ຈະ​ສ້າງ ​ແລະ ປັບປຸງ​ແຫ​ລ່ງທ່ອງ​ທ່ຽວ​ ໃຫ້​ໄດ້​ແຂວງ​ລະ 5 ​ແຫ່ງ

ຂປລ. ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ກຳນົດຈຸດສຸມ ພັດ ທະນາ ແຫລ່ງທ່ອງທ່ຽວ ໃຫ້ໄດ້ແຂວງລະ 5 ແຫ່ງ ຢູ່ໃນກອງປະຊຸມ ວຽກງານ ຖວທ ທົ່ວປະເທດ ເມື່ອຕົ້ນປີ 2019, ເຊິ່ງບັນດາ ຮອງເຈົ້າແຂວງ ຜູ້ຊີ້ນຳວຽກງານ ຖວທ ໄດ້ຕົກລົງ ເປັນເອກະພາບ ກັນວ່າ ຈະປະ ຕິບັດໄດ້ ແລະ ຢູ່ໃນວາລະດຳເນີນ ກອງປະຊຸມ ສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ນີ້, ບັນດາ ສະມາຊິກ ສະພາແຫ່ງຊາດ ແມ່ນມີຄວາມ ເປັນຫວງເປັນໄຍ ວ່າທຸກແຂວງໃນຂອບເຂດ ທົ່ວປະເທດ ຈະປະຕິບັດ ໄດ້ຕາມແຜນຫລືບໍ່.

ຕໍ່ກັບບັນຫາດັ່ງກ່າວ, ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງ ຖະແຫລງຂ່າວ, ວັດທະ ນະທຳ ແລະ ທ່ອງທ່ຽວ ກໍໄດ້ໃຫ້ຄຳກະຈ່າງແຈ້ງ ຕໍ່ກອງປະຊຸມ ເນື່ອງຈາກວ່າ ການກຳນົດ ຈຸດສຸມ ພັດທະ ນາແຫລ່ງທ່ອງທ່ຽວ ໃຫ້ໄດ້ແຂວງລະ 5 ແຫ່ງນັ້ນ ບໍ່ໄດ້ໝາຍຄວາມວ່າຈະສ້າງໃໝ່ໝົດ ແຕ່ຈະໄດ້ປັບປຸງບາງແຫ່ງ ທີ່ມີຢູ່ແລ້ວ ໃຫ້ເປັນແຫລ່ງທ່ອງທ່ຽວ ທີ່ດີ ສາມາດດຶງດູດ ນັກທ່ອງທ່ຽວ ໄດ້ຫລາຍຂຶ້ນ ເປັນຕົ້ນ ອາດຈະມີ ການຂະຫຍາຍ ເສັ້ນທາງ ໄປສູ່ສະຖານທີ່ ທ່ອງທ່ຽວ, ປັບປຸງ ອາຄານ ສະຖານທີ່ ແລະ ສິ່ງອຳນວຍ ຄວາມສະດວກຕ່າງໆ

ເພື່ອສ້າງຄວາມປະທັບໃຈ ໃຫ້ແກ່ນັກທ່ອງທ່ຽວ ໄດ້ມາແລ້ວຄິດຢາກກັບມາທ່ຽວອີກ. ສ່ວນການສ້າງໃໝ່ນັ້ນ, ຈະອີງຕາມຄວາມສາມາດ ຕົວຈິງ ໃນແຕ່ລະແຂວງ ເທົ່າທີ່ສາມາດເຮັດໄດ້, ເຊິ່ງແນ່ ນອນແລ້ວ ວ່າບາງແຂວງ ກໍຕ້ອງໄດ້ສູ້ຊົນຕື່ມ ເພື່ອໃຫ້ບັນລຸ ຕາມແຜນການ ແຕ່ບາງແຂວງ ກໍອາດຈະກາຍ ຕົວເລກ ທີ່ກຳນົດໄວ້ແລ້ວ.

ໃນໂອກາດນີ້, ທ່ານ ບໍ່ແສງຄຳ ວົງດາລາ ກໍໄດ້ຮຽກຮ້ອງ ໃຫ້ສະມາຊິກ ສະພາແຫ່ງຊາດ ກໍຄື ສະ ມາຊິກສະພາ ປະຊາຊົນ ຂັ້ນແຂວງ ຈົ່ງຊ່ວຍ ພະແນກ ຖະແຫລງຂ່າວ, ວັດທະນະທຳ ແລະ ທ່ອງທ່ຽວແຂວງ ກໍຄື ອຳນາດ ການປົກຄອງ ທ້ອງຖິ່ນ ເພື່ອຊຸກຍູ້ໃນການຈັດຕັ້ງປະຕິບັດແຜນການດັ່ງກ່າວ, ໃຫ້ບັນລຸ ຕາມຕົວເລກ ຄາດໝາຍ ທີ່ກຳນົດໄວ້.

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *