ປາດຄໍເມຍເສຍຊີວິດ ຍ້ອນເມຍບໍ່ຍອມໃຫ້ເງິນຜົວ ໃສ່ຊອງບັດເຊີນງານແຕ່ງດອງ

ຜູ້ເປັນເມຍ ຖືກຂ້າຕາຍ ເພາະຜິດຖຽງດຽວເລື່ອງ ເມຍບໍ່ຍອມໃຫ້ເງິນຜົວ ໃສ່ຊອງບັດເຊີນງານແຕ່ງດອງ ຜົວ-ເມຍ ຢູ່ບ້ານນ້ຳເຫຼືອງໃໝ່ ເມືອງຫຼວງນໍ້າທາ ແຂວງຫຼວງນໍ້າທາ ບໍ່ເຂົ້າໃຈກັນໃນຄອບຄົວ ເນື່ອງຈາກຜູ້ເປັນຜົວຂໍເງິນນໍາເມຍ ເພື່ອໃສ່ຊອງບັດເຊີນງານແຕ່ງດອງ ແຕ່ເມຍປະຕິເສດ ແລ້ວໜີໄປຢູ່ນໍາພີ່ນ້ອງເກືອບ 2 ອາທິດ; ພາຍຫຼັງກັບມາ ແຕ່ບໍ່ສາມາດເຮັດໃຫ້ຄອບຄົວດີຂຶ້ນ ຍິ່ງຜິດຖຽງກັນຮຸນແຮງກວ່າເກົ່າ ຈົນກາຍເປັນສາເຫດໃຫ້ຜົວລົງມືຄາດຕະກຳເມຍ ໂດຍການໃຊ້ມີດປາດຄໍ ແລ້ວກໍປາດຄໍຕົນເອງຕາຍ ເພື່ອໜີຄວາມຜິດ.

ເຈົ້າໜ້າທີ່ພະແນກຕຳຫຼວດສືບສວນ-ສອບສວນ ຫ້ອງຕໍາຫຼວດ ປກສ ແຂວງຫຼວງນໍ້າທາ ໃຫ້ຮູ້ວ່າ:
ເຫດການດັ່ງກ່າວ ເກີດຂຶ້ນໃນວັນທີ 13 ພຶດສະພາ 2019 ຜ່ານມາ, ໂດຍເບື້້ອງຕົ້ນໄດ້ຮັບແຈ້ງຈາກອໍານາດການປົກຄອງບ້ານນ້ຳເຫຼືອງໃໝ່ ວ່າ: ມີຜົວ-ເມຍຂ້າກັນຕາຍ, ຈາກນັ້ນຈຶ່ງປະສານກັບ ປກສ ເມືອງ ແລະ ປກສ ບ້ານ ລົງກວດກາຊັນນະສູດສະຖານທີ່ເກີດເຫດ ພົບເຫັນຜູ້ເສຍຊີວິດ 2 ຄົນ (ຜົວ-ເມຍ) ຊື່ ທ້າວ ຄໍາສຸກ ອາຍຸ 28 ປີ ແລະ ນາງ ເຊຊື ອາຍຸ 26 ປີ ທັງສອງຢູ່ບ້ານນໍ້າເຫຼືອງໃໝ່.

ຜ່ານການຊັນນະສູດຮ່າງຜູ້ເສຍຊີວິດຂອງ ເຈົ້າໜ້າທີ່ຕໍາຫຼວດວິຊາສະເພາະ, ນາງ ເຊຊື ມີ ຮ່ອງຮອຍບາດແຜຖືກຂອງມີຄົມ 1 ຈຸດ ຢູ່ບໍລິເວນຄໍ ກວ້າງ 3,3 ຊັງຕີແມັດ, ຍາວ 9,1 ຊັງຕີແມັດ, ເລິກ 3,3 ຊັງຕີແມັດ. ສ່ວນ ທ້າວ ຄໍາສຸກ ມີຮ່ອງຮອຍບາດແຜຖືກຂອງມີຄົມ 7 ຈຸດ ຢູ່ບໍລິເວນຄໍຍາວ 5 ຊັງຕີແມັດ, ເລິກ 6,6 ຊັງຕີແມັດ ແລະ ຢູ່ບໍລິເວນເຂດໃກ້ຄຽງຮ່າງຂອງຜູ້ຕາຍ ພົບມີດ 1 ດວງ ຍາວປະມານ 60 ຊັງຕີແມັດ. ຜ່ານການເກັບກຳຂໍ້ມູນ ແລະ ເອົາຄຳໃຫ້ການຈາກຜູ້ເຫັນເຫດການ ຊື່ ທ້າວ ຢາເຢະ ຜູ້ເປັນພໍ່ຂອງ ທ້າວ ຄຳສຸກ ກ່າວຕໍ່ເຈົ້າໜ້າທີ່ ວ່າ:

ຜົວ-ເມຍ ໄດ້ແຕ່ງງານຢູ່ຮ່ວມກັນມາເປັນເວລາ 8 ປີ, ມີລູກນໍາກັນ 2 ຄົນ ແລະ ກ່ອນເກີດເຫດ ໃນວັນທີ 28 ເມສາ 2019, ຢູ່ບ້ານນໍ້າເຫຼືອງໃໝ່ ມີງານແຕ່ງດອງ ທ້າວ ຄໍາສຸກ ກໍໄດ້ຖືກຮັບເຊີນໄປຮ່ວມງານ. ສະນັ້ນ, ຜູ້ເປັນຜົວຈຶ່ງໄດ້ຂໍເງິນນຳເມຍ ເພື່ອໃສ່ບັດເຊີນດອງ, ແຕ່ ນາງ ເຊຊື ບໍ່ໃຫ້ ແລ້ວໄດ້ຜິດຖຽງກັນຢ່າງຮຸນແຮງ. ຜູ້ເປັນຜົວ ຂ້າຕົວຕາຍຕາມ, ເຈົ້າໜ້າທີ່ສັນນິຖານ ສາເຫດເກີດຈາກຄວາມຫຶງຫວງຂອງຜູ້ເປັນຜົວ ຕົກມາວັນທີ 29 ເມສາ 2019, ນາງ ເຊຊື ໄດ້ລັກໜີໄປຢູ່ນໍາພີ່ນ້ອງ ຢູ່ປະເທດເພື່ອນບ້ານ ໄດ້ 13 ວັນ, ຮອດວັນທີ 12 ພຶດສະພາ 2019 ຈຶ່ງໄດ້ກັບມາເຮືອນຫາຄອບຄົວ. ຫຼັງຈາກນັ້ນ, ທັງສອງກໍໄດ້ຜິດຖຽງກັນອີກ ເຊິ່ງຄັ້ງນີ້ຮ້າຍແຮງກວ່າເກົ່າຫຼາຍ.

ດ້ວຍຄວາມໂມໂຫຈາກຄວາມບໍ່ເຂົ້າໃຈກັນ, ເຊົ້າມື້ຕໍ່ມາ ທ້າວ ຄຳສຸກ ໄດ້ຕື່ນນອນໄປລ້າງໜ້າ ແລ້ວເຂົ້າໄປເຮືອນຄົວຈັບເອົາມີດ ໄປປາດຄໍ ນາງ ເຊຊື ທີ່ກຳລັງນອນຢູ່ຈົນເສຍຊີວິດ; ຈາກນັ້ນ, ທ້າວ ຄຳສຸກ ໄດ້ເອົາມີດດວງດັ່ງກ່າວ ປາດຄໍຕົນເອງ. ໃນລະຫວ່າງນັ້ນ, ຜູ້ເຫັນເຫດການ ກໍໄດ້ແນມເຫັນ ທ້າວ ຄໍາສຸກ ກໍາລັງປາດຄໍຕົນເອງ ຜູ້ກ່ຽວຈຶ່ງໄດ້ເຂົ້າໄປຍາດເອົາມີດ ແຕ່ບໍ່ທັນ ແລະ ທ້າວ ຄຳສຸກ ກໍເສຍຊີວິດເວລາຕໍ່ມາ.

ພະແນກຕຳຫຼວດສືບສວນ-ສອບສວນ ປກສ ແຂວງຫຼວງນ້ຳທາ ໃຫ້ຮູ້ຕື່ມອີກວ່າ:
ສາເຫດທີ່ຜູ້ເປັນຜົວ ຄາດຕະກຳ ເມຍ ຍ້ອນຄວາມບໍ່ເຂົ້າໃຈກັນພາຍໃນຄອບຄົວ ແລະ ອາດເກີດຈາກຄວາມຫຶງຫວງຂອງຜູ້ເປັນຜົວ ແລະ ອີກຢ່າງໜຶ່ງ ທ້າວ ຄຳສຸກ ຍັງໄດ້ມີການພົວພັນກັບຢາເສບຕິດດ້ວຍ. ຂອບໃຈຂໍ້ມູນຈາກ ນສພ ຄວາມສະຫງົບ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *