ເມືອງສະໝ້ວຍ ຈະລຶບລ້າງຄອບຄົວທຸກຍາກ 250 ຄອບຄົວ

ໃນປີ 2019 ນີ້ ເມືອງສະໝ້ວຍ ຈະສຸມໃສ່ສ້າງບ້ານພັດທະນາໃຫ້ໄດ້ 3 ບ້ານ ຄື: ບ້ານເທສະບານ, ບ້ານລະຮາງ ແລະ ບ້ານຕັງໂກ, ພ້ອມທັງຈະສູ້ຊົນລຶບລ້າງບ້ານທຸກຍາກໃຫ້ໄດ້ 3 ບ້ານ ແລະ ຄອບຄົວທຸກຍາກໃຫ້ໄດ້ 250 ຄອບຄົວ ເຮັດໃຫ້ປະຊາຊົນຫລຸດພົ້ນອອກຈາກຄວາມທຸກຍາກ.

ທ່ານ ຄຳຕາ ໂຮ່ຊົງເລືອງ ເຈົ້າເມືອງສະໝ້ວຍ ໄດ້ໃຫ້ຮູ້ວ່າ: ເພື່ອເຮັດໃຫ້ແຜນສູ້ຊົນດັ່ງກ່າວບັນລຸຕາມຄາດໝາຍນັ້ນ ພວກເຮົາຈະຕ້ອງໄດ້ປັບປຸງອົງການຈັດຕັ້ງຂັ້ນບ້ານໃຫ້ມີຄວາມໜັກແໜ້ນເຂັ້ມແຂງ, ປຸກລະດົມຂະບວນການພັດທະນາເສດຖະກິດ-ສັງຄົມ,ປ້ອງກັນຊາດ-ປ້ອງກັນຄວາມສະຫງົບ, ຮັບປະກັນໃຫ້ມີຄວາມສະຫງົບເປັນລະບຽບຮຽບຮ້ອຍໃນສັງຄົມ, ປຸກລະດົມປະຊາຊົນບັນດາເຜົ່າຢ່າງແຂງແຮງ ເຂົ້າໃສ່ການຜະລິດເປັນສິນຄ້າ ເພື່ອແກ້ໄຂຄວາມທຸກຍາກຂອງປະຊາຊົນ, ພ້ອມທັງສ້າງໃຫ້ເກີດມີຕົວແບບການຜະລິດ ແລະ ອື່ນໆ.

ໄປພ້ອມໆກັນນີ້, ທ່ານເຈົ້າເມືອງຍັງໄດ້ ເນັ້ນໃຫ້ທຸກຂະແໜງການເອົາໃຈໃສ່ປະຕິບັດຕາມຈຸດສຸມແຜນປີ 2019-2020, ຕ້ອງວາງແຜນລົງຊຸກຍູ້-ສົ່ງເສີມກິດຈະກຳໃນ 15 ບ້ານຈຸດສຸມພັດທະນາຂອງເມືອງ, ຮີບຮ້ອນສ້າງຄັງແຮປ້ອງກັນຊາດ-ປ້ອງກັນຄວາມສະຫງົບໃຫ້ໄດ້ 2 ບ້ານຄື: ບ້ານລະຮາງ ແລະ ບ້ານຕັງໂກ, ພ້ອມທັງເອົາໃຈໃສ່ຄົ້ນຄວ້າ, ກຳແໜ້ນ, ຜັນຂະຫຍາຍເປັນວຽກງານອັນລະອຽດຂອງຕົນ ໃນການຈັດຕັ້ງປະຕິບັດໃຫ້ເກີດຜົນເປັນຈິງ, ແຕ່ງຕັ້ງພະນັກງານຜູ້ທີ່ມີມາດຖານຄົບຖ້ວນ, ມີຄວາມຮູ້ຄວາມສາມາດ ຫັນລົງຊ່ວຍຄະນະພັກຮາກຖານຊ່ວຍບ້ານ ເພື່ອສ້າງບ້ານພັດທະນາ.

Be the first to comment

Leave a Reply

Your email address will not be published.


*