ປະກາດການຈັດຕັ້ງຂັ້ນບັນຊາ ຢູ່ກອງບັນຊາການ ທະຫານແຂວງຫຼວງພະບາງ

ພິທີປະກາດການຈັດຕັ້ງ ພະນັກງານຂັ້ນບັນຊາຂອງກອງບັນຊາການທະຫານແຂວງຫຼວງພະບາງ ໄດ້ຈັດຂື້ນໃນ ວັນທີ 13 ມີຖຸນາ 2019 ນີ້ ຢູ່ສະໂມສອນຂອງກອງບັນຊາການທະຫານແຂວງ ໂດຍເປັນປະທານຂອງ ພົນຕີ ທອງລອຍ ສີລິວົງ ກໍາມະການສູນກາງພັກ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ, ມີ ທ່ານ ບົວທອງ ແພງສະຫວັນ ຮອງເລຂາພັກແຂວງ, ປະທານກວດກາພັກ – ລັດແຂວງ, ພ້ອມດ້ວຍຄະນະພັກ – ຄະນະບັນຊາກອງບັນຊາການ, ອົງການ 5 ຫ້ອງ, ພະນັກງານຫຼັກແຫຼ່ງ ຈາກບັນດາກົມກອງ ທົ່ວກອງບັນຊາການທະຫານແຂວງເຂົ້າຮ່ວມ.

ໂອກາດນີ້ ພົນຈັດຕະວາ ພູມມີ ດາລາພັດ ຫົວໜ້າກົມພະນັກງານ ກົມໃຫຍ່ການເມືອງກອງທັບ ໄດ້ຂື້ນຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການຍົກຍ້າຍ ພົນຈັດຕະວາ ບຸນຊູ ດວງຄໍາມີ ກຳມະການປະຈຳພັກແຂວງ ຫົວໜ້າການເມືອງ ກອງບັນຊາການທະຫານແຂວງຫຼວງພະບາງ ໄປຮັບໜ້າທີ່ໃໝ່ຢູ່ກະຊວງປ້ອງກັນປະເທດ.

ຜ່ານຂໍ້ຕົກລົງ ວ່າດ້ວຍການແຕ່ງຕັ້ງ ພັນໂທ ວິລ່ຽມ ວົງທິສານ ຫົວໜ້າຫ້ອງການເມືອງ ກອງບັນຊາການທະຫານແຂວງຫຼວງພະບາງ ຂື້ນຮັກສາການຫົວໜ້າການເມືອງກອງບັນຊາການ, ພ້ອມທັງແຕ່ງຕັ້ງ ພັນໂທ ແປ້ນຄໍາ ບຸດຈັນແພງ ຫົວໜ້າຫ້ອງການບໍລິຫານກອງບັນຊາການ ເປັນຮອງການເມືອງ ກອງບັນຊາການ ທັງເປັນຫົວໜ້າຫ້ອງການເມືອງ, ພັນໂທ ວິລະສິນ ມິດຕະພອນ ຫົວໜ້າພະແນກໂຄສະນາ ເປັນຫົວໜ້າຫ້ອງການ ແລະ ບໍລິຫານ, ແຕ່ງຕັ້ງ ພັນໂທ ສົມໃຈ ສີສະຫວັດ ເປັນຮອງຫົວໜ້າຫ້ອງການເມືອງ ແລະພັນໂທ ແຕງເງິນ ວົງພະຈັນ ເປັນຮອງຫົວໜ້າຫ້ອງການ ແລະ ບໍລິຫານ ຕື່ມອີກ.


ຕອນທ້າຍ ພົນຕີ ທອງລອຍ ສີລິວົງ ໄດ້ມີຄໍາເຫັນຮຽກຮ້ອງໃຫ້ພະນັກງານຂັ້ນບັນຊາ ທີ່ໄດ້ຮັບການມອບໝາຍໜ້າທີ່ໃໝ່ ຈົງສືບຕໍ່ເສີມຂະຫຍາຍພາລະບົດບາດ, ສິດ ແລະໜ້າທີ່ຂອງຕົນ, ປັບປຸງວິທີເຮັດວຽກ ໃຫ້ເຂົ້າສູ່ລະບຽບແບບແຜນທີ່ທັນສະໄໝ, ຕິດພັນກັບການປັບປຸງແກ້ໄຂຊີວິດການເປັນຢູ່ບົນຈິດໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ຕາມທິດ 4 ປູກ 4 ລ້ຽງ ແລະສືບຕໍ່ສຶກສາອົບຮົມການເມືອງ – ນໍາພາແນວຄິດໃຫ້ແກ່ພະນັກງານ – ນັກຮົບ ມີຄວາມຮັບຮູ້ເຂົ້າໃຈແຈ້ງ ຕໍ່ແນວທາງການເມືອງຂອງພັກໃນໄລຍະໃໝ່.

ໂດຍ: ສົມພອນ ສຸວັນທອນ ນັກຂ່າວກອງບັນຊາການທະຫານແຂວງ.

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *