ຄຳມ່ວນ ເຊື່ອມຊຶມມະຕິກອງປະຊຸມຄັ້ງທີ 7 ຂອງສູນກາງພັກ

????????????????????????????????????

ການເຜີຍແຜ່ເຊື່ອມຊຶມ ຜັນຂະຫຍາຍມະຕິກອງປະຊຸມຄົບຄະນະ ຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ X ຈັດຂຶ້ນທີ່ສະໂມສອນໃຫຍ່ ຫຼັກ 4 ແຂວງຄຳມ່ວນ ໃນວັນທີ 12 ກຸມພາ 2019 ເຊິ່ງປະກອບມີ ມະຕິວ່າດ້ວຍການປັບປຸງຮາກຖານ ການເມືອງ ຂອງລະບອບປະຊາທິປະໄຕ ປະຊາຊົນ ໃຫ້ເຂັ້ມແຂງ ແລະ ໜັກແໜ້ນ ເປັນກຽດເຜີຍແຜ່ໂດຍທ່ານ ໂອໄດ ສຸດພອນ ເຈົ້າແຂວງໆຄຳມ່ວນ ແລະ ມະຕິວ່າດ້ວຍເພີ່ມທະວີການນຳພາແກ້ໄຂ ຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງ ຂອງການຄຸ້ມຄອງມະຫາພາກ ເຜີຍແຜ່ ໂດຍທ່ານ ບຸນມີ ພິມມະສອນ ຮອງເຈົ້າແຂວງໆຄຳມ່ວນ, ຜູ້ຊີ້ນຳວຽກງານເສດຖະກິດຂອງແຂວງ.

 

ນອກຈາກການເຜີຍແຜ່ເຊື່ອມຊຶມ 2 ເອກະສານສຳຄັນ ຂອງສູນກາງພັກ ໃຫ້ແກ່ພະນັກງານການນຳບັນດາ ພະແນກການ, ຂະແໜງການ, ອົງການຈັດຕັ້ງມະຫາຊົນ ແລະ ຄະນະພັກກຳລັງປ້ອງກັນຊາດ-ປ້ອງກັນຄວາມສະຫງົບ ໃນຄັ້ງນີ້ ຍັງໄດ້ປະກອບຄຳຄິດ-ຄຳເຫັນ ໂດຍເອົາບັນຫາຕົວຈິງມາຍົກຂຶ້ນ ເພື່ອເຫັນໄດ້ແຈ້ງບັນຫາຫຍັງແດ່ທີ່ພົວພັນເຖິງ ຂະແໜງການຕົນ ແລະ ຈະປັບປຸງ, ແກ້ໄຂຄືແນວໃດ ໂດຍສະເພາະບັນຫາຄວາມຫຍຸ້ງຍາກທາງດ້ານເສດຖະກິດມະຫາ ພາກທີ່ສະສົມແກ່ຍາວມາດົນພໍສົມຄວນ, ແຕ່ເບິ່ງລວມແລ້ວການດຳເນີນແກ້ໄຂບັນຫາທີ່ເປັນຈຸດອ່ອນ, ຂໍ້ຄົງຄ້າງໃນ ໄລຍະຜ່ານມາ ຍັງບໍ່ທັນສ້າງການຫັນປ່ຽນຈະແຈ້ງເທື່ອ ເປັນຕົ້ນບັນຫາການຂາດດຸນງົບປະມານຂອງລັດ, ບັນຫາໜີ້ສິນ, ກໍ່ຄືບັນຫາຄວາມຫຍຸ້ງຍາກໃນພາກລາຍຈ່າຍຂອງລັດ ແລະ ອື່ນໆ.

 

ພ້ອມທັງເຫັນໄດ້ບັນຫາທີ່ຕ້ອງເອົາໃຈໃສ່ໃນການ ປັບປຸງຮາກຖານການເມືອງຂອງພວກເຮົາ ເຖິງວ່າວຽກງານຮາກຖານການເມືອງ ໄດ້ຮັບການຊີ້ນຳ-ນຳພາ ປະຕິບັດ ຢ່າງຕໍ່ເນື່ອງ ແລະ ແຂງແຮງສົມຄວນ ແຕ່ກໍ່ຍັງມີຫຼາຍດ້ານທີ່ບໍ່ທັນແທດເໝາະກັບສະພາບຕົວຈິງ ເຮັດໃຫ້ຄຸນນະພາບ ການເຄື່ອນໄຫວຂອງລະບົບການເມືອງຢູ່ຮາກຖານ ໂດຍສະເພາະການນຳພາຄຸ້ມຄອງການພັດທະນາເສດຖະກິດ-ສັງຄົມ ຍັງຈຳກັດ ແລະ ຄວາມສາມາດໃນການຕ້ານ, ສະກັດກັ້ນບັນດາປະກົດການຫຍໍ້ທໍ້ໃນສັງຄົມ ລວມເຖິງກົງຈັກຂອງພັກ-ລັດ ຢູ່ແຕ່ລະບ່ອນຍັງຕໍ່າ, ປະກົດການເສຍທາດຂາດຄຸນໃນຖັນແຖວສະມາຊິກພັກ-ພະນັກງານ ນັບມື້ຫຼາຍຂຶ້ນ. ເຊິ່ງເນື້ອໃນຈິດໃຈໃນການເຜີຍແຜ່ມະຕິຂອງສູນກາງພັກ ຄັ້ງທີ 7 ແມ່ນເພື່ອສ້າງຄວາມຮັບຮູ້, ເຂົ້າໃຈແຈ້ງກ່ຽວກັບ ສະພາບຄວາມເປັນຈິງທາງດ້ານເສດຖະກິດ-ການເງິນ ແລະ ວຽກງານຮາກຖານການເມືອງ ໃນໄລຍະຜ່ານມາ, ປະຈຸບັນ ແລະ ຜົນສະທ້ອນໃນຕໍ່ໜ້າ, ກຳແໜ້ນ, ເຊື່ອມຊຶມ ແລະ ເປັນເອກະພາບສູງກັບທັດສະນະ, ທິດທາງ, ວິທີການ ແລະ ມາດຕະການ ທີ່ສູນກາງພັກວາງອອກ. ຂໍ້ມູນ: ຂ່າວສານແຂວງຄຳມ່ວນ

Be the first to comment

Leave a Reply

Your email address will not be published.


*