ມອບ-ຮັບ ເປີດການນຳໃຊ້ຂົວອູ່ ລະຫວ່າງບ້ານຟ້າ ແລະ ບ້ານໂຄ້ງເມືອງນ້ຳບາກ ເຊິ່ງເປັນທືນສະໜັບສະໜູນຈາກ ບໍລິສັດປີໂຕຣລຽມເທຣດດິງ ລາວມະຫາຊົນ

ຂປລ. ພິທີມອບ-ຮັບ ແລະ ເປີດການນຳໃຊ້ຂົວອູ່ ຂ້າມນ້ຳບາກ ລະຫວ່າງ ບ້ານຟ້າ ແລະ ບ້ານໂຄ້ງ ເມືອງນ້ຳບາກ ໄດ້ມີຂຶ້ນໃນວັນທີ່ 9 ກຸມພາ 2019 ທີ່ສົ້ນຂົວບ້ານໂຄ້ງ, ໂດຍມີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍການນຳຂອງແຂວງຫລວງພະບາງ, ຕາງໜ້າກຸ່ມບໍລິສັດພົງສະຫວັນ ແລະ ບໍລິສັດຮັບເໝົາກໍ່ສ້າງ, ອົງການປົກຄອງເມືອງ ຕະຫລອດຮອດປະຊາ ຊົນ 2 ບ້ານເຂົ້າຮ່ວມ.


ໃນພິທີດັ່ງກ່າວ, ທ່ານ ສົມພອນ ສີອຸດົມພັນ ເຈົ້າເມືອງນ້ຳບາກ ໄດ້ມີສະແດງຄວາມຂອບໃຈເປັນຢ່າງສູງ ທີ່ໄດ້ຮັບຂອງຂັວນອັນລ້ຳຄ່າ ຈາກພັກ-ລັດຖະບານ, ໂດຍສະເພາະແມ່ນ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ກໍ່ຄື ກຸ່ມບໍລິສັດພົງສະຫວັນ ທີ່ໄດ້ມອບທືນຮອນ ເຂົ້າໃນການກໍ່ສ້າງຂົວອູ່ຂ້າມນ້ຳບາກ ເຮັດໃຫ້ການໄປມາຂອງປະຊາຊົນເມືອງນ້ຳບາກ ໂດຍສະເພາະປະຊາຊົນບ້ານໂຄ້ງ ແລະ ບ້ານຟ້າ ໄດ້ໄປມາຫາສູ່ກັນສະດວກຫລາຍຂຶ້ນ ສ້າງເງື່ອນໄຂໃຫ້ແກ່ການພັດທະນາຄອບຄົວ ແລະ ບ້ານໃນອານາຄົດ.


ໂອກາດນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທ່ານຄຳຂັນ ຈັນທະວີສຸກ ເຈົ້າແຂວງຫລວງພະບາງ ພ້ອມດ້ວຍຕາງໜ້າກຸ່ມບໍລິສັດໃຫ້ທືນ ໄດ້ຮ່ວມກັນຕັດແຖບຜ້າ ແລະປ່ອຍ ປຸມເປົ້າ ເພື່ອມອບຮັບ ແລະ ເປີດການນຳໃຊ້ຢ່າງເປັນທາງການ. ຂົວອູ່ຂ້າມນ້ຳບາກ ລະຫວ່າງບ້ານຟ້າຫາບ້ານໂຄ້ງ ເມືອງນ້ຳບາກ ເລີ່ມສ້າງຂຶ້ນໃນເດືອນເມສາ ປີ 2018 ຜ່ານມາ, ສອງສົ້ນຂົວຕັ້ງດ້ວຍເສົາເບຕົ່ງເສີມເຫລັກ ມີສາຍກາບຂະໜາດໃຫຍ່ຈ່ອງດຶງ, ໂຕຂົວເປັນໂຄງເຫລັກຂະໜາດກ້ວາງ 2 ແມັດ, ຍາວ 125 ແມັດ, ໂດຍອຳນວຍຄວາມສະດວກໃຫ້ແກ່ການສັນຈອນ ສະເພາະຄົນຍ່າງ, ລົດຖີບ ແລະ ລົດຈັກ. ທືນກໍ່ສ້າງເບື້ອງຕົ້ນ 1 ຕື້ 259 ລ້ານກ່ວາກີບ, ແຕ່ເນື່ອງຈາກໂຄງສ້າງໄດ້ຮັບຜົນກະທົບຈາກລະດູຝົນຜ່ານມາ ແລະ ມີໜ້າວຽກເພີ້ມ ຈຶ່ງໄດ້ເພີ່ມມູນຄ່າການກໍ່ສ້າງເປັນ 1 ຕື້ 800 ລ້ານກ່ວາກີບ, ເຊິ່ງເປັນທືນສະໜັບສະໜູນຈາກ ບໍລິສັດປີໂຕຣລຽມເທຣດດິງ ລາວມະຫາຊົນ ໃນກຸ່ມບໍ ລິສັດພົງສະຫວັນ ແລະ ຮັບເໝົາກໍ່ສ້າງໂດຍບໍລິສັດ ລືໄຊ ໄຊຊະນະ.

Be the first to comment

Leave a Reply

Your email address will not be published.


*