ທລຍ ຈະນຳໃຊ້ງົບປະມານ 9 ຕື້ກ່ວາກີບເພື່ອຈັດຕັ້ງປະຕິບັດ 44 ໂຄງການ ຢູ່ 3 ເມືອງຂອງແຂວງຜົ້ງສາລີ ໃນປີ 2019

ກອງທຶນຫລຸດຜ່ອນຄວາມທຸກຍາກ ກຳລັງຈັດຕັ້ງປະຕິບັດ 44 ໂຄງການຍ່ອຍ, ມູນຄ່າ 9 ຕື້ກ່ວາກີບຢູ່ 3 ເມືອງເປົ້າໝາຍຂອງແຂວງ ຜົ້ງສາລີ ຄື: ເມືອງ ຂວາ, ເມືອງສຳພັນ ແລະ ເມືອງ ໃໝ່ ປະຈໍາຮອບວຽນທີ 16 ປີ 2019, ກວມ ເອົາ 4 ຂະແໜງການ ຄື: ສຶກສາທິການ 25 ໂຄງການ, ກະສິກຳ 8 ໂຄງການ, ສາທາລະນະສຸກ 7 ໂຄງການ ແລະ ໂຍທາທິການ ແລະ ຂົນສົ່ງ 4 ໂຄງການ, ໂດຍມີບ້ານເປົ້າ ຫມາຍຂອງໂຄງການທັງໝົດ 172 ບ້ານ.


ທ່ານ ຖາວອນ ໄຊຍະບຸດ, ຫົວໜ້າກອງທຶນຫລຸດຜ່ອນຄວາມທຸກຍາກ ແຂວງ ຜົ້ງສາລີ ໃຫ້ຮູ້ວ່າ: ຈຳນວນ ໂຄງການທີ່ຈັດຕັ້ງປະຕິບັດຢູ່ 3 ເມືອງເປົ້າໝາຍຂອງແຂວງ ຜົ້ງສາລີ ໃນຮອບວຽນທີ 16 ແມ່ນເພີ່ມຂຶ້ນ 22 ໂຄງການເມື່ອທຽບໃສ່ຮອບວຽນທີ 15 ປີ 2018 ຜ່ານມາ, ໃນຂະນະທີ່ງົບປະມານຈັດຕັ້ງປະຕິບັດໂຄງການກໍ່ເພີ່ມຂຶ້ນ 1 ຕື້ກ່ວາກີບ ຍ້ອນ ທລຍ ມີງົບປະມານເຫລືອຈາກການປະມູນໂຄງ ການຢູ່ແຂວງຜົ້ງສາລີ ໃນຮອບວຽນທີ 14 ແລະ 15 ຜ່ານມາ 1 ຕື້ກ່ວາກີບ ຈິ່ງເອົາມາລວມໃສ່ຮອບວຽນທີ 16 ເຮັດໃຫ້ມີງົບປະມານໃຊ້ຈ່າຍເພີ່ມຂຶ້ນ ແລະ ເຮັດໃຫ້ຈຳນວນໂຄງ ການກໍ່ເພີ່ມຂຶ້ນເຊັ່ນດຽວກັນ.


ປັດຈຸບັນ, ຫລາຍໂຄງການພວມຢູ່ໃນຂັ້ນຕອນຈັດຊື້ຈັດຈ້າງອຸປະກອນສຳລັບການກໍ່ສ້າງ ແລະ ມີບາງໂຄງການພວມຢູ່ໃນຂັ້ນຕອນເລີ່ມຈັດຕັ້ງປະຕິບັດ, ໂດຍຈະພະຍາຍາມຈັດຕັ້ງປະຕິບັດໃຫ້ສໍາເລັດທຸກໂຄງການພາຍໃນປີນີ້ ເພື່ອປະ ກອບສ່ວນເຮັດໃຫ້ຊີວິດການເປັນຢູ່ຂອງປະຊາຊົນໃນກຸ່ມບ້ານເປົ້າຫມາຍຂອງໂຄງການມີຊີວິດການເປັນຢູ່ດີຂຶ້ນ ແລະ ຫລຸດພົ້ນອອກຈາກຄວາມທຸກຍາກໃຫ້ໄດ້.


ສໍາລັບຮອບວຽນ ທີ 15 ປີ 2018 ຜ່ານມາ, ທລຍ ໄດ້ຈັດຕັ້ງປະຕິບັດໂຄງການຍ່ອຍຢູ່ 3 ເມືອງເປົ້າໝາຍຂອງ ແຂວງ ຜົ້ງສາລີ ຄື: ເມືອງ ຂວາ, ເມືອງສໍາພັນ ແລະ ເມືອງໃໝ່, ລວມທັງໝົດ 22 ໂຄງການ, ມູນຄ່າ 7 ຕື້ກ່ວາກີບ, ກວມເອົາ 4 ຂະແໜງ ຄື: ສຶກສາທິການ ແລະ ໂຍທາທິການ ແລະ ຂົນສົ່ງ, ຂະແໜງລະ 9 ໂຄງການ, ສາທາລະນະສຸກ ແລະ ກະສິກຳ ແລະ ປ່າໄມ້ ຂະແໜງລະ 2 ໂຄງການ. ມາຮອດປັດຈຸບັນ, ໄດ້ຈັດຕັ້ງປະຕິບັດສໍາເລັດ ແລະ ມີການມອບຮັບທຸກໂຄງການ ແລ້ວ.

ຂ່າວ: ບຸນຕຽງ ຈັນທະວົງ (ວທສ)

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *