ກອງທັບກະບົດຊີເຣຍ ເປີດສາກໂຈມຕີຖານທີ່ໝັ້ນສຸດທ້າຍກຸ່ມ ໄອເອສ

ສຳນັກຂ່າວຕ່າງປະເທດລາຍງານໃນວັນທີ 10 ກຸມພາ 2019 ວ່າ ນັກຮົບກອງກຳລັງປະຊາທິປະໄຕຊີເຣຍ (ເອສດີເອຟ) ກຸ່ມກະບົດຕໍ່ຕ້ານລັດຖະບານຊີເຣຍທີ່ໄດ້ຮັບການສະໜັບສະໜຸນຈາກສະຫະລັດ ເລີ່ມການບຸກໂຈມຕີຖານທີ່ໝັ້ນສຸດທ້າຍຂອງກຸ່ມໄອເອສ ທີ່ຫມູ່ບ້ານ ບາກູຊ ອັລ ຟາການີ ໃນແຂວງເດອີ ເອຊຊໍ ທາງພາກຕາເວັນອອກຂອງຊີເຣຍແລ້ວ

ການໂຈມຕີກຸມໄອຊິສ ຂອງກອງກຳລັງເອສດີເອຟ ຢຸດໄປດົນກ່ວາ 1 ອາທິດ ເພື່ອເປີດທາງໃຫ້ພົນລະເຮືອນຫລາຍຮ້ອຍຄົນໄດ້ອົບພະຍົບອອກຈາກເມືອງ ກ່ອນວັນເສົາທີ 9 ກຸມພາ ກ່ອນກອງກຳລັງ ເອສດີເອຟຈະເລີ່ມການໂຈມຕີເພື່ອຍຶດຄືນພື້ນທີ່ 4 ກິໂລຕາແມັດ ສຸດທ້າຍຄືນຈາກກຸ່ມໄອຊິສ ເຊິ່ງເຊື່ອວ່າມີນັກຮົບປະມານ 500 ຄົນຢູ່ໃນໝູ່ບ້ານ ທີ່ສ່ວນໃຫ່ຍເປັນນັກຮົບທີ່ມີປະສົບການ ແລະຄົນລະດັບຜູ້ບັນຊາການ

ໃນຊ່ວງເຊົ້າຂອງວັນອາທິດ ກອງກຳລັງພັນທະມິດນຳໂດຍສະຫະລັດ ສົ່ງເຮືອບິນຮົບອອກໂຈມຕີທາງອາກາດໃສ່ພື້ນທີ່ທາງຕາເວັນຕົກຂອງໝູ່ບ້ານ ບາກູຊ ອັລ ຟາການີ ຂະນະຜູ້ບັນຊາການກຸ່ມເອສດີເອຟ ບອກກັບຊີເອັນເອັນວ່າ ນັກຮົບຂອງພວກຕົນຜະເຊີນກັບການຕໍ່ຕ້ານຢ່າງໜັກຈາກກຸ່ມໄອຊິສ ເຊິ່ງຕອບໂຕ້ດ້ວຍມິສໄຊຕິດຕາມຄວາມຮ້ອນ ມີນັກຮົບຂອງ ເອສດີເອຟ ເສຍຊີວິດແລ້ວ 2 ຄົນ ແລະບາດເຈັບອີກຈຳນວນໜຶ່ງ

ຜູ້ບັນຊາການຂອງເອສດີເອຟລະບຸອີກວ່າ ນັກຮົບໄອຊິສ ລີ້ຊ່ອນໂຕຢູ່ພາຍໃນໝູ່ບ້ານ ສ້າງເຄືອຂ່າຍອຸໂມງທີ່ເຮັດໃຫ້ພວກເຂົາສາມາດຍ້າຍຈາກເຮືອນຫລັງໜຶ່ງໄປສູ່ເຮືອນອີກຫລັງໜຶ່ງ ໂດຍບໍ່ມີໃຜຮູ້ ເປັນແຜນທີ່ໄອຊິສເຄີຍໃຊ້ຢູ່ເມືອງໂມຊູລ ຂອງອີຣັກ ແລະເມືອງອື່ນໆ ເຊິ່ງເປັນເລື່ອງທີ່ທ້າທາຍຢ່າງແທ້ຈິງ

ທັງນີ້ໃນຍຸກທີ່ໄອຊິສເຮືອງອຳນາດ ພວກເຂົາສາມາດຍຶດຄອງພື້ນທີ່ໃນອີຣັກ ແລະຊີເຣຍມີພື້ນທີ່ກ້ວາງໃຫ່ຍເທົ່າປະເທດໂປຕຸເກສ ມີປະຊາຊົນໃນການປົກຄອງປະມານ 8 ລ້ານຄົນ ກ່ອນຈະຖືກນານາຊາດໂຈມຕີຢ່າງໜັກ ຈົນເຫລືອພຽງແຕ່ເມືອງດຽວເທົ່ານັ້ນ

 

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *