ກະຊວງພະລັງງານ ແລະບໍ່ແຮ່ ປຶກສາຫາລືກ່ຽວກັບການ ຫຼຸດລາຄາໄຟຟ້າ ໃຫ້ຕໍ່າລົງ

ກະຊວງພະລັງງານ ແລະ ບໍ່ແຮ່ ກຳລັງພະຍາຍາມທີ່ຈະເຮັດໃຫ້ຄ່າຊົມໃຊ້ໄຟຟ້າໃຫ້ຫຼຸດຕໍ່າລົງ ເພື່ອບໍ່ໃຫ້ມີລາຄາແພງເກິນໄປສຳລັບປະຊາຊົນທົ່ວໄປ ແລະ ທຸລະກິດຕ່າງໆ. ຜູ້ຊົມໃຊ້ໄຟຟ້າໃນລາວຈຳນວນຫຼາຍໄດ້ມີຫາງສຽງກ່ຽວກັບຄ່າໄຟທີ່ເພີ່ມຂຶ້ນ. ອັດຕາຄ່າໄຟຟ້າດັ່ງກ່າວແມ່ນຍັງສູງເມື່ອທຽບໃສ່ປະເທດອ້ອມຂ້າງ, ທ່ານ ຄຳມະນິ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ກ່າວໃນກອງປະຊຸມຂະແໜງການພະລັງງານ ແລະ ບໍ່ແຮ່ໄຕມາດທຳອິດ ເຊິ່ງຈັດຂຶ້ນທີ່ນະຄອນຫຼວງວຽງຈັນເມື່ອວັນຈັນທີ່ຜ່ານມາ (3 ມິຖຸນາ 2019) ອີງຕາມການລາຍງານຂອງໜັງສືພິມວຽງຈັນທາມ.

ກອງປະຊຸມດັ່ງກ່າວເມື່ອວັນຈັນຫາວັນອັງຄານທີ່ຜ່ານມາ ມີຕົວແທນຈາກຂະແໜງການພະລັງງານ ແລະ ບໍ່ແຮ່ຫຼາຍພາກສ່ວນເຂົ້າຮ່ວມ ລວມທັງ ນັກລົງທຶນ ແລະ ຄູ່ຮ່ວມພັດທະນາ. ກອງປະຊຸມໄດ້ຖືເອົາໂອກາດນີ້ຫາລືກ່ຽວກັບແຜນ ແລະ ເປົ້າໝາຍການພັດທະນາຂະແໜງການດັ່ງກ່າວ.

ຫົວຂໍ້ທີ່ມີການຍົກຂຶ້ນມາຫາລືປະກອບມີ ຜົນສຳເລັດຂອງໂຄງການລັດເພື່ອຮັບປະກັນການກຳນົດລາຄາຄ່າໄຟໃຫ້ເປັນໄປຕາມລະບຽບກົດໝາຍ, ມີຄຸນນະພາບ ແລະ ສົມເຫດສົມຜົນ, ໂຄງສ້າງທາງດ້ານລາຄາ, ການກວດສອບຄວາມປອດໄພຂອງແຫຼ່ງຜະລິດໄຟຟ້າ ແລະ ການຂະຫຍາຍຕາໜ່າງໄຟຟ້າ, ສະຖານີໄຟຟ້າ ແລະ ສາຍສົ່ງໄຟຟ້າ ເປັນຕົ້ນ.

ໃນປີນີ້, ກະຊວງພະລັງງານ ແລະ ບໍ່ແຮ່ກຳລັງຄາດວ່າຈະສຳເລັດການກໍ່ສ້າງເຂື່ອນໄຟຟ້າພະລັງງານນໍ້າຈຳນວນ 20 ແຫ່ງ ເຊິ່ງມີກຳລັງຕິດຕັ້ງ 2,707 ເມກາວັດ. ທັງນີ້ຈະສາມາດຜະລິດໄຟຟ້າໄດ້ປະມານ 33,874 ກິໂລວັດຊົ່ວໂມງ ຕີເປັນມູນຄ່າປະມານ 16,575 ຕື້ກີບ (ຫຼາຍກວ່າ 1.9 ຕື້ໂດລາສະຫະລັດ). ພະລັງງານໄຟຟ້າທີ່ຜະລິດເພື່ອສົ່ງອອກ ຄາດວ່າຈະບັນລຸ 25,625 ກິໂລວັດໂມງ ເຊິ່ງມີມູນຄ່າປະມານ 1.45 ຕື້ໂດລາສະຫະລັດ.

ພ້ອມນີ້ ລະບົບສາຍສົ່ງຈຳນວນ 7 ສາຍ ຄາດວ່າຈະສຳເລັດໃນອະນາຄົດອັນໃກ້ນີ້ ເຊິ່ງລວມເອົາ 2 ສາຍທີ່ເປັນ 230 ກິໂລໂວນ. ໃນຂະນະທີ່ອີກ 5 ສາຍເປັນສາຍແບບ 115 ກິໂລໂວນ ກຳລັງດຳເນີນການກໍ່ສ້າງຢູ່.

ຂະນະດຽວກັນ ກະຊວງພະລັງງານ ແລະ ບໍ່ແຮ່ ກໍກຳລັງສຸມໃສ່ການພັດທະນາການສະໜອງພະລັງງານໝຸນວຽນ ເພື່ອຫຼຸດຜ່ອນການນຳເຂົ້າຈາກປະເທດອື່ນ.

ທ່ານ ຄຳມະນີ ກ່າວໃນກອງປະຊຸມວ່າ ຈີດີພີ (GDP) ໃນຂະແໜງການພະລັງງານ ແລະ ບໍ່ແຮ່ມີມູນຄ່າ 28,247 ຕື້ກີບ (ປະມານ 3.2 ຕື້ໂດລາສະຫະລັດ) ໃນປີ 2018 ເຊິ່ງເພີ່ມຂຶ້ນຈາກປີ 2017 ເຖິງ 11%.

ທ່ານ ຄຳມະນີ ກ່າວເສີມວ່າ ໃນປັດຈຸບັນ ປະເທດລາວມີເຂືອ່ນໄຟຟ້າພະລັງງານນໍ້າຈຳນວນ 63 ແຫ່ງທີ່ກຳລັງດຳເນີນການຢູ່ ດ້ວຍກຳລັງຕິດຕັ້ງ 7,213 ເມກາວັດ. ເຊື່ອນໄຟຟ້າເຫຼົ່ານີ້ສາມາດຜະລິດພະລັງງານໄຟຟ້າ 37,035 ກິໂລວັດຊົ່ວໂມງຕໍ່ປີ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *