ກະຊວງພາຍໃນ ສະຫລຸບການເຄື່ອນໄຫວວຽກງານ ປະຈໍາປີ 2018 ແລະ ທິດທາງແຜນການປີ 2019

ຂປລ. ກະຊວງພາຍໃນ ໄດ້ຈັດກອງປະຊຸມສະຫລຸບການຈັດຕັ້ງປະຕິບັດວຽກງານ ຂະແໜງ ພາຍໃນ ແລະ ການຈັດຕັ້ງປະຕິບັດວຽກງານ 3 ສ້າງ ປະຈໍາປີ 2018 ແລະ ທິດທາງແຜນການປະຈໍາປີ 2019 ຂຶ້ນໃນວັນທີ 12 ກຸມພາ 2019, ໂດຍການເປັນປະທານຂອງ ທ່ານ ຄໍາໝັ້ນ ສູນວິເລີດ ກໍາມະການສູນກາງພັກ ລັດຖະມົນຕີ ກະຊວງພາຍໃນ, ມີບັນດາຮອງເຈົ້າແຂວງ, ຮອງເຈົ້າຄອງນະ ຄອນຫລວງ, ຫົວໜ້າພະແນກພາຍໃນແຂວງ-ນະຄອນຫລວງ ທົ່ວປະເທດ ເຂົ້າຮ່ວມ.

 

ໂອກາດດັ່ງກ່າວ, ທ່ານ ທອງຈັນ ມະນີໄຊ ຮອງລັດຖະມົນຕີ ກະຊວງພາຍໃນ ໄດ້ຂຶ້ນຜ່ານບົດສະຫລຸບການຈັດຕັ້ງປະຕິບັດວຽກງານ ປະຈໍາປີ 2018 ແລະ ທິດທາງແຜນການ ປະຈໍາປີ 2019 ຂອງກະຊວງພາຍໃນ, ໂດຍໄດ້ຍົກໃຫ້ເຫັນຜົນງານແຕ່ລະຂົງເຂດ ເປັນຕົ້ນ ຂົງເຂດການບໍລິຫານລັດ ແລະ ວຽກງານປົກຄອງ ເຫັນວ່າສະພາບກົງຈັກ ການຈັດຕັ້ງຂອງບັນດາກະຊວງ-ອົງການຂັ້ນສູນກາງ ແລະ ທ້ອງຖິ່ນ ມີຄວາມສະຫງົບໂດຍພື້ນຖານ, ມີຄວາມກະທັດຮັດ ແລະ ມີປະສິດທິພາບຫລາຍຂຶ້ນ.ພ້ອມດຽວກັນນັ້ນ, ວຽກງານຄຸ້ມຄອງລັດຖະກອນ ໄດ້ມີການພັດທະນາ ແລະ ຫັນໄປສູ່ການຄຸ້ມຄອງດ້ວຍກົດໝາຍ ແລະ ນຳໃຊ້ເຕັກໂນໂລຊີທີ່ທັນສະໄໝ ເຮັດໃຫ້ການຄິດໄລ່ ແລະ ເບີກຈ່າຍເງິນເດືອນມີຄວາມວ່ອງໄວ່ ຫລຸດຜ່ອນຄວາມຜິດພາດທາງດ້ານຂໍ້ມູນ ສາມາດກວດກາຈໍານວນລັດຖະກອນ ທີ່ມີໜ້າຕົວຈິງ ພະນັກງານ-ລັດຖະກອນ ໄດ້ຮັບການສົ່ງເສີມ ພັດທະນາຄວາມຮູ້, ຄວາມສາມາດ ແລະ ໄດ້ຮັບນະໂຍບາຍຕາມທີ່ໄດ້ລະບຸໄວ້ໃນກົດໝາຍ ແລະ ລະບຽບການ.

 

ໂອກາດດຽວກັນ, ທ່ານ ຄໍາມູນ ວິພົງໄຊ ຮອງລັດຖະມົນຕີ ກະຊວງພາຍໃນ ກໍໄດ້ຂຶ້ນຜ່ານບົດສະຫລຸບຕີລາຄາ ການຈັດຕັ້ງປະຕິບັດວຽກງານ 3 ສ້າງໃນໄລຍະຜ່ານມາ, ເຊິ່ງໂດຍລວມແລ້ວ ພາຍຫລັງສຳເລັດການເຮັດທົດລອງວຽກງານ 3 ສ້າງ ໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ ເຊັ່ນ: ໄດ້ມີການສ້າງຕັ້ງສະພາປະຊາຊົນຂັ້ນແຂວງ, ໄດ້ປັບປຸງລັດຖະທໍາມະນູນ ແລະ ບັນດາກົດໝາຍ ທີ່ເປັນກົດໝາຍພື້ນຖານ ຕິດພັນກັບການແບ່ງຂັ້ນຄຸ້ມຄອງ ກໍຄື ການກຳນົດສິດ, ໜ້າທີ່ ແຕ່ລະຂັ້ນ ເປັນຕົ້ນ ກົດໝາຍວ່າດ້ວຍລັດຖະບານ, ກົດໝາຍວ່າດ້ວຍການປົກຄອງທ້ອງຖິ່ນ, ກົດໝາຍວ່າດ້ວຍພະນັກງານ-ລັດຖະກອນ, ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ ແລະ ບັນດາກະຊວງ ໄດ້ປັບປຸງກົດໝາຍດ້ານວິຊາການຂອງຕົນຕາມທິດ 3 ສ້າງ ສືບຕໍ່ປັບປຸງນິຕິກຳລຸ່ມກົດໝາຍ ເພື່ອຜັນຂະຫຍາຍວຽກງານ 3 ສ້າງ ເຂົ້າສູ່ລວງເລິກ ແລະ ອື່ນໆ. ຂປລ

Be the first to comment

Leave a Reply

Your email address will not be published.


*