“ຕົ້ນຫວ້ານຊົນ”ແກ້ອາການບວມ, ໄຄ່ ແລະ ຟົກຊ້ຳຍ້ອນລົ້ມ ຫຼື ຖືກກະທົບ, ໃຊ້ປົວປະດົງ, ໃຊຈອດກະດູກຫັກ, ກະດູກຫຼຸດໂບກ

ບັນຍາຍລັກສະນະພືດສາດ
ພືດລຳຫຍ້າຢືນຕົ້ນ ແລະ ແຜ່ຂະຫຍາຍດ້ວຍຫົວ, ຕົ້ນເປັນສຸມ, ສູງປະມານ 1,50 ແມັດ. ລຳຕົ້ນມີສີຂາວ, ກົມ, ຍາວ 30 ຊັງຕີແມັດ, ຕໍ່ຈາກຫົວໂດຍກົງ, ໃບໃຫຍ່, ຍາວ ແລະ ປົ່ງຕັ້ງຊື່ຈາກລຳຕົ້ນ, ຍາວປະມານ 1,20 ແມັດ, ເນື້ອໃບສີຂຽວ, ຂອບໃບກ້ຽງ, ກ່າງໃບຂະໜານກັນ.

ດອກອອກເປັນພົ້ວ, ຂະໜາດໃຫຍ່, ກ້ານຂອງພົ້ວດອກປົ່ງອອກຈາກລຳຕົ້ນຢູ່ໃນຫຼືບຂອງກາບໃບ, ຍາວ 90–100 ຊັງຕີແມັດ, ມີດອກຈັບຈູ້ມກັນເປັນພົ້ວຢູ່ປາຍ, ມີ 1–2 ພົ້ວຕໍ່ຕົ້ນ, ພົ້ວດອກເມື່ອຍັງຈູມມີໃບຊ້ອນບາງໆສີຂຽວອົມຂາວຫຸ້ມໄວ້, ແມ່ນດອກປະເພດ 3 ແລະ ເປັນດອກທີ່ມີເພດຮ່ວມ.

ກາບດອກ ແລະ ກີບດອກອອກສີຂາວ, ເວລາຈູມກາບດອກ ແລະ ກີບດອກຈະເຕື່ອຍລົງລຸ່ມສັບປົນກັບກ້ານເກສອນຊຶ່ງອອກສີອິດ. ເຕົ້າໄຂ່ມີຮູບກົມ, ຍາວ ແລະ ຈັບລຸ່ມ, ຄໍເຕົ້າໄຂ່ຍາວອອກສີອິດຢູ່ເບື້ອງປາຍ. ໝາກນ້ອຍ, ມີຮູບກົມ, ອອກສີຂຽວ. ຕົ້ນຫວ້ານຊົນມີ 2 ພັນຄື: ພັນດອກສີຂາວ ແລະ ພັນດອກສີມ່ວງ. ສ່ວນພັນດອກສີມ່ວງຈະມີລຳຕົ້ນ, ໃບ ແລະ ດອກໃຫຍ່ກວ່າພັນດອກສີຂາວ.

ບັນຍາຍການນຳໃຊ້
ໃບນຳມາຂາງໄຟໃຊ້ພັນແກ້ອາການບວມ, ໄຄ່ ແລະ ຟົກຊ້ຳຍ້ອນລົ້ມ ຫຼື ຖືກກະທົບ, ໃຊ້ປົວປະດົງ, ໃຊຈອດກະດູກຫັກ, ກະດູກຫຼຸດໂບກ. ຫົວໃຊ້ເປັນຢາຂັບຂີ້ກະເຮີ້, ຫົວໃນປະເທດອິນເດຍໃຊ້ເປັນຢາລະບາຍ.

ຂອບໃຈຂໍ້ມູນຈາກ: ພາເຂົ້າລາວ

Be the first to comment

Leave a Reply

Your email address will not be published.


*