ຈັບຜູ້ຄ້າຂາຍສິ່ງເສບຕິດໄດ້ 3 ຄົນພ້ອມຂອງກາງຢາບ້າ 2 ແສນກວ່າເມັດ

ທ້າວ ສົມບັນ ອາຍຸ 60 ປີ, ທ້າວ ພອນ ຫຼື ພຸ ອາຍຸ 56 ປີ ທັງສອງຢູ່ບ້ານນາຄູນ ເມືອງນາຊາຍທອງ ແລະ ທ້າວ ວຽງເພັດ ອາຍຸ 60 ປີ ຢູ່ບ້ານໂນນແກ້ວ ເມືອງສີໂຄດຕະບອງ ນະຄອນຫຼວງວຽງຈັນ ສາມສ່ຽວຕ່າງອາຍຸ ແຕ່ຮ່ວມກັນລັກລອບຄ້າຂາຍຢາເສບຕິດ ຈຶ່ງຖືກເຈົ້າໜ້າທີ່ ປກສ ເມືອງນາຊາຍທອງ ນະຄອນຫຼວງວຽງຈັນ ເຂົ້າຈັບຕົວພ້ອມຂອງກາງຢາບ້າ ຈຳນວນ 205.927 ເມັດ, ຢາໄອສ໌ 1,5 ກິໂລກຼາມ ແລະ ເຄື່ອງຂອງກາງທີ່ພົວພັນກັບຢາ ເສບຕິດຈຳນວນໜຶ່ງໄປດຳເນີນຄະດີ ໃນວັນທີ 6 ມີນາ 2019.

ໜ່ວຍງານຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ເມືອງນາຊາຍທອງ ໃຫ້ຮູ້ວ່າ: ໃນວັນທີ 28 ກຸມພາ 2019 ເຈົ້າໜ້າທີ່ວິ ຊາສະເພາະ ປກສ ເມືອງນາຊາຍທອງ ກັກຕົວຜູ້ຄ້າຂາຍຢາເສບຕິດຊື່ ທ້າວ ວຽງເພັດ ພ້ອມຂອງ ກາງຢາບ້າ ຈຳນວນ 1.027 ເມັດ ໄປສອບສວນຂະຫຍາຍຜົນ ເຊິ່ງຜູ້ກ່ຽວໄດ້ຊັດທອດຫາຜູ້ທີ່ຂາຍຢາເສບຕິດໃຫ້ ກໍຄື ທ້າວ ສົມບັນ ແລະ ທ້າວ ພອນ ເປັນເຄືອຂ່າຍດຽວກັນ. ມາຮອດວັນທີ 6 ມີນາ 2019 ເຈົ້າໜ້າທີ່ ຈຶ່ງໄດ້ນຳກຳລັງ ປິດລ້ອມເຮືອນຂອງ ທ້າວ ສົມບັດ ເພື່ອກວດຄົ້ນ, ຜ່ານການກວດ ພົບຢາບ້າ 102 ມັດ ເທົ່າກັບ 204.000 ເມັດ ພ້ອມກັບແປ້ງຝຸ່ນສີຂາວ ແລະ ນໍ້າຢາປະສົມກິ່ນຫອມ ແລະ ອຸປະກອນທີ່ພົວພັນກັບການບັນຈຸຢາບ້າເປັນແຟັກ. ຈາກນັ້ນ, ກໍໄດ້ກັກຕົວ ທ້າວ ພອນ ພ້ອມກາງຢາບ້າ 900 ເມັດ ໃນຂະນະທີ່ຜູ້ກ່ຽວມາຊື້ຢາບ້າຢູ່ເຮືອນ ທ້າວ ສົມບັດ.


ທ້າວ ສົມບັດ ສາລະພາບວ່າ: ໄດ້ພົວພັນເສບຢາບ້າມາແຕ່ປີ 2016 ໂດຍແມ່ນ ທ້າວ ວຽງເພັດ ແບ່ງປັນໃຫ້ເສບຄັ້ງລະ 1-2 ເມັດ, ມາເດືອນມັງກອນ 2019 ຈຶ່ງເລີ່ມເຄື່ອນໄຫວຄ້າຂາຍຢາບ້າ ໂດຍຊື້ນໍາ ທ້າວ ມົ້ວເຍີ້ຍ ອາຍຸ 44 ປີ ຢູ່ ບ້ານຫຼັກ 14 ເມືອງໄຊ ແຂວງອຸດົມໄຊ ຈຳນວນ 110 ມັດ ເທົ່າ ກັບ 220.000 ເມັດ ເມື່ອໄດ້ຢາບ້າມາແລ້ວກໍນຳໄປເສບເອງຈໍານວນໜຶ່ງ ແລະ ແບ່ງຂາຍໃຫ້ກັບ ທ້າວ ສຸກ ອາຍຸ 59 ປີ ບ້ານຈັນສະຫວ່າງ ເມືອງສີໂຄດຕະບອງ ຈໍານວນ 3 ມັດ ເທົ່າກັບ 6.000 ເມັດ ແລະ ຂາຍໃຫ້ ທ້າວ ວຽງເພັດ ຈໍານວນ 5 ຖົງ ເທົ່າກັບ 1.000 ເມັດ ແລະ ຂາຍໃຫ້ກັບ ທ້າວ ພອນ ຈໍານວນ 3 ຄັ້ງ ຄັ້ງລະ 5 ຖົງ ເທົ່າກັບ 1.000 ເມັດ.

ມາວັນທີ 6 ມີນາ 2019 ທ້າວ ພອນ ໄດ້ມາຊື້ຢາບ້າຈຳນວນ 5 ຖົງ ຢູ່ເຮືອນ ໃນຂະນະທີ່ກໍາລັງ ຊື້-ຂາຍຢາບ້າໃຫ້ກັບ ທ້າວ ພອນ ກໍຖືກເຈົ້າໜ້າທີ່ເຂົ້າມາກັກຕົວ ພ້ອມຂອງກາງຢາບ້າທີ່ຊຸກເຊື່ອງໄວ້ໃນເຮືອນ ຈຳນວນ 204.523 ເມັດ ຢາໄອສ໌ 1,5 ກິໂລກຼາມ ເຊິ່ງຢາເສບຕິດຈໍານວນດັ່ງກ່າວແມ່ນຊື້ນໍາຄົນຮູ້ຈັກຢູ່ບ້ານທົ່ງຂັນຄໍາ ເມືອງຈັນທະບູລີ ນະຄອນຫຼວງວຽງຈັນ ແລະ ສ່ວນຖົງຢາງສີຂຽວມີກາໂຕ A ຈໍານວນໜຶ່ງ ແມ່ນຊື້ນໍາ ທ້າວ ຊຽງຄໍາ ອາຍຸ 56 ປີ ບ້ານດ່ານ ຊ້າງ ເມືອງໄຊທານີ ນະຄອນຫຼວງວຽງຈັນ ແລະ ແປ້ງຝຸ່ນສີຂາວ ໜັກ 30 ກິໂລກຼາມ, ຝຸ່ນສີແດງ 0,5 ກິໂລກຼາມ, ນໍ້າຢາປະສົມກິ່ນຫອມ ແລະ ຂີ້ເຜີ້ງຈໍານວນໜຶ່ງ.


ທ້າວ ພອນ ສາລະພາບວ່າ: ໄດ້ເຄື່ອນໄຫວເສບ ແລະ ຄ້າຂາຍຢາບ້າມາແຕ່ເດືອນທັນວາ 2018 ຢາບ້າທີ່ນຳມາເສບ ແລະ ຂາຍ ແມ່ນໄດ້ຊື້ນຳ ທ້າວ ສົມບັດ ແລະ ເຮັດມາແລ້ວ ຈໍານວນ 3 ຄັ້ງ ຄັ້ງ ລະ 5 ຖົງ ແລ້ວນຳມາເສບ ແລະ ຂາຍໃຫ້ກັບໄວລຸ້ນທີ່ມົ້້ວສຸມ ຄັ້ງລະ 20-40 ເມັດ, ມາໃນເດືອນກຸມພາ 2019 ຜູ້ກ່ຽວໄດ້ຊື້ຢາບ້ານຳ ທ້າວ ອານຸໄຊ ອາຍຸ 56 ປີ ຢູ່ບ້ານໜອງພະຍາ ເມືອງນາຊາຍທອງ ຈຳນວນ 2 ຖົງ ແລ້ວນຳໄປເສບ ແລະ ຂາຍຕາມເຄີຍ, ມາວັນທີ 6 ມີນາ 2019 ໄດ້ໄປຊື້ຢາບ້ານຳ ທ້າວ ສົມບັດ ຈໍານວນ 5 ຖົງ ແລະ ທ້າວ ສົມບັດ ໄດ້ເອົາຢາໄອສ໌ ໃຫ້ລອງເສບ 1 ຫຼອດນ້ອຍ. ຈາກນັ້ນ, ກໍເອົາຢາບ້າແບ່ງໄວ້ເສບ ຈຳນວນ 30 ເມັດ ຂາຍໃຫ້ກັບໄວລຸ້ນ 70 ເມັດ ໂດຍເອົາເຮືອນຂອງ ທ້າວ ສົມບັດ ເປັນບ່ອນຂາຍ ຈຶ່ງຖືກກັກຕົວ ພ້ອມຂອງກາງຈຳນວນດັ່ງກ່າວ.

ສ່ວນ ທ້າວ ວຽງເພັດ ແມ່ນເສບຢາບ້າມາແຕ່ປີ 2018 ຢາບ້າ ແມ່ນຊື້ນຳ ທ້າວ ຍັນ ອາຍຸ 32 ປີ ບ້ານໂນນຂີ້ເຫຼັກ ເມືອງສີໂຄດຕະບອງ ແລະ ຢູ່ເຂດບ້ານຫຼັກ 52 ເມືອງໂພນໂຮງ ແຂວງວຽງຈັນ, ມາໃນເດືອນມັງກອນ 2019 ໄດ້ເລີ່ມເຄື່ອນໄຫວຄ້າຂາຍ ໂດຍໄດ້ຊື້ນຳ ທ້າວ ສົມບັດ ຄັ້ງທຳອິດແມ່ນ 10 ເມັດ ເສບເອງ 4 ເມັດ ແລະ ຂາຍໃຫ້ກັບ ນາງ ຫິດ ອາຍຸ 50 ປີ ບ້ານສີວິໄລ ເມືອງນາຊາຍທອງ ຈໍານວນ 6 ເມັດ, ມາວັນທີ 28 ກຸມພາ 2019 ໄດ້ຊື້ຢາບ້ານຳ ທ້າວ ສົມບັດ ຈໍານວນ 5 ຖົງ ມີ 1.037 ເມັດ ແລ້ວຂາຍໃຫ້ ທ້າວ ມອນສີ ອາຍຸ 60 ປີ ຢູ່ບ້ານສີວີໄລ ຈໍານວນ 10 ເມັດ. ຈາກນັ້ນ, ຈຶ່ງໄດ້ຖືກເຈົ້າໜ້າທີ່ກັກຕົວ ພ້ອມຂອງກາງຢາບ້າ 1.027 ເມັດ. ຂອບໃຈຂໍ້ມູນຈາກ: ນສພ ຄວາມສະຫງົບ

Be the first to comment

Leave a Reply

Your email address will not be published.


*