ທ່ານນາຍົກລັດຖະມົນຕີ ແຫ່ງ ສປປ ລາວສຳເລັດການຢ້ຽມຢາມທາງການ ທີ່ ສສ ເຢຍລະມັນ

ໂດຍຕອບສະໜອງຕາມຄໍາເຊື້ອເຊີນຂອງພະນະທ່ານ ນາງ ອັງເກລາ ແມກເກລ, ນາຍົກລັດຖະມົນຕີ ແຫ່ງ ສາທາລະນະລັດ ສະຫະພັນ ເຢຍລະມັນ, ພະນະທ່ານ ທອງລຸນ ສີສຸລິດນາຍົກລັດຖະມົນຕີ ແຫ່ງ ສາທາ ລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍຄະນະ ໄດ້ເດີນທາງຢ້ຽມຢາມ ສາທາລະນະລັດ ສະຫະພັນ ເຢຍ ລະມັນ ຢ່າງເປັນທາງການ, ໃນວັນທີ 12-13 ມີນາ 2019, ເຊິ່ງເປັນການຢ້ຽມຢາມຄັ້ງປະຖົມມະລຶກ ຂອງການນໍາຂັ້ນສູງຂອງລາວ ທີ່ ສາທາລະນະລັດ ສະຫະພັນ ເຢຍລະມັນ ແລະ ເປັນນິມິດໝາຍອັນສໍາຄັນໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ສສ ເຢຍລະມັນ ໃຫ້ເຂັມແຂງ ແລະ ແຕກດອກອອກຜົນຍິ່ງໆຂື້ນ.

ໃນວັນທີ 13 ມີນາ 2019, ພາຍຫຼັງພິທີຕ້ອນຮັບຢ່າງເປັນທາງການຢ່າງສົມກຽດ ແລະ ເຄັ່ງຂຶມ ທີ່ ສໍານັກງານນາຍົກລັດຖະມົນຕີ ສສ ເຢຍລະມັນ, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະສອງຝ່າຍ ກັບ ພະນະທ່ານ ນາງ ອັງເກລາ ແມກເກລ, ນາຍົກລັດຖະມົນຕີ ແຫ່ງ ສາທາລະນະລັດ ສະຫະພັນ ເຢຍລະມັນ. ການພົບປະໄດ້ດໍາເນີນໄປພາຍໃຕ້ບັນຍາກາດອັນສະໜິດສະໜົມ ແລະ ສ້າງສັນ, ໂດຍສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີທີ່ມີມາຍາວນານ ລະຫວ່າງ ສອງປະເທດ,

ນັບຕັ້ງແຕ່ ສປປ ລາວ ແລະ ສສ ເຢຍລະມັນ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 31 ມັງກອນ 1958 ເປັນຕົ້ນມາ. ການຊ່ວຍເຫຼືອຂອງເຢຍລະມັນ ແກ່ ສປປ ລາວ ແມ່ນສຸມໃສ່ສອງຂະແໜງການບຸລິມະສິດຄື: ການຮ່ວມມືທາງດ້ານເຕັກນິກ ຜ່ານອົງການຮ່ວມມືສາກົນ ເພື່ອການພັດທະນາ ເຢຍລະມັນ (GIZ) ແລະ ການຮ່ວມມືທາງດ້ານການເງິນ ຜ່ານທະນາຄານສິນເຊື່ອ ເພື່ອການພັດທະນາເຢຍລະມັນ (KfW) ໂດຍສອດຄ່ອງກັບເປົ້າໝາຍລວມຂອງແຜນພັດທະນາເສດຖະກິດ-ສັງຄົມ ຂອງລັດຖະບານລາວ,

ເປັນຕົ້ນ ແມ່ນເນັ້ນໃສ່ການພັດທະນາຊົນນະບົດ, ວຽກງານອາຊີວະສຶກສາ, ການພັດທະນາຍຸດທະສາດການເຕີບໂຕສີຂຽວ (Green growth), ການພັດທະນາຊັບພະຍາກອນມະນຸດ, ການອະນຸລັກສິ່ງແວດລ້ອມ,ການ ກໍ່ສ້າງ ແລະ ປັບປຸງເສັ້ນທາງຄົມມະນາຄົມ ແລະ ສົ່ງເສີມທຸລະກິດພາກເອກະຊົນ, ລວມທັງທຸລະກິດຂະໜາດກາງ (SME) ແລະ ຈຸລະວິສາຫະກິດ (MSME).

ສໍາລັບການຊ່ວຍເຫຼືອໃນປີ 2018-2020 ແມ່ນມີມູນຄ່າສູງເຖິງ 50 ລ້ານເອີໂຣ, ໃນນັ້ນ 10 ລ້ານເອີໂຣ ແມ່ນຊ່ວຍເຫຼືອເພື່ອບັນເທົາທຸກໃຫ້ແກ່ປະຊາຊົນຜູ້ປະສົບໄພນໍ້າຖ້ວມຢູ່ ແຂວງອັດຕະປື ແລະ ໃນຂອບເຂດທົ່ວປະເທດ.
ໃນໂອກາດນີ້, ທ່ານນາຍົກລັດຖະມົນຕີເຮົາ ໄດ້ສະແດງຄວາມຂອບໃຈ ແລະ ຮູ້ບຸນຄຸນຕໍ່ການຊ່ວຍເຫຼືອອັນລໍ້າຄ່າຂອງລັດຖະບານ ກໍ່ຄືປະຊາຊົນເຢຍລະມັນ ໃຫ້ແກ່ ສປປ ລາວ ໃນໄລຍະຜ່ານມາ, ເຊິ່ງເປັນການຊ່ວຍເຫຼືອທີ່ມີຜົນປະໂຫຍດ ແລະ ສອດຄ່ອງກັບແຜນພັດທະນາເສດຖະກິດ-ສັງຄົມ ຢູ່ ສປປ ລາວ.

ຄຽງຄູ່ກັນນັ້ນ, ສອງຝ່າຍຍັງໄດ້ປຶກສາຫາລືແຜນການຮ່ວມມືໃນຕໍ່ໜ້າ, ເປັນຕົ້ນແມ່ນການຮ່ວມມືລະຫວ່າງສອງກະຊວງການຕ່າງປະເທດ, ດ້ານເສດຖະກິດການຄ້າ, ການລົງທຶນ, ການສຶກສາ ແລະ ອຶ່ນໆ.

 

ໃນໂອກາດດຽວກັນ, ຝ່າຍເຢຍລະມັນ ຍັງໄດ້ຢືນຢັ້ນທີ່ຈະສືບຕໍ່ເພີ່ມການຊ່ວຍເຫຼືອໃນການພັດທະນາກະສິກໍາ ແລະ ອຸດສາຫະກໍາປຸງແຕ່ງ ເພື່ອປະກອບສ່ວນຊ່ວຍເຫຼືອ ສປປ ລາວ ໃຫ້ຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ບັນລຸເປົ້າໝາຍການພັດທະນາແບບຍືນຍົງ ເທື່ອລະກ້າວ.

 

ນອກຈາກນັ້ນ, ສອງຝ່າຍຍັງໄດ້ແລກປ່ຽນທັດສະນະ ກ່ຽວກັບບັນຫາພາກພື້ນ ແລະ ສາກົນ ເຊິ່ງຕ່າງຝ່າຍຕ່າງມີຄວາມສົນໃຈ ແລະ ມີຜົນປະໂຫຍດຮ່ວມກັນ. ໃນໂອກາດດຽວກັນນີ້, ພະນະທ່ານ ນາຍົກ ລັດຖະມົນຕີ ທອງລຸນ ສີສຸລິດ ໄດ້ເຊື້ອເຊີນພະນະທ່ານ ນາຍົກລັດຖະມົນຕີ ອັງເກລາ ແມກເກລ ໄປຢ້ຽມຢາມ ສປປ ລາວ ໃນເວລາທີ່ເພິ່ນເຫັນວ່າສະດວກ, ເຊິ່ງຄູຮ່ວມຕໍາແໜ່ງ ເຢຍລະມັນ ໄດ້ຕອບຮັບດ້ວຍຄວາມຍິນດີ, ສ່ວນວັນເວລາຈະໄດ້ຮັບການຕົກລົງໂດຍຜ່ານຊ່ອງທາງການທູດ.

 

ໃນໂອກາດຢ້ຽມຢາມທາງການ ສສ ເຢລະມັນ ໃນຄັ້ງນີ້, ນອກ ຈາກການພົບປະສອງຝ່າຍ ກັບ ນາຍົກລັດຖະມົນຕີ ອັງເກລາ ແມກເກລ ແລ້ວ, ທ່ານນາຍົກລັດຖະມົນຕີ ທອງລຸນ ສີສຸລິດ ຍັງໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ປະທານສະມາຄົມມິດຕະພາບ ເຢຍລະມັນ-ລາວ ພ້ອມດ້ວຍຄະນະ ແລະ ພົບປະໂອ້ລົມກັບຊຸມຊົນຄົນເຊື້ອຊາດລາວ ທີ່ ນະຄອນຫຼວງແບກແລງ. ພ້ອມກັນນັ້ນ, ສອງກະຊວງການຕ່າງປະເທດລາວ-ເຢຍລະມັນ ຍັງໄດ້ລົງນາມໃນຖະແຫຼງການຮ່ວມວ່າດ້ວຍການປຶກສາຫາລື ລະຫວ່າງ ສອງກະຊວງການຕ່າງປະເທດ ລາວ-ເຢຍລະມັນ ຕື່ມອິກດ້ວຍ.

ການຢ້ຽມຢາມສສ ເຢຍລະມັນທີ່ມີຄວາມໝາຍສໍາຄັນທາງປະຫວັດສາດຂອງພະນະທ່ານນາຍົກລັດຖະມົນຕີ ສປປ ລາວ ໃນຄັ້ງນີ້ ໄດ້ດໍາເນີນໄປດ້ວຍບັນຍາກາດອັນອົບອຸ່ນ ແລະ ປະສົບຜົນສໍາເລັດອັນຈົບງາມທຸກປະການ.

ຂ່າວ,​ພາບ: ກົມຂ່າວ ກະຊວງການຕ່າງປະເທດ

Be the first to comment

Leave a Reply

Your email address will not be published.


*