ງານບຸນຮ່ວມໃຈມິດພຸໄທ ບຸນໄຂ ປະຕູເລົ້າ

ຄອບຄົວທິຣະວົງ ສວນພຸໄທທິລະ ພ້ອມຍາດພີ່ນ້ອງເຊື້ອສາຍພຸໄທທີ່ນະຄອນຫຼວງວຽງຈັນ ໄດ້ຈັດງານບຸນຮ່ວມໃຈມິດພຸໄທ ບຸນໄຂປະຕູເລົ້າ ຫຼື ປີໃໝ່ພຸໄທ ຂຶ້ນເປັນທາງການ ວັນທີ 10 ກຸມພາ ຜ່ານມາ ທີ່ສວນພຸໄທທີລະ ບ້ານໜອງແປນເໜືອ (ທາງ 450 ປີ ຮ່ອມທາງເຂົ້າໜ່ວຍ 16 ບ້ານນາຄວາຍກາງ ຫຼື ທາງເຂົ້າບ້ານຈອມສີ) ເມືອງໄຊເຊດຖາ ນະຄອນຫຼວງວຽງຈັນ ມີພະເຖລານຸເຖລະ ນຳໂດຍພະອາຈານ ມະຫາງອນ ດຳຣົງບຸນ ປະທານອົງການພຸດທະສາສະໜາສຳພັນ ແຫ່ງ ສປປ ລາວ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມດ້ວຍລັດຖະມົນຕີ ທຸຕານຸທູດ ພໍ່ແມ່ປະຊາຊົນ ແລະ ພີ່ ນ້ອງຊາວພຸໄທທີ່ມາຈາກປະ ເທດເພື່ອນບ້ານເຂົ້າຮ່ວມເປັນຈຳນວນຫຼວງຫຼາຍ.

 

ໂອກາດດັ່ງກ່າວ, ທ່ານ ສີສະຫວາດ ທິຣະວົງ ເຈົ້າຂອງສວນພຸໄທທີລະ ກ່າວລາຍງານໃນການກະກຽມງານບຸນຮ່ວມໃຈມິດພຸໄທໄຂປະຕູເລົ້າຄັ້ງນີ້ວ່າ: ການຈັດງານບຸນຄັ້ງນີ້ເປັນຄັ້ງທີສອງ (ຄັ້ງທີ 1 ແມ່ນເດືອນ 3 ອອກໃໝ່ 3 ຄາໍ່ ປີ 2018) ເພື່ອເປັນການສ້າງຂະບວນການຊຸກຍູ້ ແລະ ສົ່ງເສີມຂະບວນ ການເປີດປີທ່ອງທ່ຽວລາວ ແລະ ປີທ່ອງທ່ຽວ ລາວ-ຈີນ ພ້ອມນັ້ນເພື່ອເປັນການສືບສານຮີດຄອງປະເພນີມູນມໍລະດົກດ້ານວັດທະນະທຳອັນດີງາມຂອງຊາດ ໂດຍສະເພາະແມ່ນຊົນເຜົ່າພຸ ໄທ ແນໃສ່ເປັນການຮັກສາ ເຜີຍ ແຜ່ວັດທະນະທຳອັນດີງາມຂອງຊາວພຸໄທໃຫ້ຄົນຮຸ່ນໃໝ່ ພໍ່ແມ່ປະຊາຊົນພາຍໃນ ແລະ ຊາວຕ່າງປະເທດໄດ້ຮັບຮູ້ ແລະ ເພື່ອເປັນໃບໜ້າໃບຕາອັນໃໝ່ ເປັນສະຖານທີ່ທ່ອງທ່ຽວທາງດ້ານວັດທະນະທຳຂອງຊາວນະຄອນຫຼວງວຽງຈັນ.

 

ສວນພຸໄທທີລະ ສ້າງຂຶ້ນໂດຍໄດ້ຮ່ວມມືກັບບໍລິສັດແມ່ຂອງຊາຍນາສາກົນ ຈຳກັດ (ສປ ຈີນ) ເປັນຜູ້ຈັດຫາແຫຼ່ງ ທຶນມາຮ່ວມໃນການພັດທະນາສວນດັ່ງກ່າວ. ມີເນື້ອທີ່ທັງໝົດ 30 ເຮັກຕາ ທີ່ກຳລັງພັດທະນາ ມາຮອດປັດຈຸບັນແມ່ນສຳເລັດ 70% ແລ້ວ ແລະ ຈະໄດ້ທົດ ລອງເປີດນຳໃຊ້ ຊຶ່ງກຳລັງຢູ່ໃນຂັ້ນຕອນການດຳເນີນເອກະ ສານຈົດທະບຽນເປັນສະຖານ ທີ່ທ່ອງທ່ຽວ. ສຳລັບງານບຸນຮ່ວມໃຈມິດພຸໄທ ແມ່ນໄດ້ມີການຄົບງັນທຸກໆຄືນ ນັບແຕ່ວັນທີ 10-14 ກຸມພາ 2019 ປະກອບມີຫຼາຍກິດຈະກຳເຊັ່ນ: ຊົມສິລະປະຟ້ອນລຳພຸໄທ ຊົມການຮ້ອງເພງ ແລະ ງານວາງສະແດງສິນຄ້າຫັດຖະກຳ ກະສິກຳພື້ນບ້ານ, ທ່ຽວຊົມຕະຫຼາດນັດ, ຊົມການເຮັດອາຫານ, ຊົມກິລາພື້ນບ້ານ ສວນເດັກຫຼິ້ນ ຊົມສວນດອກໄມ້ ທົ່ງນາ ສວນຜັກ ເຮືອນຊົງລາວແບບພຸໄທ ເຄື່ອງໃຊ້ເກົ່າແກ່ແບບບູຮານ ແລະ ອື່ນໆ ສະນັ້ນ ຂໍເຊີນຊວນພໍ່ແມ່ປະ ຊາຊົນຊາວນະຄອນຫຼວງວຽງຈັນ ແຂກທັງພາຍໃນ ແລະ ຕ່າງປະເທດ ພ້ອມກັນເຂົ້າມາທ່ຽວຊົມງານບຸນດັ່ງກ່າວເພື່ອເປັນການສຶກສາ ແລະ ຮຽນຮູ້ວັດທະນະທໍາ ແລະ ວິຖີການດໍາລົງຊີວິດຂອງຊົນເຜົ່າພຸໄທ ໂດຍສະເພາະແມ່ນການນຸ່ງຖື ການໃຊ້ພາສາປາກເວົ້າ ແລະ ອື່ນໆ ແນໃສ່ເປັນການອະນຸຮັກສາ ແລະ ສືບສານວັດທະນະທໍາຮີດຄອງປະເພນີຂອງເຜົ່າພຸໄທໃຫ້ມີຄວາມຍືນຍົງ. (ພາບ-ຂ່າວ: ນສພ ປະຊາຊົນ)

Be the first to comment

Leave a Reply

Your email address will not be published.


*