ຢູໂຣບ ເລີ່ມຂະບວນການພິຈາລະນາຖອນສິດທິພິເສດທາງການຄ້າຂອງກຳປູເຈຍ

ສຳນັກຂ່າວຕ່າງປະເທດລາຍງານ 12 ກຸມພາ 2019 ວ່າ ຄະນະກຳມາທິການຢູໂຣບ  (ອີຊີ) ເຊິ່ງເປັນຝ່າຍບໍລິຫານຂອງສະຫະພາບຢູໂຣບ (EU) ອອກຖະແຫຼງການເມື່ອວັນຈັນ ທີ່ຜ່ານມາ, ເລື່ອງການເລີ່ມຂະບວນການພິຈາລະນາການຮ່ວມມືທາງການຄ້າກັບກຳປູເຈຍ ທີ່ອາດນຳໄປສູ່ການຖອດຖອນສິດທິພິເສດທາງການຄ້າຂອງກຳປູເຈຍ ໃນການເຂົ້າເຖິງລະບົບຕະຫຼາດຽວຂອງສະຫະພາບຢູໂຣບ ທີ່ມອບໃຫ້ແກ່ກຸ່ມປະເທດດ້ອຍພັດທະນາ (Least Developed Countries : LLDGs) ເພື່ອຊ່ວຍກະຕຸ້ນເສດຖະກິດຂອງກຸ່ມປະເທດເຫຼົ່ານັ້ນ ແຕ່ໂຄຕ້ານັ້ນໃຫ້ຍົກເວັ້ນສິນຄ້າຈຳພວກອາວຸດຍຸດໂທປະກອນ (Eveything But Arms : EBA)


ຂະນະດຽວກັນ, ລາຍງານຂອງ EC ລະບຸວ່າ ຂະບວນການດັ່ງກ່າວເລີ່ມຕັ້ງແຕ່ວັນທີ 12 ກຸມພາ ແລະ ມີກຳນົດໄລຍະເວລາ 18 ເດືອນ, ໝາຍຄວາມວ່າຈະສິ້ນສຸດພາຍໃນເດືອນ ສິງຫາ 2020, ຂະນະທີ່ສະພາການຄ້າຢູໂຣບປະຈຳກຳປູເຈຍ ເຊິ່ງຖືເປັນຕົວແທນຂອງພາກທຸລະກິດຈາກຢູໂຣບທັງໝົດໃນກຳປູເຈຍ ອອກຖະແຫຼງການວ່າ ການເຄື່ອນໄຫວດັ່ງກ່າວກໍ່ເພື່ອກຳຈັດການເອົາປຽບທາງການຄ້າ ທີ່ຈະນຳໄປສູ່ການຫຼຸດອັດຕາຄວາມທຸກຍາກໃນກຳປູເຈຍ ແລະ ເຕືອນລັດຖະບານກຳປູເຈຍວ່າ ການເຈລະຈາຄືທາງອອກທີ່ເໝາະສົມທີ່ສຸດ ຫຼັງຈາກເຈົ້າໜ້າທີ່ລະດັບສູງຫຼາຍທ່ານຂອງ EU ສົ່ງສັນຍານເລື່ອງນີ້ເມື່ອກາງປີ ທີ່ຜ່ານມາ ວ່າເປັນເພາະພື້ນທີ່ປະຊາທິປະໄຕໃນກຳປູເຈຍຄັບແຄບ ຈາກການທີ່ພັກປະຊາຊົນກຳປູເຈຍ ຂອງສົມເດັດຮຸນ ເຊນ ຊະນະການເລືອກຕັ້ງທັງໝົດ 125 ສຽງໃນສະພາ ໃນການເລືອກຕັ້ງເມື່ອວັນທີ 29 ກໍລະກົດ ປີຜ່ານມາ.


ເຊິ່ງຕະຫຼອດໄລຍະເວລາທີ່ຜ່ານມາ ກຳປູເຈຍເປັນປະເທດທີ່ໄດ້ຮັບສິດທິພິເສດຈາກໂຄງການດັ່ງກ່າວຂອງ EU ຫຼາຍທີ່ສຸດເປັນອັນດັບ 2 ຮອງຈາກບັງກະລາເທດ, ປັດຈຸບັນ EU ຖືເປັນຄູ່ຄ້າລາຍໃຫຍ່ທີ່ສຸດຂອງກຳປູເຈຍ ເຊິ່ງຮັບຊື້ສິນຄ້າຫຼາຍປະເພດຈາກກຳປູເຈຍເຖິງ 45% ຈາກປະລິມານການສົ່ງອອກສິນຄ້າທັງໝົດສະເພາະເມື່ອປີທີ່ຜ່ານມາ, ໂດຍສິນຄ້າທີ່ EU ນຳເຂົ້າຈາກກຳປູເຈຍສ່ວນໃຫຍ່ເປັນຜະລິດຕະພັນກ່ຽວກັບເຄື່ອງແຕ່ງກາຍ ບໍ່ວ່າຈະເປັນເຄື່ອງນຸ່ງຫົ່ມ ຫຼື ເກີບ ດ້ວຍມູນຄ່າປະມານ 4,900 ລ້ານຢູໂຣ ເມື່ອປີທີ່ຜ່ານມາ ເຊິ່ງຫາກ EU ຖອດຖອນສິດນີ້ຈາກກຳປູເຈຍ ຈະສົ່ງຜົນກະທົບຕໍ່ແຮງງານໃນອຸດສາຫະກຳດັ່ງກ່າວຫຼາຍກວ່າ 700,000 ຄົນ.

Be the first to comment

Leave a Reply

Your email address will not be published.


*