ເມືອງສະໝ້ວຍ ແຂວງສາລະວັນ ມີຄອບຄົວພົ້ນທຸກແລ້ວ 1.322 ຄອບຄົວ

ທ່ານ ບຸນນານ ປັນຍາຈັກ ສະມາຊິກສະພາປະຊາຊົນແຂວງສາລະວັນ ເຂດເລືອກຕັ້ງເມືອງສະໝ້ວຍ ແຂວງສາລະວັນ ໄດ້ໃຫ້ສຳພາດຕໍ່ສື່ມວນຊົນພວກເຮົາໃນທ້າຍອາທິດທີ່ຜ່ານມານີ້ວ່າ: ເມືອງສະໝ້ວຍ ແມ່ນເມືອງໜຶ່ງທີ່ນອນໃນເມືອງທຸກຍາກຂອງແຂວງສາລະວັນ.

ທົ່ວເມືອງມີເສດຖະກິດຂະຫຍາຍຕົວຕໍ່ເນື່ອງດີ ແລະ ມີຄວາມໝັ້ນທ່ຽງ, ສາມາດຈັດເກັບລາຍຮັບເຂົ້າງົບປະມານໄດ້ 2,5 ຕື້ກວ່າກີບ ທຽບໃສ່ແຜນການປີປະຕິບັດໄດ້ 89%, ປະຕິບັດລາຍຈ່າຍແມ່ນ 20 ຕື້ກວ່າກີບ ທຽບໃສ່ແຜນການປີ ປະຕິບັດໄດ້ 98%.

 

ດ້ານການລົງທຶນຂອງລັດ ໃນປີ 2018 ມີທັງໝົດ 4 ໂຄງການ ມີມູນຄ່າ 5 ຕື້ກວ່າກີບ ປະຕິບັດໄດ້ 68% ຂອງແຜນການປີ, ການປະຕິບັດໂຄງການລົງທຶນຊ່ວຍເຫຼືອລ້າ, ກູ້ຢືມ, ເອກະຊົນພາຍໃນ ແລະ ຕ່າງປະເທດ ມີທັງໝົດ 22 ໂຄງການ ມູນຄ່າ 5 ລ້ານກວ່າໂດລາສະຫະລັດ.

ນອກຈາກນັ້ນ, ກໍຍັງໄດ້ສົ່ງເສີມປະຊາຊົນດ້ວຍການປູກພືດທີ່ເປັນສິນຄ້າ ເຊັ່ນ: ມັນຕົ້ນ, ກ້ວຍ, ສາລີ ແລະ ເປືອກບົງ ເພື່ອສົ່ງອອກຂາຍພາຍໃນ ແລະ ຕ່າງປະເທດ. ໃນນີ້, ເນື້ອທີ່ການປູກມີທັງໝົດ 3.422 ເຮັກຕາ ຜົນຜະລິດເທົ່າກັບ 17.399 ໂຕນ.

 

ການແກ້ໄຂຄວາມທຸກຍາກຂອງພໍ່ແມ່ປະຊາຊົນຍາມໃດຄະນະພັກ, ຄະນະນຳແຕ່ລະຂັ້ນກໍໄດ້ເອົາໃຈໃສ່ໃນການຊີ້ນຳໆພາໆ ເພື່ອເຮັດໃຫ້ປະຊາຊົນຫຼຸດພົ້ນອອກຈາກ ຄວາມທຸກຍາກເທື່ອລະກ້າວ, ປັດຈຸບັນມີ 22 ບ້ານພົ້ນທຸກ ກວມເອົາ 43% ຂອງຈຳນວນບ້ານທັງໝົດ ແລະ ມີຄອບຄົວພົ້ນທຸກ 1.322 ຄອບຄົວ ກວມເອົາ 45% ຂອງຄອບຄົວທັງໝົດ, ມີບ້ານທີ່ໄດ້ຊົມໃຊ້ໄຟຟ້າມີທັງໝົດ 36 ບ້ານ ມີ 1.154 ຫຼັງຄາເຮືອນ ກວມເອົາ 41% ຂອງຈຳນວນຫຼັງຄາເຮືອນທັງໝົດ.

ສ່ວນທິດທາງຕໍ່ໜ້າແມ່ນສືບຕໍ່ເອົາໃຈພັດທະນາເສດຖະກິດແກ້ໄຂຄວາມທຸກຍາກ, ສຸມໃສ່ໃນການຈັດເກັບລາຍຮັບເຂົ້າງົບປະມານໃຫ້ໄດ້ລື່ນແຜນ, ພ້ອມທັງເອົາໃຈໃສ່ປະຕິບັດແຜນການລົງທຶນໃຫ້ສຳເລັດຕາມແຜນ ໂດຍສົມທົບທຶນຮອນຕ່າງໆເພື່ອປັບປຸງພື້ນຖານໂຄງລ່າງທີ່ຈຳເປັນ, ເປັນຕົ້ນເສັ້ນທາງເຊື່ອມຕໍ່ບ້ານຕໍ່ບ້ານ, ໂຮງຮຽນ, ນໍ້າລິນ, ຊົນລະປະທານ, ໄຟຟ້າ ແລະ ອື່ນໆ ເພື່ອເປັນການແກ້ໄຂຊີວິດການເປັນຢູ່ຂອງພໍ່ແມ່ປະຊາຊົນໃຫ້ດີຂຶ້ນເທື່ອລະກ້າວ.

 

ຂ່າວ – ຮູບ: ສິດຕາ ເພັດວົງສາ (ຫນັງສືພິມເສດຖະກິດການຄ້າ)

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *