ເຫດຍິງກັນເສຍຊີວິດ ຍ້ອນຫຶງຫວງເມຍ ທີ່ນະຄອນໄກສອນ (ມີຄລິບ)

ພະແນກສືບສວນ-ສອບສວນ ກອງບັນຊາການ ປກສ ແຂວງສະຫວັນນະເຂດ ລາຍງານໃຫ້ຊາບວ່າ ໃນຄັ້ງວັນທີ 13 ເມສາ 2019 ເວລາ 18 ໂມງ 50 ນາທີ ທາງເຈົ້າຫນ້າທີ່ ປກສ ແຂວງສະຫວັນນະເຂດ ໄດ້ຮັບລາຍງານທາງໂທລະສັບຈາກເຈົ້າຫນ້າທີ່ວິຊາສະເພາະ ປກສ ນະຄອນໄກສອນພົມວິຫານວ່າ ໄດ້ມີເຫດຍິງກັນຢູ່ບ້ານ ດົງນາຄຳ ນະຄອນໄກສອນພົມວິຫານ ແຂວງສະຫວັນນະເຂດ ເມື່ອໄດ້ຮັບລາຍງານແລ້ວ ທາງເຈົ້າຫນ້າທີ່ວິຊາສະເພາະຈຶ່ງໄດ້ປະສານສົມທົບກັບພາກສ່ວນທີ່ກ່ຽວຂ້ອງລົງກວດກາຊັນນະສູດສະຖານທີ່ເກີດເຫດ ເມື່ອລົງໄປຮອດຈຸດແລ້ວເຫັນວ່າ ເຫດການແມ່ນເກີດຂື້ນແທ້ຈິງ ຢູ່ເຮືອນຂອງທ້າວດາວເພັດ ອາຍຸ 46 ປີ ບ້ານດົງນາຄຳ ນະຄອນໄກສອນພົມວິຫານ ແຂວງສະຫວັນນະເຂດ ຜ່ານການສອບຖາມພະຍານອ້ອມຂ້າງຈຶ່ງຮູ້ວ່າ: ຜູ້ທີ່ໄດ້ຮັບບາດເຈັບມີຈຳນວນ 2 ຄົນ ແລະມີຜູ້ເສຍຊີວິດ 1 ຄົນ ຄື

1. ທ້າວ ເດັດ ອາຍຸ 30 ປີ ອາຊີບກຳມະກອນ ຖືກຍິງຢູ່ເອິກເບື້ອງຊ້າຍ ຈຳນວນ 1 ບາດ (ເສຍຊີວິດ)

2. ນາງ ຈິບ ອາຍຸ 28 ປີ ຢູ່ບ້ານຫົວເມືອງຖືກຍິງຢູ່ຂາ 1 ບາດ

3. ທ້າວດາວເພັດ ອາຍຸ 46 ປີ ບ້ານດົງນາຄຳ ຖືກຍິງຢູ່ບໍລິເວນຫນ້າຈຳນວນ 1 ບາດ ປັດຈຸບັນແມ່ນໄດ້ຮັກສາໂຕຢູ່ທີ່ໂຮງຫມໍມຸກດາຫານ (ປະເທດໄທ)

ສ່ວນຜູ້ລົງມືກໍ່ເຫດແມ່ນ ທ້າວ ໜໍ່ສະຫວັນ ອາຍຸ 41 ປີ ອາຊີບ ພະນັກງານທະຫານ ແຂວງ ຢູ່ບ້ານດົງດຳດວນ ນະຄອນໄກສອນພົມວິຫານ ແຂວງສະຫວັນນະເຂດ (ປັດຈຸບັນໄດ້ເຂົ້າມອບໂຕກັບເຈົ້າຫນ້າທີ່ ປກສ ນະຄອນໄກສອນພົມວິຫານແລ້ວ)

 

ສ່ວນສາເຫດ ແລະແຮງຈູງໃຈທີ່ພາໃຫ້ຜູ້ກ່ຽວລົງມືກໍ່ເຫດໃນຄັ້ງນີ້ ແມ່ນຍ້ອນຄວາມຫຶງຫວງເມຍ ແລະທຳຮ້າຍຮ່າງກາຍເມຍຈົນໄດ້ຮັບບາດເຈັບ ຈາກນັ້ນຈຶ່ງໄດ້ມີຄົນເຂົ້າມາຫ້າມ ແລ້ວທຳຮ້າຍຮ່າງກາຍຜູ້ກ່ຽວ ຈຶ່ງເຮັດໃຫ້ຜູ້ກ່ຽວມີຄວາມແຄ້ນ ຈຶ່ງໄດ້ກັບເມືອເອົາປືນຢູ່ເຮືອນແລ້ວກັບມາກໍ່ເຫດ

Be the first to comment

Leave a Reply

Your email address will not be published.


*