ຄະນະກຳມະການຊາຍແດນຮ່ວມ ລາວ-ຈີນ ຈັດກອງປະຊຸມຄັ້ງທີ XVI ຮ່ວມກັນ:

ໃນລະຫວ່າງວັນທີ 7-9 ມັງກອນ 2019, ທີ່ເມືອງຊຽງຮຸ່ງ, ແຂວງຢູນນານ, ສປ ຈີນ, ກອງປະຊຸມຄະນະກຳມະການຊາຍແດນຮ່ວມ ລາວ-ຈີນ ຄັ້ງທີ XVI ໄດ້ຖືກຈັດຂຶ້ນຢ່າງເປັນທາງການ.

ຄະນະຜູ້ແທນຝ່າຍລາວ ນໍາໂດຍ ທ່ານ ແພງສະຫວັນ ແກ້ວປະເສີດ, ຫົວໜ້າຫ້ອງການຄະນະກຳມະການຊາຍແດນແຫ່ງຊາດ, ກະຊວງການຕ່າງປະເທດ ແຫ່ງ ສປປ ລາວ, ຫົວໜ້າຄະນະກຳມະການຊາຍແດນ ລາວ-ຈີນ ແລະ ຝ່າຍຈີນ ນໍາໂດຍ ທ່ານ ຫວັງ ເຫວີນລີ້, ຮອງຫົວໜ້າກົມກິດຈະການຊາຍແດນ ແລະ ທະເລ, ກະຊວງການຕ່າງປະເທດ ແຫ່ງ ສປ ຈີນ, ຫົວໜ້າຄະນະກຳມະການຊາຍແດນຮ່ວມ ຈີນ-ລາວ, ໂດຍການເຂົ້າຮ່ວມຂອງບັນດາຜູ້ຕາງໜ້າຈາກພາກສ່ວນກ່ຽວຂ້ອງຂອງສູນກາງ ແລະ ບັນດາແຂວງຂອງລາວທີ່ມີຊາຍແດນຕິດຈອດກັບ ສປຈີນ.

ໃນກອງປະຊຸມ, ສອງຝ່າຍໄດ້ພ້ອມກັນສັງເກດຕີລາຄາຄືນຜົນການຈັດຕັ້ງປະຕິບັດເນື້ອໃນບົດບັນທຶກຂອງກອງປະຊຸມຄະນະກຳມະການຊາຍແດນຮ່ວມ ລາວ-ຈີນ ຄັ້ງທີ XV ໃນໄລຍະຜ່ານມາ, ເຊິ່ງເຫັນວ່າ: ສະພາບການຢູ່ຕາມບໍລິເວນຊາຍແດນລະຫວ່າງສອງປະເທດ ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍດີ, ກໍາລັງປ້ອງກັນຊາດປ້ອງກັນຄວາມສະຫງົບຂອງສອງປະເທດໄດ້ຮ່ວມກັນກວດກາລາດຕະເວນຊາຍ ແດນ ແລະ ກວດກາຫຼັກໝາຍຊາຍແດນຢ່າງເປັນປົກກະຕິ, ສະພາບປະກົດການຫຍໍ້ທໍ້ທີ່ເກີດຂຶ້ນ ກໍ່ໄດ້ຮັບການແກ້ໄຂຢ່າງທັນການ, ເຈົ້າໜ້າທີ່ທີ່ກ່ຽວຂ້ອງຂອງສຸນກາງ ແລະ ທ້ອງຖິ່ນຂອງທັງສອງປະເທດ ໄດ້ມີການພົບປະ ແລະ ປະສານສົມທົບກັນຢ່າງເປັນປົກກະຕິ; ນອກຈາກນີ້, ສອງຝ່າຍ ຍັງໄດ້ດຳເນີນການສຶກສາອົບຮົມປະຊາຊົນທີ່ອາໄສຢູ່ຕາມບໍລິເວນຊາຍແດນຂອງສອງປະເທດໃຫ້ເຄົາລົບນັບຖື “ສັນຍາວ່າດ້ວຍລະບຽບການຄຸ້ມຄອງຊາຍແດນ ແລະ ດ່ານຊາຍແດນ”ທີ່ສອງຝ່າຍໄດ້ຮັບຮອງເອົາແລ້ວ.


ຄຽງຄູ່ກັນນີ້, ເພື່ອ​ແນ​ໃສ່​ເຮັດ​ໃຫ້​ວຽກງານການຮ່ວມມື ແລະ ຄຸ້ມຄອງຊາຍແດນລະຫວ່າງສອງປະເທດ​ໃຫ້​ມີ​ປະສິດທິ​ພາບກ່ວາເກົ່າ, ສອງຝ່າຍໄດ້ເຫັນດີເປັນເອກະພາບກັນວາງທິດທາງແຜນການເຄື່ອນໄຫວໃນປີ 2019 ໂດຍຈະຕ້ອງໄດ້ເພີ່ມທະວີ​ເອົາ​ໃຈ​ໃສ່​​ໃນ​ການແລກປ່ຽນຂໍ້ມູນຂ່າວສານ, ເຜີຍແຜ່ໂຄສະນາ ແລະ ສຶກສາອົບຮົມບັນດານິຕິກຳ ກ່ຽວກັບການຄຸ້ມຄອງຊາຍແດນ ແລະ ຫຼັກໝາຍຊາຍແດນ ກໍ່ຄື ບັນດາສັນຍາ, ອະນຸສັນຍາ ໃຫ້ແກ່ເຈົ້າໜ້າທີ່ ແລະ ປະຊາຊົນທີ່ຢູ່ຕາມບໍລິເວນຊາຍແດນ; ພ້ອມນີ້ ກໍ່ຮ່ວມກັນສະກັດກັ້ນການລັກລອບຂ້າມຊາຍແດນຜິດ​ກົດໝາຍ, ການຕັດໄມ້ທໍາລາຍປ່າ, ການຄ້າຂາຍເຖື່ອນ, ການຄ້າມະນຸດ ແລະ ປະກົດການຫຍໍ້ທໍ້ອື່ນໆທີ່ເກີດຂຶ້ນຕາມບໍລິເວນຊາຍແດນ, ທັງນີ້ກໍ່ແນໃສ່ເພື່ອປົກປັກຮັກສາຄວາມສະຫງົບສຸກ ແລະ ຄວາມເປັນລະບຽບຮຽບຮ້ອຍໃນການເຄື່ອນໄຫວດຳລົງຊີວິດຂອງປະຊາຊົນທີ່ອາໃສຢູ່ຕາມບໍລິເວນຊາຍແດນຂອງສອງປະເທດ ໃຫ້ສະດວກ​ສະບາຍ​ຍິ່ງໆຂຶ້ນ.
ຂ່າວ:ພາບ: ກົມຂ່າວ ກະຊວງການຕ່າງປະເທດ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *