“ຂີງ”ໃຊ້ເປັນຢາຍ່ອຍອາຫານ ແລະ ປົວທ້ອງບິດ,ແກ້ອາການຈຸກແໜ້ນ, ທ້ອງອືດ, ຂັບລົມໃນລຳໄສ້

ບັນຍາຍລັກສະນະພືດສາດ
ພືດລຳຫຍ້າລົ້ມລຸກ, ແຜ່ຂະຫຍາຍດ້ວຍຫົວ, ເກີດເປັນສຸມ, ສູງ 50–80 ຊັງຕີແມັດ. ລຳຕົ້ນອອກສີຂຽວອ່ອນ ແລະ ມີເສັ້ນຜ່າກາງນ້ອຍ, ແມ່ນກາບໃບທີ່ສັບຊ້ອນເຂົ້າກັນເປັນລຳຕົ້ນ. ຫົວ: ເມື່ອຍັງອ່ອນອອກສີຂາວອົມສີກຸຫຼາບອ່ອນໆ, ເມື່ອແກ່ຊັ້ນເປືອກນອກຂອງຫົວອອກສີນ້ຳຕານແກ່ຊື່ງເຮົາສາມາດລອກໄດ້ງ່າຍສົມຄວນ. ເນື້ອຂອງຫົວອອກສີນ້ຳຕານຈືດໆ.

ໃບ: ແມ່ນໃບປະເພດດ່ຽວ, ສັບຊ້ອນແບບສະຫຼັບ, ໃບຍາວ ແລະ ແຄບ. ສ່ວນກົກ ແລະ ປາຍຂອງໃບແຫຼມ. ໃບຍາວ 18–20 ຊັງຕີແມັດ, ກວ້າງ 2–3 ຊັງຕີແມັດ. ເນື້ອໃບຕໍ່ໃສ່ກາບໂດຍກົງ. ດອກ: ສີເຫຼືອງອ່ອນໆອອກເປັນຊໍ່, ສັບຊ້ອນກັນເປັນຮວງຊື່ງປົ່ງຂຶ້ນຈາກພື້ນດິນ, ກ້ານຮວງດອກຍາວປະມານ 25 ຊັງຕີແມັດ, ມີກາບສີຂຽວຫຸ້ມແຕ່ລະດອກໄວ້, ແມ່ນດອກປະເພດ 3, ດອກບໍ່ສະໝ່ຳສະເໝີ ແລະ ເປັນດອກທີ່ມີເພດຮ່ວມ.


ໝົດທັງຕົ້ນໂດຍສະເພາະຫົວມີກິ່ນຫອມຍ້ອນບັນຈຸທາດໃຫ້ກິ່ນໃນລັກສະນະນ້ຳມັນລະເຫີຍຫຼາຍຊະນິດ. ພືດຊະນິດນີ້ມີຖິ່ນກຳເນີດຢູ່ເຂດອາຊີ. ປະຈຸບັນການປູກຂີງເພື່ອນຳໃຊ້ຫົວແຜ່ຂະຫຍາຍທົ່ວໄປໃນບັນດາປະເທດເຂດຮ້ອນ ແລະ ຊຸ່ມ. ຂະຫຍາຍດີບ່ອນທີ່ມີແສງແດດພໍຄວນ.

ບັນຍາຍການນຳໃຊ້
ຊ່ວຍຫຼຸດຜົນຂ້າງຄຽງຈາກສານເຄມີທີ່ໃຊ້ໃນການຮັກສາມະເຮັງ. ດັ່ງນັ້ນຄວນຮັບປະທານຂີງຄວບຄູ່ກັນໄປກັບການຮັກສາມະເຮັງຈະເປັນຜົນດີ. ດອກໃຊ້ເປັນຢາຍ່ອຍອາຫານ ແລະ ປົວທ້ອງບິດ.
ຮາກ ແລະ ເຫງົ້າມີສ່ວນໃຫ້ຈະເລີນອາຫານດ້ວຍການໃຊ້ເຫງົ້າສົດນຳມາຕົ້ມກັບນ້ຳດື່ມກໍ່ຈະໄດ້ເປັນຢາຂົມຈະເລີນອາຫານ, ໃຊ້ແກ້ໄຂ້ດ້ວຍການນຳຂີງສົດມາຄັ້ນນ້ຳໃຫ້ໄດ້ປະມານເຄິ່ງຖ້ວຍແລ້ວປະສົມນ້ຳເຜີ້ງ 1 ບ່ວງກາເຟ ນຳມາຕົ້ມກັບນ້ຳ 2 ຖ້ວຍ ແລ້ວນຳມາດື່ມວັນລະ 3 ຄັ້ງ ຈະຊ່ວຍບັນເທົາອາຫານໄດ້.

ຊ່ວຍແກ້ປັນຫາຜົມຫຼົ່ນ, ຫົວລ້ານດ້ວຍການນຳເຫງົ້າສົດໄປຂາງໄຟຈົນອຸ່ນແລ້ວນຳມາຕຳໃຫ້ແຫຼັກນຳມາປົກບໍລິເວນທີ່ມີຜົນຫຼົ່ນ ວັນລະ 2 ຄັ້ງຈົນອາການດີຂຶ້ນ ຫຼື ອີກວິທີກໍ່ຄືຄັ້ນເອົາສະເພາະນ້ຂີງມາປະສົມກັບນ້ຳມັນໝາກກອກແລ້ວນຳມາໝັກຜົມ, ນວດໃຫ້ທົ່ວຫົວປະມານ 30 ນາທີ ກໍ່ຊ່ວຍຫຼຸດປັນຫາຜົມຫຼົ່ນໄດ້ຄືກັນແຖມຍັງຊ່ວຍໃຫ້ຜົມງາມ, ແຂງແຮງ, ນຸ່ມ ແລະ ບໍ່ຂາດງ່າຍອີກດ້ວຍ.

ແກ້ອາການຈຸກແໜ້ນ, ທ້ອງອືດ, ຂັບລົມໃນລຳໄສ້ດ້ວຍການນຳຂີງແກ່ມາທຸບພໍແຫຼກຖອກນ້ຳຮ້ອນລົງໄປເຄິ່ງແກ້ວແລ້ວປິດຝາຕັ້ງປະໄວ້ປະມານ 5 ນາທີ ແລ້ວນຳມາດື່ມລະຫວ່າງມື້ອາຫານ.
ຂອບໃຈຂໍ້ມູນຈາກ: ພາເຂົ້າລາວ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *