52 ຫລັງຄາເຮືອນຂອງເມືອງເງິນ ຖືກຜົນກະທົບຈາກລົມພາຍຸ

ໃນເວລາ 23 ໂມງ ຂອງຄ່ຳຄືນວັນທີ 23 ເມສາ 2019 ນີ້, ທີ່ບ້ານນ້ຳທົນ ແລະ ບ້ານດອນສະຫວ່າງ, ເມືອງເງິນ, ແຂວງ ໄຊຍະບູລີ ໄດ້ເກີດມີໄພພິບັດທາງທຳມະຊາດ ກໍ່ຄື ລົມພະຍຸ ພັດເຮືອນຂອງປະຊາຊົນຢ່າງຮຸນແຮງ, ເຊີ່ງໄດ້ເຮັດໃຫ້ມີບ້ານເຮືອນຂອງປະຊາຊົນ, ຫ້ອງການບ້ານ ແລະ ໂຮງຮຽນ ເສຍຫາຍ ເປັນຈຳນວນຫຼາຍ.

ດັ່ງນັ້ນ, ໃນວັນທີ 24 ເມສາ 2019, ທ່ານນາງ ບຸນພັກ ອິນທະປັນຍາ, ກຳມະການຄະນະປະຈຳພັກແຂວງ, ຮອງເຈົ້າແຂວງ ແລະ ປະທານຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງໄຊຍະບູລີ, ພ້ອມດ້ວຍທ່ານນາງ ແພງຈັນ ແກ້ວມະນີວົງ, ກໍາມະການພັກແຂວງ, ຫົວໜ້າພະແນກແຮງງານສະຫວັດດີການ-ສັງຄົມແຂວງ ແລະ ທີມງາານ ຈຶ່ງໄດ້ລົງໄປກວດກາຕົວຈິງທີ່ບ້ານນ້ຳທົນ ແລະ ບ້ານດອນສະຫວ່າງ ຢ່າງຮີບດ່ວນ, ທັງເພື່ອໃຫ້ຄວາມອົບອຸ່ນ ແລະ ໃຫ້ກຳລັງໃຈຕໍ່ຜູ້ປະສົບເຄາະຮ້າຍໃນຄັ້ງນີ້.

ໃນໂອກາດນີ້, ທ່ານ ບຸນມີ ຈັນທິບ, ກຳມະການພັກແຂວງ, ເລຂາພັກເມືອງ ແລະ ເຈົ້າເມືອງໆເງິນ ໄດ້ລາຍງານເຫດການ ແລະ ການເກັບກຳຂໍ້ມູນຄວາມເສຍຫາຍໃນເບື້ອງຕົ້ນ ໃຫ້ທາງທີມງານຂອງແຂວງ ໄດ້ຮັບຊາບ. ໃນເຫດການລົມພາຍຸພັດເຮືອນຂອງປະຊາຊົນໃນຄັ້ງນີ້ ໄດ້ມີບ້ານທີ່ໄດ້ຮັບຜົນກະທົບທັງໝົດ ຈຳນວນ 2 ບ້ານຄື: ບ້ານນ້ຳທົນ ແລະ ບ້ານດອນສະຫວ່າງ, ນັບທັງ ມີເຮືອນຂອງປະຊາຊົນ, ຫ້ອງການບ້ານ ແລະ ໂຮງຮຽນ ເສຍຫາຍອີກ ທັງໝົດ 53 ຫຼັງ, ໂດຍໃນນີ້ ບ້ານນ້ຳທົນ ມີເຮືອນ 16 ຫຼັງ, ບ້ານດອນສະຫວ່າງ ມີເຮືອນ 37 ຫຼັງ, ແລະ ມີຈຳນວນພົນທັງໝົດ 300 ຄົນ, ຍິງ 155 ຄົນ; ເຮືອນທີຖືກເສຍຫາຍໜັກ ມີຈຳນວນ 15 ຫຼັງ, ໂຮງຮຽນ 1 ຫຼັງ, ຫ້ອງການບ້ານ 1 ຫຼັງ ລວມມູນຄ່າຄວາມເສຍຫາຍ ຈາກການລົງເກັບກຳຂໍ້ມູນເບື້ອງຕົ້ນ 276,504,000 ກີບ.

ດ້ວຍເຫດນີ້, ທາງຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງ ຈຶ່ງໄດ້ນຳພາ ພະນັກງານ, ທະຫານ-ຕຳຫຼວດ ລົງຊ່ວຍເຫຼືອຢ່າງຮີບດ່ວນ, ເປັນຕົ້ນແມ່ນ ໄດ້ຊ່ວຍສ້ອມແປງ ເຮືອນທີ່ຖືກເສຍຫາຍ, ແລະ ຊ່ວຍເກັບມ້ຽນເຄື່ອງຂອງ ແລະ ເກັບມ້ຽນສິ່ງເສດເຫຼືອຕ່າງໆຕື່ມອີກ, ພ້ມທັງ ໄດ້ມອບເຄື່ອງອຸປະກອນທີ່ຈຳເປັນຈຳນວນໜຶ່ງ, ໂດຍ ແມ່ນ ທາງອົງການປົກຄອງເມືອງເປັນຜູ້ສະໜອງໃຫ້ ເຊັ່ນ: ກະເບື້ອງ, ສັງກະສີ, ເຫຼັກຕາປູ, ປູນຊີເມັນ, ເປັນຕົ້ນ.
ຈາກນັ້ນ, ທາງຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງ ກໍ່ໄດ້ມອບເງິນຊ່ວຍເຫຼືອບັນເທົາທຸກເບື້ອງຕົ້ນ ມູນຄ່າ 20 ລ້ານກີບ ໃຫ້ທາງອົງການປົກຄອງເມືອງ ເຊີ່ງໃຫ້ກຽດຮັບໂດຍແມ່ນທ່ານ ເຈົ້າເມືອງໆເງິນ.
ໂດຍ: ອິນແປງ ແຫວນຄຳ ຫ້ອງການ ຖວທ ເມືອງເງິນ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *