ສະເປນ ສົງໄສ CIA ກ່ຽວຂ້ອງກັບເຫດບຸກລຸກສະຖານທູດເກົາຫຼີເຫນືອ

ສຳນັກຂ່າວຕ່າງປະເທດລາຍງານຈາກນະຄອນມາດຣິດປະເທດສະເປນ ເມື່ອວັນທີ່ 15 ມີນາ 2019 ໂດຍອ້າງຈາກລາຍງານຂອງສື່ທ້ອງຖິ່ນຫລາຍແຫ່ງໃນສະເປນ ເຊື່ງສຳພາດແຫຼງຂ່າວດ້ານການສືບສວນຂອງສຳນັກງານຕຳຫຼວດແຫ່ງຊາດ ແລະສູນຂ່າວກອງແຫ່ງຊາດຂອງສະເປນ (ຊີເອັນໄອ) ກ່ຽວກັບເຫດການກຸ່ມຊາຍຢ່າງຫນ້ອຍ 10 ຄົນ ໃສ່ຫມວກໄຫມພົມອຳພາງໃບຫນ້າ ບຸກລຸກເຂົ້າພາຍໃນສະຖານເອກອັກຄະລັດຖະທູດເກົາຫຼີເຫນືອປະຈຳນະຄອນມາດຣິດ ເມື່ອຊ່ວງບ່າຍຂອງວັນທີ່ 22 ກຸມພາທີ່ຜ່ານມາ ແລ້ວທຳຮ້າຍຮ່າງກາຍພ້ອມທັງ “ສືບປາກຄຳ” ເຈົ້າຫນ້າທີ່ຂອງສະຖານເອກອັກຄະລັດຖະທູດຊື່ງກຳລັງປະຕິບັດຫນ້າທີ່ຢູ່ນັ້ນ ຄົນຮ້າຍຢ່າງຫນ້ອຍ 2ຄົນ ແທ້ຈິງແລ້ວມາຈາກສຳນັກຂ່າວກອງກາງສະຫະລັດ (ຊີໄອເອ)

ລາຍງານລະບຸອີກວ່າ ກຸ່ມຜູ້ບຸກລຸກນຳຄອມພິວເຕີ ແລະອຸປະກອນການສື່ສານໃນສະຖານເອກອັກຄະລັດຖະທູດໄປນຳ ຂະນະທີ່ເຈົ້າຫນ້າທີ່ຍິງຄົນຫນື່ງຂອງສະຖານເອກອັກຄະລັດຖະທູດຫຼົບຫນີອອກມາໄດ້ດ້ວຍການໂດດລົງມາຈາກປ່ອງຢ້ຽມຊັ້ນສອງ ແລ້ວແລ່ນອອກມາຮ້ອງຂໍຄວາມຊ່ວຍເຫຼືອຈາກປະຊາຊົນທີ່ສັນຈອນຜ່ານໄປມາ ຈົນກະທັ້ງມີພົນລະເມືອງດີແຈ້ງຕຳຫຼວດ ຢ່າງໃດກໍ່ຕາມ ເມື່ອເຈົ້າຫນ້າທີ່ໄປຍັງທີ່ເກີດເຫດ ພົບກັບຊາຍຊາວເອເຊຍຄົນຫນື່ງຊື່ງກ່າວວ່າ “ບໍ່ມີຫຍັງເກີດຂື້ນ” ແຕ່ຕໍ່ຈາກນັ້ນພຽງບໍ່ເທົ່າໃດນາທີ ມີລົດຫຼູ 2 ຄັນແລ່ນອອກໄປຈາກສະຖານເອກອັກຄະລັດຖະທູດແລ້ວຖືກຈອດຖິ້ມໄວ້ແຄມຫົນທາງສາຍຫນື່ງບໍ່ຫ່າງອອກໄປຫລາຍ ເມື່ອຕຳຫຼວດເຂົ້າໄປກວດສອບພົບເຈົ້າຫນ້າທີ່ຊາວເກົາຫຼີເຫນືອຂອງສະຖານເອກອັກຄະລັດຖະທູດ 8 ຄົນໃນສະພາບມີຖົງຄຸມຫົວແລະມີຮ່ອງຮອຍຂອງການຖືກທຳຮ້າຍຮ່າງກາຍ

ດ້ານແຫຼ່ງຂ່າວຂອງສຳນັກງານຕຳຫຼວດແຫ່ງຊາດສະເປນເຜີຍກັບສື່ທ້ອງຖິ່ນຫລາຍແຫ່ງ ວ່າກຸ່ມຄົນຮ້າຍມີຄວາມເປັນມືອາຊີບ ແລະກຽມການມາເປັນຢ່າງດີ ໂດຍໃຊ້ເວລາບໍ່ດົນ ແລະເກັບໄປພຽງສິ່ງທີ່ຕ້ອງການນັ້ນຄືອຸປະກອນສື່ສານອີເລັກໂທນິກ ແລະຄອມພິວເຕີ ເບື້ອງຕົ້ນເຈົ້າຫນ້າທີ່ເຊື່ອວ່າເປົ້າຫມາຍຂອງການກໍ່ເຫດຄັ້ງນີ້ຄືການຄົ້ນຫາຂໍ້ມູນກ່ຽວກັບທ່ານຄິມ ຮາຢອກ-ຊອລ ອາດີດເອກອັກຄະລັດຖະທູດເກົາຫຼີເຫນືອປະຈຳນະຄອນມາດຣິດ ຊື່ງຖືກເນລະເທດເມື່ອປີ 2017 ຈາກການທົດສອບລະເບີດນິວເຄຼຍຂອງລັດຖະບານປຽງຢາງ ແຕ່ປັດຈຸບັນທ່ານຄິມ ຮາຢອກ-ຊອລ ໄດ້ຮັບການແຕ່ງຕັ້ງຈາກທ່ານຄິມ ຈອງ-ອຶນ ຜູ້ນຳສູງສຸດ ໃຫ້ເຮັດຫນ້າທີ່ທູດພິເສດຂອງເກົາຫຼີເຫນືອໃນການເຈລະຈາກັບອາເມຣິກາ

ທັງນີ້ ເຫດການດັ່ງກ່າວເກີດຂື້ນພຽງບໍ່ເຖິງ 1 ອາທິດ ຫຼັງການພົບຫາລືລະຫວ່າງປະທານາທິບໍດີໂດນັລ ທຣັມ ຜູ້ນຳອາເມຣິກາກັບທ່ານຄິມ ຈອງ-ອຶນ ທີ່ນະຄອນຮ່າໂນຍ ເມືອງຫຼວງຂອງຫວຽດນາມເມື່ອທ້າຍເດືອນທີ່ຜ່ານມາ ເຊື່ງທ່ານຄິມ ຮາຢອກ-ຊອລ ເປັນຫນື່ງໃນຄະນະຜູ້ຕິດຕາມ ນອກຈາກນີ້ ຍັງເປັນທີ່ຫນ້າສັງເກດອີກວ່າຫຼັງເກີດເຫດບໍ່ມີການແຈ້ງຄວາມ ແລະລັດຖະບານສະເປນປະຕິເສດໃຫ້ຂໍ້ມູນວ່າເພາະເຫດໃດຈື່ງເຊື່ອວ່າຜູ້ກໍ່ເຫດຢ່າງນ້ອຍ 2 ຄົນ ມີຄວາມກ່ຽວຂ້ອງກັບຊີໄອເອຂະນະທີ່ລັດຖະບານອາເມຣິກາແລະຊີໄອເອປະຕິເສດໃຫ້ຄວາມເຫັນໃນເລື່ອງນີ້

Be the first to comment

Leave a Reply

Your email address will not be published.


*