ຊາຍອາຍຸຫຼາຍທີ່ສຸດໃນໂລກ ເສຍຊີວິດແລ້ວ

ສໍານັກຂ່າວຕ່າງປະເທດລາຍງານຈາກນະຄອນໂຕກຽວ ປະເທດຍີ່ປຸ່ນ ເມື່ອວັນທີ່ 20 ມັງກອນ 2019 ວ່າ ທ່ານ ມາຊາໂສະ ໂນນາກະ ເສຍຊີວິດເມື່ອຊ່ວງເຊົ້າຂອງວັນອາທິດ ຂະນະກໍາລັງນອນຫຼັບ ທີ່ເຮືອນພັກໃນເມືອງອາໂຊໂຣະ ເທິງເກາະຮ໊ອກໄກໂດ ນາງ ຢູໂກະ ໂນນາກະ ຫຼານສາວເຜີຍວ່າ ພໍ່ເຖົ້າມາຊາໂສະເສຍຊີວິດຢ່າງສະຫງົບ ຈາກສາເຫດທາງທໍາມະຊາດ
ທ່ານມາຊາໂສະ ໂນນາກະ ເຊິ່ງທາງຄອບຄົວເຮັດທຸລະກິດໂຮງແຮມອາບນໍ້າພຸຮ້ອນມາດົນ 4 ຊົ່ວອາຍຸຄົນ ໄດ້ຮັບການຮັບຮອງຈາກສະຖາບັນສະຖິຕິໂລກ ກິນເນສ ເວິລດ ເຣັກຄອຣດ ເມື່ອເດືອນ ເມສາ 2018 ໃຫ້ເປັນ “ຜູ້ຊາຍອາຍຸຫຼາຍທີ່ສຸດໃນໂລກ” ເທົ່າທີ່ຍັງມີຊີວິດຢູ່ ດ້ວຍອາຍຸ 112 ປີກັບອີກ 259 ວັນ


ທ່ານ ໂນນາກະເກີດເມື່ອວັນທີ່ 25 ກໍລະກົດ 1905 ທີ່ເມືອງອາໂຊໂຣະ ໃນຄອບຄົວຂະໜາດໃຫຍ່ ເອື້ອຍນ້ອງ 8 ຄົນ ເປັນຜູ້ຊາຍ 7 ແລະ ຜູ້ຍິງ 1 ຄົນ ແຕ່ເອື້ອຍນ້ອງເສຍຊີວິດໝົດແລ້ວ ທ່ານ ໂນນາກະ ແຕ່ງງານເມື່ອປີ 1931 ມີບຸດ 5 ຄົນ ພັນລະຍາ ແລະ ບຸດ 3 ຄົນເສຍຊີວິດແລ້ວ ປັດຈຸບັນທຸລະກິດໂຮງແຮມຕົກທອດສູ່ມືຂອງນາງຢູໂກະ ໂນນາກະ ຫຼານສາວ


ຍີ່ປຸ່ນເປັນໜຶ່ງໃນປະເທດທີ່ມີປະຊາກອນມີເກນອາຍຸຢືນຍາວສະເລ່ຍສູງທີ່ສຸດໃນໂລກ ຈາກຂໍ້ມູນຂອງຂອງກະຊວງສາທາລະນະສຸກ ແຮງງານ ແລະ ສະຫວັດດີການສັງຄົມຍີ່ປຸ່ນ ໃນເດືອນກັນຍາ 2018 ຍີ່ປຸ່ນມີປະຊາກອນອາຍຸເກີນ 100 ປີ ລວມທັງຫມົດ 69.785 ຄົນ ເກືອບ 90% ໃນຈໍານວນນີ້ເປັນຜູ້ຍິງ ແລະ ບຸກຄົນອາຍຸຫຼາຍທີ່ສຸດໃນໂລກ ເທົ່າທີ່ມີຊີວິດຢູ່ໃນປັດຈຸບັນຈາກການຮັບຮອງຂອງກິນເນສ ເປັນຊາວຍີ່ປຸ່ນເຊັ່ນ ຄືແມ່ເຖົ້າທວດ ຄາເນະ ແລະ ທານາກະ ຊາວເມືອງຟຸກຸໂອກະ ເທິງເກາະຄິວຊູ ທາງພາກໃຕ້ເຊິ່ງມີອາຍຸ 116 ປີ
ສ່ວນສະຖິຕິບຸກຄົນອາຍຸຢືນຍາວທີ່ສຸດໃນໂລກ ເທົ່າທີ່ເຄີຍມີການບັນທຶກຈົນເຖິງປັດຈຸບັນ ໄດ້ແກ່ນາງ ຈີນ ຫລຸຍ ແຄລມອງ ຊາວຝຣັ່ງ ເຊິ່ງເສຍຊີວິດເມື່ອປີ 2007.

Be the first to comment

Leave a Reply

Your email address will not be published.


*