ເຈົ້າຫນ້າທີ່ການຄ້າແຂວງຄຳມ່ວນ ຢຶດນໍ້າມັນເຖື່ອນໄດ້ 5.000 ລິດ

ເຈົ້າໜ້າທີ່ກວດກາການຄ້າ ພະແນກອຸດສາຫະກຳ ແລະ ການຄ້າ ແຂວງຄໍາມ່ວນ ໄດ້ລົງກວດກາ ແລະ ເຂົ້າຈັບກຸມຂະບວນການຄ້າຂາຍນໍ້າມັນນອກລະບົບຢູ່ເມືອງຍົມມະລາດ ແຂວງຄໍາມ່ວນ ເຊິ່ງພົບການຊື້ – ຂາຍນໍ້າມັນນອກລະບົບ 3 ກໍລະນີ ລວມປະລິມານນໍ້າມັນຫຼາຍກວ່າ 5 ພັນລິດ.


ອີງຕາມບົດລາຍງານ ເລກທີ 015/ກຄພນ ລົງວັນທີ 11 ມີນາ 2019 ຂອງຂະແໜງການຄ້າພາຍໃນ ພະແນກອຸດສາຫະກຳ ແລະ ການຄ້າ ແຂວງຄໍາມ່ວນ ເລື່ອງ: ກວດກາການລັກລອບຊື້ – ຂາຍນ້ຳມັນນອກລະບົບຢູ່ຕາມສາຍທາງ ເລກທີ 12 ແລະ ຮ້ານຂາຍຍ່ອຍທົ່ວໄປເຂດເມືອງທ່າແຂກ – ຍົມມະລາດ.
ຂະແໜງການຄ້າພາຍໃນ ຂໍຖືເປັນກຽດລາຍງານໃຫ້ທ່ານຊາບກ່ຽວກັບການລົງກວດກາລັກລອບຊື້ – ຂາຍສິນຄ້ານອກລະບົບ ( ນ້ຳມັນເຊື້ອໄຟ ) ຢູ່ເຂດເມືອງທ່າແຂກ ແລະ ເຂດເມືອງຍົມມະລາດ ເຊິ່ງມີລາຍລະອຽດດັ່ງນີ້:

1. ລົງກວດກາຢູ່ບ້ານຊຽງລຽບ ເມືອງທ່າແຂກ ກວດພົບລົດບັນທຸກສິນຄ້າ ໝາຍເລກທະບຽນ 71 – 1051 ( ຈັງຫວັດສະລະບູລີ ປະເທດໄທ ) ກຳລັງມີການຊື້ – ຂາຍນ້ຳມັນເຊື້ອໄຟນອກລະບົບໃຫ້ຮ້ານຂາຍເຄື່ອງຍ່ອຍຕາມເສັ້ນທາງ, ຜ່ານການກວດຕົວຈິງພົບເຫັນມີຈຳນວນນ້ຳມັນເຊື້ອໄຟ ( ກາຊວນ ) 1 ຕຸກ ປະມານ 20 ລິດ. ດັ່ງນັ້ນ, ເຈົ້າໜ້າທີ່ພວກເຮົາຈຶ່ງໄດ້ສ້າງບົດບັນທຶກເຕືອນທັງຜູ້ຊື້ ແລະ ຜູ້ຂາຍ ຫ້າມບໍ່ໃຫ້ຊື້ – ຂາຍນ້ຳມັນຊະຊາຍທີ່ຜິດຕໍ່ລະບຽບກົດໝາຍ ( ພ້ອມທັງຢຶດນ້ຳມັນດັ່ງກ່າວ ).


2. ລົງກວດກາຢູ່ເຂດບ້ານດອຍເປືອນ ເມືອງຍົມມະລາດ ( ຕາມການລາຍງານຂອງພົນລະເມືອງດີ ) ໄດ້ກວດກາຮ້ານອາຫານຂອງຊາວຫວຽດນາມ ທີ່ມີການຊື້ – ຂາຍນ້ຳມັນນອກລະບົບ, ຜ່ານການກວດຕົວຈິງ.
– ຮ້ານທີ 1 ພົບເຫັນນ້ຳມັນກາຊວນ ຈຳນວນ 24 ຝຸ່ຍ ( 1 ຝຸ່ຍ ປະມານ 200 ລິດ ) ແລະ ລົດຮຸນໄດ 1 ຄັນ ທີ່ບັນທຸກຝຸ່ຍນ້ຳມັນຢູ່.
– ຮ້ານທີ 2 ພົບເຫັນນ້ຳມັນກາຊວນ ຈຳນວນ 5 ຝຸ່ຍ ( 1 ຝຸ່ຍ ປະມານ 200 ລິດ ).

 

( ສ່ວນນ້ຳມັນດັ່ງກ່າວແມ່ນບໍ່ມີເອກະສານຫຍັງ ) ສ່ວນຄ່ານ້ຳມັນ, ນ້ຳໜັກ ແລະ ບໍລິມາດແມ່ນຍັງບໍ່ທັນໄດ້ວັດແທກ ).
ດັ່ງນັ້ນ, ນ້ຳມັນດັ່ງກ່າວຈຶ່ງໄດ້ອາຍັດມາຝາກສາງນ້ຳມັນເຊື້ອໄຟລາວໄວ້ ສ່ວນລົດຮຸນໄດແມ່ນເອົາມາປະໄວ້ຢູ່ພະແນກອຸດສາຫະກຳ ແລະ ການຄ້າແຂວງ.

Be the first to comment

Leave a Reply

Your email address will not be published.


*