ປີ 2018 ເຊກອງ ຈັດເກັບລາຍຮັບເຂົ້າງົບປະມານໄດ້ 91 ຕື້ກ່ວາກີບ ລື່ນແຜນການ 6,65%

ກອງປະຊຸມສະຫຼຸບວຽກງານແຜນການ-ການເງິນປະຈໍາປີ 2018 ແລະວາງທິດທາງແຜນການ ປີ 2019 ໄດ້ຈັດຂຶ້ນໃນຕອນເຊົ້າວັນທີ 12 ກຸມພາ 2019 ນີ້ ທີ່ຫ້ອງປະຊຸມສະໂມສອນສະພາປະຊາຊົນແຂວງເຊກອງ ໂດຍການເປັນປະທານຂອງທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ, ຜູ້ຊີ້ນໍາຂົງເຂດເສດຖະກິດຂັ້ນແຂວງ, ຫົວໜ້າຄະນະກໍາມະການແຜນການ-ການເງິນສະພາປະຊາຊົນແຂວງ, ຫົວໜ້າ-ຮອງພະແນກການອ້ອມຂ້າງ, ຮອງເຈົ້າເມືອງ 4 ຕົວເມືອງ ຕະຫຼອດຮອດຂະແໜງການທີ່ກ່ຽວຂ້ອງຂັ້ນແຂວງ-ເມືອງເຂົ້າຮ່ວມ.


ໂອກາດດັ່ງກ່າວທ່ານ ທອນສົມມັກ ຈັນທະສີດາ ຫົວໜ້າພະແນກການເງິນແຂວງເຊກອງ ໄດ້ສະຫຼຸບຕີລາຄາຄືນວຽກງານແຜນການ-ການເງິນປະຈໍາປີ 2018 ແລະທິດທາງແຜນການປະຈໍາປີ 2019 ຂອງຂະແໜງການເງິນປະຈໍາແຂວງເຊກອງ ເຊິ່ງທ່ານໄດ້ຍົກໃຫ້ເຫັນຜົນງານດ້ານດີ, ດ້ານອ່ອນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະແຜນງົບປະມານແຫ່ງລັດໃນສົກປີຜ່ານມາ ກະຊວງການເງິນມອບລາຍຮັບທັງໝົດ 85,91 ຕື້ກີບ, ໃນນັ້ນລາຍຮັບພູດທ້ອງຖິ່ນ 80,90 ຕື້ກີບ ແລະລາຍຮັບພູດສູນກາງປະຕິບັດຢູ່ທ້ອງຖິ່ນ 4,92 ຕື້ກີບ ໂດຍຜ່ານການຈັດຕັ້ງປະຕິບັດ 1 ປີຜ່ານມາ ເຫັນວ່າສາມາດປະຕິບັດໄດ້ 91,62 ຕື້ກີບ ເທົ່າກັບ 106,65% ຂອງແຜນດັດແກ້ປະຈໍາປີ ທຽບໃສ່ໄລຍະດຽວແມ່ນປະຕິບັດໄດ້ລື່ນແຜນການ 6,65% ໃນນັ້ນລາຍຮັບພູດທ້ອງຖິ່ນປະຕິບັດໄດ້ 83,10 ຕື້ກີບ ເທົ່າກັບ 102,61% ຂອງແຜນດັດແກ້ປະຈໍາປີທຽບໃສ່ໄລຍະດຽວປະຕິບັດໄດ້ 2,61% ແລະລາຍຮັບພູດສູນກາງຢູ່ທ້ອງຖິ່ນປະຕິບັດໄດ້ 8,52 ຕື້ກີບເທົ່າກັບ 173,18% ຂອງແຜນດັດແກ້ປະຈໍາປີທຽບໃສ່ໄລຍະດຽວປະຕິບັດໄດ້ 3,18% ໃນນີ້ລວມທັງລາຍຮັບຂອງບັນດາຫ້ອງການ-ການເງິນ 4 ຕົວເມືອງ ແລະພະແນກການອ້ອມຂ້າງແຂວງ.


ຄຽງຄູ່ກັບການຈັດຕັ້ງປະຕິບັດລາຍຈ່າຍ ໄລຍະຜ່ານມາເຫັນວ່າມີທ່ວງທ່າຮັດກຸມ ແລະຖືກຕ້ອງສອດຄ່ອງກັບລະບຽບກົດໝາຍ ແລະຂະຫຍາຍຕົວດີຂຶ້ນເລື້ອຍໆ ເຊິ່ງສະແດງອອກໃນການກວດກາປິດບັນຊີງົບປະມານ-ຄັງເງິນ ແມ່ນສາມາດເບີກຈ່າຍເງິນເດືອນ-ເງິນນະໂຍບາຍຕ່າງໆ ໃນທົ່ວແຂວງ, 4 ຕົວເມືອງ, ເງິນບໍລິຫານ, ດັດສົມ ແລະອື່ນໆ ໄດ້ສໍາເລັດ 100% ລວມລາຍຈ່າຍງົບປະມານໝົດປີ 2018 ຈໍານວນ 387,92 ຕື້ກີບ ເທົ່າກັບ 97% ທຽບໃສ່ແຜນປີ ແມ່ນຫຼຸດລົງ 3% ເຊິ່ງພາຍຫຼັງປິດບັນຊີ 0 ໂມງ ມີຍອດເຫຼືອງົບປະມານຕ້ອງສົ່ງຄືນໃຫ້ສູນກາງ ຈໍານວນ 8,22 ຕື້ກີບ.


ສໍາລັບສົກປີ 2019 ກະຊວງການເງິນໄດ້ມອບລາຍຮັບງົບປະມານຈໍານວນ 84,36 ຕື້ກີບ ທຽບໃສແຜນການປີ 2018 ແມ່ນຫຼຸດລົງ 2% ໃນນັ້ນລາຍຮັບສູນກາງມາປະຕິບັດຢູ່ທ້ອງຖິ່ນຈໍານວນ 8 ຕື້ກີບ ທຽບໃສແຜນປີ 2018 ແມ່ນເພີ່ມຂຶ້ນ 68%, ລາຍຮັບພູດທ້ອງຖິ່ນຈໍານວນ 76,19 ຕື້ກີບ ທຽບໃສ່ແຜນການປີ 2018 ແມ່ນຫຼຸດລົງ 6%, ດ້ານລາຍຈ່າຍແມ່ນໃຫ້ຢູ່ໃນລະດັບບໍ່ເກີນ 400,33 ຕື້ກີບ ທຽບໃສ່ແຜນການປີ 2018 ແມ່ນເພີ່ມຂຶ້ນ 1%.

ໂດຍ: ນາລີວັນ (ຂ່າວສານແຂວງເຊກອງ)

Be the first to comment

Leave a Reply

Your email address will not be published.


*