ປະທານປະເທດ ຢ້ຽມຢາມ ແລະ ພົບປະພະນັກງານຫຼັກແຫຼ່ງເມືອງເຊໂປນ

ທ່ານ ບຸນ​ຍັງ ວໍ­ລະ​ຈິດ ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ ພ້ອມ​ຄະ­ນະ ໄດ້​ລົງ​ໄປ​ເຄື່ອນ​ໄຫວ​ຢ້ຽມ­ຢາມ ແລະ ພົບ​ປະ​ໂອ້​ລົມ​ຄະ­ນະ​ການ​ນຳ ພະ­ນັກ­ງານ​ຫຼັກ​ແຫຼ່ງ ແລະ ປະ­ຊາ­ຊົນ​ເມືອງ​ເຊ​ໂປນ ແຂວງ​ສະ­ຫວັນ​ນະ​ເຂດ ໃນ​ວັນ​ທີ 10 ມີ­ນາ 2019 ຖືກ​ຕ້ອນ­ຮັບ​ໂດຍ​ທ່ານ ສັນ­ຕິ­ພາບ ພົມ­ວິ­ຫານ ເຈົ້າ­ແຂວງ​ສະ­ຫວັນ​ນະ​ເຂດ ພ້ອມ​ດ້ວຍ​ຄະ­ນະ​ນຳ​ເມືອງ ພະ­ແນກ­ການ ແລະ ຫ້ອງ­ການ​ກ່ຽວ­ຂ້ອງ​ເຂົ້າ​ຮ່ວມ.

 

ທ່ານ ວົງ​ໄຊ ໄຊ​ຍະ​ຈັກ ເຈົ້າ­ເມືອງ​ເຊ​ໂປນ ໄດ້​ກ່າວ​ສະ­ແດງ​ຄວາມ​ຕ້ອນ­ຮັບ ພ້ອມ​ທັງ​ລາຍ​ງານ​ກ່ຽວ​ກັບ​ສະ­ພາບ​ການ​ຊີ້​ນຳ-ນຳ­ພາ​ຂອງ​ຄະ­ນະ​ພັກ​ເມືອງ​ເຊ​ໂປນ ໂດຍ​ສັງ­ເຂບ ໃຫ້​ປະ­ທານ​ປະ­ເທດ​ຊາບ: ໂດຍ​ລວມ​ແລ້ວ ເມືອງ​ເຊ​ໂປນ ມີ​ສະ­ຖຽນ​ລະ​ພາບ​ທາງ​ດ້ານ​ການ­ເມືອງ​ໜັກ​ແໜ້ນ ສັງ­ຄົມ​ມີ​ຄວາມ​ສະ­ຫງົບ​ເປັນ​ລະ­ບຽບ​ຮຽບ​ຮ້ອຍ​ໂດຍ​ພື້ນ­ຖານ ເສດ­ຖະ­ກິດ​ມີ​ການ​ຂະ­ຫຍາຍ­ຕົວ​ຢ່າງ​ເປັນ​ລະ­ບົບ​ຕໍ່​ເນື່ອງ ແລະ ໝັ້ນ​ທ່ຽງ ວຽກ​ງານ​ວັດ­ທະ­ນະ­ທຳ-ສັງ­ຄົມ​ໄດ້​ຮັບ​ການ​ບູ­ລະ­ນະ ແລະ ຊີ­ວິດ​ການ​ເປັນ​ຢູ່​ຂອງ​ພະ­ນັກ­ງານ ທະ­ຫານ ຕຳ­ຫຼວດ ຕະ­ຫຼອດ​ປະ­ຊາ­ຊົນ​ບັນ­ດາ­ເຜົ່າ​ທາງ​ດ້ານ​ວັດ­ຖຸ ແລະ ຈິດ­ໃຈ ໄດ້​ຮັບ​ການ​ປັບ­ປຸງ​ດີ​ຂຶ້ນ​ເປັນ​ກ້າວໆ.

 

ໂອ­ກາດ​ນີ້ ທ່ານ​ປະ­ທານ​ປະ­ເທດ ໄດ້​ໃຫ້​ກຽດ​ໂອ້​ລົມ ໂດຍ​ເນັ້ນ​ໃຫ້​ເມືອງ​ເຊ​ໂປນ ເອົາ­ໃຈ­ໃສ່​ແກ້​ໄຂ​ບັນ­ຫາ​ປາ­ກົດ­ການ​ຫຍໍ້­ທໍ້​ຕ່າງໆ​ທີ່​ເກີດ​ຂຶ້ນ​ໃນ​ສັງ­ຄົມ ໃຫ້​ມີ​ຄວາມ​ສະ­ຫງົບ ແລະ ເປັນ​ລະ­ບຽບ​ຮຽບ​ຮ້ອຍ ໂດຍ​ຖື​ເອົາ​ການ​ຕ້ານ ແລະ ສະ­ກັດ​ກັ້ນ​ບັນ­ຫາ​ຢາ​ເສບ​ຕິດ​ໃຫ້​ຫຼຸດ​ໜ້ອຍ​ຖອຍ​ລົງ ເອົາ­ໃຈ­ໃສ່​ການ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ປະ­ກອບ­ສ່ວນ​ຢ່າງ​ຕັ້ງ­ໜ້າ ເຂົ້າ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ເມືອງ​ໃຫ້​ເປັນ​ລະ­ບົບ ແລະ ຕໍ່​ເນື່ອງ

ໂດຍ​ຫັນ​ເອົາ​ການ​ປູກ​ການ​ລ້ຽງ​ຂອງ​ປະ­ຊາ­ຊົນ ໃນ​ເຂດ​ທີ່​ມີ​ເງື່ອນ­ໄຂ​ສິ່ງ​ອຳ­ນວຍ​ຄວາມ​ສະ­ດວກ ໃນ​ການ​ເຮັດ​ການ​ຜະ­ລິດ​ທາງ​ດ້ານ​ກະ­ສິ­ກຳ ໃຫ້​ກາຍ­ເປັນ​ສິນ­ຄ້າ​ໃຫ້​ນັບ​ມື້​ນັບ​ຫຼາຍ​ຂຶ້ນ ເພື່ອ​ສ້າງ​ລາຍ​ໄດ້ ສ້າງ​ເສດ­ຖະ­ກິດ​ຄອບ­ຄົວ​ຂອງ​ປະ­ຊາ­ຊົນ​ບັນ­ດາ­ເຜົ່າ ຢູ່​ພາຍ​ໃນ​ເມືອງ​ໄດ້​ຮັບ​ການ​ພັດ­ທະ­ນາ​ດີ​ຂຶ້ນ ແລະ ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ ແຕ່​ນີ້​ຫາ​ປີ 2020 ໂດຍ​ພື້ນ­ຖານ​ເຮັດ​ໃຫ້​ປະ­ຊາ­ຊົນ​ຢູ່​ດີ​ກິນ​ດີ ປະ­ເທດ​ຊາດ​ຮັ່ງ­ມີ​ມັ່ງ​ຄັ່ງ​ເຂັ້ມ­ແຂງ ສັງ­ຄົມ​ມີ​ຄວາມ​ສາ­ມັກ­ຄີ​ປອງ​ດອງ ແລະ ສີ­ວິ­ໄລ.

 

ນອກ​ນີ້ ທ່ານ​ປະ­ທານ​ປະ­ເທດ​ພ້ອມ​ຄະ­ນະ ຍັງ​ໄດ້​ໄປ​ຢ້ຽມ­ຢາມ​ການ​ຜະ­ລິດ​ຂອງ​ໂຮງ­ງານ​ຊັນ​ເປ​ເປີ​ໂຮນ​ດີ່ງ​ລາວ​ຈຳ­ກັດ ທີ່​ຕັ້ງ​ຢູ່​ບ້ານ​ມັນ​ຈີ ເມືອງ​ເຊ​ໂປນ ໃນ​ໂອ​ກາ​ດຽວ​ກັນ​ນັ້ນ ທ່ານ​ປະ­ທານ​ປະ­ເທດ ໄດ້​ພົບ​ປະ​ໂອ້​ລົມ​ປະ­ທານ​ບໍ­ລິ­ສັດ​ພ້ອມ​ດ້ວຍ​ພະ­ນັກ­ງານ​ໃນ​ໂຮງ­ງານ ເຊິ່ງ​ທ່ານ​ໄດ້​ເນັ້ນ​ໃຫ້​ບໍ­ລິ­ສັດ​ເອົາ­ໃຈ­ໃສ່​ກ່ຽວ​ກັບ ການ​ພົວ­ພັນ​ກັບ​ທ້ອງ­ຖິ່ນ​ໃຫ້​ໜັກ​ແໜ້ນ​ຂຶ້ນ​ຕື່ມ ແລະ ຂອດ​ການ​ປະ­ສານ​ງານ​ກັບ​ພາກ­ສ່ວນ​ທີ່​ກ່ຽວ­ຂ້ອງ​ໃຫ້​ເປັນ​ລະ­ບົບ ແລະ ຕໍ່​ເນື່ອງ

ການ­ຈັດ­ຕັ້ງ​ປະ­ຕິ­ບັດ​ກ່ຽວ​ກັບ​ການ​ຂະ­ຫຍາຍ​ເນື້ອ­ທີ່​ສຳ​ປະ­ທານ​ເບື້ອງ​ລັດ ແລະ ເອ­ກະ​ຊົນ​ໃຫ້​ສອດ­ຄ່ອງ​ກັບ​ລະ­ບຽບ​ກົດ­ໝາຍ​ຢ່າງ​ຄັກ­ແນ່ ເນັ້ນ​ໃສ່​ການ​ພັດ­ທະ­ນາ​ທ້ອງ­ຖິ່ນ​ທາງ​ດ້ານ​ພື້ນ­ຖານ​ໂຄ່ງ​ລາງ​ຂອງ​ບ້ານ​ເປົ້າ​ໝາຍ ເຂດ​ທີ່​ບໍ­ລິ­ສັດ​ສຳ​ປະ­ທານ​ບ້ານ​ແກ້ງ​ກີ​ມັນ​ຈີ ແລະ ແກ້ງ​ຫົວ​ປາ​ໃຫ້​ຫຼາຍ​ຂຶ້ນ ນອກ​ນັ້ນ ບໍ­ລິ­ສັດ​ຕ້ອງ​ໄດ້​ເອົາ­ໃຈ­ໃສ່​ປະ­ກອບ­ສ່ວນ​ຊຸກ­ຍູ້​ສົ່ງ­ເສີມ​ທາງ​ດ້ານ​ພື້ນ­ຖານ​ໂຄ່ງ​ລ່າງ​ຂອງ​ເມືອງ ຊຸກ­ຍູ້ ແລະ ສົ່ງ­ເສີມ​ໃຫ້​ປະ­ຊາ­ຊົນ​ໄດ້​ມີ​ວຽກ​ເຮັດ​ງານ​ທຳ ມີ​ລາຍ​ຮັບ​ເພີ່ມ​ຂຶ້ນ ເພື່ອ​ເຮັດ​ໃຫ້​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ເຂດ​ດັ່ງ­ກ່າວ​ໃຫ້​ນັບ​ມື້​ດີ​ຂຶ້ນ. ພາບ-ຂ່າວ: ນສພ ວຽງຈັນໃຫ່ມ

Be the first to comment

Leave a Reply

Your email address will not be published.


*