຄົມນັກກິລາ ຄະນະຮັບຜິຊອບການກະກຽມວຽກງານການແຂ່ງຂັນ ກິລາກ໊ອບເພື່ອການກຸສົນ ຊິງຂັນກຽດຕິຍຸດຂອງປະທານຄະນະກຳມະການສະເພາະກິດໄພິບັດລະດັບຊາດໃຫ້ຮູ້ຫວ່າງບໍ່ດົນມານນີ້ວ່າ:

ອີງຕາມການຕົກລົງເຫັນດີຂອງສູນກາງ ແຂວງ ອັດຕະປື ກໍ່ໄດ້ສົມທົບກັບຄະນະກຳມະການ ແລະ ກະຊວງທີ່ກ່ຽວຂ້ອງ ພ້ອມກັນຈັດຕັ້ງຄະນະກຳມະການ ເພື່ອກະກຽມໃສ່ງານແຂ່ງຂັນ ກິລາກ໊ອບ ເພື່ອການກຸສົນນີ້ຢ່າງຮີບດ່ວນ ງານດັ່ງກ່າວ ແມ່ນ ຈະໄດ້ຈັດຂຶ້ນໃນ ວັນທີ 29 ມິຖຸນາ 2019 ຢູ່ທີ່ສະໜາມກ໊ອບ ເຂດເສດຖະກິດພິເສດ ດົງໂພສີ ນະຄອນຫຼວງວຽງຈັນ ຈຸດປະສົງ ແມ່ນເພື່ອເປັນການປຸກລະດົມແຫຼ່ງທຶນເຂົ້າໄປຊ່ວຍໜູນໃນການຟື້ນຟູ ແລະ ການພັດທະນາຊີວິດການເປັນຢູ່ປະຊາຊົນຜູ້ປະສົບໄພຢູ່ທີ່ເມືອງ ສະໜາມໄຊ ໃຫ້ມີຊີວິດການເປັນຢູ່ທີ່ດີຂຶ້ນ ເຊິ່ງມາຮອດເວລານີ້

ທາງຄະນະກຳມະການກະກຽມໄດ້ແຕ່ງຕັ້ງຄະນະກຳມະການຮັບຜິດຊອບເປັນທີ່ຮຽບຮ້ອຍແລ້ວ ເປັນຕົ້ນ ແມ່ນ ຄະນະກຳມະການເລື່ອງການເຕັກນິກ ໂດຍໄດ້ມອບໃຫ້ເບື້ອງສະຫາພັນກ໊ອບແຫ່ງຊາດເປັນຜູ້ຮັບຜິດຊອບໃນການກະກຽມ ແລະ ການຈັດການແຂ່ງຂັນ, ເບື້ອງທ້ອງຖິ່ນ ແມ່ນໄດ້ມີການກະກຽມອະນຸກຳມະການເນື້ອໃນ, ພິທີການ, ສະຖານທີ່ ແລະ ການແຂ່ງຂັນຍ້ອງຍໍ.

ການແຂ່ງຂັນກິລາໃນເທື່ອນີ້ ແມ່ນເນັ້ນໃສ່ເນື້ອໃນການລົງໂຄສະນາເຜີຍແຜ່ແຈ້ງໃຫ້ສັງຄົມຮັບຊາບ ແລະ ເນື້ອໃນກ່ຽວກັບການກະກຽມຕ່າງໆ ເພື່ອຂໍການອຸປະຖຳເຂົ່າໃນການຊ່ວຍເຫຼືອຈາກສັງຄົມປະກອບສ່ວນ ຈາກນັ້ນກໍ່ໄດ້ມີການປະຕິບັດກະກຽມຍ້ອງຍໍ ເພື່ອລະນຶກເປັນກຽດຕິຄຸນໃຫ້ແກ່ຜູ້ທີ່ປະກອບສ່ວນໃນລະດັບຕ່າງໆຢ່າງສົມກຽດ, ໄດ້ມີການກະກຽມແຕ່ງຕັ້ງອະນຸກຳມະການເສດຖະກິດການເງິນ, ການປຸກລະດົມຕ່າງໆ ເຊິ່ງໄດ້ເຄື່ອນໄຫວປຸກລະດົມການປະກອບສ່ວນຈາກສັງຄົມໃຫ້ມີຄວາມວ່ອງໄວ, ສະດວກ, ໂປ່ງໄສ ໂດຍຜ່ານລະບົບບັນຊີທະນາຄານ, ແຕ່ງຕັ້ງອະນຸກຳມະການເລື່ອງປະຊາສຳພັນໃນການລົງໂຄສະນາເຜີຍແຜ່ຂໍ້ມູນຂ່າວສານກ່ຽວກັບການແຂ່ງຂັນ ເພື່ອລະດົມທຶນໃຫ້ກວ້າງຂວາງທັງພາຍໃນ ແລະ ຕ່າງປະເທດ.

ທ່ານ ຍັງໄດ້ເວົ້າຕື່ມອີກວ່າ: ໃນໄລຍະຜ່ານມາ ນັບແຕ່ໄດ້ມື້ເຫດໄພພິບັດຈາກເຂື່ອນແຕກເກີດຂຶ້ນນັ້ນ ກໍ່ໄດ້ຮັບການປະກອບສ່ວນຈາກເພື່ອນມະນຸດດ້ວຍກັນທັງພາຍໃນ ແລະ ຕ່າງປະເທດຢ່າງຕໍ່ເນື່ອງ ແຕ່ແນວໃດກໍ່ດີ ມາຮອດເວລານີ້ ການຟື້ນຟູຊີວິດການເປັນຢູ່ຂອງປະຊາຊົນໃຫ້ເຂົ້າສູ່ສະພາວະປົກກະຕິນັ້ນ ທຽບໃສ່ຄວາມຮຽກຮ້ອງຕ້ອງການເຫັນວ່າຍັງບໍ່ທັນພຽງພໍ ເຊິ່ງຍັງມີຫຼາຍອັນຢ່າງມີເຫດຜົນທີ່ຈະຕ້ອງໄດ້ໃຊ້ຈ່າຍເພື່ອຊ່ວຍເຫຼືອເຮັດໃຫ້ຊີວິດການເປັນຢູ່ຂອງປະສົບໄພໃຫ້ດີຂຶ້ນໂດຍໄວ

ດັ່ງນັ້ນ, ການຈັດງານແຂ່ງຂັນກິລາກ໊ອບໃນເທື່ອນີ້ ແມ່ນຈັດເພື່ອເປັນການລະດົມທຶນຈາກສັງຄົມທຸກພາກສ່ວນລວມທັງພາຍໃນ ແລະ ຕ່າງປະເທດ ດ້ວຍການຢາຍບັດເຊີນໃຫ້ບັນດາພາກສ່ວນບໍລິສັດ, ພາກສ່ວນທຸລະກິດພາຍໃນແຂວງ ອັດຕະປື ແລະ ໄດ້ເຊີນບັນດາແຂວງ ໃນທົ່ວປະເທດ ໂດຍຜ່ານຫ້ອງວ່າການແຂວງໃນແຕ່ລະແຂວງສົ່ງເຊີນຕໍ່ໃຫ້ໄປຮອດໄປເຖິງເປົ້າໝາຍຕ່າງໆ ເພື່ອແຈ້ງໃຫ້ທຸກພາກສ່ວນລວມທັງພາກອົງການຈັດຕັ້ງພັກ-ລັດ ແລະ ພາກເອກະຊົນໃນທົ່ວປະເທດ

ທີ່ມີຈິດໃຈສະໝັກໃນການປະກອບສ່ວນເຂົ້າຮ່ວມໃນຂະບວນການແຂ່ງຂັນ ຫຼືວ່າ ຈະປະກອບສ່ວນເປັນທຶນຮອນຕາມຄວາມອາດສາມາດຂອງຕົນກໍ່ສາມາດປະກອບສ່ວນໄດ້ ພິເສດ ຖ້າຫາກພາກສ່ວນໃດ້ມີຄວາມສະດວກດ້ວຍຕົນເອງກໍ່ສາມາດປະກອບສ່ວນໄດ້ໂດຍຜ່ານລະບົບເລກບັນຊີທະນະຄານ 080120001633679001 ຊື່ບັນຊີ THE CHARTY GOLF FOR SANAMXAY ຫຼື ໂທສອບຖາເພີ່ມຕື່ມໄດ້ທີ່ 020 59597891 ຫວັງວ່າ ຄົນລາວຄົງຈະບໍ່ຖິ້ມກັນຢ່າງແນ່ນອນ.

ຂ່າວ: ມາລາທິບ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *